Aníkena reduda Jehová nderayhuetereiha

1. ¿Mbaʼérepa redesidi raʼe reservitaha Jehovápe reikove aja pukukue? (Ehecha pe taʼanga).

¿NEMANDUʼÁPA pe día repromete haguépe Jehovápe reservitaha chupe reikove aja pukukue? Nde ningo redesidi vaʼekue rejapotaha upéva pórke reju reikuaa porã Jehovápe ha rehayhueterei chupe. Repromete Jehovápe remotenondetaha chupe nde rekovépe ha resegitaha rehayhu chupe “nde pyʼaite guive, nde rekove kompletoite reheve, entéro ne pensamiénto reheve, ha ne mbaretekue omeʼẽmíva reheve” (Mar. 12:30). Reñemeʼẽ guive Jehovápe rehayhuvéma chupe amás día, upévare oĩrõ oporandúva ndéve: “¿Nde piko legálmente rehayhu Jehovápe?”. Katuete edudaʼỹre eréta: “Si, che ahayhueterei Jehovápe ha ndaipóri voi mbaʼeve ni avave peichaite peve ahayhúva”.

2, 3. ¿Mbaʼéguipa Jehová oipota ñaĩ segúro ha mbaʼépa jahecháta ko artíkulope? (Jeremías 31:3).

² Péro ikatu oĩ oporandúva ndéve: “¿Ndépa reĩ segúro Jehová nderayhuha?”. Péicha jave ikatu reduda repenságui neremereseiha Jehová nderayhu. Peteĩ ermána heta osufri vaʼekue imitãme heʼi: “Che ningo aikuaa porã ahayhuha Jehovápe, ni michĩmi voi ndadudái upévagui, péro pyʼỹinte añeporandu Jehovápa cherayhu añete”. Péicha jave, ¿mbaʼépa ikatu nepytyvõ reikuaa hag̃ua mbaʼépa Jehová oñandu nderehe?

³ Jehová oipotaiterei reĩ segúro haʼe nderayhuetereiha (elee Jeremías 31:3). Legálmente Jehová voi oipota kuri nde haʼe iñamígo, upévare nemoag̃ui ijehe. Upéi nde reñemeʼẽ Jehovápe ha rejevautisa. Upe guive haʼe ohechauka ndéve pe mborayhu ifiélva haʼéva hína peteĩ rregálo ndaijojaháiva, upéva heʼise haʼe nderayhuha ipyʼaite guive ha núnka nanderejamoʼãiha. Peichagua mborayhu Jehová oñandu isiervokuéra ifiélvare ha heʼi voi haʼekuéra haʼeha ipuévlo teete ha hakateʼỹha hesekuéra, upévare jaʼekuaa Jehová hakateʼỹetereiha avei nderehe (Mal. 3:​17, nóta). Jehová oipota reikuaa haʼe nderayhuetereiha ha oipota reñeñandu apóstol Pablo oñeñandu haguéicha, haʼe oĩ vaʼekue segúro Jehová ohayhuetereiha chupe. Pablo oskrivi vaʼekue voi: “Che ningo aĩ segúro Ñandejára ñanderayhuha. Ni ñamanóramo, ni jaikovéramo, ni umi ánhel, ni umi goviérno ikatúva ojapo, ni umi mbaʼe koʼág̃a oĩva koʼápe, ni umi mbaʼe oútava, ni umi podér, ni umi mbaʼe oĩva yvate ni umi mbaʼe oĩva ipypukuhápe, ni mbaʼeveichagua kreasión ndaikatumoʼãi ñandepeʼa Ñandejára mborayhúgui” (Rom. 8:​38, 39). Ko artíkulope jahecháta mbaʼérepa iñimportánte jaguerovia Jehová ñanderayhuetereiha ha mbaʼépa ikatu jajapo ñaĩ hag̃ua segúro upévagui.

¿MBAʼÉREPA IÑIMPORTÁNTE EGUEROVIA JEHOVÁ NDERAYHUHA?

4. ¿Mbaʼeichagua ñuhãpa Satanás oipuru, péro mbaʼéichapa ikatu ñañemoĩ hese?

⁴ Egueroviáramo Jehová nderayhuha ndereʼamoʼãi “umi ñuhã” Satanás oipurúvape (Efes. 6:11). ¿Mbaʼeichagua ñuhãpa Satanás oipuru anivéma hag̃ua jaservi Jehovápe? Por ehémplo haʼe oipota jaguerovia Jehová nañanderayhuiha, péro upéva ningo peteĩ japu Satanás heʼíva iñañaitereígui. La Biblia heʼi voi Satanás ojoguaha peteĩ leónpe (1 Ped. 5:​8, 9). ¿Mbaʼérepa? Normálmente umi león oataka umi animál ikangy ha ndaikatúivape oñedefende ha upeichaite avei Satanás. Haʼe pyʼỹinte ñandeataka ñanekangy, ñanekaneʼõ térã ñañedesanima jave. Ikatu ningo ñañeñandu upéicha umi mbaʼe vai jahasa vaʼekuére, umi provléma jaguerekóvare koʼág̃a térã jajepyʼapýgui la ikatúvare oiko (Prov. 24:10). Jahechaháicha, Satanás oipotaiterei ñanekangy anivéma hag̃ua jaservi Jehovápe péro ñande ikatu ‘ñañemoĩ mbarete’ Satanás rehe, ha upearã jajapo vaʼerã la ikatúva guive ñaĩ hag̃ua segúro Jehová ñanderayhuha (Sant. 4:7).

5. ¿Mbaʼérepa iñimportánte ñañandu Jehová ñanderayhu ha ñanemombaʼeha?

⁵ Egueroviáramo Jehová nderayhuha reñemoag̃uivéta hese. Jahechamína mbaʼérepa jaʼe upéva. Jehová ñandeapo vaʼekue japorohayhu hag̃ua, ha avei jaipota umi ótro ñanderayhu. Upévare oĩ jave ohechaukáva ñandéve ñanderayhuha upéva ñanemomýi avei jahayhu hag̃ua pe persónape. Upéicha avei amáske ñañandu Jehová ñanderayhu ha ñanemombaʼeha ñande avei jahayhuvéntema chupe (1 Juan 4:19). Ha amáske jahayhu chupe haʼe ñanderayhuve avei. La Biblia heʼi voi: “Peñemoag̃uíkena Ñandejárare, ha haʼe oñemoag̃uíta penderehe” (Sant. 4:8). Upéicharõ, ¿mbaʼépa ikatu jajapo ñaĩ hag̃ua segúro Jehová ñanderayhuha?

¿MBAʼÉPA IKATU REJAPO ANI HAG̃UA REDUDA JEHOVÁ NDERAYHUHA?

6. Ijetuʼúrõ ndéve eguerovia Jehová nderayhuha, ¿mbaʼépa ikatu ere chupe ne ñemboʼépe?

⁶ Ejerure memékena Jehovápe tanepytyvõ rentende hag̃ua mbaʼérepa haʼe nderayhu (Luc. 18:1; Rom. 12:12). Reikotevẽrõ ikatu eñemboʼe Jehovápe heta vése káda día ikatu hag̃uáicha nepytyvõ reikuaa hag̃ua mbaʼépa haʼe oñandu nderehe. Sapyʼánte ikatu ne korasõ nekondena ha upévare ijetuʼu ndéve eguerovia hag̃ua Jehová nderayhuha, péro aníkena nderesarái Jehová tuichaveha ne korasõgui (1 Juan 3:​19, 20). Jehová ningo ndekuaa porãiterei, ni nde nderejekuaái la haʼe ndekuaaháicha. Upévare haʼe ohecha umi kualida porã nde erekóva ha nderehechakuaáiva ndejehe (1 Sam. 16:7; 2 Crón. 6:30). Upéicharõ, aníkena eduda ‘emombeʼupaite’ hag̃ua Jehovápe la reñandúva ha ere chupe egueroviaseha haʼe nderayhuha (Sal. 62:8). Upéi reñemboʼe rire esegi umi konsého jahechátava koʼág̃a.

7, 8. ¿Mbaʼéichapa umi Salmo ñanepytyvõ jaguerovia hag̃ua ñande pyʼaite guive Jehová ñanderayhuha?

⁷ Ejeroviákena la Jehová heʼívare. Jehová omeʼẽ vaʼekue ijespíritu sánto umi kuimbaʼe oskrivi vaʼekuépe la Biblia, upévare ikatu jajerovia la haʼekuéra heʼívare Jehováre. Por ehémplo peteĩ Sálmope David heʼi vaʼekue álgo iporãitereíva Ñandejárare. Haʼe heʼi kuri: “Jehová ag̃ui oĩ umi osufrívagui, haʼe osalva umi oñekevrantávape ha oñeñandúvape yvýre” (Sal. 34:18). Reñeñandu jave yvýre ikatu repensa ndaiporiha avave ikatúva nentende ha nepytyvõ, péro Jehová opromete oĩtaha nde ykére oikuaágui péicha jave reikotevẽtereiha hese. Ótro Sálmope David heʼi vaʼekue avei: “Ñandejára, embyatymína umi che resay ne mbaʼyrúpe” (Sal. 56:8). Yma umi oviaháva ogueraha vaʼekue y peteĩ mbaʼyrúpe ha oñongatu porã pe y pórke ivaliosoiterei pe viáhepe g̃uarã. Péicha avei jahasa asy jave haʼete voi Jehová oñongatúva ñande resay peteĩ mbaʼyrúpe pórke ñandevaliosoiterei chupe g̃uarã. Péva ohechauka Jehová ojepyʼapyha nderehe ha ombyasyetereiha rehasa asy jave. Avei Salmo 139:3 heʼi: ‘Ñandejára, nde reikuaapa la che ajapóva’. Jehová ningo ohecha entéro mbaʼe rejapóva, péro haʼe ojesareko umi mbaʼe porã rejapóvare (Heb. 6:10). ¿Mbaʼérepa? Pórke haʼe omombaʼeterei la rejapóva guive rembovyʼa hag̃ua chupe.a

⁸ Koʼã versíkulo ningo iporãiterei ha haʼete voi Jehová heʼíva ndéve: “Che ningo rohayhu ha ajepyʼapyeterei nderehe”. Péro jahecháma haguéicha Satanás oipota eguerovia Jehová nanderayhuiha. Sapyʼánte oúramo upéva ne akãme, ekalkulamíntena: Satanás ningo haʼe pe “japu ruvicha” ha Jehovágui katu ou “pe añetegua”. Upévare, ¿mávapepa egueroviáta? ¿Satanáspe térã Jehovápe? (Juan 8:44; Sal. 31:5).

9. ¿Mbaʼépa Jehová opromete umi ohayhúvape chupe? (Éxodo 20:​5, 6, nóta).

⁹ Epensa memékena la Jehová oñandúvare umi ohayhúvare chupe. Jahechamína la Jehová heʼi vaʼekue Moiséspe ha umi israelítape (elee Éxodo 20:​5, 6, nóta). ¿Mbaʼépa Jehová opromete umi ohayhúvape chupe? Haʼe heʼi osegitaha imbaʼeporãiterei hendivekuéra ha ohechaukataha chupekuéra pe mborayhu ifiélva. Jehová ifiél rupi, katuete ohayhúta umi ohayhúvape chupe (Neh. 1:5). Upévare sapyʼánte ijetuʼúramo ndéve eguerovia hag̃ua Jehová nderayhuha, eñeporandumína: “¿Che piko ahayhu Jehovápe?”. Oimérõ nde rehayhu chupe ha eñehaʼã ejapo ikatumíva embovyʼa hag̃ua Ñandejárape, ¿mbaʼére piko edudáta Jehová nderayhuha? (Dan. 9:4; 1 Cor. 8:3). Nde reĩramo segúro rehayhuha Jehovápe, ¿mbaʼére piko redudáta haʼe nderayhuha avei? Jehová nderayhu ha ni núnka nanderejamoʼãi neaño.

10, 11. ¿Mbaʼépa la Jehová nemboʼeséva pe rreskátere? (Gálatas 2:20).

¹⁰ Ejepyʼamongeta pe rreskátere. Jehová omeʼẽ vaʼekue Itaʼýra omano hag̃ua ñanderehehápe ha péicha ñanderreskata, upéva la rregálo iporãvéva Jehová omeʼẽva umanokuérape (Juan 3:16). ¿Péro ikatúpa jaʼe Jehová omondo hague Itaʼýrape omano hag̃ua nderehehápe? Kláro ke si. Ñanemanduʼamína apóstol Páblore. Haʼe ojapo vaʼekue heta mbaʼe vai oiko mboyve chugui kristiáno, ha upe rire jepe osegi vaʼekue olucha ani hag̃ua ojapo umi mbaʼe vai ostiráva chupe (Rom. 7:​24, 25; 1 Tim. 1:​12-14). Upéicharamo jepe Pablo oĩ vaʼekue segúro Jehová omeʼẽ hague Itaʼýra rekove hesehápe voi (elee Gálatas 2:20). Jehová voi la oskrivika vaʼekue upéva Páblope ha oĩ la Bíbliape pórke Jehová ñanemboʼese álgo iñimportánteva (Rom. 15:4). ¿Mbaʼépa la Jehová nemboʼeséva? Haʼe oipota eguerovia Jesús sakrifísio haʼeha peteĩ rregálo ndéve g̃uarã ha repensáramo upéicha reĩvétantema segúro Jehová nderayhuetereiha.

¹¹ Jaagradeseterei ningo Jehovápe ombou haguére Itaʼýrape omano hag̃ua ñanderehehápe. Péro Jesús ningo ndahaʼéi upearãnte la ou vaʼekue ko yvy ape ári, síno haʼe ou vaʼekue avei omombeʼu hag̃ua mbaʼeichaguápa añetehápe Ñandejára, por ehémplo haʼe omboʼe vaʼekue mbaʼeichaitépa Jehová ñanderayhu (Juan 18:37).

LA JESÚS OMBOʼE VAʼEKUE OHECHAUKA JEHOVÁ NDERAYHUETEREIHA

12. ¿Mbaʼérepa jaʼekuaa siertoha la Jesús heʼi vaʼekue Itúare?

¹² Jesús oĩrõ guare ko yvy ape ári vyʼápe omombeʼu vaʼekue la héntepe mbaʼeichagua Dióspa Jehová (Luc. 10:22). Ha ñande ikatu jajerovia la Jesús heʼi vaʼekuére Jehováre. ¿Mbaʼérepa? Pórke Jesús la oiko areve vaʼekue Itúandi yvágape ha upévare oikuaa porãiterei chupe (Col. 1:15). Jesús voi oikuaáma kuri mbaʼeichaitépa Itúa ohayhu chupe ha avei ohecha mbaʼeichaitépa Itúa ohayhu entéro umi ifamília iñeʼẽrendúvape chupe, tahaʼe umi oĩvape yvágape ha ko yvy ape ári. Jahechamína mbaʼéichapa la Jesús omboʼéva ikatu ñanepytyvõ ñaĩ hag̃ua segúro Jehová ñanderayhuha.

13. ¿Mbaʼéichapa Jesús oipota jahecha Jehovápe?

¹³ Jesús oipota jaikuaa Jehová ñanderayhuha peteĩ Túaicha. Upévare umi lívro de Mateo, Marcos, Lucas ha Juánpe Jesús oipuru vaʼekue 160 véserupi pe palávra “Ru” térã “Túa” oñeʼẽrõ guare Jehováre. Jesús heʼi vaʼekue idisipulokuérape Jehová haʼeha Ituakuéra heʼívo chupekuéra: “Pende Ru oĩva yvágape” (Mat. 5:16; 6:26). Pe nóta de estúdio oĩva Mateo 5:​16-pe heʼi: “Yma Ñandejára siervokuéra oipuru vaʼekue heta título tuichaicháva oñeʼẽ hag̃ua Jehováre térã oñeʼẽ jave hendive. Por ehémplo heʼi vaʼekue hikuái: ‘Ñandejára Todopoderóso’, ‘Ñandejára Ndaijojaháiva’ ha ‘Apohare Ijojahaʼỹva’. Péro Jesús pyʼỹinte oipuru vaʼekue pe palávra ‘Ru’ ha upéva ningo tuicha isensillove. Upéva ohechauka porã mbaʼéichapa Ñandejára oñemoag̃ui umi isiervokuérare” (Traducción del Nuevo Mundo españólpe). Upéicharõ, ¿mbaʼépa la Jesús ñanemboʼeséva? Haʼe ohechauka Jehová ñanderayhuetereiha peteĩ Túa ohayhuetereiháicha ifamiliamíme. Jahechamína mokõi ehémplo Jesús oipuru haguépe pe palávra Ru.

14. ¿Mbaʼéichapa Jesús ohechauka vaʼekue káda uno ñandevaliosoitereiha ñande Ru yvagapeguápe g̃uarã? (Mateo 10:​29-31). (Ehecha pe taʼanga).

¹⁴ Primero jahechamína la Jesús heʼi vaʼekue Mateo 10:​29-31-pe (elee). Peteĩ gorrión ningo peteĩ guyraʼi michĩetereíva ha Jesús heʼi vaʼekue ñande Ru yvagapegua oikuaa porãitereiha moõpa oĩ káda gorrión. Péro umi guyraʼi ningo ndoadorái ni ndohayhúi Jehovápe. Upévare epensamíntena: Jehovápe g̃uarã iñimportánteramo koʼã guyraʼi michĩetéva, koʼytevéntema oñeinteresáta ñanderehe pórke ñande jahayhu ha jaadora chupe. Upe téxtope avei Jesús heʼi vaʼekue: ‘Umi pene akãrangue jepe pende Ru oĩva yvágape okontapa’. Upéva heʼise Jehová ñandekuaa porãitereiha, haʼe oikuaa ñandehegui umi mbaʼe michĩvéva jepe, upévare ikatu ñaĩ segúro Jehová oñeinteresaitereiha ñanderehe. Péicha jahecha Jesús oipotaitereiha jaikuaa ñandevaliosoitereiha ñande Ru yvagapeguápe g̃uarã.

15. ¿Mbaʼépa ñanemboʼe Juan 6:44?

¹⁵ Jahechamína avei mbaʼépa Jesús omboʼe vaʼekue ñande Ru Jehová ojapoha (elee Juan 6:44). Jahechaháicha nde Ru yvagapegua nepytyvõ reikuaa ha rehayhu hag̃ua chupe. ¿Mbaʼérepa haʼe nemoag̃ui vaʼekue ijehe? Haʼe ojapo upéva pórke ohecha nde ndepyʼaporãha (Hech. 13:48). Jesús heʼírõ guare la oĩva Juan 6:​44-pe provávlemente imanduʼa kuri la Jehová heʼi vaʼekuére Jeremías 31:​3-pe. Upépe Jehová heʼi ipuévlope: “Che rohayhueterei rupi romoag̃ui cherehe” (ekompara Oseas 11:4 heʼívare). ¿Mbaʼépa upéva heʼise? Ñande Ru yvagapegua ñanderayhuetéva siémpre ohecha ñanderehe umi mbaʼe porã jarekóva, umi mbaʼe ni ñande ndajahecháiva ñandejehe.

16. a) ¿Mbaʼépa Jesús ñanemboʼe ha mbaʼérepa jaguerovia vaʼerã chupe? b) ¿Mbaʼépa ikatu nepytyvõ reĩ hag̃ua segúro Jehová haʼeha nde Ru ndaijojaháiva? (Ehecha pe rrekuádro “Entéronte oikotevẽ peteĩ Túa peichagua”).

¹⁶ Péicha jahecha Jesús nemboʼeseha Jehová ndahaʼeiha Itúante síno haʼeha nde Ru avei. Jesús oasegura ñandéve Jehová ñanderayhuetereiha ha oñeinteresaha káda únore voi. Upévare sapyʼánte epensáramo Jehová nanderayhuiha, nemanduʼákena la Jesús heʼi vaʼekuére ha egueroviákena chupe. Jesús ningo siémpre heʼi vaʼekue la verda ha avei haʼe la oikuaa porãvéva ñande Ru yvagapeguápe (1 Ped. 2:22).

EÑEHAʼÃMBAITÉKENA ESEGI HAG̃UA EGUEROVIA JEHOVÁ NDERAYHUHA

17. ¿Mbaʼérepa ñañehaʼãmbaite vaʼerã jasegi hag̃ua jaguerovia Jehová ñanderayhuha?

¹⁷ Tekotevẽ ningo jajapo ikatúva guive ani hag̃ua jaduda Jehová ñanderayhuha. Ñanemanduʼa vaʼerã Satanás oñehaʼãha ipy ha ipópe ñandejoko anivéma hag̃ua jaservi Jehovápe. Haʼe ñanemokangyse ha upearã osegi oñehaʼã ogueroviaka ñandéve Jehová nañanderayhuiha, upévare aníkena jaguerovia chupe ha jaheja osẽ ijidéape (Job 27:5).

18. ¿Mbaʼépa ikatu resegi rejapo ani hag̃ua reduda Jehová nderayhuha?

¹⁸ Ko artíkulope jahecháma mbaʼépa ikatu rejapo reĩ hag̃ua segúro Jehová nderayhuetereiha. Por ehémplo ikatu reñemboʼe ha ejerure chupe tanepytyvõ rehecha hag̃ua umi mbaʼe porã haʼe voi ohecháva nderehe ha ikatu ejepyʼamongeta umi téxto bíblico ohechaukávare Jehová ohayhuetereiha isiervokuérape. Nemanduʼákena avei Jehová siémpre ohayhutaha umi ohayhúvape chupe. Aníkena nderesarái pe rreskáte haʼeha peteĩ rregálo Jehová omeʼẽva ndéve g̃uarãite. Ikatu reĩ segúro Jehová haʼeha nde Ru yvagapegua Jesús heʼi haguéicha. Upévare, oĩramo oporandúva ndéve: “¿Ndépa ere Jehová nderayhuha?”, katuete edudaʼỹre eréta: “¡Si, haʼe cherayhueterei, ha che avei káda día añehaʼãmbaite ahechauka ahayhuha chupe!”.