‘Peelehi mávapepa peservise’

1. Javyʼa añete hag̃ua, ¿mbaʼépa jajapo vaʼerã ha mbaʼérepa? (Isaías 48:​17, 18).

ÑANDE Ru yvagapegua ñanderayhueterei ha oipota javyʼa koʼág̃ama voi ha amo gotyove avei (Ecl. 3:​12, 13). Haʼe ñandeapo vaʼekue ikatu hag̃uáicha jajapo heta mbaʼe ndaijojaháiva. Upéicharõ jepe nañandeapói jadirihikuaa hag̃ua ñande rekove ñandejehegui reínte, ni jadesidi hag̃ua ñandénte mbaʼépa oĩ porã ha mbaʼépa oĩ vai (Ecl. 8:9; Jer. 10:23). Ñandejára oikuaa javyʼa añete hag̃ua jaservi ha ñaneñeʼẽrendu vaʼerãha chupe (elee Isaías 48:​17, 18).

2. ¿Mbaʼépa Satanás ogueroviakase ñandéve, péro mbaʼépa Jehová ojapo ohechauka hag̃ua haʼe ijapuha?

² Satanás ogueroviakase ñandéve javyʼataha Jehová reheʼỹ, avei oipota ñapensa la umanokuéra osẽ porãtaha odesidíramo ijehegui reínte mbaʼépa oĩ porã ha mbaʼépa oĩ vai (Gén. 3:​4, 5). Jehová ohechauka hag̃ua Satanás ijapuha oheja yvyporakuérape oñegoverna ijupe peteĩ tiémpore. Koʼág̃a natekotevẽi jaha puku jahecha hag̃ua la umanokuéra osẽ vaietereiha odesidi haguére ijeheguínte mbaʼépa oĩ porã ha oĩ vai. La Bíbliape katu jatopa hetaiterei ehémplo ohechaukáva ovyʼaiterei hague umi odesidi vaʼekue oservi Jehovápe. Pe ehémplo iporãvéva haʼe hína Jesús. Jahechamína mbaʼe mbaʼérepa haʼe oelehi vaʼekue oservi Jehovápe. Upéi jahecháta mbaʼérepa ñande Ru yvagapegua omerese jaadora chupe, ha ipahaitépe ñaanalisáta mbaʼérepa ñande jaelehíma jaservi Jehovápe.

¿MBAʼÉREPA JESÚS OELEHI VAʼEKUE OSERVI JEHOVÁPE?

3. ¿Mbaʼépa Satanás oofrese vaʼekue Jesúspe ha mbaʼépa Jesús odesidi ojapo?

³ Jesús oĩrõ guare ko yvy ape ári tekotevẽ vaʼekue odesidi mávapepa oservíta. Ojevautisa riremi, Satanás oofrese vaʼekue chupe entéro umi goviérno oĩva ko yvy ape ári, péro upearã Jesús oadora vaʼerã Satanáspe una ves jepe raʼe. ¿Mbaʼépa ojapo vaʼekue Jesús? Haʼe heʼi Satanáspe: “¡Tereho koʼágui Satanás! Ñandejára Ñeʼẽme heʼi: ‘Ñandejára Jehovápe readora vaʼerã ha chupe añoite reservi vaʼerã’” (Mat. 4:​8-10). Jahechamína mbaʼe mbaʼérepa Jesús odesidi vaʼekue ojapo upéva.

4, 5. ¿Mbaʼe mbaʼérepa Jesús oelehi vaʼekue oservi Jehovápe?

⁴ Primeroite voi ikatu jaʼe Jesús oelehi hague oservi Jehovápe ohayhúgui chupe. Haʼe ningo ohayhu voi Itúape ipyʼaite guive (Juan 14:31). Avei Jesús odesidi oservi Jehovápe oikuaágui upéva oĩ porãha (Juan 8:​28, 29; Apoc. 4:11). Jesús oikuaa Jehová haʼeha ñande Apohare, ikatuha jajerovia hese ha haʼe omeʼẽha ñandéve entéro mbaʼe iporãva (Sal. 33:4; 36:9; Sant. 1:17). Jehová siémpre heʼi la verda Jesúspe ha entéro mbaʼe haʼe orekóva, Itúa omeʼẽ chupe (Juan 1:14). Satanás katu idiferentete voi, ikáusare ñande japeka ha ñamano. Haʼe ijapu, itaryrýi ha opensa ijehénte (Juan 8:44). Jesús oikuaa porãiterei vaʼekue Jehovápe ha avei Satanáspe, upévare ni mbaʼevéicharõ ndojoguaséi Satanáspe ha noñemoĩséi Jehová kóntrape (Filip. 2:​5-8).

⁵ ¿Mbaʼérepa avei Jesús odesidi oservi Jehovápe? Pórke Jesús oikuaa ojehupytytaha heta mbaʼe porã haʼe ojapóramo upéva (Heb. 12:2). Jesús oikuaa vaʼekue haʼe osegíramo ifiél oñemopotĩtaha Itúa réra ha ikatutaha opa pe pekádo ha ñemano omoñepyrũ vaʼekue Satanás.

¿MBAʼÉREPA JEHOVÁ OMERESE JAADORA CHUPE?

6, 7. ¿Mbaʼérepa heta hénte ndoservíri Jehovápe koʼág̃arupi, péro mbaʼérepa jaadora vaʼerã chupe añoiténte?

⁶ Heta hénte koʼág̃arupi ndoadorái Jehovápe pórke ndoikuaái umi kualida porãite haʼe orekóva ha umi mbaʼe haʼe ojapóva hesehapekuéra. Upéicha oiko vaʼekue yma umi hénte Atenasguáre. Apóstol Pablo opredika vaʼekue chupekuéra, péro haʼekuéra ndoikuaái vaʼekue Ñandejárape (Hech. 17:​19, 20, 30, 34).

⁷ Pablo heʼi vaʼekue umi hénte Atenasguápe pe Dios verdadéro ‘omeʼẽha enterovépe hekove, pe áire jarrespira hag̃ua ha entéro mbaʼe’. Avei heʼi chupekuéra: “Haʼe rupive ningo jaikove, jakuʼe ha jaexisti”. Ñandejára ningo ñande Apohare ha “haʼe ojapo vaʼekue peteĩ kuimbaʼéguinte entéro nasión”, upévare chupe añoite jaadora vaʼerã (Hech. 17:​25, 26, 28).

8. ¿Mbaʼépa ni mbaʼevéicharõ Jehová ndojapomoʼãi? Emyesakã.

⁸ Jehová ningo ñande Apohare ha Ñandejára ogovernáva opa mbaʼe, upéicha rupi haʼe ikatu kuri oovliga la héntepe oservi hag̃ua chupe. Péro Jehová ndojapomoʼãi upéva ni mbaʼevéicharõ. Upéva rangue haʼe ohechauka ñandéve haʼe oexistiha ha ñanderayhuha káda únope ipyʼaite guive. Jehová oipotaiterei la hénte oiko iñamígoramo pára siémpre (1 Tim. 2:​3, 4). Upévare haʼe ñanembokatupyry ikatu hag̃uáicha ñande ñamboʼe la héntepe Jehová volunta ha ñamombeʼu hag̃ua chupekuéra umi mbaʼe porã haʼe ojapótava enterove rehehápe (Mat. 10:​11-13; 28:​19, 20). Avei Jehová omeʼẽ ñandéve umi kongregasión ikatuhápe jaadora chupe, ha omoĩ umi ansiáno ñanderayhuetévape okuida hag̃ua ñanderehe (Hech. 20:28).

9. ¿Mbaʼéichapa Jehová ohechauka oporohayhuha?

⁹ Oĩ heta hénte ndogueroviáiva Ñandejára oexistiha, upéicharõ jepe Jehová omeʼẽ chupekuéra heta mbaʼe porã ha péicha ohechauka oporohayhuha. Ñapensamína koʼã mbaʼére. Heta áñorema oĩ hetaiterei hénte odesidíva ijeheguíntema mbaʼépa oĩ porã ha oĩ vai ha nopenái la Jehová heʼívare, péro lomímonte mborayhúpe Jehová omeʼẽ chupekuéra la oikotevẽva oikove ha ovyʼa hag̃ua (Mat. 5:​44, 45; Hech. 14:​16, 17). Por ehémplo Jehová opermiti haʼekuéra ovyʼa iñamígo ha ihentekuérandi. Avei koʼã persóna ikatu ifamília, ikatu ombaʼapo ha ovyʼa oikove aja (Sal. 127:3; Ecl. 2:24). Opa koʼã mbaʼe ohechauka ñande Ru yvagapegua ohayhuha entéro persónape (Éx. 34:6). Jahechamína koʼág̃a mbaʼe mbaʼérepa ñande jaelehíma jaservi Jehovápe ha mbaʼéichapa haʼe ñanevendesi upe haguére.

¿MBAʼÉREPA ÑANDE JAELEHI JASERVITAHA JEHOVÁPE?

10. a) ¿Mbaʼérepa primeroite voi jaservise Jehovápe? (Mateo 22:37). b) ¿Mbaʼéichapa Jehová ohechaukáma ipasiensiaha nderehe? (Salmo 103:​13, 14).

¹⁰ Jesús ojapo haguéicha, primeroite voi jaservise Jehovápe jahayhúgui chupe (elee Mateo 22:37). Jaikuaávo umi kualida porãite Jehová orekóva ñañemoag̃uise hese, por ehémplo haʼe ipasiénsia ñanderehe ha ñaneperdona. Yma umi israelita naiñeʼẽrendúirõ guare chupe, Jehová ojerure asy vaʼekue chupekuéra: “Pejevy jeýna pende rape vaígui” (Jer. 18:11). Haʼe oguereko enkuénta ñaneimperfektoha ha “ñande yvynteha” (elee Salmo 103:​13, 14). Epensávo mbaʼeichaitémapa Jehová ipasiénsia nderehe ha neperdona, ¿nanemomýipa upéva reservise hag̃ua chupe pára siémpre?

11. ¿Mbaʼe mbaʼérepa avei jadesidi jaservi ñande Ru yvagapeguápe?

¹¹ Jaservise avei Jehovápe jaikuaágui jajapo vaʼerãha upéva (Mat. 4:10). Avei jaikuaa jaservíramo chupe fiélmente ojehupytytaha heta mbaʼe porã. Por ehémplo oñemopotĩ Jehová réra, ojehechauka Satanás ijapuha ha ñambovyʼa ñande Ru yvagapeguápe. Hiʼarive jaelehíramo koʼág̃a jaservitaha Jehovápe, ¡ikatu hína jaservi chupe pára siémpre! (Juan 17:3).

12, 13. ¿Mbaʼépa ñanemboʼe Jeni ha Pame ehémplo?

¹² Ñanemitãramo jepe ikatúma hína jaju jahayhueterei Jehovápe ha la ñañandúva hese ikatu imbareteve ohóvo amedída ke jakakuaa. Jahechamína Jeni ha Pame ehémplo.a Haʼekuéra ningo oñoermána ha oñepyrũ vaʼekue ostudia hikuái la Biblia Jeni orekórõ guare 11 áño ha Pame katu 10 áño. Ituakuéra ndostudiaséiramo jepe la Biblia, omeʼẽ hikuái permíso Jeni ha Pámepe ostudia hag̃ua Testigokuérandi, péro upearã oho vaʼerã hikuái tupaópe ituakuérandi fin de semanakue. Jeni heʼi: “Umi mbaʼe aaprende vaʼekue la Bíbliape Testigokuérandi tuicha chepytyvõ aaguanta hag̃ua koléhiope pono cherekovai ni ajedroga, ojapo haguéicha la majoría che kompañerokuéra”.

¹³ Ohasa rire unos kuánto áño Jeni ha Pame oñepyrũ oservi de puvlikadóra. Kon el tiémpo oiko chuguikuéra prekursóra ha okuida ituakuéra ijedávare. Jeni imanduʼávo la ohasa vaʼekuére hikuái heʼi: “Aaprende Jehová siémpre okuidaha iñamigokuérare, heʼiháicha voi 2 Timoteo 2:19: ‘Jehová oikuaa umi imbaʼévape’”. Jahechaháicha entéro umi odesidíva ohayhu ha oservitaha Jehovápe, ikatu oĩ segúro Jehová siémpre oñangarekotaha hesekuéra.

14. ¿Mbaʼéichapa ikatu ñadefende Jehovápe? (Ehecha pe taʼanga).

¹⁴ Ñande ñaipytyvõse oñemopotĩ hag̃ua Jehová réra. Ñapensamína ko ehémplore. Ñamoĩ chupe erekoha peteĩ ne amigoite imbaʼeporãva, ipojeráva ha oporoperdonáva. Peteĩ día ehendu álgien oñeʼẽ vaiha ne amígo kóntrape ha heʼi hese iñaña ha ijapuha. ¿Mbaʼépa nde rejapóne? Katuete ningo redefendéta ne amígope. Péicha avei, ñahendu jave ojeʼeha heta japu Jehová kóntrape ha oĩha oñeʼẽ vaíva hese, ñande ñadefendese Jehovápe ha jaʼe umi héntepe la verda (Sal. 34:1; Is. 43:10). Umi mbaʼe jaʼéva ha jajapóva rupive jahechauka jahayhu ha jaservitaha Jehovápe.

15. ¿Mbaʼe iporãva ohupyty apóstol Pablo ojapo rupi heta kámbio? (Filipenses 3:​7, 8).

¹⁵ Ñande vyʼápe jajapo umi kámbio tekotevẽva Jehová ñandeguerohory hag̃ua térã jajapove hag̃ua iservísiope. Por ehémplo ñanemanduʼamína apóstol Páblore. Haʼe ou vaʼekue iñimportánte umi judiokuéra rrelihiónpe, péro upéi haʼe oheja entéro mbaʼe omoirũ hag̃ua Crístope ha oservi hag̃ua Jehovápe (Gál. 1:14). Odesidi rupi upéicha, Pablo ohasa heta mbaʼe ndaijojaháiva Jehová servísiope ha oñemeʼẽ chupe la oportunida ogovernávo yvágape Cristo ndive. Pablo núnka nombyasýi vaʼekue la ojapóva oservi hag̃ua Jehovápe, ha ñande avei núnka nañambyasymoʼãi (elee Filipenses 3:​7, 8).

16. ¿Mbaʼépa ñanemboʼe Julia experiénsia? (Ehecha pe taʼanga).

¹⁶ Ñamotenonde memérõ Jehová servísio, haʼe ñanevendesíta koʼág̃ama voi ha amo gotyove. Jahechamína la ohasa vaʼekue peteĩ ermána hérava Julia. Haʼe michĩ guive opurahéi peteĩ kórope tupaópe. Upe rire peteĩ kantánte profesionál ohechakuaa Julia opurahéi porãitereiha ha oñepyrũ omboʼe chupe. Ensegídama voi Julia ou ifamósa ha oñepyrũ opurahéi heta lugár ikonosidoitereívape. Upéi ostudia músika peteĩ lugár iñimportántevape ha peteĩ ikompañéro oñepyrũ oñeʼẽ chupe Ñandejárare ha oexplika chupe Ñandejára heraha Jehová. Upe riremínte Julia ostudiáma la Biblia 2 vése por semána. Kon el tiémpo haʼe odesidi omotenondetaha Jehová servísio oiko rangue ojededikapaite pe músikape, péro upéva ndahaʼéi kuri la ifasilpáva Júliape g̃uarã. Haʼe heʼi: “Heta hénte heʼi vaʼekue chetavyha adesidi haguére aservi Jehovápe aiko rangue apurahéi, péro che amotenondese vaʼekue Jehová servísio”. Ohasáma mas de 30 áño Julia odesidi hague upéva. ¿Mbaʼéichapa haʼe oñeñandu koʼág̃a? Haʼe heʼi: “Avyʼa adesidi haguére aservitaha Jehovápe, ha aikuaa haʼe omeʼẽtaha chéve amo gotyove opa mbaʼe aipotáva” (Sal. 145:16).

JASEGÍKENA JASERVI JEHOVÁPE

17. a) ¿Mbaʼépa ojapo vaʼerã umi hénte ndoservíriva gueteri Jehovápe, ha mbaʼérepa? b) ¿Mbaʼépa oikuaa umi odesidímava oservi Jehovápe koʼág̃a?

¹⁷ Ko múndo aña ningo oñehundi potaitéma. Upévare apóstol Pablo heʼi vaʼekue voi: “Ofalta ‘peteĩ tiémpo mbykymíntema’, ‘pe oúva hína, og̃uahẽta ha ndotardamoʼãi’” (Heb. 10:37). ¿Mbaʼépa heʼise hína upéva? Primeroite voi ohechauka saʼipaitemaha pe tiémpo hembýva umi hénte odesidi hag̃ua oservítapa Jehovápe, upévare ndotardái vaʼerã hikuái oelehíma hag̃ua mbaʼépa ojapóta (1 Cor. 7:29). Ha segundo, oimérõ jadesidíma rakaʼe jaservitaha Ñandejárape, jaikuaa jahasátaramo jepe heta mbaʼe ijetuʼúva, upéva oikotaha ‘peteĩ tiémpo mbykymívarente’.

18. ¿Mbaʼépa Jehová ha Jesús oipota jajapo?

¹⁸ Jesús omokyreʼỹ vaʼekue idisipulokuérape omoirũ hag̃ua chupe, péro ndahaʼéi upévante. Heʼi avei chupekuéra omoirũ meme vaʼerãha chupe (Mat. 16:24). Oimérõ jaservíma Jehovápe heta áñore, aníkena ñañentrega. Jehová oipota jadesidi jasegitaha jaservi chupe. Upearã ningo tekotevẽ ñañehaʼã pórke sapyʼánte ikatu ndahaʼéi la ifasilpáva. Péro jaservíramo Jehovápe jarresivíta heta vendisión ha javyʼáta koʼág̃ama voi ha amo gotyove (Sal. 35:27).

19. ¿Mbaʼépa ñanemboʼe Gerardo experiénsia?

¹⁹ Oĩ heta opensáva oservíramo Jehovápe tekotevẽtaha osakrifika heta mbaʼe ha upévare ndovyʼamoʼãiha. Oimérõ nde nemitã, ¿epensápa ndaikatumoʼãiha redisfruta heta mbaʼe reservíramo Jehovápe? Peteĩ ermáno imitãva hérava Gerardo heʼi: “Añandu vaʼekue ndaikatuiha voi ajediverti ni ajapo heta mbaʼe haʼe haguére testígo de Jehová. Haʼete vaʼekue chéve umi mitãrusu cheavegua ovyʼaitereíva pórke oho fiestahápe, ichíkama térã ohuga umi videohuégo ivioléntova, ha che katu upe aja aha vaʼerã rreunionhápe ha predikasiónpe”. ¿Mbaʼépa ojapo upéi Gerardo opensa rupi upéicha? Haʼe heʼi: “Añepyrũ ajapo umi mbaʼe vai kañyháme, ha un tiémpore ajediverti, péro legálmente ndavyʼái vaʼekue. Upéi añepyrũ apensa umi mbaʼe la Biblia omboʼévare ha mbaʼéichapa ideprovécho ñandéve umíva ha adesidi aservitaha Jehovápe che pyʼaite guive. Upe guive ahecha mbaʼéichapa Jehová okontesta entéro umi che ñemboʼe”.

20. ¿Mbaʼépa jajedesidi vaʼerã jajapotaha?

²⁰ Peteĩ salmísta opurahéi vaʼekue Jehovápe péicha: “Ovyʼa pe persóna nde reiporavóva oñemoag̃ui hag̃ua nderehe, oúva oiko hag̃ua nde róga korapýpe” (Sal. 65:4). Upéicharõ, jajedesidíkena jasegitaha jaservi Jehovápe. Josué heʼi haguéicha yma jaʼékena ñande avei koʼág̃a: “Che ha che família roservíta Jehovápe” (Jos. 24:15).