Pe Mboʼehára Ijojahaʼỹva heta mbaʼéma oremboʼe

CHE TUAKUÉRA EHÉMPLO PORÃ

Áño 1957-pe che tuakuéra ova Itáliagui ha oho oiko Canadápe, peteĩ siuda héravape Kindersley oĩva pe departaménto héravape Saskatchewan. Upe riremíntema haʼekuéra ou vaʼekue oikuaa Jehovápe ha oservi chupe. Ha upéva la iñimportanteve vaʼekue ore famíliape g̃uarã. Chemanduʼa chemitãʼípe heta apredika hague che famíliandi, upévare añembojaruhápe haʼémi vaʼerã guaʼu ajapóma hague che prekursorádo auxiliár arekópe 8 áñonte.

Che tuakuéra imboriahueterei vaʼekue péro naiprovlémai vaʼekue hikuái ojapo hag̃ua sakrifísio Jehová rehehápe, ha péicha omoĩ oréve peteĩ ehémplo iporãitereíva. Por ehémplo áño 1963-pe haʼekuéra ovende heta umi mbaʼe orekomíva ombyaty hag̃ua la pláta roikotevẽva roho hag̃ua peteĩ asambléa internasionálpe ojejapóva Estados Unídospe, pe siuda héravape Pasadena oĩva Califórniape. Áño 1972-pe rova vaʼekue Columbia Británicape, pe siuda héravape Trail oĩva avei Canadápe. Upéva opyta 1.000 kilómetrorupi ore roiko haguégui. Upépe rova vaʼekue ropredika hag̃ua umi hénte oñeʼẽvape italiano. Papa ombaʼapo vaʼekue peteĩ negósio tuichávape, ha upépe oñenkarga pe limpiésa ha mantenimiéntore. Haʼe orrechasa vaʼekue heta oportunida ikatuhápe ogana porãve pórke siémpre osegise vaʼekue omotenonde Jehovápe.

Papa ha mama omoĩ vaʼekue ehémplo porã umi mokõi che ermánape, che ermánope ha chéve, ha aagradeseterei la ojapo vaʼekuére hikuái. Haʼekuéra raẽvete cheprepara vaʼekue Jehová servísiope g̃uarã. Che tuakuéra chemboʼe vaʼekue peteĩ mbaʼe núnka ndacheresaraimoʼãivagui: Ñamotenondéramo pe Rréino, Jehová katuete okuidáta ñanderehe (Mat. 6:33).

AÑEPYRŨ ASERVI DE TIÉMPO KOMPLÉTO

Áño 1980-pe amenda peteĩ ermána iporãvare hérava Debbie. Haʼe ningo ojedesidi vaʼekue ojaposeha hetave mbaʼe Jehovápe g̃uarã. Mokõivévante roñepyrũse vaʼekue roservi de tiémpo kompléto, upévare 3 mése romenda haguépe, Debbie oñepyrũ vaʼekue iprekursorádo. Ohasa rire un áño romenda hague, rova vaʼekue peteĩ kongregasión michĩvape oĩvehápe nesesida, upépe amoirũ Débbiepe amoñepyrũvo che prekursorádo.

Kon el tiémpo roju roñedesanima ha rodesidi rova jeytaha upégui, péro roñeʼẽ raẽ ore superintendénte de sirkuítondi. Haʼe mborayhúpe oñeʼẽ oréve péro isinséro porã avei orendive ha heʼi: “Peẽ ningo napemoĩri hína pende párte pórke pejesarekoiterei umi provlémare. Katuete oĩ hína heta mbaʼe porã pene situasiónpe ha peñehaʼãnte vaʼerã pehechakuaa umíva”. Pe ermáno omeʼẽ vaʼekue oréve pe konsého roikotevẽve jave (Sal. 141:5). Ensegída voi rojapo upe superintendénte heʼíva oréve ha rohecha oĩ hague heta mbaʼe iporãva, por ehémplo heta umi ermáno ha ermána kongregasiónpe ojaposeve vaʼekue Jehová servísiope, umíva apytépe umi imitãva ha umi ermána orekóva iména ndahaʼéiva Testígo. La roaprende vaʼekue upérõ iñimportanteterei vaʼekue: Rohechakuaa siémpre rojesareko vaʼerãha umi mbaʼe iporãvare ha Jehová osolusionataha itiempoitépe oimeraẽ provléma rombohováiva (Miq. 7:7). Upéi rovyʼa jey ha ore situasión omehora.

Upe rire roho vaʼekue ore primera Eskuéla de Prekursórpe ha ore instruktorkuéra oservi vaʼekue ótro paíspe. Haʼekuéra ohechauka oréve fóto iñasignasiónpe guare, omombeʼu oréve umi mbaʼe ijetuʼúva ohasáva ha umi vendisión orresivi vaʼekue. Upéva oremokyreʼỹeterei roservise hag̃ua avei de misionéro, upévare romoĩ vaʼekue upe méta.

Roñepyrũ vaʼekue roñehaʼãmbaite rohupyty hag̃ua ore méta. Upévare 1984-pe rova Quebécpe oñeñeʼẽhápe francés, upéva opyta mas de 4.000 kilómetro Columbia Británicagui. Upépe roaprende vaʼekue peteĩ idióma ha kultúra idiferentetéva. Avei pyʼỹinte oresogue vaʼekue ha upéva ijetuʼu. Un tiémpore peteĩ karai oheja vaʼekue oréve roike ikokuépe rojoʼo ha rombyaty hag̃ua umi pápa hembýva. Debbie ou vaʼekue ivaleterei ojapo hag̃ua heta kláse tembiʼu umi pápagui. Rohasáramo jepe heta mbaʼe ijetuʼúva, roñehaʼãmbaite vaʼekue rosegi hag̃ua rovyʼa ha rohecha vaʼekue mbaʼeichaitépa Jehová okuida orerehe (Sal. 64:10).

Peteĩ día oĩ orerenóiva por teléfono ha roñesorprendeterei voi pórke upérõ roñeinvita roho hag̃ua roservi Betel de Canadápe. Ore ningo romondo vaʼekue ore solisitu roho hag̃ua Eskuéla de Galaádpe, upévare rovyʼa roñeinvita haguére Betélpe péro avei roñembyasyʼi pórke ore rohoseterei Galaádpe. Lomímonte roasepta pe invitasión. Rog̃uahẽrõ guare Betélpe roñeʼẽ ermáno Kenneth Little ndive, haʼe oservi pe komite de sukursálpe. Roaprovecha ha roporandu chupe: “¿Mbaʼe rojapóta roñeinvitárõ roho hag̃ua Galaádpe?”. Haʼe katu heʼi oréve: “Jahecha raẽna oikópa upéva ha upéi jakalkuláta hese”.

Una semána haguépente otokáma oréve rodesidi mbaʼépa rojapóta pórke og̃uahẽ oréve la invitasión roho hag̃ua Galaádpe. Upérõ ermáno Little heʼi oréve: “Tahaʼe haʼéva la pedesidíva, oĩta día pejehápe mbaʼérepa ndapeaseptái raʼe pe ótra asignasión, péro ndaipóri peteĩ asignasión iporãvéva ótrogui pórke Jehová ikatu penevendesi umi mokõi hendápe”. Upémarõ roasepta la invitasión roho hag̃ua Galaádpe ha ohasávo umi áño rohecha mbaʼeichaitépa siérto raʼe la heʼi vaʼekue oréve ermáno Little. Pyʼỹinte la haʼe heʼi vaʼekue roʼe jey umi ermáno tekotevẽ vaʼekuépe odesidi mbaʼe asignasiónpa oaseptáta.

ROSERVI DE MISIONÉRO

Roho vaʼekue pe kláse número 83-pe, ha rovyʼaiterei roĩ haguére umi 24 estudiánte apytépe. Pe eskuéla ojejapo vaʼekue Brooklyn, Nueva Yórkpe abril de 1987-pe. Umi instruktór prinsipál haʼe vaʼekue ermáno Ulysses Glass ha Jack Redford. Pyaʼeterei ohasa umi 5 mése, ha 6 de septiembre de 1987-pe rojegraduáma. Roñeasigna vaʼekue roho hag̃ua Haitípe ha orendive oho avei John ha Marie Goode.

Áño 1962-pe oñemosẽ vaʼekue Haitígui umi misionéro oĩ vaʼekue upépe ha upe guive noñemondovéiva misionéro Haitípe. Tres semána rojegradua rire rohóma roservi Haitípe, peteĩ lugár opytávape umi montañahárupi mombyry pe siudágui. Upépe roĩ vaʼekue peteĩ kongregasión michĩva oĩháme 35 puvlikadór. Ore ningo oremitã ha ndororekói vaʼekue experiénsia, hiʼarive roiko vaʼekue oreaño pe kása misionálpe. Umi hénte upepegua imboriahueterei vaʼekue ha oĩ vaʼekue heta ndoleekuaáiva. Roiko tiémpope upépe umi hénte ou vaʼekue iviolentoiterei pórke oĩ vaʼekue heta provléma polítiko. Heta hénte opuʼã vaʼekue pe goviérnore, oĩ vaʼekue ojapóva protésta ha avei rohasa vaʼekue heta torménta vai.

Ore ningo roaprende vaʼekue heta mbaʼe porã umi ermánogui. Oĩ vaʼekue hetaiterei ohasáva umi provléma ijetuʼúva péro haʼekuéra noñentregái ha osegi vaʼekue ovyʼa. Umi ermáno ha ermána ohayhueterei vaʼekue Jehovápe ha omombaʼe pe predikasión. Por ehémplo peteĩ ermána ijedáva ndoleekuaái vaʼekue, upéicharamo jepe haʼe oikuaa vaʼekue de memória 150 téxto bíblicorupi. Umi provléma oĩva upe lugárpe ohechauka vaʼekue oréve tekotevẽtereiha rosegi ropredika umi notísia porã oñeʼẽva Ñandejára Rréinore pórke upéva añoite ikatu osolusiona umi provléma. Rovyʼaiterei vaʼekue avei rohechávo mbaʼéichapa algúno umi ostudia vaʼekue orendive upéi oservi de prekursór rregulár, prekursór espesiál ha ansiáno.

Roĩrõ guare Haitípe aikuaa vaʼekue peteĩ mitãkariaʼy héravape Trevor. Haʼe ningo peteĩ misionéro mormón ha heta vése roñeʼẽ vaʼekue la Bíbliare oñondive. Unos kuánto áño rire ahaʼãrõʼỹve jave og̃uahẽ chéve peteĩ kárta omondóva chéve haʼe. Upépe Trevor heʼi chéve: “Ajevautisáta hína pe sigiénte asambléape, upéi ahase jey Haitípe aservi hag̃ua de prekursór espesiál. Ahase pe lugár aĩ haguépe de misionéro aĩrõ guare umi mormón rrelihiónpe”. Ha upevaite la ojapo vaʼekue Trevor, haʼe oho oservi upépe heta áñore hembirekóndi.

ROHO EURÓPAPE HA UPÉI ÁFRICAPE

Tiémpo rire oñepermiti vaʼekue Testigokuérape opredikave peteĩ sóna oĩvape Európape ha roñeasigna roho hag̃ua upépe. Áño 1992-pe rog̃uahẽ Eslovéniape, pe siuda héravape Liubliana. Che tuakuéra ningo okakuaa vaʼekue ag̃ui upégui ova mboyve hikuái Itáliape. Pe tiémpo rog̃uahẽ haguépe, pe gérra osegi vaʼekue ojapo sarambi heta lugár oĩvape pe país yma héra vaʼekuépe Yugoslavia. Pe sukursál oĩva Áustriape ha umi ofisína oĩva Croacia ha Sérbiape oñatende vaʼekue Testigokuéra rembiapóre Yugoslavia territóriope, péro upéi káda país oñeindependisáva tekotevẽ vaʼekue oreko peteĩ Betel.

Upévare tekotevẽ vaʼekue roaprende peteĩ kultúra ha peteĩ idióma ipyahúva. Umi ermáno upepegua heʼi jepi iñidiómape: “Jezik je težek”, heʼiséva: “Ore idióma ijetuʼueterei”. Ha ndareíri la heʼi hikuái upéva pórke ijetuʼueterei legálmente. Ore romombaʼeterei vaʼekue mbaʼéichapa umi ermáno ha ermána ensegída oasepta umi kámbio ojapóva ñane organisasión ha rohecha mbaʼéichapa Jehová ovendesi chupekuéra. Upérõ rohecha jey vaʼekue mbaʼéichapa Jehová siémpre mborayhúpe ha itiempoitépe ojapo umi kámbio tekotevẽva. Heta mbaʼe ipyahúva roaprende vaʼekue Eslovéniape ha avei ideprovécho vaʼekue oréve upépe umi mbaʼe roaprendéma vaʼekue voi anteve.

Péro hetave kámbio oñepresentáta gueteri kuri oréve. Áño 2000-pe roñeasigna roho hag̃ua Costa de Marfílpe, oĩva África occidentálpe. Upéi noviembre de 2002-pe oiko rupi peteĩ ñorairõ umi hentekuéra apytépe rosẽmante roho Sierra Leónape. Upépe umi hénte opuʼãmba vaʼekue avei ojuehe ha upe ñorairõ ipuku vaʼekue 11 áño, péro rohórõ guare upe ñorairõ opa ramoite kuri. Ijetuʼu vaʼekue oréve rosẽ roho derrepentete Costa de Marfílgui, péro umi mbaʼe roaprende vaʼekue upépe, koʼág̃a peve orepytyvõ rosegi hag̃ua rovyʼa.

Sierra Leónape oĩ vaʼekue heta hénte oikuaasevéva la Biblia heʼíva ha ropensa meme upévare. Avei rojesareko vaʼekue umi ermáno ha ermána oaguanta vaʼekuére heta áñore upe gérra. Haʼekuéra imboriahueterei péro okompartise vaʼekue la orekomíva. Peteĩ vuéltape, peteĩ ermána omeʼẽse vaʼekue ao Débbiepe, péro Debbie ndojagarraséi primerorã. Pe ermána katu oipotaiterei Debbie ojagarra umi ao ha heʼi chupe: “Pe gérra aja umi ermáno ótro paisgua heta orepytyvõ vaʼekue. Koʼág̃a orehaitéma poipytyvõse”. Upe guive ore avei roñehaʼã rosegi iñehemplokuéra.

Kon el tiémpo roho jey Costa de Marfílpe, péro upéi umi provléma polítiko káusare oĩ jey vaʼekue heta violénsia. Upévare noviembre de 2004-pe rojegueraha upégui elikópterope ha ikatu vaʼekue roraha peteĩ volsónte káda uno. Upe pyhare roke vaʼekue yvýpe peteĩ váse militár francésape, ha al día sigiénte rojegueraha Suízape. Upéi pyharepytérupi rog̃uahẽ Betélpe, upérõ umi ermáno oĩva pe komite de sukursálpe, hembirekokuéra, umi instruktór oĩva pe Eskuéla de Entrenamiénto Ministeriálpe ha hembirekokuéra orerresivi vaʼekue mborayhúpe. Haʼekuéra oreañuã, opreparapáma tembiʼu haku asýva ha omeʼẽ oréve hikuái atyraite chokoláte suizo. Opokoiterei vaʼekue orerehe mbaʼeichaitépa haʼekuéra oreraʼarõ kuri.

Upéi roñeasigna un tiémpore Ghánape ha itrankilomiérõ guare la situasión Costa de Marfílpe, roho jey vaʼekue upépe. Ndaigústoi vaʼekue tekotevẽrõ guare rosẽ ore asignasióngui ha roho ótro ládo un tiémpore, péro umi ermanokuéra imbaʼeporãiterei vaʼekue ha upéva tuicha orepytyvõ roaguanta hag̃ua. Debbie ha che siémpre roʼe Jehová organisasiónpe enterovéva ojoayhunteha voi, ha ore roñehaʼã rosegi hag̃ua romombaʼe upéva. Kon el tiémpo rohechakuaa vaʼekue rohasárõ guare umi situasión ijetuʼúva, roaprende hague avei heta mbaʼe iñimportánteva.

MEDIO ORIÉNTEPE

Áño 2006-pe og̃uahẽ oréve peteĩ kárta pe sentrál mundiálgui ojeʼehápe oréve roñeasignaha roho hag̃ua Medio Oriéntepe. Upévare roikuaa rohasataha heta mbaʼe núnka ndorohasái vaʼekue, ijetuʼutaha sapyʼánte ha roaprende vaʼerãha peteĩ kultúra ha idióma idiferénteva. Upe lugár roho haguépe oĩ vaʼekue heta provléma polítika ha rrelihión káusare, upévare roaprende vaʼekue heta mbaʼe. Pe kongregasiónpe umi ermanokuéra oñeʼẽ vaʼekue diferénte idióma ha rovaloraiterei vaʼekue chupekuéra pórke idiferénteramo jepe hikuái oĩ vaʼekue unído osegi rupi pe gía omeʼẽva Jehová organisasión. Avei romombaʼeterei vaʼekue umi ermánope pórke heta ijapyteguikuéra oaguanta vaʼekue pyʼaguasúpe oñemoĩ mbaretéramo jepe hesekuéra ihénte, ikompañerokuéra koléhio térã eskuelapegua, ikompañerokuéra travahopegua ha ivesinokuéra.

Áño 2012-pe roho vaʼekue pe asambléa espesiál ojejapóvape Israélpe, pe siuda héravape Tel Aviv. Pe Pentekostés áño 33 guive noñembyatýiva upe sónape hetaite oservíva Jehovápe. Legálmente ndaijojahái vaʼekue upe aty guasu.

Umi áño aja, roñemondo vaʼekue rovisita hag̃ua peteĩ país ojeproivihápe Testigokuéra rembiapo. Rogueraha vaʼekue unos kuánto ñane puvlikasionkuéra, ropredika ha roho vaʼekue umi asambléa michĩvape. Opárupi oĩ vaʼekue umi soldádo orekóva árma ha umi puésto de kontról. Péro umi mbovymi ermáno oĩ vaʼekuéndi upépe roñatendeterei vaʼekue la rojapóvare ha upévare roñeñandu vaʼekue trankílo porãnte.

ROHO JEY ÁFRICAPE

Áño 2013-pe rorresivi peteĩ asignasión idiferentetéva. Ojejerure oréve roho hag̃ua roservi Betélpe Cóngope, oĩva pe siuda héravape Kinsasa. Congo ningo peteĩ país tuicha ha iporãva, péro upépe hetáma oiko avei umi gérra ha oĩ hénte imboriahuetereíva. Primerorã ore ropensa roĩmaha preparádo roho hag̃ua upépe pórke roikuaáma voi mbaʼéichapa ojeiko Áfricape, péro oĩ raʼe heta mbaʼe tekotevẽva gueteri roaprende. Por ehémplo heta lugárpe ndaipóri vaʼekue tape javiaha hag̃ua ni puénte, upéicharõ jepe oĩ vaʼekue heta mbaʼe iporãitereíva. Por ehémplo umi ermáno noñentregái ha osegi vaʼekue ovyʼa ohasáramo jepe hikuái heta provléma ekonómiko. Haʼekuéra ikyreʼỹ predikasiónpe ha oñehaʼãmbaite oĩ hag̃ua rreunionhápe ha umi asambléape. Avei rohechakuaa mbaʼeichaitépa Jehová ovendesi pe traváho ojejapóva upe paíspe, upévare oĩ vaʼekue heta hénte oúva oikuaa Jehovápe. Umi áño roservi haguépe Cóngope roaprende vaʼekue heta mbaʼe iñimportantetereíva ha avei upépe roreko heta amígo rohayhuetereíva ore hénte teéicha.

Opakuévo áño 2017 roho jey peteĩ asignasión ipyahúvape Sudáfricape, ha roñepyrũ roservi Betélpe. Núnka noroiméi vaʼekue peteĩ sukursál tuichaitéva peichaguápe ha umi ore asignasión upépe ipyahu avei oréve. Upévare roreko jeýma vaʼekue heta mbaʼe tekotevẽva roaprende, péro avei tuicha orepytyvõ umi mbaʼe roaprendéma vaʼekue voi yma. Romombaʼeterei umi ermáno ha ermána ifiélvape hetaite áñorema ha opokoiterei avei orerehe rohechávo mbaʼéichapa pe família Betel ombaʼapo unído oúramo jepe hikuái diferénte lugárgui ha orekóramo jepe diferénte kultúra ha pire kolór. Ojekuaa porãiterei mbaʼéichapa Jehová ovendesi ipuévlope oĩ hag̃ua pyʼaguapýpe, pórke entéro isiérvo omonde peteĩ aóicha pe kondúkta pyahu ha osegi umi konsého oĩva la Bíbliape.

Koʼã áño ohasa vaʼekuépe Debbie ha che rorresivi heta asignasión igustoitereíva, tekotevẽ vaʼekue rojepokuaa diferénte kultúrare ha roaprende unos kuánto idióma. Sapyʼánte ijetuʼu vaʼekue orendive péro Jehová siémpre ohechauka orerayhuha iñorganisasión ha umi ermanokuéra rupive (Sal. 144:2). Ore rohechakuaa umi mbaʼe roaprendéva roservívo de tiémpo kompléto tuicha orepytyvõha roservi porãve hag̃ua Jehovápe.

Amombaʼeterei mbaʼéichapa chemongakuaa vaʼekue che tuakuéra, avyʼaiterei che rembireko siémpre cheapoja haguére ha avalora umi ehémplo porãite omeʼẽva umi ermáno ha ermána oĩva ko múndo tuichakuére. Che rembireko ha che ropensávo la ore renonderãre roĩ desidído rosegiseha roaprende umi mbaʼe oremboʼeséva pe Mboʼehára Ijojahaʼỹva.