Jahechaukákena ñanearanduha
1 Jesús heʼivaʼekue cuatro peskadórpe omoirũ hag̃ua chupe. Ha haʼekuéra nohaʼarõi ojapo hag̃ua upéva, ‘upepete voi oho’ hendive (Mat. 4:18-22). Saulo de Társogui oikovaʼekue kristiáno ha ohecha porã jeývo, nohaʼarõi avei ojedesidi hag̃ua. Haʼe vokoieténte ‘oñepyrũma omyerakuã hudiokuéra oñembyatyha rupi Jesús haʼeha Ñandejára Raʼy’ (Hech. 9:20). Jaikuaáningo pe tiémpo pyaʼe ohasaha, ha ohasávo ndoguevivéima arakaʼeve. Upévare, tekotevẽ ñanearandu ha ndajahejái ohasa rei ñandehegui ñane tiémpo (Efe. 5:15, 16).
2 Umi mbaʼe ñahaʼarõʼỹva. Koʼág̃a ningo ikatu jaserviñaína Jehovápe, péro koʼẽrõ katu ndajaikuaavéima (Sant. 4:14). Enterove rehe ikatu oiko umi mbaʼe ñahaʼarõʼỹva (Ecl. 9:11). Ha avei enterove ñandetuja jahávo. Koʼág̃a rupi, ñandetuja vove ñanderasypáma, ha ndaikatuvéima jajapo heta mbaʼe Jehovápe g̃uarã (Ecl. 12:1). Upévare naiporãmoʼãi ñahaʼarõiterei ñañemeʼẽ hag̃ua Jehovápe, térã ñahaʼarõ iporã raẽ ñane situasión jaservi porãve hag̃ua chupe (Luc. 9:59-62). Ñanemanduʼakuaa Abrahán rehe, haʼe pyʼaguapýpe oikovaʼekue ha ‘tujáguintema omano’. Haʼe ipyʼaguapy oikógui arandúpe, ha oñemeʼẽmbaitégui Jehovápe oservi hag̃ua chupe (Gén. 25:8).
3 Saʼíma ñane tiémpo. Ndajahejaivaʼerã ohasa rei ñane tiémpo, ‘saʼímagui hemby ñandéve’ (1 Cor. 7:29-31). Oñehundipotaitéma ko múndo aña. Upe vove ndaikatumoʼãvéima ñaipytyvõ ñande rapichakuéra ipyʼaporãvape (Rev. 14:15). Upévare, aníkena jajepyʼapy rei heta mbaʼére térã jajaposégui ambue mbaʼe nañasẽvéi japredika (Luc. 21:34, 35). Javyʼaitereíningo ñaipytyvõhaguére ikatu haguéicha ñande rapichakuérape!
4 Ndaikatúiningo jahejánte ohasa peteĩ oportunida jaservi porãve hag̃ua Jehovápe. Upéicharõ, ñañehaʼãmbaitékena jaservi Jehovápe ikatu reheve koʼág̃a (Heb. 3:13). Upévare jahechaukavaʼerã ñanearanduha, ‘oikove rupi opa ára g̃uarã ojapóva Ñandejára rembipota’ (1 Juan 2:17).