¿Ikatúpa ñanepytyvõ gueteri umi mbaʼe primeroite ñaaprende vaʼekue?

1. ¿Mbaʼéichapa okambia vaʼekue ñande rekove ñañepyrũrõ guare ñaaprende umi enseñánsa oĩva la Bíbliape?

UMI enseñánsa primeroite ñaaprende vaʼekue ñañepyrũrõ guare jastudia la Biblia okambiaite vaʼekue ñande rekove. Por ehémplo ñaaprende rire Ñandejára heraha Jehová ñañepyrũ ñañemoag̃uive hese (Is. 42:8). Jaikuaa ypýrõ guare mbaʼéichapa oĩ umi omano vaʼekue nañapensavéima umi ñane hénte omano vaʼekue ikatuha osufri hína (Ecl. 9:10). Ha jastudiárõ guare Ñandejára oprometeha ojapotaha ko yvýgui peteĩ paraíso, ndajajepyʼapyvéi ñane renonderãre. Upe guive ñaĩma segúro ndajaikovemoʼãiha 70 térã 80 áñorente síno ikatuha jaikove pára siémpre (Sal. 37:29; 90:10).

2. ¿Mbaʼérepa Pedro oipota vaʼekue umi kristiáno ijerovia mbaretéva imanduʼa umi mbaʼe primeroite oaprende vaʼekuére? (2 Pedro 1:​12, 13).

² Núnka nañanderesaráiri vaʼerã iñimportantetereiha umi enseñánsa primeroite ñaaprende vaʼekue la Bíbliagui. Apóstol Pedro oskrivi vaʼekue isegúnda kárta umi kristiáno ‘oĩ hatãvape pe añetegua oaprende vaʼekuépe’ (elee 2 Pedro 1:​12, 13). Upe tiémpope oĩ vaʼekue kongregasiónpe umi mboʼehára japu ha hénte hembiapo vaíva, koʼãva oraha vaise vaʼekue umi ermanokuérape (2 Ped. 2:​1-3). Upévare Pedro omombaretese vaʼekue umi ermáno ha ermánape ikatu hag̃uáicha ojehekýi hikuái umi japu ojeʼévagui. ¿Mbaʼépa ojapo vaʼekue upearã? Pedro omomanduʼa vaʼekue chupekuéra umi enseñánsa oaprendéma vaʼekuére hikuái, umíva oipytyvõta kuri chupekuéra osegi hag̃ua ifiél Jehovápe.

3. ¿Mbaʼérepa entéro kristiáno osegi vaʼerã ojepyʼamongeta umi enseñánsa primeroite oaprende vaʼekuére? Emombeʼu peteĩ ehémplo.

³ Ikatu oime heta áñorema jaservi Jehovápe, upéicharõ jepe ikatu gueteri ñaaprende heta mbaʼe ipyahúva umi enseñánsa primeroite ñaaprende vaʼekuégui. Ñapensamína peteĩ kosinéro ivalévare ha peteĩ oaprendévare hína oñekosinakuaa hag̃ua. Mokõivévante ikatu hína oipuru el mísmo ingrediénte ojapo hag̃ua peteĩ tembiʼu. ¿Péro moõpa oĩ la diferénsia? Pe kosinéro ivaléva orekóma heta experiénsia, ha upévare oikuaáma mbaʼéichapa ikatu oipuru umi ingrediénte heta hendáicha ojapo hag̃ua tembiʼu idiferénteva ha hetereíva. Koʼág̃a ñapensami peteĩ kristiáno are oservímavare Jehovápe ha peteĩ oñepyrũvare ostudia la Biblia. Mokõivévante oikuaa umi enseñánsa primeroite ñaaprendéva la Bíbliagui. ¿Péro moõpa oĩ la diferénsia? Pe kristiáno are oservímava Jehovápe oaprendéma diferénte mbaʼe umi enseñánsagui. ¿Mbaʼérepa? Pórke ojevautisa guive, isituasión ha umi priviléhio orekóva Jehová servísiope ikatu oime heta vésema okambia, upévare umi enseñánsa primeroite oaprende vaʼekue oipytyvõma chupe diferénte hendáicha. ¿Upéicharõ mbaʼéichapa umi enseñánsa primeroite oaprende vaʼekue peteĩ kristiáno ikatu osegi oipytyvõ chupe? Jahechamína mbohapy enseñánsa.

JAIKUAA JEHOVÁ HAʼEHA ÑANDE APOHARE

4. ¿Mbaʼéichapa ñanepytyvõ jaikuaávo Jehová haʼeha ñande Apohare?

⁴ Ñande jaikuaa ko yvy ha entéro mbaʼe oĩva pype ojapo hague ñande Apohare iñarandu ha ipoderosoitéva. La Biblia heʼi voi: “Ñandejára hína pe ojapo vaʼekue entéro mbaʼe” (Heb. 3:4). Péro oĩ hetave mbaʼe ikatúva ñaaprende ko enseñánsagui. Por ehémplo Jehová haʼe rupi ñande Apohare ñandekuaa porãiterei. Ha ndahaʼéi upévante. Avei ojepyʼapy ñanderehe ha oipota la iporãvéva ñandéve g̃uarã. Jaikuaa rupi Jehová haʼeha ñande Apohare tuichaiterei okambia ñande rekove. Ikatu jaʼe upe enseñánsa omeʼẽ hague sentído ñande rekovépe.

5. ¿Mbaʼe enseñánsapa ñanepytyvõ ñaneumílde hag̃ua? (Isaías 45:​9-12).

⁵ Jaikuaa rupi Jehová haʼeha ñande Apohare ñaaprende ñaneumílde vaʼerãha. Por ehémplo peteĩ tiémpore Job heʼi vaʼekue Jehováre unas kuánta kósa ndasiértoiva ha hesarái vaʼekue umi mbaʼe iñimportantevévagui. Job opensa vaʼekue ijehénte ha oñehaʼã ohechauka haʼe heʼíva oĩ porãha. Péro Jehová omomanduʼa chupe mávapa hína pe Todopoderóso ha entéro mbaʼe Apohare (Job 38:​1-4). Upéva oipytyvõ vaʼekue Jóbpe ohechakuaa hag̃ua entéro mbaʼe Ñandejára ojapóva oĩ porãha ha haʼe núnka ndojavyiha mbaʼevépe. Tiémpo rire proféta Isaías oskrivi vaʼekue voi: “Pe ñaiʼũ piko heʼíta pe Alfarérope: ‘¿Mbaʼéiko nde la rejapóva?’” (elee Isaías 45:​9-12).

6. ¿Mbaʼéicha javépa tekotevẽvéntema peteĩ kristiáno ojepyʼamongeta ñande Apohare ipoderóso ha iñaranduha? (Ehecha pe taʼanga).

⁶ Peteĩ kristiáno oservímava Jehovápe heta áñore ikatu hína ou ojeroviaiterei la haʼe opensávare oheka rangue Jehová gía Iñeʼẽme (Job 37:​23, 24). Péro pe kristiáno ojepyʼamongeta memérõ mbaʼeichaitépa ñande Apohare iñarandu ha ipoderóso, ¿mbaʼéichapa upéva ikatu oipytyvõ chupe? (Is. 40:22; 55:​8, 9). Upe enseñánsa ikatu oipytyvõ pe kristiánope osegi hag̃ua iñumílde ha ohechakuaa hag̃ua Jehová opensáva siémpre iñimportanteveha la haʼe opensávagui.

7. ¿Mbaʼépa oipytyvõ vaʼekue peteĩ ermánape oasepta hag̃ua peteĩ kámbio oĩva Jehová organisasiónpe?

⁷ Jahechamína la omombeʼúva peteĩ ermána hérava Rahela oikóva Eslovéniape. Haʼe oñehaʼã vaʼekue opensa meme Jehová haʼeha ñande Apohare. Upéva oipytyvõ chupe oasepta hag̃ua umi kámbio oĩva Jehová organisasiónpe. Pe ermána heʼi: “Sapyʼánte ndahaʼéi la ifasilpáva chéve aasepta hag̃ua umi mbaʼe odesidíva umi ermáno ñandegiáva. Por ehémplo che ahecha vaʼekue pe Infórme 8 omeʼẽva Kuérpo Governánte áño 2023-pe, péro lomímonte ndaroviaséi vaʼekue ahechárõ guare primera ves peteĩ ermáno ivarvapáva ojapoha diskúrso. Upémarõ ajerure Jehovápe tachepytyvõ aasepta hag̃ua upe kámbio”. Rahela ohechakuaa vaʼekue Jehová haʼe rupi ñande Apohare haʼe siémpre oikuaataha mbaʼéichapa ogia porãta iñorganisasiónpe. Ha nde kásope, ¿ijetuʼúpa ndéve sapyʼánte reasepta peteĩ entendimiénto okambiáva térã peteĩ instruksión pyahu? Oimérõ upéicha, eñemotiémpokena epensa hag̃ua mbaʼeichaitépa ñande Apohare iñarandu ha ipoderóso (Rom. 11:​33-36).

JAIKUAA MBAʼÉREPA ÑANDEJÁRA OPERMITI PE SUFRIMIÉNTO

8. ¿Mbaʼéichapa ñanevenefisia jaikuaa haguére mbaʼérepa Ñandejára opermiti oĩ pe sufrimiénto?

⁸ ¿Mbaʼérepa Ñandejára oheja jasufri? Oĩ umi persóna ndoikuaáiva la rrespuésta ha upévare ou ipochy Ñandejárandi térã opensa haʼe ndoexistiriha voi (Prov. 19:3). Péro nde reaprendéma jahasa asyha pe pekádo ha pe imperfeksión káusare ha ndahaʼéi Jehová ojapo rupi álgo ivaíva. Avei reaprendéma Jehová ipasiénsia rupi heta hénte orekomaha la oportunida oikuaávo chupe ha oaprende mbaʼéichapa Jehová koʼẽrõitéma oipeʼáta pe sufrimiénto pára siémpre (2 Ped. 3:​9, 15). Koʼã enseñánsa ñanekonsola ha ñanemoag̃uive Ñandejárare.

9. ¿Mbaʼéicha javépa tekotevẽ ñanemanduʼa mbaʼérepa Jehová oheja jahasa asy?

⁹ Ñande jaikuaa tekotevẽha ñanepasiénsia ñahaʼarõ aja Jehová oipeʼaite pe sufrimiénto. Péro ikatu hína omano peteĩ jahayhúva, jahasa peteĩ mbaʼe ijetuʼúva, oĩ ñandetrata vaíva térã ikatu hína oiko koʼã mbaʼe peteĩ ñane héntere. Péicha jave ikatu jaikuaase mbaʼérepa Jehová ohaʼarõiterei oipeʼaitéma hag̃ua pe sufrimiénto (Hab. 1:​2, 3). Ñañeñandu jave péicha iporãta ñanemanduʼa jeýrõ mbaʼérepa Jehová oheja jahasa asy (Sal. 34:19).a Avei ou porãta ñandéve ñapensa meméramo Jehová voi oipeʼasemaha pe sufrimiénto pára siémpre.

10. ¿Mbaʼépa okonsola vaʼekue peteĩ ermánape omano rire isy?

¹⁰ Jaikuaa rupi mbaʼérepa Ñandejára oheja jahasa asy, ikatu ñanepytyvõ ñaaguanta hag̃ua umi situasión ijetuʼúva. Jahechamína la ohasáva Anne, haʼe ningo oiko peteĩ ísla héravape Mayotte oĩva oséano Índicope. Anne heʼi: “Ojapo unos kuánto áño che sy omano hague chehegui, ha upéva chereja vaʼekue yvýre, péro pyʼỹinte añehaʼã chemanduʼa ndahaʼeiha Jehová káusare la jasufríva. Haʼe ningo oipotaitereíma opa umi mbaʼe ñanembohasa asýva ha omoingovese umi ñane hénte omano vaʼekuépe. Chesorprendeterei mbaʼéichapa ajepyʼamongetávo koʼã mbaʼére tuicha aju jepi chepyʼaguapy”.

11. ¿Mbaʼérepa jasegise japredika?

¹¹ Jaikuaa rupi mbaʼérepa Jehová oheja jasufri, ñanemomýi jasegi hag̃ua japredika. Pedro oexplika vaʼekue Jehová ipasiensiaha pórke oipota umi hénte oñarrepenti ha ojesalva. Heʼi rire upéva Pedro oskrivi vaʼekue: “Peñatende vaʼerã mbaʼeichagua persónapa hína peẽ: peẽ penekondúkta potĩ vaʼerã ha peadora vaʼerã Ñandejárape pende pyʼaite guive” (2 Ped. 3:11). Japredika jave ñande ‘jaadora avei hína Ñandejárape ñande pyʼaite guive’. Ñande ñañehaʼã jajogua Jehovápe, upévare jahayhu la héntepe ha jaipota oiko hikuái Ñandejára múndo pyahúpe. Jehová ipasiénsia rupi omeʼẽ umi hénte oĩvape ñande territóriope peteĩ oportunida oadora hag̃ua chupe. Ñande ningo “Ñandejára ajudánte” ha ñaipytyvõse entéro ikatúvape oikuaa hag̃ua Ñandejárape ou mboyve pe fin. ¡Ajépa tuichaite mbaʼe upe traváho ñandéve g̃uarã! (1 Cor. 3:9).

JAIKUAA JAIKOHA “UMI ÁRA PAHÁPE”

12. Jaikuaávo la Biblia heʼíva umi ára paháre, ¿mbaʼépepa upéva ñanepytyvõ?

¹² La Biblia heʼi porã vaʼekue mbaʼéichapa oñekomportáta umi hénte “umi ára pahápe” (2 Tim. 3:​1-5). Jahechávo mbaʼéichapa la hénte oñekomporta ojekuaa porãiterei la Biblia heʼíva oñekumpliha hína. Ñande jahecha mbaʼéichapa ivaive ohóvo umi mbaʼe ojapóva la hénte, upéva ñanepytyvõ jajeroviave hag̃ua la heʼívare Ñandejára Ñeʼẽ (2 Tim. 3:​13-15).

13. ¿Mbaʼéichapa pe ehémplo Jesús omombeʼu vaʼekue ikatu ñanepytyvõ? (Lucas 12:​15-21).

¹³ Jaikuaa rupi jaikoha umi ára pahápe, ñamotenonde umi mbaʼe iñimportantevéva. Upéva tekotevẽterei jajapo jahechaháicha pe ehémplo Jesús omombeʼu vaʼekuépe jatopáva Lucas 12:​15-21-pe (elee). Pe ehémplope ojeʼe ‘ivyroitereiha’ pe karai ipláta hetáva. ¿Mbaʼérepa? Ndahaʼéi ipláta haguére síno omotenonde haguére umi mbaʼe naiñimportánteiva. Upe karai ‘ombyaty vaʼekue rrikésa ijupe g̃uarã, péro imboriahu vaʼekue Ñandejára renondépe’. Haʼe oipuru vai vaʼekue itiémpo ha péicha tuicha ojavy. ¿Mbaʼérepa? Pórke Ñandejára heʼi vaʼekue pe karaípe: “Ko pyharépe nde remanóta”. ¿Mbaʼéichapa ko ehémplo ikatu ñanepytyvõ koʼág̃arupi? Jaikuaa saʼietereíma ofaltaha ko múndo aña oñehundi hag̃ua, upévare iporã ñañeporandu: “¿Mbaʼépa hína umi mbaʼe ahupytyséva? ¿Ohechaukápa umíva ajesarekoha umi mbaʼe iñimportantevévare? ¿Mbaʼépa amokyreʼỹ che famíliape ohupyty hag̃ua? ¿Aipurúpa hína che mbaretekue, che tiémpo ha umi mbaʼe arekóva ambyaty hag̃ua tesóro chejupe g̃uarã, térã ambyaty hag̃ua tesóro yvágape?”.

14. Ohechaukaháicha Miki experiénsia, ¿mbaʼérepa jajepyʼamongeta vaʼerã mbaʼe tiémpopepa jaiko?

¹⁴ Jajepyʼamongeta vaʼerã mbaʼe tiémpopepa jaiko pórke upéva ñanepytyvõta jadesidi porã hag̃ua. Upéicha ojapo vaʼekue peteĩ ermána hérava Miki. Haʼe heʼi: “Aterminárõ guare che koléhio ahase vaʼekue universidápe asegi hag̃ua peteĩ kúrso ojestudiahápe umi animálpe. Péro avei ajapose vaʼekue pe prekursorádo rregulár ha ahase vaʼekue aservi oĩvehápe nesesida. Upéi unos kuánto ermáno ha ermána ijerovia mbaretéva oñeʼẽ chendive. Haʼekuéra chemokyreʼỹ apensa porã hag̃ua ikatútapa astudia la chegustáva ha ijyképe ajapo che prekursorádo ha upéi ava ótro lugárpe aservi hag̃ua. Koʼã ermáno chemomanduʼa ko múndo aña oñehundi potaitemaha ha pe múndo pyahúpe ikatutaha chegustoitépe astudia umi animálpe pára siémpre. Upémarõ adesidi astudia álgo mbykyvéva ikatu hag̃uáicha aaprende peteĩ profesión. Upéicha rupi akonsegi peteĩ traváho chepytyvõva ajapo hag̃ua che prekursorádo rregulár ha kon el tiémpo ava Ecuadórpe, oĩvehápe nesesida”. Koʼág̃a Miki omoirũ iménape oservíva de superintendénte de sirkuíto upe paíspe.

15. Ohechaukaháicha Santiago ehémplo, ¿mbaʼérepa ndovaléi ñañentrega oĩramo álgien nohenduséiva gueteri umi notísia porã? (Ehecha pe taʼanga).

¹⁵ Aníkena ñañedesanima oimérõ umi hénte primerorã orrechasa umi notísia porã pórke umi hénte ikatu hína okambia. Ñanemanduʼamína Jesús médio ermánore hérava Santiago. Haʼe ohecha vaʼekue Jesúspe okakuaa aja, oiko rire chugui pe Mesías ha ohendu vaʼekue mbaʼeichaitépa Jesús oporomboʼe porã. Upéicharõ jepe heta áñore Santiago nomoirũi vaʼekue Jesúspe. Jesús orresusita rire ae Santiágogui oiko vaʼekue peteĩ disípulo ikyreʼỹva (Juan 7:5; Gál. 2:9).b Upévare aníkena ñañentrega oiméramo jareko gueteri ñane hénte ndohechaukáiva oñeinteresaha la Biblia heʼívare ha jasegíkena ñaipytyvõ chupekuéra. Avei javisita jeýkena umi hénte nohenduséi vaʼekuépe anteve umi notísia porã. Ñanemanduʼa vaʼerã jaikoha umi ára pahápe, upévare japredika vaʼerã japerdeʼỹre tiémpo. Umi mbaʼe jaʼéva koʼág̃a la héntepe ikatu omomýi chupekuéra okambia hag̃ua amo gotyove, oñepyrũ rire jepe pe jehasa asy guasu.c

JEHOVÁ ÑANEMOMANDUʼA UMI MBAʼE PRIMEROITE ÑAAPRENDE VAʼEKUÉRE

16. ¿Mbaʼéichapa nepytyvõ umi informasión nemomanduʼáva umi mbaʼe primeroite reaprende vaʼekuére? (Ehecha pe rrekuádro “Jaipuru umi enseñánsa oĩva la Bíbliape ñaipytyvõ hag̃ua ótrope”).

¹⁶ Oĩ ningo umi persóna núnka nohendúiva gueteri umi enseñánsa primeroite ñaaprendéva la Bíbliagui. Upévare Jehová organisasión oprepara informasión chupekuéra g̃uarãite. Por ehémplo umi diskúrso púvliko ojejapóva káda semána, unos kuánto artíkulo ha vidéo oĩva jw.org-pe ha umi rrevísta púvlika ojejapo espesiálmente umi ndahaʼéivape g̃uarã Testígo. Upéicharamo jepe, koʼã informasión ñanemomanduʼa umi mbaʼe primeroite ñaaprende vaʼekuére ha tuicha ikatu avei ideprovécho ñandéve. Por ehémplo ñanepytyvõ jahayhuve hag̃ua Jehovápe, jajeroviave hag̃ua Iñeʼẽre ha ñamboʼe porãve hag̃ua ótrope la Biblia heʼíva (Sal. 19:7).

17. ¿Mbaʼéicha javépa tekotevẽ ñapensa meme umi enseñánsa primeroite ñaaprende vaʼekuére?

¹⁷ Oimérõ jaservíma Jehovápe heta tiémpore, katuete javyʼaiterei jarresivi jave peteĩ entendimiénto pyahu. Péro avei ñamombaʼeterei umi enseñánsa primeroite ñaaprende vaʼekue la Bíbliagui, umíva ningo ñanepytyvõ vaʼekue ñañepyrũ hag̃ua ñañemoag̃ui Jehováre. Péro jahecháma haguéicha ideprovécho ñandéve koʼág̃a peve. ¿Mbaʼéichapa? Ikatu oime jarresivi peteĩ instruksión Jehová organisasióngui, péro ñapensa la ñande jaʼéva térã jajapo lája peteĩ mbaʼe iporãveha. Oikórõ ñanderehe upéva tekotevẽ ñaneumílde ha ñanemanduʼa ñande Apohare iñaranduetéva ha ipoderosoitéva ogiaha hína iñorganisasión. Avei peteĩ jahayhúva ohasa jave peteĩ pruévare térã oimérõ ñande voi jahasa peteĩ situasión ijetuʼúvare, tekotevẽ ñanepasiénsia ha ñapensa meme mbaʼérepa Jehová oheja la hénte ohasa asy. Ha jadesidíta jave mbaʼéichapa jaipurúta ñane tiémpo térã umi mbaʼe jarekóva, ñapensa meme vaʼerã jaikomaha umi ára pahápe ha ndaikatuiha japerde rei ñane tiémpo. Katuete ningo Jehová enseñánsa osegíta ñanemoarandu ha ñanepytyvõ jasegi hag̃ua jaservi chupe fiélmente.