Ñandejára siémpre oporohayhuetereíta

1, 2. ¿Mbaʼe ijetuʼúvapa ohasa jepi heta kristiáno?

EÑEIMAHINAMÍNA reĩha pe mar mbytépe peteĩ varkoʼípe ha upeichahágui oñepyrũ peteĩ torménta vai, umi oláda ojejapete pe varkoʼíre ha pe varkoʼi oñepyrũma okacha vaipa. Ndojepoíriramo pe márpe pe ánkla, pe varkoʼi ohóta oimeha gotyo. Pe ánkla oipytyvõta ani hag̃ua pe varkoʼi osegi okacha vaipa ha oñehundi.

² Rehasa jave peteĩ situasión ijetuʼuetereíva ikatu voi repensa ejoguaha pe varkoʼípe pórke umi provléma nembokacha vaipa. Upéicha jave ikatu káda rráto okambia la reñandúva, peteĩ día rejerovia Jehová nderayhu ha nepytyvõtaha. Péro al día sigiénte katu reduda ha ere: “¿Oikuaa piko Jehová la ahasáva?” (Sal. 10:1; 13:1). Peteĩ ne amígo nekonsoláramo ikatu peteĩ tiémpore reĩ porã jey (Prov. 17:17; 25:11). Péro upéi eñepyrũ jey eduda ha ndereikuaái Jehová nepytyvõtapa, ikatu voi reju repensa nderevaleiha mbaʼeverã chupe g̃uarã. Péicha jave, ¿mbaʼépa la ikatúva nepytyvõ pe ánkla oipytyvõháicha pe varkoʼípe? ¿Mbaʼéichapa ikatu reĩ segúro ha esegi eguerovia Jehová nderayhuha ha oĩtaha nde ykére?

3. a) ¿Mbaʼépa heʼise “mborayhu ifiélva”? (Salmo 31:7; 136:​1, nóta). b) ¿Mbaʼérepa jaʼekuaa Jehová ohechauka porãitereiha mbaʼépa heʼise pe mborayhu ifiélva? (Ehecha pe taʼanga).

³ Ani hag̃ua umi provléma osegi nembokacha vaipa tekotevẽterei nemanduʼa Jehová ohechaukaha pe mborayhu ifiélva (elee Salmo 31:7; 136:​1, nóta). La Bíbliape heʼi jave “mborayhu ifiélva” heʼise peteĩ persóna ñanderayhuha ipyʼaite guive, ndofallamoʼãiha ñanendive ha ni mbaʼevéicharõ nañanderejamoʼãiha. Jehová ningo pe ohechauka porãvéva mbaʼépa heʼise mborayhu ifiélva. La Biblia heʼi voi Jehová ‘oporohayhuetereiha’ (Éx. 34:​6, 7). Heʼi avei entéro ojeroviáva Jehová rérare ‘ohechakuaataha mbaʼeichaitépa haʼe oporohayhu’ (Sal. 86:5). Ñapensamíntena la heʼiséva koʼã téxto: Jehová núnka ndohejareíri isiervokuéra ifiélvape. Nemanduʼáramo Jehová núnka nanderejamoʼãiha, upéva nepytyvõta ani hag̃ua nembokacha vaipaite umi provléma (Sal. 23:4).

JEHOVÁ MBORAYHU HA UMI ENSEÑÁNSA PRIMEROITE REAPRENDE VAʼEKUE

4. Emombeʼu mbaʼe mbaʼépa hína umi enseñánsa primeroite ñaaprendéva ha mbaʼérepa jaguerovia siertoha umíva.

⁴ ¿Mbaʼe ótra kósapa ikatu rejapo ani hag̃ua nembokacha vaipaite umi provléma? Ikatu nemanduʼa reaprende hague la Bíbliape Jehová nderayhuha, upéva hína peteĩva umi enseñánsa primeroite reaprende vaʼekue. ¿Mbaʼépa ndéverõ g̃uarã umi enseñánsa primeroite reaprende vaʼekue? Ikatu repensa umi mbaʼe la Biblia nemboʼévare ha upéi eñepyrũva eguerovia. Por ehémplo reaprende vaʼekue Ñandejára heraha Jehová ha Jesús haʼeha Ñandejára Raʼy peteĩetéva. Avei la Biblia rupive reikuaa umi omanóva noñanduveimaha mbaʼeve ha ko yvýgui oikotaha peteĩ paraíso ikatuhápe umi hénte oikove pára siémpre (Sal. 83:18; Ecl. 9:5; Juan 3:16; Apoc. 21:​3, 4). Nde reñepyrũ vaʼekue reguerovia koʼã enseñánsa siertoha ha upéi ndaikatuvéima avave ou ogueroviakántema ndéve ótra kósa. ¿Mbaʼérepa? Pórke nde reikuaáma oĩha heta pruéva ohechaukáva koʼã enseñánsa siertoha. Upévare nemanduʼákena pe Jehová mborayhu oĩha umi mbaʼe primeroite reaprende vaʼekue apytépe. Ha nde siémpre nemanduʼárõ Jehová nderayhuha, upéva nepytyvõta ani hag̃ua reduda Jehová oñeinteresaha nderehe ha ohechaha umi mbaʼe rehasáva.

5. Emombeʼu mbaʼéichapa peteĩ persóna ikatu omboyke umi enseñánsa japu.

⁵ Reñepyrũrõ guare restudia la Biblia, ¿mbaʼépa nepytyvõ vaʼekue emboyke hag̃ua umi enseñánsa japu? Oiméne rekompara raʼe umi mbaʼe nemboʼe vaʼekue ne rrelihión umi mbaʼe la Biblia omboʼévare. Epensamína ko ehémplore: Ñamoĩ chupe nde reguerovia hague Jesús haʼeha Ñandejára Todopoderóso, péro amáske restudia la Biblia eñepyrũ vaʼekue eñeporandu: “¿Siérto piko upe enseñánsa?”. Restudia rire mbaʼépa heʼi la Biblia ko témare, rehechakuaáma kuri Jesús ndahaʼeiha Ñandejára, síno Jesús haʼeha “pe Taʼýra ypykue ojejapo vaʼekue opaite mbaʼe mboyve” ha haʼeha “Ñandejára Raʼy peteĩetéva” (Col. 1:15; Juan 3:18). Upévare nde remboyke pe enseñánsa japu ha eñepyrũ ejerovia la Biblia omboʼévare. Jaikuaa ningo umi enseñánsa japu ikatuha imbarete ñanderehe ‘imbareteháicha umi tórre’ ijetuʼúva ojeity hag̃ua (2 Cor. 10:​4, 5). Péro ñaaprende rire mbaʼépa hína la verda núnka mas ndajagueroviavéima umi enseñánsa japu (Filip. 3:13).

6. ¿Mbaʼérepa ikatu reguerovia Jehová siémpre nderayhuetereitaha?

⁶ Rehasa jave peteĩ situasión ijetuʼúva ikatu reduda ha epensa siértopa la Jehová nderayhu, péicha jave eñeporandumína: “¿Oĩ porã piko la apensáva?”. Upéi epensami umi dúda erekóvare ha ekompara la heʼívare Salmo 136:​1, upe téxto omopyenda voi ko artíkulo. ¿Mbaʼére la Biblia heʼi Jehová mborayhu ifielha? ¿Mbaʼére la ojeʼe 26 vése voi upe sálmope ‘Jehová siémpre oporohayhuetereitaha’? Upévagui ñaaprende Jehová mborayhu ifiélva haʼeha hína peteĩ enseñánsa iñimportantetereíva oĩva la Bíbliape, ojogua umi enseñánsa primeroite reaprende vaʼekuépe la Bíbliagui ha regueroviaitéva voi. Upéicharõ epensa sapyʼárõ Jehovápe g̃uarã nderevaleiha mbaʼeverã térã haʼe nanderayhuiha, nemanduʼákena upéva ndahaʼeiha hína siérto. Upévare emboyketékena upe enseñánsa, emboykeháicha avei entéro umi ótro enseñánsa japu.

7. ¿Mbaʼe téxtopa ohechauka Jehová ñanderayhuha? Emombeʼu umi ehémplo.

⁷ La Bíbliape jatopa hetaiterei téxto ohechaukáva Jehová ñanderayhuha. Por ehémplo Jesús heʼi vaʼekue isegidorkuérape: “Peẽ ningo pevaleve heta gorrióngui” (Mat. 10:31). Avei Jehová voi heʼi vaʼekue ipuévlope: “Che romombaretéta ha roipytyvõta. Che po deréchape añakaramáta nderehe ha rogueraháta tape porãre” (Is. 41:10). Jaleévo koʼã téxto ndaipóri jaduda hag̃ua, pórke Jesús ndeʼíri vaʼekue: “Provávlemente peẽ pevaleve hína heta gorrióngui”. Ha Jehová ndeʼíri vaʼekue: “Ikatu mbaʼe roipytyvõ”. Upéva rangue umi téxto oasegura voi ha heʼi: “Peẽ ningo pevaleve heta gorrióngui”, ha avei heʼi: “Che roipytyvõta”. Upévare, reduda sapyʼárõ Jehová nderayhuha rehasa jave peteĩ situasión ijetuʼúva, koʼã téxto ndahaʼéi ku nepytyvõtavante reñeñandu porã hag̃ua, síno nekonvenséta voi Jehová nderayhuha. Koʼã téxto omombeʼu hína umi mbaʼe siertoguáva, upévare iporãta eñemboʼéramo Jehovápe emombeʼu hag̃ua chupe la eñandúva ha ejepyʼamongeta koʼã téxtore. Péicha ikatúta ere avei heʼi haguéicha umi kristiáno síglo primérope guare: “Ñande ningo jaikuaáma ha jaguerovia Ñandejára ñanderayhuha” (1 Juan 4:16).a

8. ¿Mbaʼépa ikatu rejapo sapyʼánte nderegueroviapáiramo Jehová nderayhuha?

⁸ ¿Mbaʼépa ikatu rejapo resegínteramo nderegueroviapái la Jehová nderayhuha? Péicha jave ekomparamína la nde reñandúva umi mbaʼe reikuaávare Jehovágui. Ndaikatúi ningo siémpre jajerovia umi ñane sentimiéntore, pórke umíva ñañandúnte ha ndahaʼéi katuete álgo siertoguáva, péro la Biblia omboʼe Jehová ñanderayhuha ha upéva si haʼe peteĩ mbaʼe siertoguáva. Ndajagueroviáiramo Jehová ñanderayhuha ndajarekói hína enkuénta pe kualida iñimportantevéva haʼe orekóva: Pe mborayhu (1 Juan 4:8).

EPENSA MEMÉKENA JEHOVÁ NDERAYHUHA

9, 10. ¿Mbaʼe témarepa oñeʼẽ vaʼekue Jesús heʼírõ guare idisipulokuérape: “Pe Túa voi penderayhu”? (Juan 16:​26, 27). (Ehecha pe taʼanga).

⁹ Jaikuaa porãve hag̃ua mbaʼeichaitépa Jehová ñanderayhu ikatu ñanemanduʼa avei la Jesús heʼi vaʼekuére idisipulokuérape. Haʼe heʼi vaʼekue: “Pe Túa voi penderayhu” (elee Juan 16:​26, 27). Jesús ndeʼíri vaʼekue upéva idisipulokuérape ombovyʼa hag̃uánte chupekuéra. ¿Mbaʼére jaʼekuaa upéva? Pórke jaleévo umi ótro versíkulo upe téxtope, jahechakuaa Jesús noñeʼẽi hague upérõ umi mbaʼe idisipulokuéra oñandúvare síno oñeʼẽ hína ótra kósare. Haʼe heʼi hína kuri chupekuéra mbaʼéichapa oñemboʼe vaʼerã hikuái.

¹⁰ Jesús heʼi ramoiténte kuri idisipulokuérape oñemboʼe vaʼerãha hérape péro ndahaʼéi chupe (Juan 16:​23, 24). Upéva iñimportanteterei kuri umi disipulokuéra oikuaa. ¿Mbaʼérepa? Pórke Jesús orresusita rire umi idisipulokuéra ikatu kuri oñemboʼese chupe. Legálmente ningo Jesús iñamigokueraite kuri. Upévare umi disípulo ikatu vaʼekue opensa Jesús ohayhueterei rupi chupekuéra, haʼe ikatuha ohendu oñemboʼe jave hikuái ha upéi ojerure Jehovápe toipytyvõ chupekuéra. Péro Jesús omboʼe vaʼekue chupekuéra nopensái vaʼerãha hikuái péicha. ¿Mbaʼérepa? Pórke heʼi haguéicha Jesús ‘pe Túa voi ohayhu chupekuéra’. Upéicharõ Jehová ñanderayhueterei rupi haʼe voi ohendu ñañemboʼe jave chupe, péva haʼe hína peteĩ enseñánsa iñimportánteva oĩva la Bíbliape oñeʼẽva pe ñemboʼére. ¿Mbaʼépa nemboʼe ndéve upéva? Restudia rupi la Biblia reikuaa porãve Jesúspe ha rehayhu chupe (Juan 14:21). Péro umi disípuloicha avei, nde ikatu reñemboʼe Ñandejárape pórke ‘pe Túa voi nderayhu’ ha káda ke reñemboʼe Ñandejárape rehechauka reroviaha upéva (1 Juan 5:14).

EÑEHAʼÃ ENTENDE MBAʼÉREPA REDUDA

11. ¿Mbaʼérepa Satanás ovyʼáta ñapensáramo Jehová nañanderayhuiha?

¹¹ ¿Mbaʼéicha rupi ikatu ñañepyrũ jaduda ha ñapensa Jehová nañanderayhuiha? Ikatu oime jaʼe Satanás káusare la ñapensaha upéicha, ha en párte siérto upéva. Haʼe hína pe ‘oñehaʼãva omokõ oimeraẽvape’ ha ovyʼáta jajúramo ñapensa Jehová nañanderayhuiha (1 Ped. 5:8). Jehová ñanderayhueterei rupi ombou vaʼekue Itaʼýrape omano hag̃ua ñanderehehápe, péro Satanás oipota ñapensa pe rreskáte ndaikatuiha ñanevenefisia pórke ñaneimperfektoiterei (Heb. 2:9). Upéicharõ, ¿mávapa la ovyʼátava ñañepyrũramo jaduda Jehová ñanderayhuha? Satanás. ¿Ha mávapa la osẽtava ijidéape jajúramo jaheja Jehová servísio ñañedesanima rupi? Satanás jeýnte. Ñapensamíntena mbaʼeichaitépa Satanás hovaʼatã, haʼe oipota ñande ñapensa Jehová nañanderayhuiha, péro legálmente chupe hína la Jehová ndohayhúiva. Péicha jahecha Satanás ogueroviakaseha ñandéve Jehová nañanderayhuiha ha ñanemboykeha, péva peteĩ ñuhã Satanás omoĩva ñane renonderãme (Efes. 6:11). Japillávo mbaʼépa ñane enemígo oñehaʼã ojapo ñane kóntrape, jajedesidivéntema ‘ñañemoĩ mbaretetaha pe Diáblore’ (Sant. 4:7).

12, 13. ¿Mbaʼérepa jaʼe ñaneimperfékto rupi ikatuha avei ñapensa Jehová nañanderayhuiha?

¹² ¿Mbaʼérepa ikatu avei jaduda Jehová ñanderayhuha? Ñanase rupi pekadór (Sal. 51:5; Rom. 5:12). Pe pekádo ombyai pe amista jarekóva Ñandejárandi, avei ombyai umi mbaʼe ñapensáva, ñañandúva ha ñande rete.

¹³ Pe pekádo ojapo vai ñanderehe, upévare ikatu ñañeñandu kulpávle, jakyhyje ha japyta ñatĩ. Koʼã mbaʼe ikatu ñañandu japekáramo. Avei ikatu ñañeñandu péicha ñanemanduʼa meme rupi ñaneimperfektoha ha ñande jaikuaa Ñandejára nañandeapói hague upéicha g̃uarã (Rom. 8:​20, 21). Ñapensamína ko ehémplore: Peteĩ veíkulo ollantáramo ndaikatumoʼãi ombaʼapo porã, ha peichaite avei ñande. Ñaneimperfékto rupi ndaikatúi jajapo porã entéro mbaʼe Jehová ñandeapo haguéicha iñepyrũme. Jarekóvo enkuénta upéva ikatu ñantende mbaʼérepa sapyʼánte jaduda Jehová ñanderayhuha. Oikóramo upéva ñanderehe ñanemanduʼa vaʼerã Jehová haʼeha Ñandejára tuichaitereíva “ohechaukáva ohayhuetereiha umi ohayhúvape chupe ha umi okumplívape imandamientokuéra” (Neh. 1:5).

14. ¿Mbaʼérepa ikatu jaʼe jajepyʼamongetáramo pe rreskátere ñaĩvetaha segúro Jehová ñanderayhuha? (Romanos 5:8). (Ehecha pe rrekuádro “Ñañatendékena ani hag̃ua ‘pe pekádo ñanembotavy’”).

¹⁴ Sapyʼánte ikatu ñañandu nañamereseiha Jehová ñanderayhu. Ha jaʼe porãsérõ g̃uarã nañamereséi voi, upévare la ñamombaʼete Jehová mborayhu. Ndahaʼéi ku ñandejehegui reínte ikatúva jajapo álgo Jehová ñanderayhu hag̃ua, péro Jehová omeʼẽ pe rreskáte ikatu hag̃uáicha oñeperdona ñande pekadokuéra ha upéva haʼe ojapo ñanderayhueterei rupi (1 Juan 4:10). Avei ñanemanduʼa vaʼerã Jesús ou hague osalva hag̃ua umi pekadórpe ndahaʼéi hénte perféktope (elee Romanos 5:8). Ndaipóri avave ikatúva ojapo porãmba entéro mbaʼe ha Jehová nohaʼarõi voi upéva ñandehegui. Ñantendévo ñaneimperfékto rupi ikatuha jaduda Jehová ñanderayhuha, jajedesidi jaluchataha ponove ñapensa upéicha (Rom. 7:​24, 25).

EJEDESIDÍKENA ESEGITAHA NDEFIÉL

15, 16. Jasegíramo ñandefiél Jehovápe, ¿mbaʼéguipa ikatu ñaĩ segúro ha mbaʼérepa? (2 Samuel 22:26).

¹⁵ Jehová oipota jadesidi porã ha ‘ñañakarama hatã hese’ (Deut. 30:​19, 20). Péicha jajapóramo ikatu ñaĩ segúro Jehová núnka nañanderejamoʼãiha (elee 2 Samuel 22:26). Jasegíramo ñandefiél Jehovápe katuete haʼe ñanepytyvõta tahaʼe haʼéva pe situasión ijetuʼúva oñepresentáva ñandéve.

¹⁶ Jahecháma haguéicha, hetaiterei mbaʼére ikatu jaʼe umi provléma ndaikatumoʼãiha ñanembokacha vaipa. La Biblia ñanemboʼe Jehová ñanderayhuha ha ñanepytyvõtaha. Jaduda sapyʼáramo upévagui, iporãta jajepyʼamongetáramo la jaikuaa porãvare Jehovágui, jajesareko rangue la ñañandúvare upe moméntope. Aníkena jaduda Jehová siémpre ñanderayhuetereitaha la Biblia voi omboʼeháicha.