Eñeñandu vaieterei térã eñedeprimíramo

Adriana oikóva Brasílpe heʼi: “Tódo el tiémpo añeñandu vaieterei vaʼekue ha aju voi apensa iporãvetaha ajesuisidáramo”.

¿NDÉPA reñeñandúmava avei upéicha ha epensa ikuentaveha reñentregántema? Upéicharõ, katuete rentendéta Adriánape. Haʼe ningo oñeñandu vaieterei kuri oikóvo, ndovyʼavéi ha sapyʼánte ojedesespera voi. Tiémpo rire umi doktór heʼi chupe orekoha depresión.

Peteĩ karai Japongua hérava Kaoru oñatende vaʼekue ituakuéra ijeda ha hasykatúvare. Haʼe heʼi: “Upe tiémpope ndaikatúi vaʼekue ni akuʼe traváhogui. Upéi ajúma ndakarusevéi ha ndaikatúi ake porã. Apensa vaʼekue voi ikuentaveha amano mbaʼe apytuʼu hag̃ua”.

Peteĩ karai Nigeriagua hérava Samuel heʼi: “Che siémpre aiko vaʼekue añembyasyháre, ha oimeraẽ mbaʼére cherasesẽma. Upéi añepyrũma apensa mbaʼéichapa ikatu ajesuisida”. Haʼetépe Samuel, Kaoru ha Adriana odesidi ndojapomoʼãiha upéva, péro ñambyasýramo jepe káda áño hetaiterei persóna ojesuisida.

MBAʼÉPA IKATU NEPYTYVÕ

Umi kuimbaʼe ningo otĩve ojerure hag̃ua ajúda, upévare oĩ hetave kuimbaʼe ojesuisidáva. Jesucristo heʼi vaʼekue umi hasýva oikotevẽha doktór (Lucas 5:31). Oiméramo nde reñeñandu péicha ani retĩ ejerure hag̃ua ajúda. Heta persóna orekóva depresión tuicha omehora osegi rire peteĩ tratamiénto médiko. Por ehémplo Samuel, Kaoru ha Adriana oho kuri okonsulta doktór ndive ha koʼág̃a oñeñandu porãvéma.

Umi doktór omanda jepi umi orekóvape depresión hoʼu hag̃ua pohã, osegi hag̃ua tratamiénto peteĩ sikólogo ndive, térã ojapo hag̃ua lodovéva. Avei umi hasykatúva oikotevẽ ifamília ha iñamigokuéra ipasiénsia ha ontende chupe. Péro Jehová hína pe amígo iñimportantevéva ikatúva reguereko, haʼe nepytyvõta la Biblia rupive.

KOʼẼRÕITE PE DEPRESIÓN OPÁTA PÁRA SIÉMPRE

Umi orekóva depresión tekotevẽ jepi ojapo tratamiénto heta tiémpore, ha avei okambia vaʼerã oiko lája ikatu hag̃uáicha ogueropuʼaka pe mbaʼasy. Oiméramo nde reñedeprimi, ani rejepyʼapy, koʼẽrõite opátama opaichagua mbaʼasy. Samuel heʼi: “Hiʼãitéma ahecha oñekumpli Isaías 33:24 heʼíva, koʼẽrõite ni peteĩ oikóva ko yvy ape ári ndeʼimoʼãvéima: ‘Cherasy hína’”. Katuete ndéve avei nekonsoláta pe promésa Ñandejára ojapóva oĩtaha “peteĩ yvága pyahu ha yvy pyahu” ha ndaiporimoʼãiha hasýva. Upe tiémpope ndaiporivéitama avei pe depresión nembohasa asyetéva (Apocalipsis 21:1, 4). Upe tiémpope rekueraitéta ne mbaʼasýgui pára siémpre, la Biblia heʼi voi: “Avave naimanduʼamoʼãi umi mbaʼe oiko vaʼekuére yma, umíva ojeietétama pene korasõgui” (Isaías 65:17).

Téxto bíblico ikatúva nepytyvõ

Ñandejára ontende la reñandúva

“Che ningo Jehová, nde Jára, ha añakarama hatãta nderehe, nde po deréchagui rojagarráta. Che ningo haʼe ndéve: ‘Ani rekyhyje, che roipytyvõta’” (Isaías 41:13).

Ndaipóri ótro nentende porãvétava Jehovágui, ha haʼe ningo nepytyvõseterei.

Ejepyʼamongeta Ñandejára Ñeʼẽre

Elías “ojerure vaʼekue omano hag̃ua, ha heʼi: ‘¡Ovalémante Jehová! Eipeʼántemana chehegui che rekove’” (1 Reyes 19:4).

Samuel heʼi: “Ajepyʼamongeta Ñandejára Ñeʼẽ heʼívare ha upéva tuicha chepytyvõ. Ahechakuaa Elías oñeñandu hague avei che añeñanduháicha”.

Eaprende umi ehémplo oĩvagui la Bíbliape

Jesús heʼi vaʼekue Pédrope: “Che ajeruréma nderehe ani hag̃ua ikangy nde jerovia” (Lucas 22:32).

Pedro onega rire tres vése Jesúspe, oñeñandu vaieterei ha oho hasẽ soro. Kaoru heʼi: “Pedro ohasa vaʼekue chepytyvõ ahechakuaa hag̃ua mbaʼeichaitépa Jehová ha Jesús oñeinteresa hese, ha upéva chemokyreʼỹeterei”.

“Avave naimanduʼamoʼãi umi mbaʼe oiko vaʼekuére yma, umíva ojeietétama pene korasõgui” (Isaías 65:17).