Pyʼaporã: jahechauka umi mbaʼe jaʼévare ha jajapóvare

ÑANEMBOPYʼAGUAPY ha ñañeñandu porã peteĩ persóna ipyʼaporãva ojapo jave álgo ñanderehehápe. Jahechaháicha, ñamombaʼe oĩ jave ñandetrata porãva ha ojepyʼapýva ñanderehe. ¿Mbaʼéichapa ñande avei ikatu jahechauka ñandepyʼaporãha?

Ñandepyʼaporã ningo heʼise ñañeinteresa añeteha ñande rapicháre, ha jahechauka upéva umi mbaʼe jaʼévare ha jajapóvare. Ndahaʼéi ñaneamávle ha ñandeedukádo haguére jarekómava ko kualida. Añetehápe ñandepyʼaporãrõ tekotevẽ japorohayhu ñande pyʼaite guive, ha ñañemoĩ ñande rapichakuéra lugárpe. Iñimportanteveha katu, pe pyʼaporã haʼe peteĩ mbaʼe oúva Ñandejára espíritu sántogui, ha upévare entéro kristiáno oñehaʼã vaʼerã oreko (Gál. 5:22, 23). Jahechamína mbaʼéichapa Jehová ha Itaʼýra ohechauka ko kualida. Péicha ikatúta jasegi iñehemplokuéra.

JEHOVÁ IPYʼAPORÃ ENTEROVÉVANDI

Jehová ipyʼaporã ha imbaʼerechakuaa enterovévandi, tahaʼe jepe “umi imalagradesído ha iñañávandi” (Luc. 6:35). Por ehémplo, Jehová “oheja osẽ kuarahy iñaña ha hekoporãvape g̃uarã; ha omongy hekojoja ha hekojojaʼỹvape g̃uarã” (Mat. 5:45). Umi norrekonoséiva Jehová haʼeha Ijapohare lomímonte oñevenefisia umi mbaʼe haʼe mborayhúpe omeʼẽvagui, ha ikatu avei odisfruta heta mbaʼe.

Hesakã porã ñandéve mbaʼeichaite pevépa Jehová ipyʼaporã otrata lájare Adán ha Évape. Opeka riremi “ojapo hikuái ijaorã ígo roguekuégui ikatu hag̃uáicha oñemoʼã”. Péro Jehová oikuaa oikotevẽtaha ijaokuerarã osẽ rire Edéngui, pórke oñesẽvo pe hardíngui pe yvy oñemaldesi ha “ñuatĩ ha ñana vaímante okakuaáta”. Upévare Jehová pyʼaporãme omeʼẽ chupekuéra la oikotevẽva, ha ojapo chupekuéra “ao puku animál pirekuégui” (Gén. 3:7, 17, 18, 21).

Jehová otrata porãramo jepe “iñañáva ha ivuénovape”, koʼytevéntema ohechauka ipyʼaporãha umi persóna oservívape fiélmente chupe. Por ehémplo, proféta Zacarías tiémpope peteĩ ánhel ojepyʼapyeterei ohechávo ndojesegiriha oñemyatyrõ pe témplo Jerusalénpe. Upérõ Jehová ojapysaka umi mbaʼe oipyʼapývare pe ánhelpe “ha heʼi chupe umi mbaʼe iporãva ha oporokonsoláva” (Zac. 1:12, 13). Jehová otrata porã avei proféta Elíaspe. Peteĩ jey, pe proféta oñeñandu yvýre ha heʼi Jehovápe omanosenteha. Ñandejára ojesareko vaʼekue Elías oñandúvare ha omondo peteĩ ánhel omombarete hag̃ua chupe. Upéicha avei, oasegura pe profétape noĩriha haʼeño. Jehová otrata mborayhúpe Elíaspe ha oipytyvõ chupe, péicha haʼe oĩma kuri preparádo okumpli hag̃ua iñasignasión (1 Rey. 19:1-18). ¿Mávapa pe Ñandejára siérvo osegi porãve vaʼekue Jehová ehémplo ohechaukávo ipyʼaporãha?

JESÚS EHÉMPLO

Jesús ipyʼaporã ha imbaʼerechakuaa vaʼekue opredika tiémpope ko yvy ape ári. Haʼe ndahaʼéi kuri peteĩ persóna ijarhélva ni oporotrata vaíva. Upéva rangue oñemoĩ umi hénte lugárpe. Upévare ikatu vaʼekue heʼi: “Peju che rendápe enterove peẽ pembaʼapo jejopy ha pendekárga pohýiva, ha che pombopiroʼýta. [...] Che júgo napendeforsamoʼãi” (Mat. 11:28-30). Ohechakuaágui mbaʼéichapa Jesús ipyʼaporã, umi hénte osegi chupe opárupi. Haʼe ningo “oiporiahuverekoiterei chupekuéra”, upévare omongaru umi héntepe, omonguera umi hasývape ha omboʼe chupekuéra “heta mbaʼe” Itúagui (Mar. 6:34; Mat. 14:14; 15:32-38).

Jesús ohechauka ipyʼaporãha pórke oikuaa mbaʼéichapa otrata vaʼerã umi héntepe. Upévare, hembiapoitereíramo jepe, orresivi amávlemente entéro umi ohekávape chupe sinséramente (Luc. 9:10, 11). Por ehémplo, pe Léi de Moisés heʼi peteĩ kuña iñemorráhiava ndaikatuiha oĩ hénte atýpe. Upéicharõ jepe, Jesús nomongavajúi peteĩ kuñakarai orekóvape upe mbaʼasy ha okueraségui ou vaʼekue kyhyjepópe hendápe opoko hag̃ua ijaóre (Lev. 15:25-28). Jesús oiporiahuvereko ko kuña osufrímavape 12 áñore, ha heʼi chupe: “Che rajy, rejerovia rupi ningo rekuera ko mbaʼasy nembohasa asyetévagui. Tereho katu pyʼaguapýpe” (Mar. 5:25-34). ¡Ajépa ipyʼaporãite Jesús!

JAJAPÓVARE JAHECHAUKA ÑANDEPYʼAPORÃHA

Umi ehémplo oñemoĩ vaʼekuépe jahecha añetehápe ñandepyʼaporãrõ jahechauka vaʼerãha umi mbaʼe jajapóvare. Jesús ohechauka vaʼekue ndahaʼeiha jaʼénte vaʼerã ñandepyʼaporãha oñeʼẽrõ guare pe samaritano ipyʼaporãvare. Umi samaritano ndojoguerahaporãiramo jepe umi judíondi, pe samaritano Jesús oñeʼẽ hague oiporiahuvereko pe kuimbaʼe oñemonda, oñenupã ha ojeheja rei vaʼekue heʼongue lénto pe tape kóstare. Pe samaritano ipyʼaporã rupi oipytyvõ hapichápe. Haʼe oipohano umi párte oñelastima haguépe ha oraha chupe peteĩ ospedáhepe. Ndahaʼéi upéva añónte, opaga pe ospedáhe járape oñangareko hag̃ua pe kuimbaʼére, ha heʼi avei chupe opagataha oĩramo ótro gásto (Luc. 10:29-37).

Jahechaukáramo jepe umi mbaʼe jajapóvare ñandepyʼaporãha, ikatu avei jahechauka upéva jaipurúvo hendaitépe umi palávra oporomokyreʼỹva. Upévare la Biblia heʼi “peteĩ persóna ojepyʼapyetereíramo” ha ou oñedeprimi, umi mbaʼe porã jaʼéva ikatu omokyreʼỹ chupe hetiaʼe jey hag̃ua (Prov. 12:25). Ñandepyʼaporã ha ñanembaʼeporãrõ ikatu hína ñambohetiaʼe ñande rapichápe ñañemongetávo hendive umi mbaʼe oporomokyreʼỹvare.a Umi palávra porã jaipurúva ohechaukáta jajepyʼapyha hesekuéra. Péicha ikyreʼỹta hikuái ha ombohovái porãvéta umi pruéva (Prov. 16:24).

ÑAÑEHAʼÃKENA ÑANDEPYʼAPORÃ

Entéro yvypóra ningo ikatu jahechauka ñandepyʼaporãha pórke Ñandejára ñandeapo “ijoguaháramo” (Gén. 1:27). Por ehémplo, peteĩ ofisiál romano hérava Julio oraha vaʼekue Páblope Rómape. Haʼe imbaʼeporãiterei vaʼekue Pablo ndive, upévare “oheja chupe oho iñamigokuéra rendápe oñatende hag̃ua hese” hikuái oĩrõ guare Sidónpe (Hech. 27:3). Upe rire, umi hénte oikóva pe ísla de Máltape “imbaʼeporãiterei” Pablo ha umi ótrondi oñapymírõ guare pe várko ou haguépe hikuái. Umi oikóva upe íslape ombojepota avei tata ikatu hag̃uáicha ojepeʼe umi og̃uahẽ ramóva (Hech. 28:1, 2). Péro jaguerohorýramo jepe koʼã hénte ojapóva, jajapo haguére sapyʼa pyʼa umi mbaʼe porã ndeʼiséi ñandepyʼaporãmaha.

Tekotevẽ siémpre jahechauka ñandepyʼaporãha Ñandejára ñandeguerohory hag̃ua. Upévare Jehová heʼi voi ñañemonde vaʼerãha pyʼaporãgui (Col. 3:12, nóta). Upéicharõ jepe, ndahaʼéi la ifasilpáva jahechauka ko kualida porãite Ñandejára oguerekóva. ¿Mbaʼérepa? Pórke ikatu ñaneotĩ, ndajajeroviái ñandejehe, oĩ oñemoĩva ñane kóntrape térã ñapensaiterei ñandejehe. Péro ikatu hína ñamboyke koʼã mbaʼe pe espíritu sánto rupive. Avei ikatu ñañehaʼã jahecha mbaʼéichapa Jehová ohechauka ipyʼaporãha ikatu hag̃uáicha ñahaʼanga chupe (1 Cor. 2:12).

¿Mbaʼe situasiónpepa tekotevẽ jahechauka ñandepyʼaporãha? Ñañeporandumína: “¿Ahendúpa che rapichápe ha añehaʼã apensa isituasiónre? ¿Aimépa aténto umi ótro oikotevẽrõ g̃uarã álgo? ¿Arakaʼépa pe última ves chembaʼeporã hague peteĩ persóna ndahaʼéivandi che hénte térã che amigoite?”. Upéi ikatu ñañehaʼã jahupyty umi mbaʼe jahecháva ifaltaha ñandéve. Por ehémplo ikatu ñañehaʼã jaikuaave ñande rapichakuérape, koʼýte umi oĩva ñane kongregasiónpe. Péicha jajapóramo jajesarekovéta isituasiónre ha umi mbaʼe oikotevẽvare hikuái. Upéi, ikatu avei jahechauka ñandepyʼaporãha jajapóvo ótrore umi mbaʼe ñandegustátava avei ojejapo ñanderehe (Mat. 7:12). Jajeruréramo Jehovápe ñanepytyvõ hag̃ua, haʼe ñanevendesíta ñañehaʼã rupi ñandepyʼaporã (Luc. 11:13).

ENTÉRONTE OÑEMOAG̃UISE UMI PERSÓNA IPYʼAPORÃVARE

Apóstol Pablo ositárõ guare umi mbaʼe ohechaukáva haʼe oserviha Ñandejárape, oñeʼẽ avei pe pyʼaporãre (2 Cor. 6:3-6). Umi hénte ojogueraha porã vaʼekue Páblondi pórke haʼe oñeinteresa hesekuéra. Upéva ojekuaa umi mbaʼe Pablo torýpe ojapóvare ha heʼívare (Hech. 28:30, 31). Upéicha avei, ñandepyʼaporãramo ikatu ñaipytyvõ umi héntepe oikuaase hag̃ua pe añetegua. Ñandepyʼaporãramo enterovéndi, tahaʼe jepe umi oñemoĩvandi ñanderehe, ikatu hína japoko ikorasõre ha okambia hikuái (Rom. 12:20). Ha moõ jaikuaapa noiméipa upéi ointeresáta chupekuéra pe mensáhe oĩva la Bíbliape.

Pe paraíso oútavape, hetaiterei persóna oikove jeýta ha ohecháta mbaʼeichaitépa entéronte ipyʼaporã, ikatu voi primera ves ohecha hikuái upéva. Katuete ningo oagradesetereíta ojetrata porã haguére chupekuéra, ha ohechaukaséta avei hikuái ipyʼaporãha hapichakuérandi. Upe tiémpope, umi ndoporotrataporãséiva ni noipytyvõséiva ótrope, ndosegimoʼãi oikove Ñandejára Rréino poguýpe. Péro umi persóna Ñandejára ohejáva oikove opa árare ipyʼaporãta ha ojotratáta mborayhúpe (Sal. 37:9-11). ¡Mbaʼeichaitépa isegúrota ha itrankílota pe múndo pyahúpe! Péro og̃uahẽ mboyve upe tiémpo, ¿mbaʼéichapa koʼág̃ama voi ikatu ñañevenefisia jahechaukávo ñandepyʼaporãha?

¿MBAʼÉPA JAHUPYTÝTA ÑANDEPYʼAPORÁRÕ?

La Biblia heʼi: “Peteĩ persóna ivuénoramo, haʼe voi oñevenefisia” (Prov. 11:17). Umi hénte oñemoag̃ui peteĩ persóna ipyʼaporãvare ha otrata jepi avei upéicha chupe. Jesús heʼi vaʼekue: “Pe medída peipurúva pende rapicháre ojepurúta penderehe avei” (Luc. 6:38). Upéicha rupi, peteĩ persóna ipyʼaporãvape ndahasyiete otopa hag̃ua iñamigorã ha omantene hag̃ua upe amista.

Apóstol Pablo oñemoñeʼẽ vaʼekue umi ermáno Efesoguápe heʼívo chupekuéra: “Penembaʼeporã vaʼerã oñondive, pejoporiahuvereko ha peñoperdona pende pyʼaite guive” (Efes. 4:32). Oipytyvõiterei ningo peteĩ kongregasiónpe káda uno oñemoĩramo iñermáno lugárpe ha ojotrata porã ha oñopytyvõ ikatumiháicha. Péicha jave arakaʼeve ndojepurúi ñeʼẽ arhél, ndojetakýi avavére ni ndaipóri omoñeñandu vaíva ótrope oñeʼẽ haguére de segunda. Oñeñeʼẽ vai rangue ótrore, káda uno oñehaʼã oipytyvõ iñermánope umi mbaʼe heʼíva rupive (Prov. 12:18). Péicha pe kongregasión imbareteve espirituálmente.

Jahechaháicha, ñandepyʼaporãramo ojekuaáta jaʼévare ha jajapóvare. Ñandepyʼaporãrõ jasegi hína Jehová ehémplo, pórke haʼe imbaʼeporãiterei ha ipojera (Efes. 5:1). Avei, péicha ñaipytyvõ imbarete hag̃ua ñane kongregasión, ha ñamoĩ ehémplo porã ótrope oservi hag̃ua avei Ñandejárape. Jasegíkena ñañehaʼã ikatu hag̃uáicha umi hénte ñandekuaa haʼe haguére peteĩ puévlo ipyʼaporãva.