Umi sarambi oikóva: ¿ohechaukápa Ñandejára ipyʼahatãha?

OJEʼÉVA JEPI: “Ñandejára ningo ogoverna ko múndo. Upéicharõ haʼe voi ombou umi yvytu atã, ama guasu ha ambue mbaʼe vai ñandekastiga hag̃ua”.

MBAʼÉPA HEʼI LA BIBLIA: ‘Ko múndo oĩ aña poguýpe’ (1 Juan 5:19, BNP). Ñandejára Ñeʼẽ heʼi pe “aña” haʼeha Satanás, pe tekove ipyʼahatãitéva (Mateo 13:19; Marcos 4:15). Péro, ¿añete piko oĩ ipoguýpe ko múndo? Epensamínte: Satanás ogovernáramo ko múndo, katuete oguerováta ilája umi hénte oĩvare ipoguýpe. Haʼe itaryrýi, ndojepyʼapýi avavére ha oreko pytũmbýpe opavavépe. Umíva ohechauka porã mbaʼérepa yvyporakuéra ojapo heta mbaʼe ombyaíva ohóvo ko yvy ha opa mbaʼe oĩva pype. Umi iñarandúva koʼã mbaʼépe, heʼi ndojeporuporãi rupi ko yvy ikatuha oiko heta sarambi opárupi, káda día ikatu ivai vaive ñane situasión ha oiko pyʼỹive umi sarambi.

Péro, ¿mbaʼérepa Ñandejára oheja Satanáspe ogoverna ko múndo? Jaikuaa hag̃ua, jahecha vaʼerã mbaʼépa oiko vaʼekue Ñandejára ojapo riremi yvyporakuérape. Ñande tuvakuéra ypykue, Adán ha Eva, opuʼã kuri Ñandejárare ha noñemoĩsevéi ipoguýpe, upe guive heta yvypóra ojapo avei upéicha. Odesidi vai rupi hikuái, ko múndo tuichakue oĩ Ñandejára enemígo poguýpe. Upévare Jesús ohenói Satanáspe “ko múndo ruvicha” (Juan 14:30, BNP). Péro haʼe nogovernamoʼãi opa árare ko múndo.

Jehováa ningo ombyasy ohechávo mbaʼéicha Satanás oporombohasa asy. Por ehémplo, la Biblia omombeʼu mbaʼéichapa oñeñandu ohechárõ guare Israel osufri: “Haʼekuéra ojejopy vaiete jave, Haʼe ojepyʼapy avei” (Isaías 63:9, ÑÑB). Ñandejára oiporiahuverekógui yvyporakuérape, odesidíma ohunditaha Satanás goviérno, ha koʼẽrõitéma ojapóta upéva. Avei omoĩma Itaʼýra Jesucrístope ogoverna hag̃ua opa árare.

MBAʼÉPA ÑAAPRENDE: Satanás arakaʼeve ndoprotehéi yvyporakuérape umi sarambi oikóvagui, péro Jesús ojapóta upéva. Haʼe oikórõ guare ko yvy ape ári, oprotehe idisipulokuérape ojagarrárõ guare chupekuéra márpe peteĩ torménta ndevaíva. La Biblia heʼi: “Ojaʼo pe yvytúpe ha heʼi pe márpe: ‘¡Epytaitéke! ¡Ekirirĩetéke!’. Ha pe yvytu opyta ha pe torménta ohasaite”. Umi idisípulo katu oponderajoa ha heʼi ojupe: “¿Máva piko añetehápe ko kuimbaʼe? Yvytu ha mar jepe iñeʼẽrendu chupe” (Marcos 4:37-41, NM). Upévare ikatu jajerovia Jesús ogoverna vove oprotehetaha umi iñeʼẽrendúvape (Daniel 7:13, 14).