Japredika ñanekaneʼõʼỹre
1 Ivaieterei ko tiémpo koʼág̃a jaraháva. Oiko heta ñorairõ tetãnguérarupi, oĩ umi ñorairõ ojapóva umi grúpo ndahaʼéiva ojorrása rehegua, oĩ umi omoĩva ijehe vómba okapu ha oporojuka hag̃ua ha hetave mbaʼe ivaietereíva. Koʼág̃a opárupi yvyporakuéra oikotevẽtereive ymaguarégui pe marandu porã. Péro opárupi avei noñemombaʼéi Ñandejára Ñeʼẽ. Heta hendápe hasy jatopa hag̃ua hógape tapichakuérape ha hasyvéntema jatopa hag̃ua umi ohenduséva, térã ostudiaséva Ñandejára Ñeʼẽ. Upéicharõ jepe, tekotevẽ japredika ñanekaneʼõʼỹre pe marandu porã Ñandejára Rréino rehegua (Mat. 24:14).
2 Jehová ohayhu yvyporakuérape. Pe predikasión jajapóva ohechauka Jehová ohayhuha yvypórape. “Haʼe ndoipotái oñehundi avave. Oipota uvei opavave oñembyasy hembiapo vaígui” (2 Ped. 3:9; Eze. 33:11). Upévare Jehová oipota, Jesús heʼihaguéicha, ‘enterove tetãme ojepredika raẽ ko marandu porã’ (Mar. 13:10). Ñandejára ojerure yvyporakuérape ojevy hag̃ua ha oservi chupe ikatu hag̃uáicha ohasa omanoʼỹre pe huísio Satanás múndope og̃uahẽtava (Joel 2:28, 29, 32; Sof. 2:2, 3). Ajépa javyʼa Jehová omeʼẽhaguére ñandéve ko oportunida (1 Tim. 1:12, 13).
3 Pe infórme mundiál predikasión rehegua ohechauka pe áño de servísio 2004-pe ojejapohague 6.085.387 estúdio vívliko rupi káda més, ha ojevautisahague 5.000 disípulo pyahu rupi káda semána. Umíva apytépe oĩ umi oikuaavaʼekue la verda oĩhaguére umi ermáno oñehaʼãva oñeʼẽ opavavépe iterritóriope, ha Jehová ovendesi hembiapokuéra. Ñanembovyʼaitépa upe infórme ñahendúva, ha tuichaitépa ko priviléhio oñemeʼẽva ñandéve ñambaʼapo hag̃ua Ñandejára ndive ko predikasiónpe, ikatúva osalva ñande rapi-chakuéra rekove! (1 Cor. 3:5, 6, 9.)
4 Ñamombaʼe Ñandejára Réra. Japredika ñanekaneʼõʼỹre ñamomorã hag̃ua Jehovápe opavave rovake ha ñamopotĩ hag̃ua héra opárupi ko Yvy apére (Heb.13:15). Satanás ombotavy ‘opavave tapichakuéra oĩva ko Yvy ape áripe’, oimoʼã hag̃ua Ñandejára ndaikatuiha omyatyrõ umi yvypóra provlemaita, térã nomombaʼeiha yvyporakuéra jehasa asy, térã ndaiporiha voi Ñandejára (Rev. 12:9). Pe predikasión rupive, ñadefende pe añetegua ñande Ru yvagapegua ijojahaʼỹvagui. Jasegíkena ñamomorã ha ñamombaʼe Ñandejára réra... koʼág̃a ha opa ára g̃uarã (Salmo 145:1, 2).