Pyaʼékena ñaipytyvõ umi ipyʼaporãvape

1. ¿Mbaʼeichagua héntepa jatopa jepi japredika jave? (Hechos 13:​47, 48; 16:​14, 15).

YMA síglo primérope, heta hénte ojeroviáma voi ojepredikamírente chupekuéra pe mensáhe oñeʼẽva Ñandejára Rréinore (elee Hechos 13:​47, 48; 16:​14, 15). Koʼág̃arupi avei predikasiónpe oĩ jepi umi hénte vyʼápe voi orresivíva umi notísia porã ohendu ypy guive. Péro oĩ avei umi hénte ñepyrũrã ndahaʼéiva la ointeresapáva chupekuéra pe mensáhe oñeʼẽva Ñandejára Rréinore, péro upéi okambia hikuái la opensáva, oikuaaseve Ñandejárape ha oadorase chupe. ¿Mbaʼépa jajapo vaʼerã jatopa jave umi hénte ‘ipyʼaporãvape’ predikasiónpe?

2. ¿Mbaʼérepa ikatu jaʼe japredika jave haʼeteha ku jakuidáva ñande uértare?

² Ikatu jaʼe japredika jave haʼeteha ku jakuidáva ñande uértare. Ñambaʼapo jave ñande uértape ikatu jatopa umi mbaʼe ñañotỹ vaʼekue apytépe umi hiʼáva ha hiʼajupámava voi, péro ikatu avei oĩ umi neʼĩrava hiʼaju. Péicha jave ensegída ñamonoʼõta umi hiʼajupámava, péro upéva ndeʼiséi ndajasegimoʼãiha ñañatende umi neʼĩravare hiʼaju. Predikasiónpe ikatu jatopa umi hénte ohenduséva voi ñane mensáhe, péicha jave pyaʼe ñaipytyvõse umívape oiko hag̃ua chuguikuéra Jesús disípulo. Péro avei ikatu oime oĩ umi hénte oikotevẽvéva tiémpo ohechakuaa hag̃ua iñimportantetereiha ñane mensáhe. Ha ñande jasegíta ñaipytyvõ chupekuéra avei (Juan 4:​35, 36). Jahechaháicha oĩ umi persóna ñanerendusémava voi ha ótro katu oikotevẽmie tiémpo. Péro japilláramo mbaʼeichagua persónapa hína la jatopáva jaikuaáta mbaʼéichapa ikatu ñaipytyvõ porãve chupe. Jahechamína mbaʼépa ikatu jajapo pe primera konversasiónpe jahechakuaárõ pe persóna omombaʼemaha voi pe mensáhe. Avei ñaanalisáta mbaʼéichapa ikatu ñaipytyvõ koʼãichagua persónape osegi hag̃ua oprogresa.

¿MBAʼÉICHAPA ÑAIPYTYVÕKUAA UMI OHENDUSÉVAPE UMI NOTÍSIA PORÃ?

3. ¿Mbaʼépa jajapo vaʼerã jatopáramo peteĩ persóna ohenduséva umi notísia porã? (1 Corintios 9:26).

³ Predikasiónpe jatopa jave peteĩ persóna ohenduséva umi notísia porã, pyaʼe voi ñaipytyvõse chupe oikuaa hag̃ua Jehovápe ha oñemoag̃ui hag̃ua hese. Pe primera konversasiónpema voi ikatu jaofrese pe persónape peteĩ kúrso bíblico ha ñainvita chupe oho hag̃ua rreunionhápe (elee 1 Corintios 9:26).

4. ¿Mbaʼérepa ikatu jaʼe oĩha umi hénte ensegída voi ostudiaséva la Biblia? Emombeʼu peteĩ ehémplo.

⁴ Jaofresékena peteĩ kúrso bíblico. Ikatu hína oĩ umi persóna ensegídama voi ostudiaséva la Biblia. Por ehémplo Canadápe, peteĩ kuñataĩ oñemboja pe karríto de puvlikasión oĩháme ha ojagarra pe folléto ¡Jaikóta vyʼápe pára siémpre! Upéva oiko kuri peteĩ jueves, ha upérõ pe ermána oĩva pe karrítope heʼi pe kuñataĩme umi ojagarráva pe folléto ikatuha avei ojerure peteĩ kúrso bíblico grátis. Pe kuñataĩme ogusta la idéa ha omeʼẽ inúmero de teléfono pe ermánape. Upe díapema voi pe kuñataĩ omensaheáma pe ermánape ha oporandu chupe pe kúrso bíblicore. Pe ermána heʼi chupe ikatuha oho hendápe pe fin de semána, péro pe kuñataĩ heʼi chupe: “Che ningo koʼẽrõ chelívre ha ikatúma añepyrũ astudia”. Upémarõ oñepyrũ hikuái pe kúrso bíblico pe viernes voi. Upéi pe kuñataĩ ohóma rreunionhápe pe fin de semánape ha osegi pyaʼe oprogresa.

5. ¿Mbaʼépa jareko vaʼerã enkuénta oimérõ peteĩ persóna ndostudiái la Biblia ensegidaite? (Ehecha pe taʼanga).

⁵ Jaikuaa ningo naentéroi ojoguataha upe kuñataĩme ha ensegída voi ostudiasetaha la Biblia. Oĩ umi hénte oikotevẽvéva tiémpo upearã, upévare pe primera konversasiónpe ñañeʼẽ vaʼerã peteĩ téma ointeresávare upe persónape. Avei iñimportánte ndajaperdéi la esperánsa ha jasegi jahechauka chupe jajepyʼapyha hese. Jajapóramo péicha ikatu hína ndohasái heta tiémpo pe persóna ostudia hag̃ua la Biblia. ¿Mbaʼépa ikatu jaʼe jaofreséta jave peteĩ kúrso bíblico? Upe porandu ojejapo unos kuánto ermáno ha ermána ivalévape omoñepyrũ hag̃ua kúrso bíblico. Jahechamína la heʼi vaʼekue hikuái.

6. ¿Mbaʼépa ikatu jaʼe pe persónape oñeʼẽse jey hag̃ua ñanendive?

⁶ Koʼã ermáno ikatupyrýva heʼi oĩha umi país nokonvenirihápe jaʼe derechoite pe persónape jajapotaha hendive peteĩ kúrso térã estúdio bíblico, térã ñamboʼetaha chupe. Umi ermáno heʼi ikuentaveha jaʼénteramo upe persónape ñañemongeta jeytaha hendive ha ikatuha oikuaave la Biblia heʼíva. Pe persóna oñeʼẽse jey hag̃ua ñanendive ikatu jaʼe chupe: “La Biblia ningo okontesta heta porandu iñimportantetereíva”, térã: “La Biblia ndahaʼéi peteĩ lívro rrelihiósonte, síno ñanepytyvõ heta hendáicha avei”. Upéi ikatu jaʼeve: “Diez térã 15 minútope ikatúma reaprende álgo nepytyvõtava”. Natekotevẽi jaʼe upe persónape jahaseha hendápe káda semána, pórke upéva ikatu omondýi chupe ha oñandu oikemaha peteĩ kompromísope.

7. ¿Mbaʼe moméntopepa heta persóna ohechakuaa otopa hague la verda? (1 Corintios 14:​23-25).

⁷ Ñainvita umi héntepe rreunionrã. Amalisia apóstol Pablo tiémpope algúno umi hénte ohechakuaa vaʼekue otopa hague la verda pe primera ves ohórõ guare rreunionhápe (elee 1 Corintios 14:​23-25). Koʼág̃arupi avei pyʼỹinte oiko upéva, oĩ heta hénte oñemoag̃ui pyaʼevéva Jehováre oñepyrũramo oho rreunionhápe. Upévare, ¿arakaʼe guivépa ñainvita vaʼerã umi persónape? Pe lívro ¡Jaikóta vyʼápe pára siémpre!, oinvita umi héntepe oho hag̃ua rreunionhápe leksión 10-pe. Péro natekotevẽi ñahaʼarõ ñag̃uahẽ raẽ upépe ñainvita hag̃ua umi persónape. Ñañepyrũ guive ñañemongeta umi héntendi ikatúma ñainvita chupekuéra oho hag̃ua rreunionhápe upe fin de semánape. Upearã ikatu jaʼe umi persónape mbaʼéichapa hérata pe diskúrso púvliko térã mbaʼépa ojehecháta pe Ñemañaháme upe semánape.

8. Ñainvita jave peteĩ persónape rreunionrã, ¿mbaʼe mbaʼépa ikatu jaexplika chupe? (Isaías 54:13).

⁸ Ñainvita jave peteĩ persónape rreunionrã, ikatu jaexplika chupe mbaʼépepa idiferénte ñane rreunión la ojejapo lájagui ótro rrelihiónpe. Por ehémplo peteĩ estudiánte de la Biblia ohórõ guare rreunionhápe ohecha por primera ves mbaʼéichapa ojejapo pe Ñemañaha Ñehesaʼỹijo. Upéi pe estudiánte oporandu pe ermáno odirihíva pe Ñemañaha oikuaápa enterovéva réra. Upémarõ pe ermána ombostudiáva chupe oexplika pe estudiántepe pe kongregasión ojoguaha peteĩ famíliape, upévare la oĩva guive upépe oñehaʼã oikuaa enterovéva réra. Upémarõ pe estudiánte heʼi irrelihiónpe avave lénto ndoikuaaiha umi ótro réra. Avei heta persóna ndoikuaái maʼerãpa ojejapo ñane rreunión, upévare iporãta jaexplikáramo chupekuéra (elee Isaías 54:13). Ñande ñañembyaty jaadora hag̃ua Jehovápe, ñaaprende hag̃ua chugui ha ñañomokyreʼỹ hag̃ua (Heb. 2:12; 10:​24, 25). Upévare ñane rreunionkuéra oñeorganisa porã ikatu hag̃uáicha ñaaprende heta mbaʼe ha ndojejapói mbaʼeve ojesegi hag̃uánte umi tradisión (1 Cor. 14:40). Ñande ningo jaha rreunionhápe ñaaprende hag̃ua, upévare umi Salónpe oñemoĩ lus omohesakã porãva pe lugár. Avei nañañentremetéi rupi polítikare noñeñeʼẽi umi rreuniónpe upe témare. Ndaipóri avei ojodiskutíva ni heʼíva la opensáva osapukaihápe. Umi hénte oikuaa hag̃ua mbaʼéichapa ojejapo umi rreunión iporãta avei jahechaukáramo chupekuéra de antemáno pe vidéo ¿Mbaʼéichapa rojapo ore rreunionkuéra?

9, 10. Ñainvita jave peteĩ persónape rreunionrã, ¿mbaʼe mbaʼépa ikatu jaʼe chupe ani hag̃ua okyhyje oho hag̃ua? (Ehecha pe taʼanga).

⁹ Sapyʼánte oĩ okyhyjéva oho hag̃ua rreunionhápe openságui ojeʼetaha chupe oiko vaʼerãha chugui testígo de Jehová. Upévare jaʼékena pe persónape ñande javyʼaitereiha oĩ jave ñandevisitáva Salónpe ha haʼe ikatuha ohónte ohendu hag̃ua ha ndojeovligamoʼãiha chupe okambia hag̃ua irrelihión. Jaʼe vaʼerã avei upe persónape umi tuakuéra ikatuha oho rreunionhápe umi ifamília michĩvandi. Ndojejapói rreunión apárte umi mitãme g̃uarã, upéva rangue umi mitã ikatu oguapy ituakuérandi oaprende hag̃ua oñondivepa, péicha umi túa oikuaa moõpa oĩ ifamília ha mbaʼépa oñemboʼe hína chupekuéra (Deut. 31:12). Umi rreunionhápe avei ndojejeruréi pláta pórke Jesús voi heʼi vaʼekue: “Grátis oñemeʼẽ kuri peẽme, ha peẽ grátinte pemeʼẽ vaʼerã avei” (Mat. 10:8). Avei ikatu jaexplika upe persónape natekotevẽiha omonde umi ao de lúho ni hepýva, pórke Ñandejára nomañái umi hénte píntare síno ohecha la oĩva ikorasõme (1 Sam. 16:7).

¹⁰ Pe persóna ohóramo rreunionhápe, jajapókena ikatúva guive haʼe oñeñandu porã hag̃ua upépe. Ikatu ñapresenta chupe umi ansiáno ha umi ótro ermáno ha ermánape. Pe persóna ovyʼáramo rreunionhápe ikatu ohose jey hína. Pe rreunión aja oimérõ haʼe ndorekói ibíblia, jahechaukákena chupe umi téxto bíblico ñande Bíbliape ha avei ñaipytyvõ upe persónape ontende hag̃ua la oñehesaʼỹijóva hína.

¿MBAʼÉPA JAJAPOKUAA OIMÉRÕ ÑAÑEPYRŨMA JASTUDIA PE PERSÓNANDI?

11. ¿Mbaʼépa jareko vaʼerã enkuénta jastudia jave peteĩ persónandi?

¹¹ ¿Mbaʼépa jareko vaʼerã enkuénta ñañepyrũrõ jastudia peteĩ persónandi? Jarrespetákena pe tiémpo haʼe orekóva ostudia hag̃ua. ¿Mbaʼépa heʼise upéva? Por ehémplo oimérõ japyta raʼe peteĩ órape, ñag̃uahẽkena oraitépe. Jajapókena upéicha oiméramo jepe pe jaikohárupi la hénte ojepokuaa og̃uahẽ tárde. Avei iporãvéta ñañehaʼãramo jastudia mbykymínte pe primera ves. Umi ermáno ha ermána ikatupyrýva heʼi ani hag̃ua ñambopukueterei pe primer estúdio, pe persóna ohendusevéramo jepe. Ñanemanduʼákena avei ndovaleiha ñañeʼẽterei síno jaheja vaʼerã pe persóna tomombeʼu la opensáva ha oñandúva (Prov. 10:19).

12. ¿Mbaʼépa ñañehaʼã vaʼerã jahupyty pe primer estúdio guive?

¹² Pe primer estúdio guive ñaipytyvõse pe persónape oikuaa hag̃ua Jehová ha Jesúspe ha ohayhu hag̃ua chupekuéra. Upearã siémpre jahechauka vaʼerã la Biblia heʼíva ha ani jajegia la ñande jaikuaávarente (Hech. 10:​25, 26). Apóstol Pablo oheja vaʼekue ñandéve peteĩ ehémplo porã, haʼe oporomboʼérõ guare oñeʼẽ meme vaʼekue Jesucrístore. Jesúspe oñembou vaʼekue ikatu hag̃uáicha ñanepytyvõ jaikuaa ha jahayhu hag̃ua Jehovápe (1 Cor. 2:​1, 2). Avei Pablo ohechauka vaʼekue iñimportanteha ñaipytyvõ umi disípulo pyahúpe oreko hag̃ua umi kualida iporãva, umi kualida oñekompara voi ‘óro, pláta ha ita vera iporãitereívare’ (1 Cor. 3:​11-15). Por ehémplo iñimportanteterei peteĩ kristiáno ojerovia, iñarandu, odiferensiakuaa iporãva ha ivaíva ha orrespeta Jehovápe (Sal. 19:​9, 10; Prov. 3:​13-15; 1 Ped. 1:7). Jasegíkena Pablo ehémplo, upearã ñaipytyvõkena ñane estudiántepe ojerovia mbarete hag̃ua ha oreko hag̃ua peteĩ amista imbaretéva Itúa yvagapeguándi (2 Cor. 1:24).

13. ¿Mbaʼéichapa ikatu jahechauka ñanepasiensiaha ha ñantendeha ñane estudiántepe? (2 Corintios 10:​4, 5). (Ehecha pe taʼanga).

¹³ Ñaporomboʼe jave jasegi vaʼerã Jesús ehémplo. Upearã tekotevẽ ñanepasiénsia ha ñañehaʼã ñantende ñane estudiántepe. Aníkena jajapo umi porandu ikatúva omoñeñandu vai upe persónape. Jahechakuaárõ ijetuʼuha chupe ontende peteĩ téma, ikuentavénte jasegírõ la estúdio ha upe rire ae ñañeʼẽ jey upe témare. Ikatu avei hína ijetuʼu ñane estudiántepe oasepta hag̃ua peteĩ enseñánsa pyahu. Péicha jave aníkena jajopy chupe síno ñameʼẽkena chupe tiémpo ojepyʼamongeta ha okambia hag̃ua opensa lája (Juan 16:12; Col. 2:​6, 7). La Biblia heʼi umi enseñánsa japu ojoguaha peteĩ tórre imbaretévape tekotevẽva jaity (elee 2 Corintios 10:​4, 5; ehecha pe nóta de estúdio oĩva versíkulo 4-pe retopátava pe Traducción del Nuevo Mundo españólpe). Ikatu hína ijetuʼu peteĩ estudiántepe omboyke hag̃ua umi enseñánsa japu orovia vaʼekue hetaite tiémporema. Upévare primero tekotevẽ ñaipytyvõ pe estudiántepe oreko hag̃ua peteĩ amista imbaretéva Jehovándi ikatu hag̃uáicha ojerovia hese. Péicha upéi ifasilvétama pe persónape omboyke hag̃ua umi enseñánsa yma orovia vaʼekue ipyʼaite guive (Sal. 91:9).

OĨ JAVE PRIMERA VES OHÓVA RREUNIONHÁPE

14. ¿Mbaʼéichapa jatrata vaʼerã entéro umi ohóvape rreunionhápe?

¹⁴ Jehová oipota jatrata enterovépe peteĩchapa. Upévare jarresivi mborayhúpe entéro persónape, tahaʼe haʼéva pe lugár ouhágui ha ikostúmbre, ha nañamañái iplátapa térãpa imboriahu (Sant. 2:​1-4, 9). Jahechamína mbaʼéichapa ikatu jahechauka jahayhuha umi héntepe.

15, 16. ¿Mbaʼéichapa ikatu ñaipytyvõ umi héntepe oñeñandu porã hag̃ua rreunionhápe?

¹⁵ Oĩ umi persóna ohóva rreunionhápe ohechaséguinte mbaʼépa ojejapo upépe. Ótro ikatu oime oho oĩgui álgien ótro ladogua omokyreʼỹva kuri chupe oho hag̃ua rreunionhápe. Tahaʼe haʼeháicha, jahecháramo peteĩ persóna og̃uahẽha Salónpe primera ves, ñañembojákena ha ñañeʼẽ chupe, ñaneamávlekena hendive péro ani jadesahusia chupe. Ikatu ñainvita pe persónape oguapy hag̃ua ñanendive, ñakonsegi chupe peteĩ Biblia ha umi puvlikasión, térã ñakomparti hendive umi puvlikasión ñande jarekóva pe rreunión aja. Avei jahecha vaʼerã mbaʼe ótra kósapa ikatu jajapo pe persóna oñeñandu porã hag̃ua Salónpe. Por ehémplo peteĩ vuéltape peteĩ karai oho vaʼekue Salón del Réinope, upérõ pe karai heʼi pe ermáno orresivívape chupe otĩha pórke haʼe noñemondéi rreunionrã oñemondeháicha umi Testígo. Pe ermáno ensegída otrankilisa pe karaípe ha heʼi chupe Testigokuéra oñemondéramo jepe péicha rreunionrã, haʼekuéra ojoguanteha avei umi ótro héntepe. Pe karai kon el tiémpo ojevautisa ha núnka ndahesaráiri vaʼekue mbaʼéichapa pe ermáno orresivi chupe Salónpe. Péro aníkena ñanderesarái ko mbaʼégui: Ñañeinteresáramo jepe umi hénte ñandevisitávare, ndajaikomoʼãi ñanentremetído ni nañaporandumoʼãi chupe hetaiterei mbaʼe (1 Ped. 4:15).

¹⁶ ¿Mbaʼe ótra kósapa ikatu jajapo umi hénte oñeñandu porã hag̃ua Salónpe? Jahechaukákena jarrespetaha umi ndahaʼéivape Testígo ha umi mbaʼe ogueroviáva hikuái. Upearã ñañatende vaʼerã la jaʼévare ñañemongeta jave ótrondi, ñakomenta térã jareko jave párte rreunionhápe. Aníkena jaʼe mbaʼeve ikatúva oofende umi ñandevisitávape Salónpe ha upéi ndohosevéima hikuái rreunionhápe (Tito 2:8; 3:2). Por ehémplo ndajaikomoʼãi ñañeʼẽ vai umi mbaʼe la hénte ogueroviávare (2 Cor. 6:3). Umi ermáno ojapóva diskúrso púvliko koʼýte oñatendéta ani hag̃ua ojapo upéva. Avei idiskúrso aja oexplikáta hikuái umi palávra ñande jaipurúva ha ikatúva hína nontendéi umi ndahaʼéiva Testígo.

17. ¿Mbaʼépa jajapose jatopa jave peteĩ persóna ‘ipyʼaporãvare’?

¹⁷ Amáske ohasa la tiémpo iñimportantevéntema japredika japerdeʼỹre tiémpo. Katuete jasegíta jatopa umi hénte ‘ipyʼaporãvare ohupyty hag̃ua jeikove opaveʼỹva’ (Hech. 13:48). Jatopa jave koʼãichagua héntere aníkena jaduda jaofrese hag̃ua chupekuéra peteĩ kúrso bíblico ha ñainvita hag̃ua chupekuéra oho hag̃ua rreunionhápe. Péicha jajapóramo ñaipytyvõta umi héntepe oñepyrũ hag̃ua oguata ‘pe tape oporoguerahávare jeikove opaveʼỹvape’ (Mat. 7:14).