Jehová orepytyvõ rojepokuaa ha rovyʼa hag̃ua oimehápe

Mats ha Ann-Catrin oho vaʼekue Eskuéla de Galaádpe áño 1979-pe. Kon el tiémpo oñeasigna kuri chupekuéra oservi hag̃ua Irán, Mauricio, Myanmar, Tanzania, Uganda ha Záirepe. Eskuéla de Galaádpe pe instruktór hérava Jack Redford omeʼẽ vaʼekue umi konsého iporãva, umíva oipytyvõ vaʼekue Mats ha Ann-Catrínpe káda ke orresivi peteĩ asignasión ipyahúva. Ko matrimónio ningo orresivíma heta asignasión, ha haʼekuéra voi omombeʼúta ñandéve umi mbaʼe ohasa vaʼekue.

¿Ikatu piko pemombeʼumi oréve mbaʼéichapa peikuaa raʼe pe añetegua?

Mats: Che túa oiko vaʼekue Polóniape pe segunda gérra mundiál aja. Upe tiémpope haʼe ohecha vaʼekue oĩha heta japu pe rrelihión katólikape. Upéicharõ jepe haʼe heʼími vaʼerã: “Pe rrelihión verdadéra oiméne oĩ upérupinte hína”. Kon el tiémpo ahechakuaa vaʼekue upéva siertoha. Peteĩ vuéltape ajogua kuri unos kuánto lívro usádo. Umíva apytépe oĩ vaʼekue peteĩ lívro hovy hérava: La verdad que lleva a vida eterna. Pe lívro réra iñinteresanteterei vaʼekue chéve. Upévare pe pyhare ajogua haguépe pe lívro aleepaitéma voi kompletoite. Upéi pyhareve aĩma kuri segúro atopa hague pe rrelihión verdadéra.

Abril de 1972 guive añepyrũ vaʼekue alee hetave puvlikasión ojapóva umi testígo de Jehová. Upéicha ikatu vaʼekue ambohovái heta porandu areko vaʼekue la Bíbliagui. Peteĩ ehémplope Jesús oñeʼẽ vaʼekue peteĩ komersiánte otopa vaʼekuére peteĩ pérla iporãitereíva. Otopa rire upéva, pe kuimbaʼe ovendepaite la orekomíva ojogua hag̃ua pe pérla iporãitéva. Che ningo añeñandu vaʼekue upe kuimbaʼéicha. Atopa rire pe rrelihión verdadéra aheja heta mbaʼe. Por ehémplo, che ahase vaʼekue universidápe oiko hag̃ua chehegui doktór. Péro ambotapykue vaʼekue upéva aservi hag̃ua Jehovápe (Mat. 13:​45, 46). Upéi ajevautisa vaʼekue pe 10 de diciembre de 1972-pe.

Ohasa rire un áño, che tuakuéra ha che ermáno menór oñepyrũma avei ostudia la Biblia ha ojevautisa. Che añepyrũ vaʼekue aservi de tiémpo kompléto julio de 1973-pe. Che kongregasiónpe oĩ vaʼekue unos kuánto prekursór ikyreʼỹva, umíva apytépe oĩ vaʼekue peteĩ ermána iporã ha ohayhuetereíva Jehovápe. Haʼe hína Ann-Catrin, ore ningo rojegusta ha romenda áño 1975-pe. Upéi 4 áño aja roiko peteĩ siuda héravape Strömsund opytáva Suéciape. Upe lugár ningo iporãiterei ha heta hénte oikuaaseve vaʼekue la Bíbliagui.

Ann-Catrin: Che túa oñepyrũ vaʼekue ostudia la Biblia oho aja universidápe Estocólmope. Che upérõ areko vaʼekue 3 mésente, péro papa cheraháma hendive rreunionhápe ha predikasiónpe. Che sýpe katu ndogustái vaʼekue upéva, ha oñehaʼãmbaite vaʼekue ohechauka hag̃ua testígo de Jehová tuichaiterei ojavyha. Péro amo ipahápe haʼe nokonsegíri upéva, ha kon el tiémpo haʼe ojevautisa avei. Che ajevautisa vaʼekue arekópe 13 áño, ha upéi arekópe 16 áño añepyrũ aservi de prekursóra. Tiémpo rire aha aservi peteĩ siuda héravape Umeå. Upe lugárpe ningo oñekotevẽ vaʼekue hetave puvlikadór rehe, ha che upépe añepyrũ vaʼekue aservi de prekursóra espesiál.

Mats ha che romenda rire roipytyvõ vaʼekue heta persónape oikuaa hag̃ua pe añetegua. Por ehémplo umíva apytépe oĩ vaʼekue peteĩ mitãkuña hérava Maivor, haʼe ningo haʼe vaʼekue deportísta. Péro upéi oheja upéva ikatu hag̃uáicha oservi porãve Jehovápe. Upéi haʼe oservi vaʼekue de prekursóra che ermána menór ndive. Haʼekuéra oho vaʼekue oñondive Galaádpe áño 1984-pe, ha oĩ hikuái de misionéra Ecuadórpe.

¿Mbaʼépa mokõivévape penepytyvõ raʼe pejepokuaa hag̃ua umi kámbiore, ha pesegi hag̃ua pevyʼa pene asignasiónpe?

Mats: Pyʼỹinte roreko vaʼekue asignasión pyahu ha tekotevẽ vaʼekue rova ótro lugárpe. Upévare roñehaʼãmbaite vaʼekue rosegi Jesús ehémplo, koʼýte roñehaʼã oreumílde haʼéicha. Upéva tuicha orepytyvõ vaʼekue rojepokuaa hag̃ua ore asignasiónpe rorresivi jave peteĩ kámbio (Col. 2:​6, 7). Por ehémplo ore roho jave peteĩ lugárpe, norohaʼarõi umi ermáno upepegua ojeadapta orerehe. Upéva rangue ore rojepokuaa hesekuéra ha roñehaʼã rontende ojapo lája hikuái heta mbaʼe, ha mbaʼéicha rupípa ojapo hikuái péicha. Ore rontendeseterei vaʼekue la haʼekuéra opensa lája ha ikultúra. Amáske rosegi Jesús ehémplo, ifasilve oréve rojepokuaa ha rovyʼa hag̃ua pe lugár roñeasignahápe. Upéicha rupi ore roñandu rojoguaha “peteĩ yvyramáta oñeñotỹvape arrójo ykére” (Sal. 1:​2, 3).

Ann-Catrin: Reva jave peteĩ asignasión pyahúpe rejogua peteĩ yvyramáta oñeñotỹ ramóvape. Peichagua yvyramáta oikotevẽ pe kuarahýre okakuaa porã hag̃ua. Ore roʼekuaa Jehová ohesape hague orerehe peteĩ kuarahýicha (Sal. 84:11). Jehová orevendesi omeʼẽvo oréve heta ermáno ha ermána orerayhu ha ijerovia mbaretéva. Por ehémplo, ore kongregasión ningo michĩ vaʼekue ha opyta peteĩ siuda héravape Teherán (Irán). Umi ermáno ha ermána upepegua ningo imbaʼeporã ha ipojeraiterei orendive. La Biblia heʼi yma oĩ hague umi péicha imbaʼeporã vaʼekue, ha umi ermáno ore kongregasionpegua oremomanduʼa umi rreláto bíblicore. Odependérire orerehe, ropytave vaʼerãmoʼã kuri Iránpe. Péro julio de 1980-pe ojeproivi Testigokuéra rembiapo upépe, ha oñemeʼẽ oréve 2 díante rosẽ hag̃ua upégui. Upévare roñeasigna vaʼekue roho hag̃ua roservi Záirepe, upe país opyta Áfricape ha koʼág̃a oñehenói República Democrática del Congo.

Hetaiterei ningo cherasẽ vaʼekue aikuaárõ guare roñeasignaha roservi hag̃ua Áfricape. Che ningo ahendu vaʼekue upépe oĩha heta mbói ha heta mbaʼasy, ha upéva chemongyhyje vaʼekue. Péro peteĩ matrimónio haʼéva ore amigoite oservi vaʼekue Áfricape heta áñore. Haʼekuéra heʼi vaʼekue oréve: “Anína pekyhyje, peẽ ningo neʼĩra gueteri peikuaa África, péro ág̃a peime vove upépe roikuaa porã pevyʼaitereitaha”. ¡Ha upeichaite oiko kuri! Umi ermáno ha ermána upepegua ningo oporohayhukuaaiterei voi. Upéi ohasa pe tiémpo, ha 6 áño upe rire tekotevẽ vaʼekue rosẽ Záiregui pórke ñane rembiapo ojeproivi upépe. Che ningo aiko vaʼekue ajerure Jehovápe ropytamínte hag̃ua Áfricape, ha upépe apuka chejehe pórke apilla tuichaiterei okambia hague la apensáva Áfricare.

Koʼã áño ohasa vaʼekuépe, ¿mbaʼeichagua vendisiónpa perresivi raʼe peservívo Jehovápe?

Mats: Rorresivi vaʼekue heta vendisión, por ehémplo ikatu kuri roikuaa heta misionéro diferénte paispegua ha haʼekuéra ore amigoite. Avei che rembireko ha che, algúno umi asignasiónpe ikatu vaʼekue roreko 20 kúrso bíblicorupi káda uno. ¡Upéva ningo orembovyʼaiterei vaʼekue! Avei ndaikatúi cheresarái mbaʼeichaite pevépa umi ermáno Africapegua imbaʼeporãiterei vaʼekue orendive. Ore ningo roguereko vaʼekue peteĩ kombi, ha rovisita aja umi kongregasión Tanzániape roñestasiona umi ermanokuéra rógape. Haʼekuéra ningo omeʼẽmbaite vaʼekue oréve la roikotevẽva, “ha omeʼẽve voi pe orekóvagui” (2 Cor. 8:3). Ore ningo káda día pyhare rojepokuaa vaʼekue che rembirekóndi roguapy ha romombeʼu ojupe umi mbaʼe rohasa vaʼekue upe díape, ha upépe roagradese Jehovápe okuida haguére orerehe. Káda día ore rojapo upéva ha upe moménto iñimportánte vaʼekue oréve g̃uarã.

Ann-Catrin: Chéve g̃uarã peteĩ vendisión aikuaa heta ermáno ha ermána diferénte paispeguápe. Avei roaprende vaʼekue unos kuánto idióma, por ehémplo francés, persa, luganda ha suajili. Hiʼarive ikatu vaʼekue aikuaa diferénte kultúra. Roipytyvõ vaʼekue avei hetápe oservi porãve hag̃ua Jehovápe. Avei roreko heta amígo ikalidáva ha roservi vaʼekue hendivekuéra vyʼápe peteĩ ñeʼẽme (Sof. 3:9).

Avei heta ikatu vaʼekue rodisfruta Jehová kreasióngui rohechávo umi mbaʼe iporãitereíva. Káda ke roasepta peteĩ asignasión haʼete ku Jehová oreimbitáva peteĩ viaherã ha ohechaukáva oréve pe tape. Haʼe rupive ikatu roaprende hetaiterei mbaʼe orejehegui reínte ndaikatumoʼãiva kuri roikuaa.

¿Mbaʼeichagua situasión ijetuʼúvapa pehasa raʼe, ha mbaʼépa penepytyvõ peaguanta hag̃ua?

Mats: Umi áño ohasa vaʼekuépe orejagarra vaʼekue heta mbaʼasy, umíva apytépe pe malaria. Avei sapyʼánte che rembirekópe tekotevẽ vaʼekue ojeopera de urhénsia. Ore ningo avei rojepyʼapyeterei vaʼekue ore tuakuérare, pórke haʼekuéra ijedáma kuri. Péro roagradeseterei ore famíliape okuida porã haguére ore tuakuérare roĩ aja ore asignasiónpe. Umi ermáno ha ermána oñangareko porãiterei vaʼekue ore tuakuérare. Haʼekuéra ipasiénsia ha okuida voi hesekuéra mborayhu ha vyʼápe (1 Tim. 5:4). Ore ningo roñehaʼã vaʼekue roipytyvõ chupekuéra ikatumiháicha roikóramo jepe mombyry chuguikuéra. Upéicharõ jepe sapyʼánte roñeñandu vai pórke rojapose vaʼekue hetave mbaʼe hesehapekuéra.

Ann-Catrin: Áño 1983-pe roservi aja Záirepe, cherasykatu pórke chejagarra vaʼekue peteĩ mbaʼasy hérava cólera. Pe doktór heʼi vaʼekue voi Mátspe: “¡Enohẽ chupe ko paísgui estedía voi!”. Upévare al día sigiénte rosẽ roho hag̃uáicha Suéciape, péro sólamente peteĩ avión de kárga la ohótava upépe. Peichagua avión normálmente ndorahái umi persónape, péro lomímonte roviaha upe aviónpe.

Mats: Upérõ hetaiterei orerasẽ vaʼekue, pórke ropensa núnka ndaikatumoʼãveimaha roservi de misionéro. Pe doktór ningo heʼi vaʼekue che rembireko ndojerrekuperamoʼãiha, péro ndaupeichaiete kuri pórke Ann-Catrin upéi oñeñandu porã jey. Un áño upe rire, ikatu vaʼekue roho jey roservi Záirepe. Upe vuéltape rohóma kuri roservi peteĩ kongregasión michĩvape oñeñeʼẽhápe suajili, pe siuda héravape Lubumbashi.

Ann-Catrin: Roikórõ guare Lubumbáshipe cheryeguasu, péro la ore veveʼi omano kuri orehegui onase mboyvéma voi. Ore ningo noroplaneái vaʼekue orefamiliataha.Upéicharõ jepe omanórõ guare la ore veveʼi añembyasyeterei vaʼekue. Péro pe ijetuʼuetérõ guare orendive, Jehová omeʼẽ oréve peteĩ rregálo norohaʼarõietéva. Upérõ guare, arakaʼeveʼỹ guaréicha romoñepyrũ hetave kúrso bíblico. Ndohasáiti kuri un áño ha tuichaiterei okakuaa pe kongregasión, 35 puvlikadórnte oĩ vaʼekue péro upéi oĩma 70 puvlikadór. Avei rreunionhápe roĩ vaʼekue jepi éntre 40, péro upéi roĩma éntre 220 persóna. Ore ningo ore rembiapo heta vaʼekue Jehová servísiope, ha tuicha chekonsola ahechávo mbaʼeichaitépa Jehová orevendesi. Upéicharamo jepe, koʼag̃aite peve ropensa ha roñeʼẽ pe ore veveʼi omano vaʼekuére. Múndo pyahúpe ningo Jehová oipeʼaitéta ñane korasõgui umi mbaʼe ñanemoñeñandu vaíva, ha ore rohechasetereíma upéva oñekumpli vove.

Mats: Tiémpo rire, che rembireko ou vaʼekue ikaneʼõiterei ha ikangy. Upe javete avei ojetopa vaʼekue arekoha kánser de kólon. Upévare tekotevẽ vaʼekue ajopera ha upe siruhía tuicha vaʼekue. Péro koʼág̃a aime porãiterei, ha Ann-Catrin oñehaʼã hína ojapo la ikatúva guive Jehová servísiope.

Ore rohechakuaa vaʼekue ndahaʼéi hague orénte la rohasáva umi situasión ijetuʼúvare. Ruándape áño 1994-pe ojejuka vaʼekue hetaiterei héntepe. Upe rire ore roho vaʼekue rovisita umi ore amígo oikóvape umi kámpo de rrefuhiádope. La isituasionkuéra ningo ijetuʼueterei vaʼekue, péro umi ermáno lomímonte osegi vaʼekue ojerovia, oaguanta ha imbaʼeporã. Umi ermáno ehémplo rupive ore rohechakuaa Jehová siémpre oĩtaha ñanepytyvõ hag̃uáicha tahaʼe haʼéva pe situasión jahasáva (Sal. 55:22).

Ann-Catrin: Ore rohasa vaʼekue avei ótra situasión ijetuʼuetereíva. Áño 2007-pe roho vaʼekue Ugándape ojededikárõ guare upépe pe sukursál. Opa rire pe prográma roviaha rohóvo kuri éntre 25, umíva apytépe oĩ vaʼekue misionéro ha betelita. Ore roviaha kuri rog̃uahẽ hag̃ua peteĩ siuda héravape Nairobi, Kéniape. Péro rog̃uahẽ mboyve Kenia frontérape, peteĩ kamión guasu derrepentete osẽ ikarrílgui ha ochoka orerehe defrentete. Pe omaneháva, ha avei 5 ermáno ha ermána upepete voi omano, tardeve peteĩ ermána omano kuri ospitálpe. Hiʼãiterei ningo oréve rohecha jey umi ore amigokuérape (Job 14:​13-15).

Añelastimáramo jepe upe aksidéntepe, kon el tiémpo ajerrekupera jey. Péro Mats, che ha unos kuánto oĩ vaʼekue orendive upe aksidéntepe roreko vaʼekue ansieda. Ore ropyta kuri upéicha pe aksidénte rire, ha upéva orembohasa asyeterei kuri. Che kásope pe ansieda cheataka vaʼekue pyharekue, derrepentete apáymi ha añandu voi ku arekótarõguáicha peteĩ atáke che korasõme. Upéva ningo ijetuʼueterei vaʼekue. Péro ore roñemboʼe vaʼekue Jehovápe, rolee umi téxto oregustavéva ha umíva orepytyvõ vaʼekue roaguanta hag̃ua upe situasión. Avei roho vaʼekue doktórpe ikatu hag̃uáicha rosegi peteĩ tratamiénto pe ansiedápe g̃uarã, ha upéva tuichaiterei orepytyvõ vaʼekue. Koʼág̃a ore roñeñandu porãvéma ha rojerure Jehovápe taorepytyvõ rokonsola hag̃ua umi persóna ohasa asývape avei pe ansieda káusare.

Pemombeʼúvo mbaʼéichapa Jehová penepytyvõ peaguanta hag̃ua umi situasión ijetuʼúva, peipuru kuri peteĩ ñeʼẽnga oñeʼẽva umi “ryguasu rupiʼáre”. ¿Ikatu piko pemombeʼu oréve mbaʼépa heʼise upéva?

Mats: Upe fráse ningo haʼe peteĩ ñeʼẽnga ojepurúva idióma suajílipe. Upe idiómape haʼekuéra heʼi: “Tumebebwa kama mayai mabichi”. Upéva heʼise: “Oregueraha hikuái ku oguerahárõguáicha ryguasu rupiʼa”. Jaikuaaháicha, peteĩ persóna ogueraháva ryguasu rupiʼa oñatende porã ani hag̃ua ojeka chugui. Ha upéicha vaʼekue avei Jehová orendive, haʼe ningo mborayhúpe oñangareko porãiterei vaʼekue orerehe entéro umi ore asignasiónpe. Jehová ningo siémpre omeʼẽmbaite vaʼekue oréve la roikotevẽva, sapyʼánte omeʼẽ rasapa voi oréve. Avei ore roñandu vaʼekue Jehová oreapoja ha orerayhuetereiha pe Kuérpo Governánte rupive, pórke haʼekuéra ontende porãiterei la ore situasión.

Ann-Catrin: Amombeʼuse peẽme peteĩ vuéltape mbaʼéichapa Jehová mborayhúpe ohechauka oréve orepytyvõha. Peteĩ díape añehenói kuri, ha ojeʼe chéve che túa oikóva Suéciape oñeinternaha ospitálpe ha oĩ vaietereiha. Upérõ guare ningo Mátspe ojagarra ramoite vaʼekue pe malaria. Upévare haʼe osegi gueteri ikangy, ha ore ndaikatúi vaʼekue rojogua umi pasáhe de avión. Upémarõ rodesidi vaʼekue rovendémante vaʼerãha la ore áuto. Péro upéi oĩ kuri la orerenóiva, peteĩva haʼe kuri peteĩ matrimónio oikuaa vaʼekue la ore situasión, ha haʼekuéra heʼi opagaseha la pasáhe peteĩvare. Ha upéi pe ótra persóna orerenói vaʼekue haʼe kuri peteĩ ermána ijedáva. Haʼe oiko kuri oñongatu pláta peteĩ káhape ha ijapére oskrivi: “Peteĩ oikotevẽvape g̃uarã”. Péicha ohasa kuri unos kuánto minútonte ha Jehová orepytyvõma roreko hag̃ua umi pasáhe roikotevẽva (Heb. 13:6).

Peẽ ningo 50 áñoma peservi hague de tiémpo kompléto, ¿mbaʼe mbaʼépa peaprendéma raʼe?

Ann-Catrin: Che ningo aaprende ñanembareteveha ‘japytáramo pyʼaguapýpente ha jajeroviáramo Jehováre’. Jajerovia jave Jehováre haʼete ku haʼe oñemoĩva ñande ykére ha olucha ñande vése (Is. 30:15; 2 Crón. 20:​15, 17). Roñehaʼã rupi romeʼẽ Jehovápe la iporãvéva káda asignasiónpe, rorresivi hetaiterei vendisión. Umichagua vendisión ndaikatumoʼãi kuri rorresivi roikórire rojapo ótra kósa.

Mats: Che ningo aaprende ajerovia vaʼerãha Jehováre entéro situasiónpe, ha añehaʼã vaʼerãha ahecha mbaʼéichapa haʼe chepytyvõta (Sal. 37:5). Jehová ningo núnka ndofallái chendive, haʼe siémpre okumpli la ipromésa. Koʼág̃a roservívo Betel de Myanmárpe rosegi gueteri rohecha mbaʼéichapa haʼe orepytyvõ.

Hiʼãite ningo oréve entéro umi mitãrusu ha mitãkuña oservi porãsevéva Jehovápe ohechakuaa avei oréicha mbaʼeichaitépa Jehová ñanderayhu. Haʼekuéra opermitíramo, Jehová oipytyvõta chupekuéra ovyʼa hag̃ua oimeraẽ asignasiónpe. Péicha haʼekuéra ojoguáta umi plánta ipotývape tahaʼe haʼéva pe lugár oñeñotỹhápe.