2 | “Ñandejára Ñeʼẽ ñanekonsola”
LA BIBLIA HEʼI: “Entéro mbaʼe ojeskrivi vaʼekue yma Ñandejára Ñeʼẽme, ojeskrivi ñanerekomboʼe hag̃ua. Ñandejára Ñeʼẽ ñanekonsola ha ñanepytyvõ ñaaguanta hag̃ua, ha upéva omeʼẽ ñandéve esperánsa” (ROMANOS 15:4).
¿Mbaʼépa heʼise upéva?
La Bíbliape oĩ heta téxto ñanemokyreʼỹ, ñanekonsola ha ñanemombaretéva. Upéva ñanepytyvõ ñañorairõ hag̃ua umi pensamiénto negatívo kóntrape. La Biblia omeʼẽ avei esperánsa, pórke upépe oñepromete ñandéve koʼẽrõite umi orekóva provléma emosionál okuerataha.
¿Mbaʼéichapa ñanepytyvõ?
Enterove ningo sapyʼánte ndajavyʼái ha ñañekevranta jepi voínte. Péro umi persóna orekóva provléma emosionál ikatu hína tódo el tiémpo oñekevranta ha oñeñandu vai. ¿Mbaʼéichapa la Biblia ikatu oipytyvõ chupekuéra?
La Biblia ikatu ñanepytyvõ jaipeʼa hag̃ua ñane akãgui umi pensamiénto vai ha ñapensa hag̃ua iporãvare (Filipenses 4:8). La heʼíva pype ikatu ñanetrankilisa ha ñanembopyʼaguapy, péicha ikatu ñakontrola umi mbaʼe ñapensáva ha ñañandúva (Salmo 94:18, 19).
La Biblia ikatu avei ñanepytyvõ anivéma hag̃ua ñapensa ndajavaleiha mbaʼeverã (Lucas 12:6, 7).
Hetaiterei párte la Bíbliape oasegura ñandéve nañaimeiha ñaneaño, ha Ñandejára haʼéva ñande Kreadór, ñanentende porãitereiha (Salmo 34:18; 1 Juan 3:19, 20).
La Bíbliape Ñandejára opromete ovorrataha ñane pensamiéntogui umi mbaʼe vai jahasa vaʼekue (Isaías 65:17; Apocalipsis 21:4). Ñañeñandu vaietereíramo térã ou jave ñane akãme umi pensamiénto vai ñandejopyetereíva, ikatu ñapensa Ñandejára promésare ha péicha ñanembaretéta jasegi hag̃ua.