¿Mbaʼérepa umi testígo de Jehová ojapo pe Séna del Señór diferénte umi ótro rrelihióngui?
Pe Séna del Señórpe oñehenói avei Última Séna térã “Jesucristo séna” (1 Corintios 11:20; Ñande Ruete Ñeʼẽ Bíblia). Ha ore roñehaʼãmbaite rojapo upéva la Bíbliape oĩhaichaite. Péro heta umi mbaʼe ojapo ha ogueroviáva umi ótro rrelihión noĩri la Bíbliape.
Maʼerãpa ojejapo
Pe Séna del Señór ningo ojejapo ojegueromanduʼa hag̃ua Jesúspe. Péicha ojehechauka ojeagradeseha pe sakrifísio haʼe ojapo vaʼekue ñanderehehápe (Mateo 20:28; 1 Corintios 11:24). Ko séna ndahaʼéi peteĩ sakraménto, térã peteĩ mbaʼe jajapóva ñaime porã hag̃ua Ñandejárandi térã oñeperdona hag̃ua ñande pekádo.a La Biblia omboʼe ñande pekadokuéra oñeperdonataha jajeroviáramo añoite Jesúsre, ha ndahaʼéi jasegi rupi peteĩ kostúmbre rrelihiósa (Romanos 3:25; 1 Juan 2:1, 2).
Káda mboýpa ojejapo vaʼerã
Jesús heʼi vaʼekue idisipulokuérape ojapo vaʼerãha pe Séna del Señór, péro ndeʼíri káda mboýpa ojapo vaʼerã hikuái upéva (Lucas 22:19). Oĩ opensáva ojejapo vaʼerãha káda mes, ótro katu káda semána, káda día, térã heta vése voi un díape. Ha oĩ avei heʼíva káda uno ojapo vaʼerãha asegún ohecha iporãvetaha. Péro jahechamína mbaʼépa heʼi la Biblia upévare.
Jesús omoñepyrũ vaʼekue pe Séna del Señór la mísma fécha ojejapohápe pe Páskua Hudía, ha omano avei upe díape (Mateo 26:1, 2). Ndahaʼéi ningo kavaleténte okoinsidíva upe féchare, síno upéicha vaʼerã voi kuri, pórke Jesús sakrifísio oñekompara pe ovecharaʼy ojejukávare pe Páskua jave (1 Corintios 5:7, 8). Pe Páskua ningo ojejapo vaʼekue unave al áño (Éxodo 12:1-6; Levítico 23:5). Upévare umi kristiáno yma guare ojapo vaʼekue pe Séna del Señór unave al áño, ha ore testígo de Jehová rosegi iñehemplokuéra.b
Fécha ha óra
Pe ehémplo Jesús oheja vaʼekue ñanepytyvõ avei jaikuaa hag̃ua mbaʼe óra ha mbaʼe féchapa ojejapo vaʼerã pe Séna del Señór. Haʼe ningo ojapo vaʼekue pe séna áño 33-pe, oike rire kuarahy el 14 de nisán, según pe kalendário lunár oipuru vaʼekue umi hudío (Mateo 26:18-20, 26). Ore rosegi rojapo pe Séna del Señór upe féchape káda áño, ojapo haguéicha avei umi kristiáno yma guare.c
Pe 14 de nisán áño 33-pe ningo hoʼa vaʼekue peteĩ viernes, péro pe aniversário upe féchagui ikatu hoʼa diferénte día káda áño. Pe fécha ore rojapoha pe Séna del Señór ojoavyʼimi jepi pe día umi kalendário hudío koʼag̃agua omarkaha el 14 de nisán, pórke Jesús tiémpope ojekalkula diferénte vaʼekue arakaʼetépa oñepyrũ upe mes, ha ore rojesegi gueteri upévare.d
Pan ha víno
Jesús oipuru vaʼekue pan ilevaduraʼỹva ha víno tínto hemby vaʼekue pe Páskuagui ojapo hag̃ua pe séna (Mateo 26:26-28). Ore rosegi iñehémplo ha roipuru pan ndorekóiva levadúra ni ótro ingrediénte. Roipuru avei víno tínto, ndahaʼéi húgo de úva ni víno oñemoĩva pype ingrediénte heʼẽve térã imbareteve hag̃ua.
Oĩ rrelihión oipurúva pan ilevadúrava, péro pe levadúra ojepuru jepi la Bíbliape oñekompara hag̃ua pe pekádore térã peteĩ mbaʼe oñembyaívare (Lucas 12:1; 1 Corintios 5:6-8; Gálatas 5:7-9). Jesús ningo núnka ndopekái vaʼekue. Upévare, pe pan orrepresenta porã hag̃ua hetekue, ndorekói vaʼerã levadúra ni ótro ingrediénte (1 Pedro 2:22). Oĩ avei hoʼúva húgo de úva pe víno rangue, péro upéva ndohói avei la Biblia heʼívare. Algúno rrelihiónpe ojejapo upéicha ojeproivígui ojeʼu oimehaichagua vevída, péro la Biblia ndoproivíri upéva (1 Timoteo 5:23).
Pe pan ha vínogui ndoikói Jesús rete ha huguy
Pe pan ilevaduraʼỹva ha pe víno ningo ojepuru pe Séna del Señórpe orrepresenta hag̃ua Jesús rete ha huguy. Ndahaʼéi pe pan ha vínogui oikóva voi hete ha huguy peteĩ milágro rupive, térã oñembojeheʼáva umívare, opensaháicha algúno. ¿Mbaʼérepa jaʼe upéva?
Jesús heʼírire idisipulokuérape hoʼu vaʼerãha huguy ohóta kuri Ñandejára léi kóntrape, pórke pe Léi oproivi ojeʼu tuguy (Génesis 9:4; Hechos 15:28, 29). Péro Jesús núnka ndeʼíriva avavépe natekotevẽiha osegi pe léi heʼíva ojerrespeta vaʼerãha pe tuguy (Juan 8:28, 29).
Jesús heʼi pe víno orrepresentaha pe tuguy “oñeñohẽtava oñeperdona hag̃ua hetápe ipekádo”, pórke haʼe neʼĩra gueteri kuri ojesakrifika upérõ. Upévare ndaikatúi jaʼe pe víno hoʼu vaʼekue umi apóstol haʼe hague Jesús ruguy (Mateo 26:28).
Jesús sakrifísio ojejapo “una ves ha opa ára g̃uarã” (Hebreos 9:25, 26). Péro oimérire pe víno ha pe pángui oiko voi Jesús ruguy ha hete pe Séna del Señórpe, pe sakrifísio ojerrepetíta hína káda ke ojejapo pe séna.
Jesús heʼi vaʼekue: “Pesegíkena pejapo kóva penemanduʼávo cherehe”. Upéicharõ, haʼe ndeʼíri pe sakrifísio ojejapo jey jeytaha káda ke ojejapo pe séna (1 Corintios 11:24).
¿Mbaʼérepa upéicharõ oĩ ogueroviáva pe víno ha pe pángui oikoha Jesús ruguy ha hete? Oĩ heʼíva algúno versíkulo oĩva la Bíbliape oapojaha upéva. Por ehémplo, heta Bíbliape oĩ Jesús heʼi hague pe víno rehe: “Kóva niko che ruguy” (Mateo 26:28). Péro heta expérto ohechakuaa Jesús ndeʼiséi hague pe víno haʼeha huguy térã pe pan haʼeha hete. Por ehémplo, Jacques Dupont heʼi iporãvetaha ojetradusíramo la Jesús heʼi vaʼekue pe pan rehe: “Kóva heʼise hína che rete”, térã “Kóva orrepresenta che rete”. Jesús ningo heta vése oipuru vaʼekue ehémplo oporomboʼe hag̃ua, ha upéva la ojapóva hína kuri upérõ guare (Mateo 13:34, 35).
¿Mávapa hoʼu vaʼerã pe pan ha víno?
Umi testígo de Jehová ojapo jave pe Séna del Señór, algúnonte ijapytepekuéra hoʼu pe pan ha víno. ¿Mbaʼérepa upéva?
Ñandejára Jehová ningo ojapo vaʼekue peteĩ kompromíso pe puévlo de Israel ndive, péro Jesús ruguy rupive ojejapo peteĩ “kompromíso pyahu” (Hebreos 8:10-13). Umi oikéva pe kompromíso pyahúpe hoʼu pe pan ha víno pe Séna del Señórpe. Péro ndahaʼéi entéro Jesús disípulo oĩva upe grúpope, síno “umi ojeporavo vaʼekue” ojapo hag̃ua peteĩ traváho espesiál (Hebreos 9:15; Lucas 22:20). Haʼekuéra ogovernáta yvágape Jesús ndive, ha la Biblia heʼi 144.000 persónante orekotaha upe priviléhio (Lucas 22:28-30; Apocalipsis 5:9, 10; 14:1, 3).
Umi ogovernátavape Jesúsndi oñehenói “ovechakuéra mbovymi”, péro oĩ avei ótro grúpo. La Biblia oñeʼẽ peteĩ ‘aty guasúre’ oikótava pára siémpre ko yvy ape ári, ha la majoría umi oservíva Ñandejárape oĩ upe grúpope (Lucas 12:32; Apocalipsis 7:9, 10). Umi oikótava ko yvy ape ári ndoʼúi pe pan ha pe víno, péro lomímonte oĩ pe Séna del Señórpe ohechauka hag̃ua oagradesetereiha pe sakrifísio Jesús ojapo vaʼekue (1 Juan 2:2).
a Pe lívro El Espíritu Santo, la Iglesia y los sacramentos, páhina 12, heʼi: “[Ñandejára Ñeʼẽme] ndojepurúi pe palávra ‘sakraménto’, síno ojepuru pe palávra ‘mistério’. [...] Péro ni peteĩ pártepe pe Nuevo Testaméntope ndojepurúi pe palávra mistério oñeñeʼẽ hag̃ua pe vautísmore ni pe Eukaristía rehe [haʼéva hína pe Séna del Señór]”.
b Ehecha The New Schaff-Herzog Encyclopedia of Religious Knowledge, volúmen IV, páhina 43, 44, ha McClintock and Strong’s Cyclopedia, volúmen VIII, páhina 836.
c Ehecha The New Cambridge History of the Bible, volúmen 1, páhina 841.
d Umi kalendário hudío koʼag̃agua omoñepyrũ pe mes de nisán og̃uahẽ jave pe lúna nuéva astronómika, upéva heʼise hína pe jasy ndojekuaaiete jave. Péro umi hénte Jesús tiémpope guare ndojapói vaʼekue upéicha, chupekuéra g̃uarã pe mes de nisán oñepyrũ vaʼekue pe primer día ojekuaaha pe jasyraʼy Jerusalénpe. Upéva ikatu oiko un día térã hetave día og̃uahẽ rire pe lúna nuéva astronómika. Upévare pe fécha umi testígo de Jehová ojapoha pe Séna del Señór ha pe fécha umi hudío ojapoha pe Páskua sapyʼánte nokoinsidíri.