Oñenombra mokõi ermánope oĩ hag̃ua pe Kuérpo Governántepe

PE SÁBADO 5 de octubre de 2024-pe, ojejapo peteĩ anúnsio espesiál pe rreunión anuálpe: Umi ermáno héravape Jody Jedele ha Jacob Rumph oñenombra miémbro del Kuérpo Governánte de los testigos de Jehová. Koʼã mokõi ermáno oservíma Jehovápe fiélmente heta áñore.

Ermáno Jedele onase Misúripe (Estados Unidos). Ituakuéra oipytyvõ vaʼekue chupe oikuaa hag̃ua Jehovápe. Pe lugár haʼekuéra oikohápe oĩ vaʼekue saʼieterei Testígo. Péro ermáno Jedele ikatu vaʼekue oikuaa heta ermánope, pórke umi ermáno oikóva diferénte lugárpe upe paíspe oumi vaʼekue oipytyvõ chupekuéra predikasiónpe. Ohechávo mbaʼeichaitépa umi ermáno ojoayhu ha oĩ unído, upéva opokoiterei vaʼekue hese. Haʼe ojevautisa el 15 de octubre de 1983, ha ogustaiterei chupe la predikasión. Upévare otermina riremi ikoléhio, oñepyrũma oservi de prekursór rregulár, septiembre de 1989 guive.

Ermáno Jedele ha iñermána michĩrõ guare, ituakuéra orahámi vaʼekue chupekuéra Betélpe. Umi visíta ojapóva hikuái omokyreʼỹ umi mitãme omoĩ hag̃ua méta oservi hag̃ua Betélpe, ha mokõivéva ohupyty upéva. Septiembre de 1990-pe ermáno Jedele oñepyrũ oservi Betel de Wállkillpe. Oñepyrũ ombaʼapo Departaménto de Limpiésape ha upéi katu Servicios Médicospe.

Upe tiémpope, upe sónape oĩ vaʼekue heta kongregasión idióma españólpe. Umíva okakuaa voi ohóvo ha upévare oñekotevẽ kuimbaʼe oservi vaʼerã upépe. Upéicha rupi ermáno Jedele oho oservi peteĩva umi kongregasiónpe, ha péicha oaprende español. Upe riremínte oikuaa Dámarispe, peteĩ prekursóra oservíva isirkuítope. Kon el tiémpo omenda hikuái ha Dámaris oho avei oservi hendive Betélpe.

Año 2005-pe haʼekuéra osẽmante Betélgui oñatende hag̃ua hikuái ituakuéra rehe. Upe aja mokõivéva oservi de prekursór rregulár. Ermáno Jedele oservi de instruktór heta vése pe Eskuéla de Prekursórpe. Upéi haʼe oservi pe Comité de Enlace con los Hospitales ndive, ha avei pe Comité Regional de Construcción ndive.

Año 2013-pe ermáno Jedele ha hembirekópe oñeinvita jey oservi hag̃ua Betélpe, péro ko vuéltape pe konstruksión de Wárwickpe. Upe rire oservi avei hikuái Patterson ha Wállkillpe. Ermáno Jedele ombaʼapo avei pe Departamento Local de Diseño y Construcciónpe ha avei pe Servicios de Información sobre Hospitales ndive. Marzo de 2023-pe oñenombra chupe ajudánte del Comité de Servísio. Oñeʼẽvo umi asignasión oreko vaʼekuére ermáno Jedele heʼi: “Avése ipohyieterei ñandéve peteĩ asignasión pyahu. Péro upe jave ñanemanduʼa vaʼerã iñimportantetereiha ñakonfia Jehováre, pórke haʼe rupivénte voi jajapo opa mbaʼe haʼe ojeruréva ñandéve”.

Ermáno Rumph onase Califórniape (Estados Unidos). Haʼe michĩrõ guare isy oĩ kuri inaktíva, upéicharõ jepe haʼe oñehaʼã omboʼe imembýpe pe añetegua oĩva la Bíbliape. Káda áño ermáno Rumph ovisitámi ijavuélape, haʼéva peteĩ ermána ojerovia mbaretéva. Ijavuéla oipytyvõ vaʼekue chupe oñeinteresa hag̃ua la Biblia omboʼévare, upévare haʼe orekópe 13 áño ojerure peteĩ kúrso bíblico. Upéi haʼe imitãrusuete reheve voi ojevautisa el 27 de septiembre de 1992. Avei isy orreaktiva jey ha ifamília kompletoite oñepyrũ oprogresa ha ojevautisa.

Imitã reheve voi ermáno Rumph ohecháma mbaʼeichaitépa ovyʼa umi prekursór. Upévare oterminamíre ikoléhio omoñepyrũma iprekursorádo septiembre de 1995-pe. Año 2000-pe haʼe ova Ecuadórpe, peteĩ lugár oñekotevẽhápe opredika vaʼerã. Upépe oikuaa peteĩ prekursóra héravape Inga ou vaʼekue Canadágui, ha kon el tiémpo omenda hikuái. Omenda riremi oñepyrũ oservi hikuái peteĩ puévlope Ecuadórpe, oĩháme peteĩ grúpo de puvlikadór michĩmívante. Koʼág̃a g̃uarã, upe grupoʼígui oikóma peteĩ kongregasión tuicháva.

Kon el tiémpo oñenombra chupekuéra prekursór espesiál, ha upéi katu oservi de superintendénte de sirkuíto. Año 2011-pe oñeinvita hikuái oho hag̃ua Eskuéla de Galaádpe pe kláse 132-pe. Ojegradua rire oñemondo chupekuéra diferénte paíspe, ha umírupi oservi hikuái Betélpe, de misionéro ha de superintendénte de sirkuíto. Ermáno Rumph oservi avei kuri de instruktór pe Eskuéla de Evanhelisadórpe.

Pe pandémia de COVID-19 káusare oho jey kuri hikuái Estados Unídospe. Upérõ oñeasigna chupekuéra oservi hag̃ua Betel de Wállkillpe. Upépe ermáno Rumph ojekapasita pe Departaménto de Servísiope. Upe rire oñemondo chupekuéra Ecuadórpe, ha ermáno Rumph oservi kuri pe komite de sukursálpe. Año 2023-pe oñeasigna chupekuéra Wárwickpe, ha enero de 2024-pe oñenombra chupe ajudánte del Komite de Servísio. Imanduʼávo umi lugár ha asignasión oreko vaʼekuére, ermáno Rumph heʼi: “La iñimportantevéva ndahaʼéi voi moõpa jaservi Jehovápe, síno mávandipa jaservi: Ñane ermanokuérandi”.

Javaloraiterei ningo pe traváho ojapóva koʼã ermáno ha siémpre ñamombaʼe chupekuéra (Filip. 2:29).