Ipochyeterei ha ojuka iñermánope

Adán ha Eva heta ifamília kuri osẽ rire pe hardín de Edéngui. Pe ifamília majór héra Caín ha pe segundoha katu Abel. Caín ombaʼapo vaʼekue kokuépe ha Abel katu oñangareko vaʼekue ovecháre.

Peteĩ día, Caín ha Abel omeʼẽ ofrénda Jehovápe. ¿Ndépa reikuaa mbaʼépa hína peteĩ ofrénda? Upéva haʼe peteĩ rregálo ñameʼẽva Jehovápe. Jehovápe ogustaiterei Abel ofrénda, péro Caín mbaʼéva katu ndoguerohoryiete. Upévare Caín ipochyeterei. Jehová ohecha upéva ha heʼi Caínpe osegíramo ipochy ojapotaha hína álgo ivaíva. Péro haʼe nopenái Jehováre.

Upéva rangue, Caín heʼi Abélpe: “Jahamína jakorre amo ñúre”. Ha oĩ jave hikuái haʼeño, Caín oataka iñermánope ha ojuka chupe. ¿Mbaʼépa ojapo Jehová ohechávo upe oiko vaʼekue? Okastiga Caínpe omondóvo chupe mombyry ihentekuéra oĩhágui ha heʼi chupe arakaʼeve ndohechamoʼãveimaha chupekuéra.

¿Mbaʼépa ñaaprende? Sapyʼánte ikatu hína ñandepochyeterei nosẽi haguére ñandéve peteĩ mbaʼe ñande jaipotaháicha, péro jahechakuaáramo ñandepochyveha jahávo, térã ojeʼéramo ñandéve ñañetrankilisa hag̃ua, ñañehaʼã vaʼerã jajapo upéva. Jasegínteramo ñandepochy, ikatu hína ndajajejokovéi ha jajapo vyrorei.

Abel ohayhueterei vaʼekue Jehovápe ha ojeporta porã vaʼekue, upévare Jehová siémpre imanduʼáta hese ha omoingove jeýta chupe pe paraísope.