Kapítulo 8

‘Ñorairõ umi ánhel aña ndive’

1. Mbaʼérepa jaikuaasevaʼerã mbaʼéichapa ombaʼapo umi ánhel aña ?

OĨRAMO jepe heta oñembohorýva ojeʼégui oĩha tekove aña yvágape, kóva ndahaʼéi peteĩ mbaʼe japuka hag̃ua. Hetáramo jepe ndogueroviáiva, jaikuaa umi ánhel aña oĩha ha ombaʼapoha opaichagua tapicháre. Koʼãva apytépe oĩ avei umi oadoráva Jehovápe. Añetehápe, chupekuéra raẽ oñehaʼã ombyai. Pe apóstol Pablo omombeʼuvaʼekue upéva heʼírõ guare: “Nañañorairõi [...] yvyporakuéra ndive. Ñañorairõ uvei umi yvategua mbaʼe pochykuéra ndive [umi mburuvicha aña yvagapegua], imbarete ha oguerekóva ipoguýpe koʼã ára jaikoha, pyharéicha pytũva” (Efesios 6:12). Koʼã tiémpope, umi tekove aña yvagapegua ombaʼapo hatãvéntema. Satanás oñemosẽvaʼekue yvágagui ha upévare ipochyeterei, oikuaágui oñehundipotaitemaha (Apocalipsis [Revelación] 12:12).

2. Mbaʼéichapa ikatu ñandepuʼaka umi ánhel añáre?

² Ikatúpa ñandepuʼaka umi ánhel añáre? Ikatu, péro upearã tekotevẽ jajeroviapaite Jehováre. Ñahenduvaʼerã chupe ha jajapo la Biblia heʼíva. Upéicharõ añoite ikatúta jajehekýi heta mbaʼe vai ohasávagui umi oĩva Satanás poguýpe (Santiago 4:7).

Mburuvichakuéra yvagapegua oisãmbyhýva ko múndo

3. Máva mávarepa oñemoĩ mbarete Satanás, ha mbaʼéichapa ojapo upéva?

³ Oĩgui Jehová yvágape, ohechapaite oikóva ko múndope ha omombeʼu ñandéve. Peteĩ visión apóstol Juan oguerekovaʼekuépe, ojehecha Satanáspe haʼerõguáicha ‘peteĩ dragón guasu, pytãva tatarendýicha’. Ko dragón oĩvaʼekue omokõ hag̃uáicha Ñandejára goviérnope, oñepyrũrõ guare ogoverna yvágape 1914-pe. Ndaikatúimaramo ojapo upéva, Satanás oñemoĩ opersegi umi tapicha ombaʼapóva ko Goviérno ndive (Apocalipsis [Revelación] 12:3, 4, 13, 17). Mbaʼéichapa Satanás ojapo ko mbaʼe? Oiporúvo umi yvypóra haʼe oisãmbyhývape.

4. Mávapa omeʼẽ pe puʼaka umi goviérnope, ha mbaʼéichapa jaikuaa upéva?

⁴ Juan ohecha koʼág̃a peteĩ mymba ñarõ siete iñakã ha diez hatĩva, ha ipuʼakáva “opaichagua yvypórare, táva, ñeʼẽ ha tetãre”. Ko mymba hína pe sistéma polítiko oĩva ko múndope. Juánpe ojeʼe pe dragón [Satanás el Diablo] omeʼẽha ko mymbápe ‘ipuʼaka, iguapyha ha tuicha autorida’ (Apocalipsis [Revelación] 13:1, 2, 7). Añetehápe, Satanás omeʼẽ pe puʼaka ha autorida umi goviérnope. Upévare, heʼihaguéicha pe apóstol Pablo, umi oisãmbyhy añetéva ko múndo haʼe umi ánhel aña oguerekóva ipoguýpe umi goviérnope. Umi oadoraséva Jehovápe ohechakuaavaʼerã koʼã mbaʼe (Lucas 4:5, 6).

5. Mbaʼerãpa oñembyatyhína koʼág̃a umi mburuvichakuérape?

⁵ Oĩramo jepe heta governánte heʼíva irrelihiosoha, ndaipóri peteĩ tetã oñemoĩva Jehová goviérno poguýpe térã omombaʼéva pe Rréi haʼe omoĩvaʼekuépe, Jesucristo. Entéro umi tetã oñorairõ jepi omantene hag̃ua ipodér. Ohechaukaháicha Apocalipsis, umi demónio ojapo koʼág̃a heta mbaʼe ombyaty hag̃ua umi mburuvichakuérape. Koʼãva oñorairõta Ñandejára Ipuʼakapáva ñorairõme, hérava Armagedón (Apocalipsis [Revelación] 16:13, 14, 16; 19:17-19).

6. Mbaʼérepa ñañeñangarekovaʼerã ani hag̃ua ñañemoĩ Satanás múndo ykére?

⁶ Koʼẽ koʼẽre, opaichagua tapicha oñandu umi provléma polítiko, sosiál, ekonómiko ha rrelihióso ombohasa asýva yvyporakuérape. Koʼã provlémape oike jepi hikuái oñemoĩvo odefende hetã, iñidióma térã ikláse sosiál. Ha pyʼỹi umi natekotevẽiva jepe oike koʼã provlémape oñemoĩ odefende peteĩme. Ojapóvo upéicha, máva ykérepa oñemoĩhína hikuái? La Biblia heʼi porã “ko múndo oĩmbaha aña poguýpe” (1 Juan 5:19, BNP). Mbaʼépa, upéicharõ, ikatu jajapo ani hag̃ua Satanás ñanembotavy ko múndo ndive? Ñañemoĩ Ñandejára goviérno ykére ha ndajajeheʼái umi provléma ko múndope oĩvare (Juan 17:15, 16).

Umi ñuhã oiporúva Satanás

7. Mbaʼéichapa ojehecha Satanás ikatupyryha oiporúvo pe rrelihión japu?

⁷ Ymaiterei guive, Satanás oiporu opaichagua persekusión omboyke hag̃ua tapichakuérape Ñandejára rape potĩgui. Péro oiporu avei heta ñuhã oporombotavy hag̃ua. Katupyrýpe oiporu pe rrelihión japu oguereko hag̃ua pytũmbýpe hetaiterei tapichápe, ogueroviaukávo chupekuéra oserviha Ñandejárape. Ndoikuaaporãi rupi Ñandejárape ha ndohayhúigui pe añetegua, umi hénte ikatu omombaʼeterei umi mbaʼe ojejapóva heta rrelihiónpe (2 Tesalonicenses 2:9, 10). Upevére, ojeʼe ñandéve oĩtaha umi ohejáva ijerovia “oho hag̃ua umi espíritu japu oporombotavýva ha umi [demónio omboʼéva] rapykuéri” (1 Timoteo 4:1). Mbaʼéichapa ikatu oiko upéva?

8. Mbaʼéichapa ikatu Satanás ñandereity pe rrelihión japúpe jaadoráramo jepe Jehovápe?

⁸ Satanás oikuaa mbaʼépepa ñanekangy ha oiporu upéva ñandereity hag̃ua. Jakyhyjépa gueteri ñande rapicha yvypóragui? Upéicharamo, peteĩ ñane pariénte térã vesíno heʼíramo jajapo hag̃ua umi rrelihión japu omboʼéva ikatu jakyhyje ha jajapo. Térãpa ñandeorgullóso gueteri? Oiméramo upéicha, ikatu ñandepochy oĩramo oñemoñeʼẽva ñandéve, térã nomoporãiramo pe jaʼéva (Proverbios 15:10; 29:25; 1 Timoteo 6:3, 4). Jasegirangue pe ehémplo Cristo ohejavaʼekue, ikatu ñahenduseve ojeʼéramo ñandéve ñahendusévante. Umíva apytépe oĩ heʼíva iporãmaha jalee guive la Biblia ha ndajajapói mbaʼeve ivaíva (2 Timoteo 4:3). Satanáspe ndoipyʼapýi jaikéramo peteĩ rrelihiónpe térã jasegíramo ñande jagueroviávante. Haʼe ndoipotáinte jaadora Jehovápe ñanemboʼeháicha la Biblia ha Ñandejára organisasión.

9. Mbaʼéichapa Satanás oiporu pe deséo seysuál ojejapo hag̃ua haʼe oipotáva?

⁹ Satanás oporombotavy avei omokyreʼỹvo tapichakuérape oguereko hag̃ua rrelasión seysuál hendapeʼỹ. Ko múndope pyʼỹi oñemboyke Ñandejára heʼíva ha ojeʼe peteĩ kuimbaʼe ha kuña ikatuha oiko oñondive omendaʼỹre, térã upéicha ojapóvo pe tapicha ohechauka okakuaapamaha. Ha mbaʼépa ikatu jaʼe umi omendávare? Oĩ heta oñomoakãratĩva térã, ndojapóiramo jepe ko mbaʼe, ojedivorsia térã ojuejáva ikatu hag̃ua oñemoirũ jey ambuéndi. Japúpe Satanás omomýi yvyporakuérape ovyʼa hag̃ua koʼág̃a ha ani hag̃ua opensa umi mbaʼe vai oguerútavare. Umi mbaʼe ndojapovaimoʼãi hesekuéra añónte, ivaiveha, omoĩ vaíta chupekuéra Jehová ha Itaʼýra ndive (1 Corintios 6:9, 10; Gálatas 6:7, 8).

10. Mbaʼéichapa oiporu Satanás pe teko tieʼỹ ha violénsia ñanembyai hag̃ua?

¹⁰ Entéro ñande yvypóra javyʼase avei. Pe vyʼarã iporãramo ikatu ñanembopiroʼy. Péro, mbaʼépa jajapo Satanás oiporu jave pe vyʼarã ñanemboyke hag̃ua Jehovágui? Ñande jaikuaa Jehová ndaijaʼeiha pe teko tieʼỹ ha violénsiare. Péro jahecha vove koʼã mbaʼe peteĩ pelíkulape, televisión térã teátrope, japytápa upépe jahechapaite umi mbaʼe? Ñanemanduʼavaʼerã Satanás ohekataha ombohetave ha ombovaive koʼã mbaʼe, koʼýte hiʼag̃uivévo pe ára ojepoi hag̃ua yvykua pypukúpe [abismo, NM]. La Biblia heʼi: “Umi tekove vai oikóva oporombotavy katu oho vai vaive vaʼerã, oporombotavy ha oñembotavyvaʼerã” chupekuéra (2 Timoteo 3:13, BNP , Apocalipsis [Revelación] 20:1-3). Upévare, ñañatende meme vaʼerã ikatu hag̃ua jahechakuaa mbaʼéichapa ombaʼapo Satanás (Génesis 6:13; Salmo 11:5; Romanos 1:24-32).

11. Jaikuaáramo jepe mbaʼépa pe espiritísmo, mbaʼéichapa ikatu jaʼa iñuhãme nañañatendeporãiramo?

¹¹ Jaikuaa avei Jehová ndaijaʼeiha umi espiritísmo ojapóvare, tahaʼe haʼevaichagua. Umíva apytépe oike pe adivinasión, paje térã oñeñeʼẽse umi omanovaʼekue ndive (Deuteronomio 18:10-12). Jaikuaávo upéva, ndajaikomoʼãi jajevale peteĩ tapicháre ojapo hag̃ua ñandéve umi mbaʼe, ha katuete ndajahejamoʼãi oike ñande rógape ojapo hag̃ua espiritísmo. Péro, ñahendútapa chupe jahecháramo televisiónpe térã Internét rupive? Ndajahamoʼãiramo jepe peteĩ pajeséro rendápe ñanemonguera hag̃ua, ñañapytĩnepa peteĩ mbaʼe pe mitã onaseramóva pyapýre, ñaimoʼãgui upéicha ndojehumoʼãiha chupe mbaʼeve? Térã jaikuaa rire la Biblia okondenaha jajapo paje ñande rapicháre, jahejánepa ojejapo ñanderehe pe hipnotismo? (Gálatas 5:19-21.)

12. a) Mbaʼéichapa pe músika rupive ikatu jajapose ivaíva? b) Mbaʼéichapa ñande ao, ñaneñeʼẽ térã ñane akãrague ohechauka ñamombaʼeha umi tapicha hekovaívape? c) Mbaʼépa jajapovaʼerã ani hag̃ua jaʼa Satanás ñuhãme?

¹² La Biblia heʼi ani hag̃ua ñañemongeta jepe, natekotevẽiramo, pe teko tieʼỹ ha teko kyʼáre (Efesios 5:3-5). Péro mbaʼépa jajapóta ñahendúramo umi mbaʼe músika pu porãme? Ñañepyrũtapa ñande avei japurahéi ha ñamombaʼe pe dróga, teko tieʼỹ térã oimeraẽ mbaʼe ivaíva ojeʼéva upépe? Térã jaikuaáramo jepe ndajaikoivaʼerãha umi hénte oikoháicha, ñañemondesépa haʼekuéraicha, térã jajoguase chupekuéra iñeʼẽme térã orekoháicha iñakãrague? Umi ñuhã Satanás oiporúva omosarambi hag̃ua umi mbaʼe vai ojaposéva, añetehápe ñanembotavykuaa (2 Corintios 4:3, 4). Ndajaʼaséiramo umi ñuhãme, ndajahejaivaʼerã ko múndo ñanembyai. Ñanemanduʼavaʼerã mávapa hína umi mburuvichakuéra oguerekóva ipoguýpe ko múndo pytũmbýpe oĩva, ha ñañemoĩ mbarete hesekuéra (1 Pedro 5:8).

Ñañemoĩ ñandepuʼaka hag̃uáicha ko ñorairõme

13. Mbaʼéichapa ikatu ñane imperféktoramo jepe ñandepuʼaka Satanás múndore?

¹³ Jesús omano mboyve, heʼivaʼekue ijapostolkuérape: “Ani pekyhyje, che chepuʼakavaʼekue ko múndo rehe” (Juan 16:33, BNP). Haʼekuéra avei ikatuvaʼekue ipuʼaka ko múndore. Sesenta áño upe rire, pe apóstol Juan ohaivaʼekue: “Ndaipóri ipuʼakáva ko múndo rehe ogueroviaʼỹramo Jesús [...] Ñandejára Raʼyha” (1 Juan 5:5, BNP). Jahechauka upeichagua jerovia ñaneñeʼẽrendúvo Jesúspe ha jajeroviávo Ñandejára Ñeʼẽre, Jesús ojapohaguéicha. Mbaʼépa tekotevẽ jajapove? Ani jaheja pe kongregasión haʼe Omoakãva. Jajavy vove, ñañembyasyvaʼerã ñande pyʼaite guive ha jajerure Jehovápe tañaneperdona Jesús sakrifísio rupive. Upéicha, jajavýramo jepe sapyʼánte ñane imperféktogui, ikatúta ñandepuʼaka ko múndore (Salmo 130:3, 4).

14. Elee Efesios 6:13-17 ha eiporu umi porandu ha téysto oñemoĩva pe párrafo rire rehecha hag̃ua mbaʼéichapa ñanepytyvõ ñamoĩ ko armadúra oúva Ñandejáragui.

¹⁴ Jajapo hag̃ua upéva, ñamoĩvaʼerã ‘pe armadúra oĩmbaitéva oúva Ñandejáragui’, ha ani jaheja rei mbaʼeve. Eguenohẽmi nde Biblia ha eleemi Efesios 6:13-17 rehecha hag̃ua mbaʼeichaguápa pe armadúra. Upe rire, eiporu umi porandu oñemoĩva rehecha hag̃ua mbaʼéichapa pe armadúra ñanemoʼã.

‘Jajekuʼajopy añeteguápe’

Jaikuaáramo jepe pe añetegua omboʼéva Ñandejára Ñeʼẽ, mbaʼéichapa ñanepytyvõ jastudia meme la Biblia, jajepyʼamongeta hese ha jaha meme rreunionhápe? (1 Corintios 10:12, 13; 2 Corintios 13:5; Filipenses 4:8, 9.)

‘Ñamoʼã ñande pytiʼa hustísiape’

Mávapa omboʼe pe hustísia? (Apocalipsis [Revelación] 15:3.)

Emoĩ ehémplo ohechaukáva mbaʼéichapa opyta vai Ñandejára ndive umi omboykéva ihustísia (Deuteronomio 7:3, 4; 1 Samuel 15:22, 23).

‘Ñamoĩ ñande pyreheguáramo pe notísia porã oguerúva pyʼaguapy’

Mbaʼéichapa ñandeprotehe jaiporu meméramo ñande py jaha hag̃ua ñamombeʼu ñande rapichápe Ñandejára oguerutaha pyʼaguapy? (Salmo 73:2, 3; Romanos 10:15; 1 Timoteo 5:13.)

‘Ñande jerovia eskúdo guasúramo’

Imbaretéramo ñande jerovia, mbaʼépa jajapóta oĩramo ñanemongyhyjeséva? (2 Reyes 6:15-17; 2 Timoteo 1:12.)

‘Ñane akãmoʼãháramo pe salvasión’

Mbaʼéichapa pe esperánsa jajesalvataha ñanepytyvõ ani hag̃ua jaikoiterei umi mbaʼerepy rapykuéri? (1 Timoteo 6:7-10, 19.)

‘Pe espáda espíritugui oúva’

Mbaʼérepa jajeroviavaʼerã oĩ jave ñandejopy vaíva, ñandéve térã ñande rapichápe, ñamboyke hag̃ua Ñandejárape? (Salmo 119:98; Proverbios 3:5, 6; Mateo 4:3, 4.)

Mbaʼépa avei ñaikotevẽ ñagana hag̃ua ko ñorairõ? Mboy vésepa jajapovaʼerã upéva? Ha máva rehehápepa? (Efesios 6:18, 19.)

15. Mbaʼéichapa ñañorairõ porãvéta ñande jeroviáre?

¹⁵ Cristo soldádoicha, ñande ñaime peteĩ ehérsitope ha ñañorairõ ñande jeroviáre. Ñañatende porãramo ha jaiporu pe armadúra oĩmbaitéva oúva Ñandejáragui, ndajaʼamoʼãi ko ñorairõme ha ñaipytyvõta avei ñane ermanokuérape. Ñaime porãvéta jasegi hag̃ua japredika umi mbaʼe porã oguerútava Ñandejára rréino, pe goviérno yvagapegua oĩtava Jesucristo pópe ha Satanás oñehaʼãmbaitéva ombyai.

Ñanemanduʼa hag̃ua

• Mbaʼérepa umi oadoráva Jehovápe ndojeheʼái mbaʼeveichagua ñorairõ ko múndope oĩva rehe?

• Mbaʼeichagua ñuhãpa oiporu Satanás ombyai hag̃ua kristianokuérape?

• Mbaʼéichapa ñanepytyvõ pe armadúra oúva Ñandejáragui ñañorairõ hag̃ua ñande jeroviáre?

[Nóta oĩva taʼanga ndive páhina 76]

Tetãnguéra oñembyatyhína oñorairõ hag̃ua Armagedónpe