1925​, ojapóma 100 áño

NOÑEKUMPLÍRI UMI MBAʼE OHAʼARÕVA HIKUÁI

Heta Estudiánte de la Biblia ohaʼarõ kuri 1925-pe ko yvýgui oikotamaha peteĩ paraíso. ¿Mbaʼérepa opensa raʼe hikuái péicha? Ermáno Albert Schroeder, oĩ vaʼekue Kuérpo Governántepe omombeʼu mbaʼérepa. Haʼe heʼi: “Upe tiémpope oñepensa vaʼekue umi unhído hembýva ohótama hague yvágape ogoverna hag̃ua Crístondi Irréinope. Avei oñepensa vaʼekue umi Jehová siérvo yma guare oikove jeytaha upe tiémpope ko yvýpe, por ehémplo Abrahán, David ha hetave ótro. Péicha oikóta chuguikuéra prínsipe ha oñenkargáta ko yvýre”. Péro upéva noñekumplíri kuri, ha upéva káusare oĩ vaʼekue umi ermáno oñedesanimáva (Prov. 13:12).

Oĩramo jepe oñedesanimáva, la majoría umi Estudiánte de la Biblia osegi opredika kyreʼỹ. Haʼekuéra mbeguekatúpe ontende la iñimportantevéva haʼe vaʼerãha opredika la héntepe oikuaa hag̃ua hikuái mávapa Jehová. Jahechamína mbaʼéichapa oipuru vaʼekue hikuái pe rrádio omog̃uahẽ hag̃ua pe añetegua umi lugár mombyryvehápe.

OMOĨ HIKUÁI HETAVE ESTASIÓN DE RRÁDIO

Áño 1924-pe heta hénte ohendu pe predikasión ojejapóva por rrádio pe emisóra WBBR rupive. Upévare 1925-pe umi Estudiánte de la Biblia odesidi omopuʼã ótra estasión de rrádio imbaretéva Chicago ypýpe. Ha upe estasiónpe ombohéra hikuái WORD. Oĩ vaʼekue peteĩ inheniéro hérava Ralph Leffler ombaʼapo vaʼekue oñemopuʼã hag̃ua pe estasión de rrádio. Haʼe heʼi: “Pe inviérnope umi pyhare roʼyetérõ guare oĩ vaʼekue heta hénte ohendúva pe emisóra, umi lugár mombyryveha peve”. Por ehémplo, peteĩ família oikóva Pilot Station Aláskape, oĩva mas de 5.000 kilómetro, ohendu umi prográma osẽ ypy vaʼekue upe rrádiope. Opa rire pe prográma, pe família oskrivi peteĩ kárta umi ombaʼapóvape pe emisórape. Pe família oagradese chupekuéra, pórke pe prográma omokyreʼỹ ha oipytyvõ chupekuéra oñemoag̃uive hag̃ua Ñandejárare.

Pe rrevísta Ñemañaha del 1 de diciembre de 1925 osẽ vaʼekue ingléspe, omombeʼu kuri mbaʼeichaitépa pe emisóra WORD imbarete ha oñehendu umi lugár mombyryveha peve. Pe rrevísta heʼi: “Pe estasión de rrádio oĩ hína umi estasión ipotentevéva apytépe Estados Unídospe. Ikatu vaʼekue oñehendu pe kósta éstepe ha pe kósta oéstepe Estados Unídospe, avei Cúbape ha pe párte nórte de Aláskape. Upéicha rupi heta persóna núnka nohendúiva umi notísia porã, koʼág̃a ohendúma ha oaprendeseve voi”.

Upe tiémpope, umi Estudiánte de la Biblia oipuruse kuri avei pe rrádio opredika hag̃ua umi notísia porã Canadápe. Upévare áño 1924-pe, haʼekuéra omopuʼã pe estasión de rrádio CHUC pe siuda héravape Saskatoon (Saskatchewan). Pe estasión de rrádio oĩ vaʼekue umi primera estasión de rrádio rrelihiósa apytépe upe paíspe. Péro 1925-pe ojehecha tekotevẽha ojeguerova ko estasión de rrádio. Upévare pe Sociedad Watch Tower omoĩ hérape ko estasión de rrádio, ha upéi oguerova pe estúdio de rrádio pe edifísio héravape Regent. Péva ningo peteĩ teátro yma guare opytáva siuda héravape Saskatoon. Pe Sociedad Watch Tower ojogua pe edifísio ha ombopyahu.

Ko emisóra de rrádio rupive, heta hénte oikóva umi puévlo opytávape mombyrymbyry ohendu por primera ves umi notísia porã. Por ehémplo peteĩ kuñakarai oikóva peteĩ puevloʼi opytávape mombyry, ohendu pe notísia porã pe rrádio rupive. Haʼe ensegída voi oskrivi ojerure hag̃ua umi puvlikasión bíblica. Ermáno George Naish omombeʼu mbaʼépa ojapo hikuái: “Roleévo la ikárta, ropilla ko kuñakarai anga oikotevẽtereiha ajúda. Upémarõ romondo chupe pe koleksión kompléta de Estudios de las Escrituras”. Ha upe riremínte ko kuñakarai oñepyrũma omog̃uahẽ umi notísia porã mombyryvehápe.

OÑENTENDE PORÃVE UMI ENSEÑÁNSA

Rrevísta Ñemañaha del 1 de marzo de 1925 osẽ vaʼekue ingléspe, onohẽ peteĩ artíkulo ijojahaʼỹva hérava “Oñepyrũ peteĩ tetã”. ¿Mbaʼérepa iñimportantete upe artíkulo? Ohasáma kuri un tiémpo umi Estudiánte de la Biblia oikuaa hague Satanás orekoha peteĩ organisasión. Upe organisasiónpe oĩ umi demónio, umi rrelihión japu, ha umi organisasión komersiál ha polítika oĩva ko yvy ape ári. Péro ko artíkulo rupive pe esklávo de konfiánsa oipytyvõ ermanokuérape ontende hag̃ua Jehová orekoha avei peteĩ organisasión. Péva idiferentete Satanás organisasióngui ha oñemoĩ voi ikóntrape (Mat. 24:45). Avei pe esklávo de konfiánsa oexplika porã vaʼekue Ñandejára Rréino oñepyrũ hague ogoverna áño 1914-pe ha oiko hague peteĩ gérra yvágape upe áño. Upérõ oñemosẽ vaʼekue Satanás ha idemoniokuérape yvágagui, ha oñemombo chupekuéra ko yvýpe (Apoc. 12:​7-9).

Algúno umi Estudiánte de la Bíbliape ijetuʼu lénto vaʼekue oasepta hag̃ua ko explikasión pyahu. Upévare upe artíkulope osẽ ko konsého: “Oĩramo algúno oleéva ko rrevísta ha ndoaseptáiva ko explikasión pyahu, rojerure peẽme penepasiensiami hag̃ua, pejerovia ñande Ruvicháre, ha peñehaʼã siémpre ipotĩ hag̃ua pene korasõ”.

Tom Eyre, peteĩ kolportór (koʼág̃a oñehenóiva prekursór) oikóva Gran Bretáñape, omombeʼu mbaʼépa ojapo la majoría umi Estudiánte de la Biblia olee rire upe artíkulo. Tom heʼi: “Umi ermanokuéra vyʼapópe orresivi ko explikasión omyesakãva Apocalipsis 12. Rontende porã rire pe Rréino ogovernamaha yvágape, kyreʼỹme romombeʼu ko notísia porã umi héntepe. Upéva oremomýi rombaʼapove hag̃ua, ha avei rohechakuaa hag̃ua Jehová ojapotaha hetaiterei mbaʼe iporãitevéva amo gotyove”.

OÑENTENDE IÑIMPORTANTEHA OJEKUAAUKA MÁVAPA JEHOVÁ

Koʼág̃arupi enterove ñande testígo de Jehová jaikuaa porãiterei mbaʼépa heʼi Isaías 43:10. Upe téxto heʼi peteĩ pártepe: “Jehová heʼi: ‘Peẽ hína che testígo, peẽ ningo che siérvo che aiporavo vaʼekue’”. Péro 1925 mboyve, ko téxto saʼi ojeexplika vaʼekue umi ñane puvlikasiónpe. Upéva okambiaitéta hína kuri, upe áñope voi 11 número de la rrevísta Ñemañaha ingléspe oñeʼẽ Isaías 43:​10, 12 rehe.

Opa potávo agosto de 1925, umi Estudiánte de la Biblia ojapo peteĩ Aty Guasu peteĩ siuda héravape Indianápolis (Indiana). Pe prográma de la asambléa oñeimprimíva, oreko peteĩ mensáhe de vienvenída omeʼẽva ermáno Joseph Rutherford. Upépe heʼi: “Jaju hína ko aty guasúpe ikatu hag̃uáicha ñande Ruvicha ñanemombarete. Péicha jasegíta ñanekyreʼỹve predikasiónpe jahechauka hag̃ua ñande haʼeha Itestígo”. Pe asambléa ipuku kuri 8 día, ha umi 8 día aja oñemokyreʼỹ umi ermánope osegi hag̃ua omombeʼu Jehová réra mamo ikatuhápe.

Pe sábado 29 de agosto, ermáno Rutherford ojapo peteĩ diskúrso hérava “Tekotevẽ japredika”. Pe idiskúrsope ohechauka iñimportantetereiha japredika. Heʼi voi: “Jehová heʼi isiervokuérape: ‘Peẽ hína che testígo. Che hína pe Dios verdadéro’. Upéi ojeʼe porãiterei ñandéve: ‘Pemoĩ peteĩ señál ijyvatéva umi puévlo ohecha hag̃ua’” (Is. 43:12; 62:10). Upéi katu pe ermáno oexplika: “Ko yvy ape ári, ndaipóri avave ikatúva ohupi pe señál ijyvatéva umi puévlo ohecha hag̃ua. Jehová siervokuéra añoite ikatu ojapo upéva, pórke oreko hikuái ñande Ruvicha espíritu, ha upéicha rupi haʼekuéra haʼe Itestígo”.

Ojapopa rire idiskúrso, ermáno Rutherford olee peteĩ rresolusión hérava “Peteĩ mensáhe omeʼẽva esperánsa”. Upépe heʼi Ñandejára Rréino rupive añoite “oĩtaha pyʼaguapy, jarekotaha heta mbaʼe, ñaneresãita, jaikovéta, jarekóta liverta ha javyʼáta para siémpre”. Enterovete umi oĩva upépe oasepta pe rresolusión. Upéi pe rresolusión ojetradusi heta idiómape, ha oñeimprimi ojepuru hag̃ua predikasiónpe. Pe rresolusión ojerreparti vaʼekue amo 40 millónrupi.

Upérõ umi Estudiánte de la Biblia neʼĩra oñehenói testígo de Jehová. Upéva oiko kuri unos kuánto áño upe rire, péro amás día ontende porãve hikuái iñimportantetereiha oikuaauka Jehová réra.

TEKOTEVẼ JAJAPO RREVISÍTA

Ko múndo tuichakuére hetavéma ohóvo kuri umi Estudiánte de la Biblia. Upévare Ñandejára organisasión omokyreʼỹ ermanokuérape ovisita jey hag̃ua umi persóna ohendu porã vaʼekuépe pe mensáhe. Ojejapo vaʼekue pe kampáña espesiál ojerreparti hag̃ua pe rresolusión hérava: Peteĩ mensáhe omeʼẽva esperánsa. Pe Bulletina omeʼẽ ko instruksión: “Peplaneákena peho jey hag̃ua pevisita umi hénte ojagarra vaʼekuépe pe kópia de la rresolusión, ndohejáiramo jepe hikuái umi puvlikasión”.

Pe Bulletin osẽva enero de 1925-pe oñenohẽ ko komentário ojapóva peteĩ Estudiánte de la Biblia oikóva Plánope (Texas). Haʼe heʼi kuri: “Tuicha oresorprende rohechávo mbaʼéichapa ropredika rire heta vése peteĩ lugárpe, la hénte orresponde porãve upépe. Upéva ndoikói jepi umi território roho ramóvape. Ore territóriope oĩ peteĩ puevloʼi, ha upépe rohóma 5 vése ko 10 áño ohasa vaʼekuépe. Ramoiténte ermána Hendrix ha che sy, oho jey opredika upépe, ha hetaiterei lívro okolokami hikuái. Núnka voi neʼĩrava peichaite peve heta lívro orreparti hikuái upe lugárpe”.

Peteĩ kolportór oikóva Panamápe heʼi: “Heta hénte nacherenduséi vaʼekue pe primera visítape, péro upéi aha jeývo avisita chupekuéra 2 térã 3 veseha okambiaitéma hikuái. Ko áñope aipurupa lénto la che tiémpo ajapo hag̃ua rrevisíta, ha algúno rrevisíta ajapo vaʼekue oikoite”.

PE TRAVÁHO TEKOTEVẼTAVA OJEJAPO

Pe kárta omondóva káda áño umi kolportórpe, ermáno Rutherford orresumi umi mbaʼe ojejapo vaʼekue upe áñope, ha oñeʼẽ avei umi traváho ojejapo vaʼerãre. Haʼe heʼi: “Ko áñope peẽ peguereko kuri pe priviléhio pekonsolávo heta hénte oñembyasývape. Ha katuete penembovyʼaiterei upe tembiapo pejapo vaʼekue. Pe áño oñepyrũvape, perekóta heta oportunida pehechauka hag̃ua peẽ haʼeha Ñandejára Testígo, ha avei pesegíta peñeʼẽ Irréinore. Péicha umi hénte oikuaáta mávapa hína umi añetehápe oadoráva Ñandejárape. Jasegíkena ñambotuicha oñondivepa ñande Rréi ha Ñandejárape”.

Opávo 1925, umi ermáno ojeprepara hína kuri ombotuichave hag̃ua umi edifísio oĩva Broóklynpe (Nueva York). Ha 1926-pe, ñane organisasión omoñepyrũta kuri pe projékto de konstruksión tuichavéva ojejapóva upe tiémpope.