Oñepyrũparaʼe umi yvypóra hardín de Edénpe?

EPENSAMÍNA reimeha mombyry, peteĩ hardín neporãvape. Upépe igustoiterei, natekotevẽi rejepyʼapy mbaʼevete asýre, neresãi ha nembarete. Ndepyʼarory rehechávo mbaʼéichapa pe lugár okukuipa porãgui.

Remañaha gotyo omimbi ha ojajaipa, pe kuarahy ohesape umi yvyramáta paʼũ rupi, ha umi yvoty kaʼaguy hyakuãvureíva neañua. Yvytu peju kangymi omyatymói yvyra rogue. Guyraita ñeʼẽ ndererohory, ha umi panambi ojeroky yvotytýre. Umi mainumby ovyʼa ha isaraki. Rejesaupi ha rehecha peteĩ arrójo piroʼysã porã, yvykuʼi morotĩ ári osyry ñeno pytuʼúva ohóvo kaʼaguy ryakuãvurei paʼũme... Máva piko noĩsemoʼãi peichagua lugárpe!

Heta hénte heʼi iñepyrũme péicha oiko hague ñande tuvakuéra ypykue, peteĩ hardín neporãvape. Ymaite guive umi kristiáno, hudiokuéra ha umi musulmán oguerovia Adán ha Eva oiko hague hardín de Edénpe. La Biblia heʼi mokõivéva oiko hague vyʼa ha pyʼaguapýpe, upérõ umi mymba jepe imansopa. Avei haʼekuéra oĩ porã vaʼekue Ñandejárandi ha haʼe oipotavaʼekue oiko hikuái opa ára g̃uarã (Génesis 2:15-24).

Upéicha avei umi hindu omboʼe yma oĩ hague peteĩ hardín neporãva ko yvy ape ári. Heta budísta katu heʼi umi mboʼehára térã búda, ou hague ko múndope ha oiko hikuái pe Edénpe ojeiko haguéicha. Upéicha avei heta rrelihión Africapegua omboʼe yvyporakuéra oiko hague peteĩ lugár neporãvape.

Añetehápe haimete enterove rrelihión ha umi hénte oikóva opa hendárupi oguerovia iñepyrũme oĩ hague peteĩ hardín neporãva. Peteĩ istoriadór hérava Jean Delumeau heʼi: “Heta puévlo yma guare oguerovia ñepyrũrã yvyporakuéra iperfékto hague, ha ojeiko hague vyʼa ha pyʼaguapýpe peteĩ lugár neporãvape. Upépe opavave oikovaʼekue ojepyʼapyʼỹre, ndaipóri iñañáva ni oñorairõva. [...] Upévare enterovépente hiʼãiterei jaiko jey péicha, pe lugár porãite oñehundivaʼekuépe ha ndopytáiva tesaráipe”.

Mbaʼérepa hetaite oĩ ogueroviáva yvyporakuéra oiko hague peteĩ hardínpe? Noiméipa añete péicha ojeiko rakaʼe, upévare enterovéva imanduʼa hese? Ikatu piko jaʼe añetehápe Adán ha Eva oiko hague Edénpe?

Oĩ heʼíva ko ñane tiémpope ndaikatuveimaha jaguerovia peteĩ kuénto reínte, jahechávo koʼẽ koʼẽre umi sientífiko oikuaa ha ojapoha hetave mbaʼe pyahu. Ivaiveha katu, heta rrelihión omoakãva jepe opensa pe hardín de Edén ndaipóri hague. Heʼi hikuái la Bíbliape oñemoĩha upéva orrepresenta hag̃uánte peteĩ mbaʼe.

Añetehápe, la Bíbliape oĩ heta ehémplo ojeporúva jepi oñerrepresenta hag̃ua ambue mbaʼe. Jesús ojevalevaʼekue heta ehémplore omboʼe hag̃ua hemimboʼekuérape. Péro Ñandejára Ñeʼẽ ohechauka porã hardín de Edén añetehápe oĩ hague, ndahaʼéi peteĩ kuénto reínte. Ñapensamína ko mbaʼére: Upéva japúrire, mbaʼéicha piko jagueroviavéta la Biblia heʼíva? Jahechamína mbaʼérepa heta hénte ndogueroviái ko istória. Upéi ñahesaʼỹijóta avei mbaʼérepa iñimportánte jaikuaa porã ko mbaʼe.

Oĩpa rakaʼe peteĩ lugár hérava Edén?

KATUETE rehendúmane heta hénte heʼiha Adán ha Eva oiko hague hardín de Edénpe. Péro, releémapa ndete voi mbaʼépa heʼi la Biblia ko témare? Ikatúpa relee koʼág̃a? Rehechakuaa Génesis 1:26–3:24 heʼíva. Upépe omombeʼu oiko hague péicha:

Jehováa ojapovaʼekue yvýgui pe kuimbaʼe ypykuépe, ombohéra Adán ha omoĩ chupe peteĩ hardín iporãitereívape. Ñandejára opreparavaʼekue upe lugár hérava Edén, upépe oĩ hetaiterei yvyramáta, opaichagua yva hetereíva ha ojere hese cuatro ysyry. Pe hardín mbytépe Ñandejára omoĩ ‘peteĩ yvyramáta oikuaaukáva mbaʼépa iporã ha mbaʼépa ivai’. Péro heʼi Adánpe ani hag̃ua hoʼu upe yva nomanoséiramo. Upéi Ñandejára ojapo Évape Adán kostíllagui ha heʼi chupekuéra oñangareko hag̃ua pe hardín rehe, ifamília reta hag̃ua ha upéicha tomyenyhẽ ko yvy.

Peteĩ jey Eva oĩrõ guare haʼeño, peteĩ mbói omboliga chupe hoʼu hag̃ua pe yva. Heʼi chupe Ñandejára ijapu hague ha hoʼúramo pe yva oikotaha Ñandejáraicha. Eva oguerovia upéva ha hoʼu pe yva. Adán ojapo avei upéicha. Upe rire Jehová heʼi mbaʼépa oikóta chuguikuéra naiñeʼẽrendúi haguére. Adán ha Eva oñemosẽ pe hardíngui ha anivéma hag̃ua oike hikuái upépe Ñandejára omoĩ umi ánhel pe Edén renondépe.

Ymave, heta istoriadór ha karai arandu ostudiáva Ñandejára Ñeʼẽ, heʼi añeteha la Biblia omombeʼúva pe hardín de Edén rehe. Péro koʼág̃a rupi hetave oĩ ndogueroviasevéimava upéva. Mbaʼépa heʼi jepi hikuái? Koʼág̃a ñambohováita cuatro porandu ojejapóva jepi.

1. Moõpa oĩrakaʼe pe hardín de Edén?

Heta tiémpore umi teólogo oimoʼãvaʼekue oĩha gueteri pe hardín de Edén. Péro upéi umi rrelihión omoakãva oñepyrũ oguerovia umi filósofo Platón ha Aristóteles omboʼéva, haʼekuéra heʼi ko yvy ape ári ndaikatuiha oĩ perfeksión.b Upévare umi teólogo heʼi pe hardín de Edén oĩne hag̃ua yvágape, ótro heʼi oĩha peteĩ sérro ijyvatetereíva ári, ỹrõ pólo nórte térã pólo súr gotyo. Ha ambue katu heʼi oĩha Jasýpe. Opa koʼã mbaʼére ndojegueroviavéi oĩne hague pe hardín de Edén, ha opyta peteĩ kuénto térã ñemombeʼu guaʼúnteramo. Ivaiveha katu, oĩ heʼíva japuha umi lugár réra ojekalkulahápe opyta hague pe Edén, ha amo ipahápe ontendeka hikuái ñandetavyetereitamaha jagueroviáramo upe istória.

Péro jahechamína mbaʼépa omombeʼu la Biblia pe hardín rehe. Pór ehémplo Génesis 2:8-14 omombeʼu porã moõitépa opytarakaʼe: heʼi oĩha kuarahy resẽ gotyo peteĩ lugár héravape Edén, ha ijerére oĩha cuatro ysyry. Oñemombeʼu káda rrío réra ha moõ gotyopa osyry. Heta tiémporema umi iñarandúva ojoka iñakã ko téysto heʼívare, jahecha ndotopavéipa peteĩ mbaʼe ohechaukáva moõitépa oĩrakaʼe pe hardín de Edén. Péro mbaʼevetépe nog̃uahẽi hikuái, oikeve guei peteĩ javorái kuápe ikatuʼỹvagui osẽ. Heʼisépa upéva la Biblia ijapuha oñeʼẽvo Edén rehe ha umi ysyry oĩvaʼekuére upépe?

Nahániri, ñanemanduʼavaʼerã ohasamaha 6.000 áño rupi koʼã mbaʼe oiko hague ha oiméne pe lugár tuicháma okambia. Moisés ohaírõ guare ko istória ohasamavaʼekue voi 2.500 áño rupi, oiméne haʼe oikuaa koʼã mbaʼe oikovaʼekue oñemombeʼu rupi chupe térã oĩgui umi kuatiañeʼẽme ojehaíva upe tiémpope. Upéicha jahecha Moisés ohaírõ guare ohasáma hague heta tiémpo. Ha upérõ guare oiméne tuicháma okambia umi lugár ha ko yvy voi. Mbaʼérepa jaʼe upéva? Ñane planéta ningo mbeguekatúpe okambia ohóvo oĩ rupi yvyryrýi, ha ama guasu. Pe lugár Edén oĩ haguépe oiko jepi heta yvyryrýi tuichaitereíva. Avei ñanemanduʼavaʼerã Ñandejára ombou hague pe dilúvio Noé tiémpope ha oiméne upéva tuicha okambiáraʼe ko yvy.c

La Bíbliape oñeñeʼẽvo pe hardín rehe omombeʼu oĩ hague ijerére cuatro rrío, ha mokõi umíva apytégui koʼag̃aite peve oĩ gueteri, pe rrío Éufrates ha Tigris térã Hidequel. Ha oĩ párte koʼã rrío osyryha ojoypyetépe. La Biblia omombeʼu avei mbaʼe lugár rupípa osyry ha mbaʼe mbaʼépa oĩ umírupi. Katuete umi Israelgua oikuaa porã vaʼekue umi lugár, ñanemanduʼavaʼerã chupekuéra g̃uarã voi ojehai hague ko istória.

Ñapensamína avei ko mbaʼére: oñemombeʼu jave káso térã kuénto, noñemombeʼúi opa mbaʼe oiko hagueichaite, ndojeʼéi moõpa ni arakaʼépa oiko. Kóicha oñepyrũ jepi: “Oĩ ndaje rakaʼe, mombyry koʼágui...”. Péro la Bíbliape oñeñeʼẽ jave hardín de Edén rehe oñemombeʼu mbaʼéichapa héra umi lugár ha arakaʼépa oiko umi mbaʼe, oñemombeʼuháicha jepi peteĩ istória añetehápe oikovaʼekue.

2. Mbaʼéicha piko Ñandejára ojapóraʼe Adánpe yvýgui ha Évape katu Adán kostíllagui?

Umi sientífiko ohechakuaa ñande retépe oĩha heta eleménto orekóva ko yvy. Pór ehémplo hidrógeno, oxígeno ha carbono. Mávapa ombojeheʼa koʼã mbaʼe oiko hag̃ua chugui peteĩ yvypóra?

Heta sientífiko heʼi opa mbaʼe oiko hague ijehegui reínte. Heʼi hikuái oñepyrũ hague peteĩ sélulagui, ha upe sélula mbeguekatúpe okambia hague ohóvo oiko peve chugui peteĩ mymba térã yvypóra. Péro, añete piko upéva? Haʼekuéra jepe ndaikatúi ohechauka mbaʼéichapa opa mbaʼe oiko ijehegui rei. Upéva rangue ñamañaha gotyo jahechakuaa oĩ hague peteĩ Apohare iñaranduetereíva (Romanos 1:20).d

Ñamoĩ chupe rehenduha vevyimi peteĩ musikapu igustoitereíva, térã rehechahahína peteĩ kuádro iporãitereíva, ỹrõ katu rehecha mbaʼéichapa ombaʼapo peteĩ aparáto pyahu osẽvaʼekue. Ndépa eréta koʼã mbaʼe ijehegui reínte oiko hague? Nahániri, ajépa. Ha ñapensa porãramo ni peteĩ mbaʼe yvypóra ojapovaʼekue ndaikatúi ñambojoja ñande retére. Mbaʼéicha piko upéicharõ jaʼéta ndajaguerekoiha peteĩ apohare? Génesis kuatiañeʼẽme oñemyesakã voi Ñandejára ojapo hague yvyporakuérape añoite ijoguaháramo (Génesis 1:26). Upévare oĩ heta yvypóra ivaléva ha ojapokuaáva heta mbaʼe iporãitereíva. Ñapensamína: ñande jajapokuaáramo heta mbaʼe, mbaʼére piko jahecharamóta térã ndajagueroviamoʼãi Ñandejára ñandeapo hague yvýguinte?

Ha mbaʼérepa jagueroviakuaa Ñandejára ojapo hague Évape Adán kostíllagui? Ñandejárape g̃uarã oiméne upéva ndahasyietéraʼe.e Ojapóvo upéicha Jehová ohechaukase Eva haʼeha Adán kostílla pehẽngue. Ñandejára oipota haʼekuéra omenda, ojoayhu ha upéicha ‘oiko mokõivégui peteĩnte’ (Génesis 2:24). Haʼe ojapo kuimbaʼe ha kuñáme ojoayhu, oñopytyvõ ha oñangareko hag̃ua ojuehe. Ajépa iñarandu ha imbaʼeporãite ñande Apohare!

Avei heta sientífiko ostudiáva pe ADN rehe heʼi iñepyrũme ikatu hague oĩ peteĩ kuimbaʼe ha peteĩ kuña, ha chuguikuéra ouha opavave yvypóra. Amo ipahápe ñapensa porãramo, mbaʼére piko ndajagueroviamoʼãi Génesis kuatiañeʼẽme heʼíva?

3. Mbaʼéicha piko peteĩ yvyramáta ikatu oikuaauka ñandéve iporãva ha ivaíva ha ótro katu ñanemoingove?

Ñepyrũrã jaikuaavaʼerã la Biblia ndeʼiriha koʼã mokõi yvyramáta oreko hague podér, Jehová omoĩ koʼã yvyramáta orrepresenta hag̃ua peteĩ mbaʼe.

Ñande ningo pyʼỹi jajapo avei upéicha. Pór ehémplo peteĩ mboʼehára heʼi jepi iñalumnokuérape orrespetavaʼerãha pe vandéra, péro añetehápe, mbaʼépa heʼise upéva? Ndahaʼéi pe téla reínte omombaʼétava hikuái, jaikuaa porã ningo pe vandéra orrepresentaha peteĩ tetãme.

Mbaʼépa orrepresenta upéicharõ umi mokõi yvyramáta oĩvaʼekue hardín de Edénpe? Hetaiterei mbaʼéma ojeʼe ko mbaʼére, upéicharõ jepe ndahasyiete jaikuaa mbaʼépa orrepresenta ha mbaʼérepa iñimportánte ñandéve g̃uarã. Pe yvyramáta oikuaaukáva iporãva ha ivaíva ohechauka Ñandejára añoite ikatuha odesidi mbaʼépa oĩ porã ha mbaʼépa oĩ vai (Jeremías 10:23). Upévare, Jehovápe g̃uarã ivaieterei Adán ha Eva ojapovaʼekue. Ha pe yvyramáta oporomoingovéva orrepresenta jeikove opaveʼỹva, peteĩ jopói Ñandejára añoite ikatúva omeʼẽ (Romanos 6:23).

4. Mbaʼéicha piko peteĩ mbói oñeʼẽraʼe Évape?

Ikatu hasy ñantende hag̃ua Génesis kuatiañeʼẽ heʼíva ko pártepe. Péro jahecháramo mbaʼépa heʼive la Biblia hesakãta ñandéve mbeguekatúpe.

Mbaʼéicha rupípa oñeʼẽraʼe pe mbói? Ñepyrũrã ñanemanduʼavaʼerã umi isrraelíta oikuaa porãha mávapa upe oñeʼẽvaʼekue pe mbói rupive. Mbaʼérepa jaʼe upéva? Moisés voi ohaivaʼekue Ñandejára ombou hague peteĩ ánhel ha upéicha rupi Balaam rymba vúrro oñeʼẽvaʼekue upérõ (Números 22:26-31; 2 Pedro 2:15, 16).

Avei umi isrraelíta oikuaa porã umi ánhel aña térã demónio ipoderosoha. Pór ehémplo Moisés ohechavaʼekue mbaʼéichapa umi saserdóte Egiptoygua ojapo yvyra pukúgui peteĩ mbói. Mávapa omeʼẽ chupekuéra podér? Katuete oiméne umi demónio raʼe (Éxodo 7:8-12).

Ipahápe ñanemanduʼavaʼerã avei umi isrraelíta oreko hague Job kuatiañeʼẽ, oiméne Moisés ohairakaʼe upéva. Ko kuatiañeʼẽ omboʼe chupekuéra mbaʼéichapa Satanás opuʼã Ñandejárare ha otaky yvyporakuérare (Job 1:6-11; 2:4, 5). Opa koʼã mbaʼére umi isrraelíta oikuaa porã Satanás oiporu hague pe mbóipe ombotavy hag̃ua Évape.

Oĩ hetave mbaʼe ohechaukáva Satanás ojevale hague pe mbóire ijapu hag̃ua Évape, pór ehémplo Jesús voi heʼivaʼekue Satanás haʼeha ‘japu ruvicha’ (Juan 8:44). Haʼe oñepyrũvaʼekue ijapu heʼírõ guare Adán ha Eva ‘nomanomoʼãiha’ hoʼúramo pe yva (Génesis 3:4). Ha koʼýte jahechakuaa upéva Jesús heʼírõ guare apóstol Juánpe, Satanás haʼeha pe ‘mbói ypykue’ (Revelación [Apocalipsis] 1:1, 12:9).

Ñapensamína, koʼág̃a rupi oĩ heta artísta omoĩva muñéko ipóre ha ojapo oñeʼẽramoguáicha upe muñéko. Upéicharõ, mbaʼére piko hasýta peteĩ ánhelpe oiporu peteĩ mbóipe oñeʼẽ hag̃ua?

Añetehápe ikatu jaguerovia

Ñambohovái rire koʼã porandu, ajépa ikatu jaʼe Génesis kuatiañeʼẽ heʼíva añetehápe oiko hague. Jahecháma ningo heta mbaʼe ohechauka porãva upéva. Péro jahechavemína ambue mbaʼe.

La Biblia heʼi Jesucristo haʼeha ‘testígo jeroviapy ha añetetéva’ (Revelación 3:14). Haʼe ningo perfékto, upévare arakaʼeve ndaijapúiva ha omombeʼu opa mbaʼe oiko hagueichaite. Ou mboyve ko yvy ape ári, ha ko yvy ojejapo mboyve jepe, haʼe oikomavaʼekue yvágape Itúva Jehová ndive (Juan 17:5). Jesús oĩmavaʼekue yvyporakuéra ojejapo mboyve, upévare ikatu heʼi porã ñandéve mbaʼépa oikovaʼekue iñepyrũme. Mbaʼépa haʼe heʼivaʼekue hardín de Edén rehe?

Jesús imanduʼa Ñandejára heʼivaʼekuére omomendárõ guare Adán ha Évape, upéicha ohechauka haʼekuéra añetehápe oiko hague (Mateo 19:3-6). Ñapensáramo Génesis kuatiañeʼẽme heʼíva peteĩ kuénto reinteha, jaʼehína Jesús ijapuha. Péro tuichaiterei jajavýta ñapensáramo upéicha, jaʼéma haguéicha haʼe yvága guive ohechapaitékuri pe oikovaʼekue.

Ñande ndajagueroviáiramo Génesis omombeʼúva, ndaikatumoʼãi jajerovia añete Jesús rehe. Ndaikatumoʼãi avei ñantende porã la Biblia omboʼéva ni umi promésa Ñandejára ojapóva. Jahechamína mbaʼérepa.

[Nóta]

Mbaʼérepa iñimportánte pe oikovaʼekue Edénpe

HETA mbaʼe ningo ojeʼe hendapeʼỹ ojehechauka hag̃ua pe hardín de Edén ndaipóri hague. Umíva apytépe heta karai ostudiáva Ñandejára Ñeʼẽ, heʼi voi la Bíbliape noñeñeʼẽveimaha upe rire hardín de Edénre. Peteĩ profesór omboʼéva rrelihión, hérava Paul Morris, ohai: “Ni peteĩ hendápe la Biblia naimanduʼavéima pe oikovaʼekuére hardín de Edénpe”. Ha ikatu oime hetave opensáva péicha, péro jahechamína añetépa haʼekuéra heʼíva.

La Bíbliape hetaiterei hendápe imanduʼa jey Adán, Eva, pe mbói ha pe hardín de Edén rehe.a Koʼã karai arandu heʼíva oĩ vaíramo jepe, ndahaʼéi jey mbaʼevete ñambojojáramo heta rrelihión omoakãva ha teólogo heʼívare. Haʼekuéra heʼi upe oikovaʼekue hardín de Edénpe kuénto reinteha, ha upéva ningo ivaieterei. Mbaʼérepa? Upéicha haʼekuéra otaky Ñandejára Ñeʼẽre voi.

Ñantende hag̃ua mbaʼépa ñanemboʼe Ñandejára Ñeʼẽ tekotevẽ jaikuaa porã mbaʼépa oikovaʼekue hardín de Edénpe. La Biblia ombohovái umi porandu oipyʼapyvéva yvyporakuérape. Péro koʼã porandu hesakã porã hag̃ua jahechavaʼerã mbaʼépa oikovaʼekue upérõ.

● Mbaʼérepa ñandetuja térã ñaneg̃uaig̃ui ha ñamano? Adán ha Eva iñeʼerendúrire Jehovápe oikovaʼerãmoʼã opa árare. Péro opuʼãha árape Ñandejárare, ndahaʼevéima perfékto ha upe guive mbeguekatúpe omano ohóvo hikuái (Génesis 2:16, 17; 3:19). Upévare ñande enterovéva ñaneimperfékto ha jajavy. La Biblia heʼi voi ‘pekádo oike haguéicha yvy ári peteĩ kuimbaʼe rupive, upéicha oike pe ñemano, ha pe ñemano ohasa opavavépe, opavave opekágui’ (Romanos 5:12, BNP).

● Mbaʼérepa Ñandejára oheja oiko hetaite mbaʼe vai? Hardín de Edénpe ningo Satanás otaky Jehováre, heʼi hese ijapuetereiha ha ndoipotaiha hembiguaikuéra ovyʼa (Génesis 3:3-5). Jaʼe porãsérõ g̃uarã heʼi hese nogovernaporãiha. Adán ha Eva oguerovia pe Aña ruvicha heʼíva ha omboyke Ñandejárape. Péicha haʼekuéra heʼi yvypóra ikatuha odesidi ijeheguínte mbaʼépa oĩ porã ha mbaʼépa oĩ vai. Mbaʼépa ojapo Jehová upévo? Haʼe ohechauka ihústo ha iñaranduha ohejávo yvyporakuérape oñegoverna peteĩ tiémpore. Péro umi mbaʼe vaieta oikóva ko múndope oĩva Satanás poguýpe, ohechauka yvyporakuéra ndaikatuiha oñegoverna Ñandejára reheʼỹ (Jeremías 10:23).

● Maʼerãpa Ñandejára ojapovaʼekue ko yvy? Pe hardín de Edén ohechauka porã Ñandejára oipota hague ko yvýgui oiko peteĩ lugár iporãitereíva. Haʼe heʼivaʼekue Adán ha Évape ifamília reta hag̃ua ha tomyenyhẽ ko yvy (Génesis 1:28). Péicha jahecha Jehová oipotaha yvyporakuéra iperfékto, oiko vyʼápe ha ñorairõʼỹre peteĩ hardín neporãvape. La Biblia omyesakã porã mbaʼéichapa Ñandejára okumplíta upéva.

● Maʼerãpa ouvaʼekue Jesús ko yvy ape ári? Adán ha Eva omboyke rupi Ñandejárape hardín de Edénpe, enterove yvypóra ñaneimperfékto ha ñamano. Péro ohayhuetereígui yvyporakuérape Ñandejára ombou Itaʼýrape ko yvy ape ári ‘omano hag̃ua ñanderehehápe’ (Mateo 20:28). La Bíbliape oñehenói Jesúspe “pe Adán ipahapegua”, haʼe akóinte iñeʼẽrenduvaʼekue Jehovápe, upévare iperfektovaʼekue ha omeʼẽ hekove yvypóra rehehápe. Upéicha rupi umi ojerovia añetéva Ñandejárare ikatu oñeperdona ha oikove peteĩ múndo iporãitereívape, Adán ha Eva oiko haguéicha opeka mboyve (1 Corintios 15:22, 45; Juan 3:16). Upévare jaʼekuaa Jesús ou hague ko yvy ape ári ohechauka hag̃ua Ñandejára okumplitaha katuete hembipota.b

Jahechaháicha Ñandejára rembipota ndahasýi ñantende hag̃ua ha jajeroviakuaa hese. Pe oñemombeʼúva hardín de Edén, Adán ha Évare ndahaʼéi kuénto reínte, upéicha avei Ñandejára Ñeʼẽme oñeprometéva ndahaʼéi japu, oñekumplíta katuete. Mávapa ikatu ohupyty koʼã mbaʼe porãite? Ñandejára oipota opavave oiko upe hardínpe, umi oñemomombyryvaʼekue jepe ojevýramo ikatu avei ohupyty (1 Timoteo 2:3, 4). Mbaʼéichapa jaikuaa upéva?

Omano mboyvemi Jesús oñeʼẽ peteĩ mbaʼe vai apoha ndive, ko kuimbaʼe oikuaa hembiapo vai rupi omanovaʼerãha. Upéicharamo jepe haʼe ojerure Jesúspe oiporiahuvereko hag̃ua chupe. Upévo Jesús heʼi chupe: ‘Reiméta chendive pe hardín neporãvape’ (Lucas 23:43, NM). Jesús oipotáramo peteĩ hembiapo vaivaʼekue oiko opa ára g̃uarã ko yvy ape ári, koʼýte oipotáta upéva ñandéve g̃uarã. Ha Jehová avei omeʼẽse ñandéve upe jopói. Haʼe opromete koʼẽrõite ojapotaha ko yvýgui peteĩ hardín neporãva. Ha nde reikoséramo upépe reñehaʼãvaʼerã reikuaave chupe.

[Nóta]

[Taʼanga ha rrekuádro oĩva páhina 7-pe]

PE PROFESÍA YPYKUE OMOPYENDÁVA LA BIBLIA

‘Kuña ndive romoingo vaíta, iñemoñare ne ñemoñare ndive. Kuña ñemoñare ne akãre opyrũta, nde katu reisuʼúta chupe ipytápe.’ (Génesis 3:15.)

Péicha heʼivaʼekue Ñandejára oñeʼẽrõ guare pe mbóipe, Edénpe, ha upéva hína pe profesía ypykue oĩva la Bíbliape. Mávapa pe kuña, pe mbói ha iñemoñarenguéra? Mbaʼérepa ojeʼe ‘oñemoingo vaitaha’ chupekuéra? Jahechami.

PE MBÓI

Satanás (Revelación 12:9).

PE KUÑA

Umi ánhel iñeʼẽrendúva oĩva yvágape térã Jehová organisasión yvagapegua (Gálatas 4:26, 27). Isaías heʼivaʼekue ko “kuña” omoheñoitaha peteĩ tetã (Isaías 54:1).

MBÓI ÑEMOÑARE

Umi omoirũva Satanáspe ha ojapóva hembipota (Juan 8:44).

KUÑA ÑEMOÑARE

Tenondetépe Jesucristo, ouvaʼekue Jehová organisasióngui oĩva yvágape. Ko ‘ñemoñarépe’ oike avei umi ojeporavovaʼekue oisãmbyhy hag̃ua yvágape Jesúsndi. Koʼã kristiánope oñehenói avei ‘Israel Ñandejára mbaʼéva’ (Gálatas 3:16, 29; 6:16, JMP; Génesis 22:18).

OJESUʼU IPYTÁPE PE ÑEMOÑARÉPE

Satanás ojukauka Ñandejára Raʼýpe. Péro pe mbaʼe vai Satanás ojapovaʼekue pyaʼe oñemyatyrõ ha oñemoingove jey Jesúspe.

OÑEPYRŨ PE MBÓI AKÃRE

Jesús ohundietéta Satanáspe opa ára g̃uarã. Péro upe mboyve omyatyrõta opa mbaʼe vai oikovaʼekue oñepuʼã haguére Jehováre Edénpe (1 Juan 3:8; Revelación 20:10).

Pe folléto La Biblia—Mbaʼépa oikuaauka ñandéve? ojapóva testigos de Jehová, omyesakã porãve pe marandu iñimportantevéva oĩva la Bíbliape.

[Nóta oĩva taʼanga ndive páhina 11]

Adán ha Eva heta ohasa asy naiñeʼẽrendúi haguére