AJÉPA igustoite umi diskursánte oiporu jave ehémplo. Umíva opoko ñane sentimiéntore ha opytaite ñane akãme. Umi ehémplo rupive pe informasión og̃uahẽ ñane korasõme, ñanepytyvõ ñakambia hag̃ua ñapensa lája ha jajepyʼamongeta hag̃ua ñandejehe. ¿Reñehaʼãpa avei nde reiporu ehémplo reporomboʼe jave?

Umi ehémplo ha komparasión ojeporu jepi ojerresalta hag̃ua peteĩ enseñánsa, umíva rupive ñañeimahina ha haʼete voi jahecháva upe ojeʼéva ñandéve. Umíva ndaijetuʼúi jepi oñentende hag̃ua, péro remyesakãʼimíramo mbaʼépa heʼise, koʼýte pe enseñánsa opyta porãvéta umi nerendúva akãme. La Bíbliape jatopa hetaiterei ehémplo koʼãichagua.

Ekompara térã emombeʼu mbaʼépepa idiferénte ojuehegui umi kósa. Nderejepokuaáiramo reiporu ehémplo iporãta reaprende raẽ mbaʼéichapa ikatu rejapo komparasión, upéva ifasilve hína. Upearã ojeporu jepi koʼã palávra: “haʼete”, “ojogua”, “upéicha avei” ha hetave palávra koʼãichagua. Umi komparasión rupive oñemyesakã mbaʼépepa ojojogua mokõi mbaʼe idiferénteva. La Bíbliape heta vése ojeporu umi plánta, animalkuéra, térã umi estrélla ojejapo hag̃ua komparasión. Por ehémplo Salmo 1:3-pe heʼi umi olee meméva Ñandejára Ñeʼẽ ojoguaha ‘peteĩ yvyramáta oñeñotỹvape y rembeʼýpe, hiʼáva itiémpope ha ndahoguemanóiva’. Umi iñañávare katu ojeʼe opeskaha ñanderehe ojapoháicha ‘peteĩ león’ (Sal. 10:9). Ha Jehová opromete vaʼekue Abrahánpe: “Ambohetaitereíta ndéve ne ñemoñare umi estrélla yvagapeguáicha ha pe yvykuʼi már rembeʼypeguáicha” (Gén. 22:17). Ha omombeʼúrõ guare mbaʼeichaitépa ohayhu ha otrata porã umi isrraelítape, Jehová heʼi: ‘Peteĩ kuimbaʼe ojopyháicha isínto ikuʼáre, upéicha amoag̃ui chejehe Israel ha Judápe’ (Jer. 13:11).

Jesús heta vése omombeʼu mbaʼépepa ojojogua mokõi mbaʼe idiferénteva ojuehegui. Por ehémplo heʼi vaʼekue: “Peẽngo mbaʼerendýicha hína ko múndope” (Mat. 5:14). Ha omombeʼúrõ guare mbaʼeichaitépa ikatu operhudika ñande rapichápe umi mbaʼe jaʼéva, Santiago heʼi: “Ñande juru ningo ojogua tatápe” (Sant. 3:6). Ha David opurahéivo Jehovápe heʼi: ‘Nde hína peteĩ ita guasu, pe lugár añemoʼãha’ (Sal. 31:3). Reiporúramo koʼã komparasión natekotevẽi voi remyesakã oñentende hag̃ua, ha umi nerendúva imanduʼa porãvéta pe enseñánsare.

Oĩ vése ikatuhápe rexahera peteĩ mbaʼe oñentende porãve hag̃ua pe remboʼeséva. Jesús ojapómi vaʼekue upéicha, peteĩ jey haʼe heʼi umi héntepe: “¿Maʼerãpa repena pe kapiʼi oĩvare ne ermáno resápe, péro nderehechái pe víga oĩva nde resápe?” (Mat. 7:3). Upéicha umi hénte ndahesaráiri pe púnto omboʼese vaʼekuégui. Péro reiporu mboyve peichagua ehémplo, reñehaʼã raẽ vaʼerã reiporukuaa umi komparasión.

Emombeʼu peteĩ káso térã peteĩ ehémplo. Remombeʼukuaa avei peteĩ káso oiko vaʼekue, téra ndénte reñeimahináva. Péro umíva reiporu vaʼerã sapyʼapyʼánte ha hendaitépe, por ehémplo remyesakã hag̃ua peteĩ púnto iñimportánteva. Ha reiporu porãramo, umi hénte imanduʼáta pe enseñánsa remyesakã vaʼekuére, ha ndahaʼéi pe káso remombeʼu vaʼekuérente.

Ikatúramo jepe remombeʼu umi káso ndénte reñeimahináva, reñehaʼã vaʼerã remombeʼu umi situasión ohasáva jepi umi hénte térã peteĩ experiénsia. Por ehémplo Jesús omboʼérõ guare mbaʼéichapa jahecha vaʼerã umi oñarrepentívape, omombeʼu peteĩ káso ohechaukáva mbaʼéichapa oñeñandu peteĩ karai otopa jeývo ijovecha okañy vaʼekue (Luc. 15:1-7). Ha omboʼe hag̃ua mbaʼépa añetehápe heʼise jahayhu ñande rapichápe, Jesús omombeʼu peteĩ káso: Peteĩ hudío ojasalta ha oñembyepoti vaipaite, ha ohasa upérupi peteĩ saserdóte ha peteĩ levíta, péro mokõivévante oñembotavy ha nopenái hese. Pe samaritáno katu imbaʼeporã ha oipytyvõ chupe (Luc. 10:30-37). Rejepokuaáramo reñatende umi héntere, umi kostúmbre orekóva térã oñekomporta lája, ikatúta avei remombeʼu koʼãichagua káso.

Proféta Natán ohóramo guare oñemoñeʼẽ hag̃ua Davídpe, ndeʼíri chupe derechoite moõpa ojavy, síno omombeʼu raẽ peteĩ káso. Heʼi chupe oĩ hague peteĩ karai ipláta hetáva, orekóva hetaiterei ovecha, ha ótro katu imboriahumi ha oreko peteĩ ovechamínte. Upéi pe karai ipláta hetáva oho oipeʼa pe karai imboriahumívagui pe ijovecha peteĩete. Ohendúvo upéva, David ipochyeterei pe karai ipláta hetáva ojuka haguére pe ovecha ahéno. Upévo Natán osẽ heʼi Davídpe: “Nde hína upe kuimbaʼe”. Upéva opokoiterei David rehe, pórke haʼe heta tiempo oñangareko vaʼekue ovecháre ha oikuaa mbaʼépa oñandu ijovechamíre peteĩ ovecharerekua. Upévare upe ehémplo oiporúva Natán oipytyvõ Davídpe oñarrepenti hag̃ua ipyʼaite guive (2 Sam. 12:1-14). Nde avei ndekatupyryvévo rehóvo, ikatúta reiporu porã umi ehémplo reipytyvõ hag̃ua nde rapichápe.

La Bíbliape avei oĩ heta ehémplo ikatúva reiporu reporomboʼe jave. Jesús heta vése oiporu ehémploramo Ñandejára siérvo rembiasakue térã umi mbaʼe oiko vaʼekue. Lucas 17:32-pe jatopa heʼi hague: “Penemanduʼákena Lot rembirekóre”. Ha oñeʼẽrõ guare umi ára paháre Jesús heʼi: “Oiko haguéicha Noé tiémpope, upéichata avei pe Yvypóra Raʼy oĩ vove” (Mat. 24:37-39). Ha Hebreos kapítulo 11-pe apóstol Pablo ñanemokyreʼỹ ñahaʼanga hag̃ua umi ijerovia mbaretévape, ha omoĩ ehémploramo dieciséis kuña ha kuimbaʼépe. Rejepokuaáramo restudia porã la Biblia rehechakuaáta oĩha heta mbaʼe ikatúva reiporu ehémploramo (Rom. 15:4; 1 Cor. 10:11).

Sapyʼánte ikatu avei remombeʼu peteĩ experiénsia ikatu hag̃uáicha rerresalta peteĩ enseñánsa. Péro rejasegura vaʼerã siertoha pe remombeʼútava hína, ha ani ere mbaʼeve ikatúva oofende térã omoñeñandu vai umi nerendúvape. Ani remombeʼu avei peteĩ experiénsia oñeʼẽva peteĩ téma káda uno tekotevẽvare jadesidi, pono upe rire oñepyrũ oñekuestiona la eréva. Nemanduʼa vaʼerã pe experiénsia oho vaʼerãha ne témare. Ha ani remeʼẽ hetaiterei detálle naiñimportanteguasúiva, umíva ikatu odistrae rei umi nerendúvape.

Oñentende porã vaʼerã. Tahaʼe haʼéva pe komparasión térã ehémplo reiporúva, reñehaʼã vaʼerã taideprovécho umi nerendúvape. Upévare reñeporandu vaʼerã: “¿Tekotevẽtapa amyesakãʼimi oñentende hag̃ua?”.

Jesús heʼi rire idisipulokuéra haʼeha peteĩ “mbaʼerendýicha ko múndope”, oñeʼẽ mbykymi mbaʼéichapa ojeporu jepi umi lámpara, ha mbaʼe rresponsavilidápa upéicharõ oreko hikuái (Mat. 5:15, 16). Ha omohuʼã hag̃ua pe ehémplo oñeʼẽva pe ovecha ojetopa jey vaʼekuére, Jesús heʼi ‘yvágape avei ojevyʼaitereiha peteĩ pekadór oñarrepentíramo (Luc. 15:7). Omombeʼu rire pe káso oñeʼẽva pe samaritáno imbaʼeporãvare, Jesús ojevale peteĩ porandúre ha direktoite heʼi pe kuimbaʼépe mbaʼépa ojapo vaʼerã (Luc. 10:36, 37). Péro omombeʼúrõ guare pe ehémplo oñeʼẽva umi semílla hoʼáva diferénte kláse yvýpe ha pe oñeʼẽva pe trígo ha ñana vaíre katu nomyesakãi enterovépe, síno idisipulokuérapente, ¿mbaʼérepa? Pórke haʼekuéra iñumílde ha oporandu chupe mbaʼépa heʼise umi ehémplo (Mat. 13:1-30, 36-43). Tres día omano mboyve Jesús omombeʼu peteĩ káso oñeʼẽva umi chokokue iñañaitévare, péro natekotevẽi kuri omyesakã mbaʼeve, ¿mbaʼérepa? Pórke ‘umi saserdóte ruvichakuéra ha umi fariséo ohechakuaa Jesús oñeʼẽ hague hesekuéra’ (Mat. 21:33-45). Upéicharõ, reikuaa hag̃ua tekotevẽtapa remyesakã, odepende hína mbaʼe ehémplopa reiporu, mávapepa remombeʼu ha mbaʼépa remboʼese. Avei rehecha vaʼerã tekotevẽpa remyesakã kompletoite voi térã peteĩ pártente.

Jepe ijetuʼu hína reiporukuaa hag̃ua umi ehémplo ha komparasión igústova ha iñinteresánteva, reñehaʼã vaʼerã reiporu reporomboʼe jave. Umíva tuicha nepytyvõta ikatu hag̃uáicha oñentende porãve umi enseñánsa. Péicha pe informasión ndopytamoʼãi umi nerendúva akãmente, síno og̃uahẽta avei ikorasõmekuéra.

IÑIMPORTANTETEREI ningo jaiporu umi ehémplo ohóva ñane témare. Péro jaipotáramo umi ehémplo ideprovechove umi ñanerendúvape, ñañehaʼã vaʼerã jaiporu umi mbaʼe ojapóva ha ohasáva hikuái káda día.

¿Mbaʼérepa reguereko vaʼerã enkuénta umi nerendúvape repreparáta jave peteĩ ehémplo? Jesús oreko vaʼekue enkuénta upéva, upéicha rupi siémpre oporomboʼe porãiterei. Tahaʼe oñeʼẽ jave umi héntepe térã idisipulokuérape Jesús oñeʼẽ umi mbaʼe ikonosídovare. Haʼe ndoikói oñeʼẽ umi kostúmbre orekóvare umi hénte oikóva ótro tetãrupi, pórke umíva iñextráñota chupekuéra g̃uarã. Por ehémplo Jesús nomombeʼúi mbaʼe kostúmbrepa oreko umi ehípsio, térã umi rrelihión oĩva Índiape. Upéva rangue imanduʼa umi mbaʼe ikonosídovare opavavépe, haʼe oñeʼẽ umi onegosiávare, umi rremiéndore, umi ohóvare kasamientohápe térã mbaʼépa ojejapóne okañýrõ peteĩ kósa ovaletereíva. Jesús oikuaa mbaʼépa ohasa umi hénte ha mbaʼéichapa orreaksiona jepi diferénte situasiónpe, ha oreko enkuénta upéva oiporu jave peteĩ ehémplo (Mar. 2:21; Luc. 14:7-11; 15:8, 9; 19:15-23). Oikuaa rupi opredikataha prinsipálmente umi isrraelítape, Jesús oñeʼẽ umi erramiénta ha tembiporu oiporúva jepi umi hénte oikohárupi, térã umi tembiapo haʼekuéra ojapóvare. Upévare oiporu ehémploramo umi chokokue ojapóva, umi ovecharerekua ha umi mbaʼyru oñeñongatuhápe víno (Mar. 2:22; 4:2-9; Juan 10:1-5). Avei omombeʼu umi istória isrraelitakuéra oikuaáva: ojejapórõ guare Adán ha Évape, pe Dilúvio oiko vaʼekue Noé tiémpope, Sodoma ha Gomorra oñehundírõ guare, ha pe oiko vaʼekue Lot rembirekóre (Mat. 10:15; 19:4-6; 24:37-39; Luc. 17:32). Reiporavo jave pe ehémplo reiporútava, iporã reguereko enkuénta umi nerendútavape, umi kostúmbre orekóva ha mbaʼe traváhopa ojapo jepi hikuái.

Péro reñeʼẽtaramo peteĩ grúpo michĩvape térã peteĩ persónapente, ¿mbaʼéichapa reiporavokuaa pe ehémplo reiporútava? Eñehaʼã ehecha mbaʼépa ideprovechovéta umi nerendútavape. Jesús opredikárõ guare pe samaritánape, oñeʼẽ chupe peteĩ mbaʼe ojepokuaávare ojapo pe kuñakarai. Haʼe oñepyrũ oñeʼẽ chupe pe ‘y oporomoingovévare’, ha heʼi pe kuñáme hoyʼúramo pe y arakaʼeve ndaijyʼuheimoʼãveimaha, pórke haʼetéta orekóva ‘ipype peteĩ yvu omeʼẽva y oporomoingovéva opa ára g̃uarã’ (Juan 4:7-15). Ha ohechárõ guare unos kuánto peskadór ojohéi hína irréd, omoĩ peteĩ ehémplo oñeʼẽva péskare (Luc. 5:2-11). Koʼã mokõi kásope Jesús ikatúnte kuri oñeʼẽ umi traváho ojapóvare umi chokokue térã umi oñangarekóva animalkuérare, péro oñeʼẽ rupi umi traváho ojapóvare hikuái upe moméntope, umi ehémplo og̃uahẽ porãve chupekuéra. ¿Reñehaʼãpa nde avei rejapo péicha?

Jesús opredika vaʼekue prinsipálmente umi Israelguápe, oikóva ‘ovecha okañy vaʼekuéicha’, péro apóstol Pablo ndahaʼéi umi Israelguápente opredika vaʼerã, síno avei umi tetã ambueguápe (Mat. 15:24; Hech. 9:15). Upéicha rupi apóstol Pablo okambia umi ehémplo oiporúva opredika hag̃ua chupekuéra. Por ehémplo umi kárta a los Coríntiospe jatopa haʼe oñeʼẽ hague umi karrérare, umi tembiʼu oñekuaveʼẽvare umi ñandejára guaʼúpe ha umi desfíle ojapóva umi soldádo ou rire gerrahágui (1 Cor. 8:1-10; 9:24, 25; 2 Cor. 2:14-16).

¿Ndépa reñehaʼã avei reiporavo porã umi ehémplo reiporútava ojapo haguéicha Jesús ha Pablo? ¿Reguerekópa enkuénta umi kostúmbre ha tembiapo ojapóva umi nerendúva? Añetehápe umi notísia ha téle rupive heta hénte ikatu oikuaa mbaʼépa oiko ótro tetãrupi ha mbaʼe kostúmbrepa oreko hikuái. Ha ikatúramo jepe reiporu ehémploramo koʼã mbaʼe, iporãve hína reñeʼẽramo umi hénte ohasávare káda día: ifamíliandi, itravahohápe, hógape, umi tembiʼúre térã pe klímare. Koʼã mbaʼe katuete ointeresavéta umi héntepe.

Reiporu jave peteĩ ehémplo oñentende porã vaʼerã, péro tekotevẽramo remyesakã hetaiterei detálle, upéva heʼise upe ehémplo naikonosidoiha ha hasýta oñentende hag̃ua. Koʼãichagua ehémplo ndaideprovechoguasúi, pórke umi hénte imanduʼáta umi detállere péro naimanduʼamoʼãi pe enseñánsare.

Jesús ojapo rangue komparasión ijetuʼuetereíva, oiporu umi ehémplo isensíllo ha enterove ikatúva ontende. Haʼe hesakuaitépe omyesakã umi mbaʼe ijetuʼuvéva jepe, oiporu rupi umi ehémplo isensillomívante. Péicha umi hénte ontende porã pe omboʼeséva ha opytaite iñakãme pe enseñánsa. Enterove ikatúta ñaporomboʼe porã jasegíramo Jesús ehémplo.