¿Mávapa pe arkánhel Miguel?

Mbaʼépa omboʼe la Biblia

Miguel, algúno rrelihiónpe oñehenóiva “San Miguel”, haʼe hína ótro téra oreko vaʼekue Jesús ou mboyvéma voi ko yvy ape ári, ha orekóitiva koʼág̃a peve.a Miguel oiko vai vaʼekue Satanás ndive Moisés omano rire, ha oipytyvõ avei kuri peteĩ ánhelpe omog̃uahẽ hag̃ua Ñandejára mensáhe pe proféta Daniélpe (Daniel 10:13, 21; Judas 9). Pe téra Miguel heʼise hína “¿Máva piko ikatu ohupyty Ñandejárape?”. Ha ikatu jaʼe hoʼaitereiha hese la héra pórke Miguel oñemoĩ Ñandejára kontrariokuérare, ha odefende pe derécho Ñandejára orekóva ogoverna hag̃ua (Daniel 12:1; Apocalipsis 12:7).

Jahechamína mbaʼérepa isentído porãiterei jaʼe Jesús haʼeha pe arkánhel Miguel.

• Miguel haʼe hína “pe arkánhel” (Judas 9). Péva pe título heʼise hína “umi anhelkuéra ruvicha”, ha oaparese la Bíbliape mokõi versíkulopente. Ni peteĩva koʼã kásope ndeʼíri oĩha heta arkánhel, síno oñeʼẽ peteĩrente, ha upéva ohechauka pe yvágape oĩha peteĩnte la orekóva ko título. Peteĩva koʼã versíkulope oñeʼẽ voi diréktamente Jesús rehe, ha heʼi: “Oguejýta yvágagui ha hatã osapukáita ojapoháicha peteĩ arkánhel” (1 Tesalonicenses 4:16). Jesús osapukáita ojapoháicha peteĩ arkánhel, pórke haʼe voi pe arkánhel Miguel.

• Miguel haʼe hína pe komandánte omandáva umi ehérsito de ánhel rehe. La Biblia heʼi voi mbaʼépa oiko yvágape peteĩ vuéltape: “Miguel ha hiʼanhelkuéra oñorairõ pe dragón kóntrape”, haʼéva Satanás (Apocalipsis 12:7). Jaikuaa avei Miguel orekoha tuicha autorida yvágape, pórke ojeʼe hese haʼeha “peteĩva umi prínsipe iñimportánteva”, térã katu diréktamente voi “pe prínsipe iñimportantevéva” (Daniel 10:13, 21; 12:1). Según peteĩ expérto ostudiáva pe Nuévo Testaménto, upéva heʼise hína Miguel haʼeha “pe komandánte prinsipál orekóva umi ánhel”.

  La Bíbliape sólamente Jesús rehe la ojeʼe avei orekoha peichagua autorida yvágape. Pype ojeʼe voi ‘ñande Ruvicha Jesús ojechaukataha yvága guive tatarendýpe hiʼanhelkuéra ipoderósovandi’ (2 Tesalonicenses 1:7, 8; Mateo 16:27). Jesús ningo “oho yvágape, ha oñemoĩ ipoguýpe umi ánhel, autoridakuéra ha umi podér” (1 Pedro 3:21, 22). Legálmente ningo naisentidomoʼãi Ñandejára omoĩramo Miguélpe haʼe hag̃ua umi ánhel ruvicha, ha upéi omoĩ avei Jesúspe opuʼã hag̃ua ojuehe hikuái. Upéva rangue, isentidove ñapensáramo koʼã mokõi téra, Jesús ha Miguel, en rrealida oñeʼẽnteha la mísma persónare.

• Miguel “opuʼãta oñemboʼy” peteĩ “tiémpo ojeiko asytahápe” (Daniel 12:1). Lívro de Daniélpe ojepuru jave pe fráse “opuʼã oñemboʼy”, heʼise jepi peteĩ rréi ojepreparaha ojapo hag̃ua álgo iñimportánteva (Daniel 11:2-4, 21). Jesucristo, oñehenóiva avei “Ñandejára Ñeʼẽ”, haʼe hína pe “Rréi omandavéva entéro umi ótro rréigui”, ha ojapóta álgo iñimportantetereíva ohundipa vove Ñandejára enemigokuérape ha oprotehe ipuévlope (Apocalipsis 19:11-16). Haʼe ojapo vove upéva “oikóta peteĩ jehasa asy guasu. Ko múndo oñepyrũ guive koʼág̃a peve núnka ndoikóiva péicha” (Mateo 24:21, 42).