Kárta omboúva Cuerpo Gobernante
Oremaitei enterove ermanokuérape:
Rovyʼaite ningo ikatu haguére romombeʼu peẽme ko kárta rupive mbaʼéichapa roñeñandu! Haʼete apóstol Juan oñeñandu haguéicha heʼírõ guare ‘ohayhuetereiha’ iñermanokuérape, ha ovyʼaiterei hague ohendúrõ guare oho porãha hese hikuái ‘Ñandejára rapére’ (2 Juan 1, 4). Ñande ningo hetaiterei mbaʼe porã jahupyty jaikuaágui Ñandejára Ñeʼẽ. Pór ehémplo, upéicha rupi nañaiméi Babilonia Guasu poguýpe. Umíva ningo omongyʼa Ñandejára réra. Jajapo rupi la Biblia heʼíva japorohayhuve, ñanderory ha ñanembaʼerechakuaa. Avei ñaneimperféktoramo jepe ikatu ñañemoag̃ui Ñandejárare, ha tuicha ñanekonsola jaikuaávo ikatuha jaiko opa ára g̃uarã.
Jaagradesete ningo Jehovápe omeʼẽ haguére ñandéve ijespíritu, ára ha ára ñanesãmbyhy ha ñanemombaretéva. Katuete penepytyvõneraʼe umi mbaʼe jahechavaʼekue ñande Aty Guasúpe “Ñandejára espíritu ñanesãmbyhy”. Jaikuaaháicha koʼã tiémpo jaikóvape ivai vaive ohóvo, upévare tekotevẽterei jajerovia Jehová espíritu ñanesãmbyhy porãtaha.
Jaleévo Anuáriope mbaʼeichaitépa ñane ermanokuéra ohasa asy, opokoiterei ñanderehe. Ha koʼýte jaikuaávo umíva apytépe oĩha ojevautisa ramóva térã neʼĩrava voi ojevautisa. Ñamombaʼeterei ningo chupekuéra iñeʼẽrendu ha nomboykéigui Ñandejárape! Añetehápe koʼã ehémplo ñanemombarete jaservi hag̃ua Jehovápe toiko oikóva (1 Tes. 1:6-8).
Roikuaa ningo pehasaha heta mbaʼe ijetuʼúvare, sapyʼánte pendesogue térã pehasa asy ambue mbaʼére. Upéicharamo jepe mborayhúpe peñehaʼã peservi porã Jehovápe pene família ndive, peikuaágui tekotevẽtereiha pejapo upéva. Pór ehémplo, hetápe ijetuʼu osẽ hag̃ua predikasiónpe térã oho hag̃ua rreunionhápe, péro ojapo hasýramo jepe. Upévare heta roñemboʼe ha rohecha rire mbaʼépa ikatu ojejapo, rokambiaʼimi ñane rreunionkuéra 1 de enero 2009 guive. Rojerovia ningo peaprovecha porãtaha koʼã mbaʼe ha avei pestudiavetaha peneaño térã pene família ndive.
Orembovyʼaiterei rohechávo mbaʼéichapa ñande aty guasukuérape heta oĩ ojevautisavaʼekue, ha umíva apytépe mitã jepe. Upévare, poguerohoryeterei tuvakuéra pemboʼe haguére pene famíliape ohayhu hag̃ua Ñandejára rape ha pemokyreʼỹ haguére chupekuéra oservi hag̃ua Jehovápe imitã reheve. Haʼekuéra ningo ohasa heta mbaʼe eskuélape ha upéicharamo jepe ojevautisa. Upéva ohechauka oñehekomboʼe porã hague chupekuéra hogapýpe (Sal. 128:1-6).
Oĩ avei ambue mbaʼe orembovyʼáva. Rohechakuaa ningo koʼág̃a oĩha hetave ostudiáva la Biblia. Upéva ohechauka mbaʼeichaitépa oñembaʼapo porã, koʼýte umi misionéro ha precursor especial. Ore ningo romombaʼeterei pe tembiapo neporãva opavave pejapóva ikatu hag̃uáicha umi ipyʼaporãva ou ha hoyʼu “pe y oporomoingovévagui” opagaʼỹre mbaʼevete (Rev. 22:17, BNP). Ñamomaitei umi 289.678 oñemeʼẽvaʼekue Jehovápe ha ojevautisa pe áño ohasavaʼekuépe.
Akóinte iporã ñanemanduʼa apóstol Juan heʼivaʼekuére: “Ko múndo niko opavaʼerã, opa koʼã mbaʼe ojehayhúva ipype oĩva reheve, pe ojapóva [...] Ñandejára rembipota katu opytavaʼerã tapia g̃uarã” (1 Juan 2:17, BNP). Añetehápe ningo ko múndo aña “opavaʼerã”, ha saʼietereíma ofalta upearã. Ñañatende porãkena ha jajapo Ñandejára rembipota (Mat. 24:42). Upéicha jajapóramo arakaʼeve nañambyasymoʼãi, jahupytýta guei heta mbaʼe porã Jehovágui (Isa. 63:7).
Roipotaite ningo umi mbaʼe porãite oĩva Anuario 2009-pe penepytyvõ pemotenonde hag̃ua Ñandejára rréino opa mbaʼe ári. Peikuaákena ore ermanokuéra akóinte oremanduʼa ha roñemboʼeha penderehe. Peikuaákena avei ore pohayhuetereiha. Jehová tapenevendesi.
Pene ermanokuéra,
Cuerpo Gobernante de los Testigos de Jehová