Núnka nañaiméi ñaneaño

1, 2. a) ¿Mbaʼérepa jaʼekuaa nañaimeiha ñaneaño ñambohovái jave umi provléma? b) ¿Mbaʼépa jahecháta ko artíkulope?

JAREKO jave umi provléma ijetuʼuetereíva ikatu ñañandu ñaĩha peteĩ kaʼaguýpe ñaneaño peteĩ ha ni ndajaikuaaiha moõrupipa ñasẽta. Péro jahasa jave umi provléma ijetuʼúva nañaiméi ñaneaño. Ñande Ru yvagapegua ndahaʼéi ohechánteva umi mbaʼe jahasáva, síno opromete avei ñanepytyvõtaha ñambohovái hag̃ua umíva. Jehová mborayhúpe heʼi káda uno isiérvope: ‘Che roipytyvõta’ (Is. 41:10).

² Ko artíkulope jahecháta Jehová ñanepytyvõha 1) ñandegiávo, 2) omeʼẽvo ñandéve la ñaikotevẽva, 3) ñandeprotehévo ha 4) ñanekonsolávo. Jehová oasegura ñandéve tahaʼe haʼéva la jahasáva ndahesaraimoʼãiha ñandehegui. Haʼe núnka nañanderejamoʼãi, upévare ikatu jaʼe nañaimeiha ñaneaño.

JEHOVÁ ÑANDEGIA

3, 4. ¿Mbaʼéichapa Jehová ñandegia? (Salmo 48:14).

³ (Elee Salmo 48:14). Jehová oikuaa porã ñaikotevẽtereiha haʼe ñandegia pórke ñande ndaikatúi jajapo upéva ñandejeheguínte. Upéicharõ, ¿mbaʼéichapa haʼe ogia koʼág̃a isiervokuérape? Heta hendáicha. Por ehémplo haʼe oipuru Iñeʼẽ ñandegia hag̃ua (Sal. 119:105). Iñeʼẽ rupive Jehová ñanepytyvõ jadesidi porã hag̃ua. Upéicha ikatu jajogua chupe umi mbaʼe jajapóvape ha ñapensa lájape. Avei ñaneñeʼẽrendúvo chupe ikatu javyʼa koʼág̃ama voi ha jareko pe esperánsa jaikovetaha pára siémpre.a Por ehémplo Jehová ñanemboʼe ndovaleiha ñandepyʼaro, ñaneonrrádo vaʼerãha entéro mbaʼépe ha jahayhu vaʼerãha ñande pyʼaite guive umi ótrope. Koʼã kualida tuicha ikatu ñanepytyvõ ñane famíliandi, ñane rembiayhúndi ha ñane amigokuérandi (Sal. 37:8; Heb. 13:18; 1 Ped. 1:22).

⁴ Avei Iñeʼẽme Jehová oheja umi ehémplo ohechaukáva oĩ hague umi ohasáva provléma ijetuʼúva ha avei haʼekuéra oñeñandu hague ñande ñañeñanduháicha (1 Cor. 10:13; Sant. 5:17). Ñande ikatu jalee umi ehémplo ha ñaaprende chuguikuéra. Upéva ikatu ñanepytyvõ mokõi hendáicha. Primero voi jahechakuaa hag̃ua ndahaʼeiha ñandénte la jahasáva umi provléma ijetuʼúva, síno oĩ hague avei umi ohasáva peichagua provlémare ha ikatu hague oaguanta (1 Ped. 5:9). Ha segundo, umi ehémplo rupive jahecha mbaʼéichapa ikatu ñaaguanta umi pruéva ha jasegi javyʼa (Rom. 15:4).

5. ¿Máva mávarepa Jehová ojevale ñandegia hag̃ua?

⁵ Jehová avei ojevale umi ermáno ha ermanakuérare ñandegia hag̃ua.b Por ehémplo umi superintendénte de sirkuíto pyʼỹinte ñandevisita kongregasiónpe ñanemokyreʼỹ hag̃ua. Umi idiskúrso omombarete ñande jerovia ha ñanepytyvõ jasegi hag̃ua ñaĩ unído kongregasiónpe (Hech. 15:40–16:5). Umi ansiáno avei ombaʼapo jejopy kongregasiónpe ñanepytyvõ hag̃ua káda únope voi jasegi hag̃ua ñañemoag̃ui Jehováre (1 Ped. 5:​2, 3). Tuakuéra avei ohekomboʼe ifamíliape ohayhu hag̃ua Jehovápe, odesidi porã hag̃ua ha oreko hag̃ua umi kostúmbre ideprovéchotava chupekuéra (Prov. 22:6). Avei umi ermána ijedavéva omeʼẽ ehémplo porã umi ermána imitãvévape, omokyreʼỹ ha omeʼẽ chupekuéra umi konsého ideprovechoitereíva (Tito 2:​3-5).

6. ¿Mbaʼépa jajapo vaʼerã ideprovécho hag̃ua ñandéve pe gía Jehová omeʼẽva?

⁶ Jehová ningo omeʼẽ ñandéve pe gía ñaikotevẽva jadesidi porã ha javyʼa hag̃ua. ¿Mbaʼéichapa ikatu jahechauka jaagradeseha chupe upéva? Proverbios 3:​5, 6 heʼi: “Rekonfia vaʼerã Jehováre nde pyʼaite guive, ha ani rejerovia umi mbaʼe nde repensávare”. Jajapóvo upéva ‘haʼe ñandegiáta jaha hag̃ua tape porãre’, upéva heʼise Jehová ñanepytyvõtaha ani hag̃ua jaike provlémape síno javyʼa hag̃ua. Ajépa ningo jaagradesete Jehovápe upe haguére. Haʼe ñandekuaa ha ñanderayhueterei rupi omeʼẽ káda únope pe gía oikotevẽva (Sal. 32:8).

JEHOVÁ OMEʼẼ ÑANDÉVE LA ÑAIKOTEVẼVA

7. ¿Mbaʼéichapa avei Jehová ñanepytyvõ? (Filipenses 4:19).

⁷ (Elee Filipenses 4:19). Jehová ndahaʼéi omeʼẽnteva ñandéve umi mbaʼe omombaretétava ñande jerovia, síno avei ñanepytyvõ ñañehaʼã jave ñakonsegi umi mbaʼe ñaikotevẽva, por ehémplo umi hiʼupy, ao térã peteĩ lugár jaiko hag̃ua (Mat. 6:33; 2 Tes. 3:12). Sapyʼánte ningo jajepyʼapýnte voi umi mbaʼe ñaikotevẽvare, péro Jehová ñanemokyreʼỹ ani hag̃ua jajepyʼapy rasa umi mbaʼére (Mat. 6:25). ¿Mbaʼérepa? Pórke ñande Ru Jehová núnka ndohejareimoʼãi isiervokuérape oikotevẽ jave (Mat. 6:8; Heb. 13:5). Upévare ni michĩmi voi ndajadudái haʼe opromete jave omeʼẽtaha ñandéve umi mbaʼe ñaikotevẽva.

8. ¿Mbaʼépa Jehová ojapo vaʼekue David rehehápe?

⁸ Jahechamína mbaʼéichapa Jehová oipytyvõ vaʼekue rréi Davídpe. Heta tiémpore ijetuʼueterei vaʼekue David ndive pórke oiko vaʼekue okañy rréi Saúlgui. Péro Jehová omeʼẽmbaite vaʼekue David ha iñirũnguérape la oikotevẽva oikove hag̃ua. David ojepyʼamongetávo mbaʼéichapa Jehová okuida vaʼekue hese upe tiémpope heʼi: “Che chemitã vaʼekue, ha koʼág̃a katu chetujáma, péro núnka ndahecháiva Ñandejára oheja reíramo peteĩ hembiapo porãvape, ni ifamíliape oikórõ ojerure upérupi hoʼumi vaʼerã” (Sal. 37:25). Provávlemente nde voi rehecháma raʼe mbaʼéichapa Jehová mborayhúpe omeʼẽ isiervokuérape la oikotevẽva ijetuʼu jave.

9. ¿Mbaʼéichapa Jehová koʼág̃a oipytyvõ isiervokuérape oiko jave peteĩ desástre naturál? (Ehecha pe taʼanga).

⁹ Jehová avei oipytyvõ ipuévlope oiko jave umi desástre. Por ehémplo ymave síglo primérope ou vaʼekue peteĩ ñembyahýi guasu. Upérõ umi kristiáno oikóva diferénte paíspe omondo hiʼupy umi ermáno ha ermána oikotevẽvape g̃uarã (Hech. 11:​27-30; Rom. 15:​25, 26). Koʼág̃a avei péicha oñepytyvõ umi ermáno oikotevẽvape. Por ehémplo, oiko jave peteĩ desástre naturál, Jehová mborayhúpe omomýi isiervokuérape omeʼẽ hag̃ua tembiʼu, y, ao ha pohã umi ermáno oĩvape pe lugár oiko haguépe pe desástre. Umi grúpo de konstruksión katu omyatyrõ umi óga ha Salón del Reino. Jehová siervokuéra pyaʼe voi oñehaʼã oipytyvõ ha okonsola la Biblia rupive umi operde vaʼekuépe hóga térã umi ihénte manóvape.c

10, 11. ¿Mbaʼépa ñaaprende Borys ehémplogui?

¹⁰ Jehová avei mborayhúpe omeʼẽ la oikotevẽva umi ndoadoráivape chupe. Upévare jasegi iñehémplo ha jaheka voi oportunida jahechauka hag̃ua ñanembaʼeporãha umi ndoservírivandi Jehovápe (Gál. 6:10). Jajapo jave upéva ikatu hína ñaipytyvõ peteĩ persónape oikuaaseve hag̃ua Jehovápe. Upéva la oiko vaʼekue peteĩ karai héravare Borys. Haʼe ningo ndahaʼéi testígo de Jehová, péro siémpre otrata porã umi iñalúmno haʼévape Testígo ha orrespeta la ogueroviáva hikuái. Pe gérra káusare Borys tekotevẽ vaʼekue osẽ hógagui oho hag̃ua peteĩ lugár isegurovehápe ha upérõ ñane ermanokuéra oipytyvõ kuri chupe. Upe rire ko karai oho konmemorasiónpe. Borys opensávo la umi ermáno ojapo vaʼekuére hesehápe heʼi: “Umi testígo de Jehová ningo ikalida ha imbaʼeporãiterei chendive, upévare che aagradeseterei chupekuéra”.

¹¹ Ñande ikatu avei jasegi ñande Ru yvagapegua ehémplo. Upearã jahechauka vaʼerã jahayhuetereiha umi oikotevẽvape, tahaʼe jepe raʼe ñane ermáno térã avei umi ndahaʼéivape Testígo (Luc. 6:​31, 36). Ikatu hína pe mborayhu jahechaukáva omomýi chupekuéra oikuaaseve hag̃ua Jehovápe ha oñepyrũ hag̃ua oservi chupe (1 Ped. 2:12). Péro haʼekuéra odesidíramo jepe ndoservimoʼãiha Jehovápe, ñande lomímonte javyʼaitereíta pórke heʼiháicha Hechos 20:35: “Javyʼaiteve ñameʼẽvo, ñandéve oñemeʼẽ rangue”.

JEHOVÁ ÑANDEPROTEHE

12. ¿Mbaʼépa Jehová opromete ipuévlo kompletoitépe? (Salmo 91:​1, 2, 14).

¹² (Elee Salmo 91:​1, 2, 14). Koʼág̃a Jehová opromete ñandéve ndohejamoʼãiha mbaʼeve ohundi ñane amista hendive. Jehová núnka ndohejamoʼãi Satanás ojoko ipuévlope, upévare jasegíta jaadora Jehovápe haʼe oipotaháicha (Juan 17:15). ¿Ha mbaʼépa oikóta ou vove ‘pe jehasa asy guasu’? Jehová katuete okumplíta ipromésa. Haʼe osalváta ipuévlope ha ñanepytyvõta jasegi hag̃ua jajerovia mbarete (Apoc. 7:​9, 14).

13. ¿Mbaʼéichapa Jehová ñandeprotehe káda únope?

¹³ ¿Mbaʼéichapa Jehová ñandeprotehe koʼág̃a káda únope? Por ehémplo la Biblia rupive Jehová ñanepytyvõ jaikuaa hag̃ua mbaʼépa iporã ha mbaʼépa ivai (Heb. 5:14). Jajapóvo la Biblia heʼíva ikatu japrotehe ñane amista Jehovándi, ikatu jadesidi porã ha upéicha rupi javyʼa ha ñaneresãive (Sal. 91:4). Jehová omeʼẽ avei ñandéve pe kongregasión, upépe jarresivi pe ajúda ñaikotevẽva jasegi hag̃ua ñandefiél chupe (Is. 32:​1, 2). Umi ermáno ha ermána oĩva kongregasiónpe ohayhueterei Jehovápe ha iñeʼẽrendu chupe. Upévare ñanekyreʼỹvéta jajeheʼa meméramo hesekuéra ha avei ñanepytyvõta ani hag̃ua jajapo umi mbaʼe ivaíva (Prov. 13:20).

14. a) ¿Mbaʼérepa Jehová oheja jahasa umi provléma? b) Ohechaukaháicha Salmo 9:​10, ¿mbaʼéguipa ikatu ñaĩ segúro? (Ehecha pe nóta).

¹⁴ Ymave sapyʼánte Jehová oprotehe vaʼekue isiervokuérape umi mbaʼe ikatúvagui operhudika térã ojukaite voi chupekuéra. Péro Jehová ndahaʼéi oprotehéva upéicha enterovetévape, la Biblia heʼi voi ikatuha ‘ñanderupyty umi desgrásia ñahaʼarõʼỹve jave’ (Ecl. 9:11). Jehová oheja vaʼekue algúno isiervokuérape ojepersegi ha oĩ voi omanóva, pórke upéicha ojehechauka vaʼekue Satanás ijapuha (Job 2:​4-6; Mat. 23:34). Koʼág̃a avei ikatu jaʼe upeichaha. Jehová ndoipeʼáiramo jepe ñandehegui umi provléma, ikatu ñaĩ segúro Jehová ndohejareimoʼãiha umi ohayhúvape chupe (Sal. 9:10).d

JEHOVÁ ÑANEKONSOLA

15. ¿Mbaʼéichapa Jehová ñanekonsola pe ñemboʼe, la Biblia ha ñane ermanokuéra rupive? (2 Corintios 1:​3, 4).

¹⁵ (Elee 2 Corintios 1:​3, 4). Sapyʼánte ikatu ñañeñandu vai, ñañekevranta térã jajepyʼapyeterei. Ikatu oime rehasa hína peteĩ provléma ijetuʼuetereívare ha upévare reñandu reimeha neaño. ¿Péro oĩpa álgien ontendéva umi mbaʼe reñandúva? Oĩ, ha upéva hína Jehová. Haʼe ningo ndahaʼéi ontendénteva la ñañandúva síno avei ñanekonsola jahasa jave opaichagua provlémare. ¿Mbaʼéichapa haʼe ojapo upéva? Ñamombeʼupaite jave chupe la ñañandúva ñane ñemboʼépe, haʼe omeʼẽ ñandéve pe “pyʼaguapy tuichavéva entéro mbaʼe yvyporakuéra ikatúvagui ontende” (Filip. 4:​6, 7). Jehová avei ñanekonsola jalee jave la Biblia. Upépe haʼe heʼi ñandéve mbaʼeichaitépa ñanderayhu, ñanemboʼe mbaʼéichapa ikatu ñanearandu ha omeʼẽ ñandéve esperánsa. Koʼã mbaʼe ningo tuicha ojapo porã ñanderehe. Avei ikatu jarresivi konsuélo ñane rreunionhápe. Upépe ñaaprende heta mbaʼe ñanemokyreʼỹva oĩva la Bíbliape ha ikatu ñaĩ ñane ermáno ha ermanakuéra ñanderayhuetévandi.

16. ¿Mbaʼépa ikatu ñaaprende Nathan ha Priscila ehémplogui?

¹⁶ Jehová ñanekonsola ha ñanemokyreʼỹ la Biblia rupive. Jahechamína Nathan ha Priscila ehémplo ñantende hag̃ua mbaʼéichapa Jehová ojapo upéva. Ko matrimónio oiko Estados Unídospe, ha ojapóma unos kuánto áño haʼekuéra odesidi hague ova peteĩ lugár oĩvehápe nesesida. Nathan heʼi: “Ore roĩ vaʼekue segúro Jehová ovendesitaha umi mbaʼe rojapóva”. Péro haʼekuéra oho rire iñasignasiónpe oñepyrũ hasykatu ha oguereko provléma ekonómiko. Upévare ko matrimónio tekotevẽ vaʼekue oho jey hógape ha hiʼarive osegi hikuái oreko provléma ekonómiko. Nathan heʼi: “Che añeporandu vaʼekue mbaʼérepa Jehová naorepytyvõi vaʼekue ore roimoʼã haguéicha, ore ropensa voi rojapo hague álgo ivaíva mbaʼe”. Kon el tiémpo Nathan ha Priscila ohechakuaa Jehová ndohejareíri hague chupekuéra oikotevẽrõ guare. Nathan heʼi jey: “Ijetuʼúrõ guare orendive, la Biblia oregia ha oremokyreʼỹ ojapoháicha peteĩ amígo iñarandúva. Rojesareko rangue ore provlemakuérare, ropensa meme mbaʼéichapa Jehová orepytyvõ roaguanta hag̃ua. Upévare roĩ segúro Jehová osegitaha oĩ ore ykére amo gotyove”.

17. ¿Mbaʼéichapa ermána Helga orresivi vaʼekue konsuélo? (Ehecha pe taʼanga).

¹⁷ Ñane ermáno ha ermanakuéra ikatu avei ñanekonsola, ¿mbaʼéichapa? Upearã jahechamína ermána Helga ehémplo. Haʼe ningo oiko Hungríape ha heta áñore haʼe ohasa umi provléma ijetuʼuetereívare. Upévare opyta oñekevranta ha oñandu voi ndovaleiha mbaʼeverã. Péro haʼe imanduʼávo umi mbaʼe ohasa vaʼekuére ohechakuaa mbaʼéichapa Jehová okonsola chupe pe kongregasión rupive. Haʼe heʼi: “Jehová ohecha vaʼekue chekangypaitérõ guare akuida haguére che memby hasykatúvare, che traváho káusare ha areko rupi hetave provléma. Péro péicha jave haʼe siémpre chemombarete. Koʼã 30 áño ohasa vaʼekuépe ndaipóri ni peteĩ día ikatuhápe haʼe Jehová nokumplíri hague chendive la ipromésa chekonsolávo ha chemombaretévo. Jehová heta vése chemopuʼã jey umi ermanokuéra heʼíva rupive, pórke haʼekuéra heʼi chéve umi mbaʼe chemokyreʼỹva. Avei hetaiterei vése umi ermáno omondo chéve peteĩ mensáhe, peteĩ kartaʼi térã cheguerohory hikuái aikotevẽve jave”.

18. ¿Mbaʼéichapa ikatu ñakonsola ótrope?

¹⁸ Ñande ikatu jasegi Jehová ehémplo ñakonsolávo ótrope. ¿Mbaʼéichapa ikatu jajapo upéva? Por ehémplo ikatu trankílo porãnte ñahendu ñande rapichápe oñeʼẽ jave ñandéve, jaʼe umi mbaʼe okonsolátava chupe ha ñaipytyvõ pe persónape jajapóvo álgo hesehápe (Prov. 3:27). Ñañehaʼãmbaite vaʼerã ñakonsola entéro umi ohasa asývape, ndoservíriramo jepe hikuái Jehovápe. Por ehémplo peteĩ ñane vesíno ohasa asýramo, hasykatúramo térã oñekevrantáramo ikatu jaha javisita, ñahendu chupe ha ñakompartikuaa hendive peteĩ téxto bíblico omokyreʼỹtava chupe. Jehová ningo haʼe peteĩ Dios omeʼẽva konsuélo. Upévare ñande jasegívo iñehémplo ikatúta ñaipytyvõ ñane ermanokuérape oaguanta hag̃ua umi pruéva. Péro ndahaʼéi upévante, síno avei ikatúta ñaipytyvõ umi ndoservírivape gueteri Jehovápe oñemoag̃ui hag̃ua hese (Mat. 5:16).

JEHOVÁ SIÉMPRE OĨTA ÑANDE YKÉRE

19. ¿Mbaʼépa Jehová ojapo ñanderehehápe, ha mbaʼéichapa ikatu jasegi iñehémplo?

¹⁹ Jehová ojepyʼapyeterei entéro umi ohayhúvare chupe. Haʼe ni núnka nañanderejareimoʼãi jareko jave provléma. Peteĩ túa mborayhúpe okuidaháicha ifamíliare, péicha avei Jehová oñangareko umi ifiélvare chupe. Haʼe ningo ñandegia, omeʼẽ ñandéve la ñaikotevẽva, ñandeprotehe ha ñanekonsola. Ñande ikatu hína jasegi ñande Ru yvagapegua ehémplo ñamokyreʼỹ ha ñaipytyvõvo umi ohasávape umi pruéva ijetuʼúvare. Ko múndope ningo ikatu jareko heta provléma, péro ni michĩmi ndajadudái Jehová oĩtaha ñande ykére. Jehová voi heʼi ñandéve: “Ani rekyhyje pórke che aĩ nde ykére” (Is. 41:10). Ko promésa porãite oasegura ñandéve núnka nañaimeiha ñaneaño.