Ehechauka mbaʼérepa ideprovécho pe informasión

IPORÃRAMO jepe peteĩ informasión, upéva ndeʼiséi katuete ideprovechotaha umi nerendúvape. Reprepara vove nde diskúrso reñeporandu vaʼerã: “¿Mbaʼérepa ou porãta chupekuéra ko informasión? ¿Mbaʼépa ikatu haʼe ohechakuaa hag̃ua hikuái ko informasión añetehápe ideprovechotaha chupekuéra?”.

Rejapóta jave diskúrso repensa vaʼerã reñeʼẽtaha pe kongregasión kompletoitépe, péro otokáramo ndéve peteĩ demostrasión nde reñeʼẽta hína ne ajudántepe.

Ereko enkuénta umi nerendútavape. Primeroite reñeporandu vaʼerã mbaʼe mbaʼépa oikuaáma voi umi nerendúva pe témagui. Ne kongregasiónpe oĩramo heta ermáno aréma oservíva Jehovápe, ani rerrepetínte umi enseñánsa oikuaapámava voi hikuái, síno emyesakãve umíva. Péro oĩramo heta estudiánte oho ramóva rreunionhápe, rejepreparávo rereko vaʼerã enkuénta chupekuéra.

Odepende umi nerendúvare reikuaa hag̃ua tekotevẽpa reñeʼẽ pyaʼeve térã mbegueve. Por ehémplo ikatu reñeʼẽ pyaʼeve remyesakã jave peteĩ mbaʼe enterove oikuaámava voi, péro reñeʼẽ vaʼerã trankilove eréta jave peteĩ púnto pyahu, péicha ifasilvéta chupekuéra ontende hag̃ua.

Epensa vaʼerã mbaʼépa oikotevẽ umi nerendúva. Ideprovécho hag̃ua pe informasión natekotevẽi katuete remombeʼu peteĩ mbaʼe pyahu. Oĩ diskursánte omyesakã jave peteĩ mbaʼe, isensíllo la ijexplikasión, upévare oñeʼẽramo jepe peteĩ téma ikonosídovare, hetápe g̃uarã haʼete voi por primera ves ontende porãva upe enseñánsa.

Repredika jave rehechaukaséramo jaikoha umi ára pahápe, ani reñeʼẽnte peteĩ notísiare, síno emyesakã pe ogajárape mbaʼéichapa umi mbaʼe oikóva ohechauka oñekumpliha hína umi profesía. Péicha pe ogajára ohecháta iñimportanteha pe mensáhe reikuaaukáva. Upéichante avei reiporútaramo peteĩ informasión omeʼẽ vaʼekue umi sientífiko pe naturalésare, umi animalkuérare térã umi plántare, ndahaʼéi representánte vaʼerã peteĩ informasión iñinteresánteva térã igústova, síno remyesakã vaʼerã umíva rupive Ñandejára oexisti ha ñanderayhuha.

Ha reñeʼẽtaramo peteĩ téma ikonosídovare, ¿mbaʼépa ikatu rejapo lomímonte iñinteresánte hag̃ua?

Tekotevẽterei reinvestiga porã upe téma. Rejeprepara jave ani remoĩnte umi idéa oúva ndéve ne akãme, síno eñehaʼã eheka informasión oñeʼẽvéva upe témare. Páhina 33 al 38-pe retopáta moõpa ikatu rejeporeka. Ha upépe oñemeʼẽ avei heta suherénsia reikuaa hag̃ua mbaʼe mbaʼépa rereko vaʼerã enkuénta reheka jave informasión. Reinvestiga jave ikatu retopa peteĩ mbaʼe iñinteresánteva ohóva ne témare ha naentéroi oikuaáva, por ehémplo peteĩ notísia osẽ ramoite vaʼekue térã peteĩ detálle omeʼẽ vaʼekue umi istoriadór.

Nde voi rentende porã vaʼerã mbaʼérepa pe informasión iñimportánteta umi nerendúvape. Upévare reiporavo jave pe informasión reñeporandu vaʼerã: “¿Mbaʼérepa ikatu aguerovia upépe heʼíva? ¿Mbaʼéichapa ahechaukáta upéva che diskúrsope? ¿Mbaʼérepa ijetuʼu algúnope oguerovia hag̃ua ko enseñánsa vívlika? ¿Mbaʼérepa ontende porã vaʼerã hikuái ko púnto? ¿Mbaʼérepa ou porãta chupekuéra ko konsého? ¿Mbaʼe ehémplopa aiporukuaa ahechauka hag̃ua ideprovechoha jasegi upe konsého? ¿Mbaʼépa ñanemboʼe Jehovágui upe enseñánsa?”. Ha reñeʼẽtaramo peteĩ mbaʼe oiko vaʼekuére ymave, iporãta avei reñeporandu: “¿Arakaʼetépa oiko raʼe upéva? ¿Mbaʼe leksiónpa ikatu ñaaprende?”. Ikatu voi nde diskúrso aja reporandu koʼã mbaʼe ha rekontestáma voi rehóvo, upéicha katuete igústota la nde párte.

Ikatu otoka ndéve relee umi téxto ikonosidoitereíva, ¿mbaʼépa rejapo vaʼerã iñinteresanteve hag̃ua umi nerendúvape? Ani releénte ha opáma, síno ehecha mbaʼépa ikatu ere remyesakãve hag̃ua.

Por ehémplo, umi téxto katuete ideprovechovéta umi nerendúvape reiporavóramo peteĩ palávra ohóva nde diskúrso témare ha upéi remyesakã. Ñamoĩ chupe releetaha Colosenses 3:12, upéicharõ ikatu remyesakã mbaʼépa Pablo ontendekase heʼívo ‘peiporiahuvereko pende rapichápe, penembaʼeporã ha peñemomirĩ’. ¿Mbaʼéicha javépa jahechauka koʼã mbaʼe? ¿Mbaʼe ehémplopa ikatu reiporu remyesakã hag̃ua ko párte? Odepende ne témare, ne tiémpore ha mbaʼépa ideprovechovéta umi nerendúvape reikuaa hag̃ua mbaʼe pártepa remyesakãta.

Natekotevẽi remeʼẽ hetaiterei detálle remyesakãta jave peteĩ palávra, síno eñehaʼã taisensíllonte la nde explikasión. Jepe haʼete la ikonosidoitereíva pe palávra “Rréino”, heta hénte ndoikuaái mbaʼépa añetehápe heʼise. Umi heta áñorema oservíva Jehovápe jepe ikatu ontende porãve peteĩ téxto remyesakãvo mbaʼépa heʼise peteĩ palávra oĩva pe versíkulope. Por ehémplo releévo 2 Pedro 1:5-8, ikatu remyesakã mbaʼépa heʼise jajerovia, ñanembaʼeporã, jajejokokuaa, ñaaguanta, ñamombaʼeguasu Ñandejárape, jahayhu ñane ermánope ha enterovépe. Ha Proverbios 2:1-6-pe katu oĩ umi palávra ojojogua léntova. Upépe heʼi iñimportanteha ñanearandu, jareko konosimiénto, disernimiénto ha entendimiénto. Péicha jave iporãta remombeʼu mbaʼépepa idiferénte ojuehegui koʼã mbaʼe.

Jaiporukuaa avei peteĩ téxto vívliko ikatu hag̃uáicha ñamopensa umi ñanerendúvape ha ñamboʼe hag̃ua chupekuéra peteĩ mbaʼe iñimportánteva. Jesús ojapo vaʼekue upéva, haʼe oiporu peteĩ téxto umi saduséo ogueroviáva ohechauka hag̃ua haʼekuéra ojavyha. Jesús imanduʼa Éxodo 3:6 heʼívare omyesakã hag̃ua umi omanóva oikove jeytaha (Luc. 20:37, 38). Ha heta hénte katuete ohecharamóta mbaʼépa la Biblia omboʼe umi omanóvare jahechaukáramo chupekuéra Juan 11:11-14 heʼíva. Upépe Jesús heʼi iñamígo Lázaro okenteha, ha upéva oho porãiterei Eclesiastés 9:5 heʼívare, umi omanóva nopensái ni noñanduiha mbaʼeve.

Ikatu avei ñamyesakãve peteĩ téxto ñamombeʼúramo mbaʼe mbaʼépa heʼi pe téxto mboyve ha upe rire, mbaʼe situasiónpepa ojeskrivi, mávapa heʼi umi mbaʼe, térã mávape g̃uarãpa ojeskrivi. Jesús ojapo upéva ombohováirõ guare umi fariséope. Haʼekuéra oikuaa voi mbaʼépa heʼi pe Salmo 110, péro Jesús omyesakã peteĩ detálle iñimportantetereíva. Haʼe oporandu: “¿Mbaʼépa peẽ peje? ¿Máva raʼýpa pe Cristo?”. Heʼi hikuái: “David raʼy”. Jesús katu heʼi chupekuéra: “¿Mbaʼére piko upéicharõ espíritu sánto rupive, David ohenói chupe che Ruvicha, heʼírõ guare: ‘Jehová heʼi che Ruvichápe: “Eguapy che deréchape amoĩmba peve nde py guýpe ne enemigokuéra”’? Ha David voi heʼírõ chupe che Ruvicha, ¿mbaʼéicha piko upéicharõ pe Cristo haʼéta itaʼýra?” (Mat. 22:41-45). Péicha ñarrasonáramo peteĩ téxtore, umi ñanerendúva ohechakuaáta iñimportanteha ojesareko avei umi detállere olee jave la Biblia.

Remombeʼútaramo arakaʼépa ojeskrivi peteĩ lívro vívliko, térã mbaʼe tiémpopepa oiko peteĩ mbaʼe, iporãta avei remyesakã mbaʼe situasiónpa oĩ raʼe upe tiémpope, por ehémplo iñeʼẽrendúpa umi hénte Jehovápe térã nahániri, ha máva mávapa oiko upe tiémpope. Upéicha umi ermáno ontende porãvéta mbaʼérepa iñimportantete umi lívro vívliko, térã upe remombeʼúva hína.

Ideprovéchota avei rehechaukáramo mbaʼépepa idiferénte mokõi mbaʼe térã mokõi situasión. Por ehémplo ikatu rehechauka mbaʼépepa idiferénte umi kreénsia orekóva la hénte la Biblia omboʼévagui, térã rekompara mokõi téxto vívliko oñeʼẽva la mísma situasiónre. Ikatu remyesakã mbaʼérepa idiferénte ha mbaʼépa ñaaprende chugui. Péicha rejapóramo, umi nerendúva ikatu hína oaprende peteĩ mbaʼe ipyahútava chupekuéra.

Rejapótaramo peteĩ diskúrso reñeʼẽ hag̃ua predikasiónre, rrevisítare téra estúdiore iporãta rejapo raẽramo peteĩ rresúmen. Ikatu remyesakã mbaʼépa ojejapo vaʼerã ha mbaʼérepa, avei rehechaukakuaa mbaʼérepa Testígope g̃uarã iñimportanteterei upe tembiapo. Upe rire remombeʼukuaáma moõpa jajapo vaʼerã upéva, arakaʼépa ha mbaʼeichaitépa.

¿Ha mbaʼépa ikatu rejapo remyesakãtaramo “umi mbaʼe ipypukuvéva oúva Ñandejáragui”? (1 Cor. 2:10.) Primeroite remombeʼu vaʼerã umi púnto prinsipál ha emyesakã umíva, péicha oñentende porãvéta umi detálle remeʼẽva upe rire. Ne konklusiónpe ikatu rejapo peteĩ rrepáso umi idéa iñimportantevévagui. Upéva ou porãitereíta umi nerendúvape, pórke imanduʼa porãvéta pe informasiónre.

Remeʼẽtaramo peteĩ konsého. Ideprovécho hag̃ua umi nerendúvape umi mbaʼe eréva, rehechauka vaʼerã mbaʼérepa iñimportánte chupekuéra g̃uarã upe informasión. Upévare reiporavo jave umi téxto vívliko releétava nde diskúrsope iporã reñeporandu: “¿Mbaʼérepa Ñandejára omanda tojeskrivi koʼã mbaʼe la Bíbliape?” (Rom. 15:4; 1 Cor. 10:11). Repreparávo nde diskúrso repensa vaʼerã mbaʼépa ohasa hína umi nerendúva, ha mbaʼéichapa ikatu oipytyvõ chupekuéra la Biblia heʼíva. Ha rejapo vove nde diskúrso emyesakã porã upéva. Ani reñeʼẽnte pyaʼe pyaʼe hetaiterei mbaʼére, síno eñehaʼã eñekonsentra peteĩ púntorente ha ehesaʼỹijo porã upéva.

Otoka vove ndéve peteĩ párte, eñehaʼã esegi peteĩ térã mokõi konsého oĩva ko leksiónpe, ha ndekatupyryvévo rehóvo eiporu avei umi ótro púnto. Saʼi saʼípe repillátama umi ermánope ogustaitereiha la nde diskúrso, oikuaágui umi mbaʼe eréva katuete oipytyvõtaha chupekuéra.