Umi párte michĩvéva oñenohẽva tuguýgui ha umi tratamiénto doktorkuéra ojapóva

Párte michĩvéva oñenohẽva tuguýgui. Umíva oñenohẽ koʼã párte iñimportantevévagui oĩva tuguýpe: glóbulos rojos, glóbulos blancos, plaquetas ha plasma. Pór ehémplo umi glóbulos rójosgui oñenohẽ peteĩ proteína hérava hemoglobina. Ikatu oñenohẽ yvypóra térã mymba ruguykuégui. Umi pohã ojejapóva hemoglobínagui ojeporu oñepohano hag̃ua umi huguy kangyetereíva térã huguyetereíva oĩ jave hemorragia.

Pe plásmagui oñenohẽ heta hormona, sales inorgánicas, enzimas ha nutrientes, umíva apytépe minerales ha asuka. Pe plásmape oĩ avei umi factores de coagulación omombytáva ñande ruguy, proteínas: albúmina ha umi anticuerpo ñanepytyvõva ani hag̃ua ñanderasy. Ikatu avei umi doktór heʼi peteĩ hasývape omoĩuka hag̃ua gammaglobulina, upéva oreko heta anticuerpo ha oñenohẽ plásmagui. Kóva ojepeʼa ótro tapicha orekovaʼekuégui upe mbaʼasy. Ha umi glóbulos bláncosgui oñenohẽ interferones ha interleuquinas, umíva ojeporu oñepohano hag̃ua cáncer ha avei umi infección oguerúva umi virus.

Ikatúpa kristianokuéra jajapouka umi tratamiénto ojeporuhápe koʼã párte térã jaiporu umi pohã? La Biblia ndeʼíri ikatúpa térã ndaikatúi, upévare jaiporuvaʼerã ñane konsiénsia ha ñandete jadesidi. Oĩ umi ndoipotáiva mbaʼeveichagua párte oĩva tuguýpe. Haʼekuéra heʼi Ñandejára omeʼẽrõ guare iléi umi Israelguápe heʼi hague ojejuka jave peteĩ mymba ‘oñeñohẽvaʼerãha huguy yvýpe’ (Deuteronomio 12:22-24). Oĩ avei umi ndoipotáiva oñemoĩ chupekuéra tuguy ha umi párte iñimportantevéva oĩva tuguýpe, péro oheja oñemoĩ chupekuéra umi párte michĩvéva. Haʼekuéra heʼi ndahaʼeveimaha tuguy ha upévare norrepresentaveimaha tekove.

Jadesidi mboyve ñañeporanduvaʼerã: “Ndaipotáiramo oñemoĩ chéve mbaʼeveichagua párte michĩvéva, ahechakuaápa ndaikatumoʼãiha aiporu umi pohã ojejapóva koʼãvagui, umi omombytáva ñande ruguy ani hag̃ua ñanderuguypa? Haʼekuaátapa peteĩ doktórpe mbaʼérepa aheja térã ndahejái oñemoĩ chéve koʼã párte?”.

Tratamiénto ojejapóva: Umi operasiónpe umi doktór oiporuve jepi koʼã tratamiénto: hemodilución ha recuperación de sangre. Hemodiluciónpe ñande ruguy oñemondo peteĩ mbaʼyrúpe, ha upe aja oñemoĩ hekovia suéro omboʼyve hag̃ua ñande ruguy, ha upéi oñemondo jey ñandéve pe mbaʼyru guive. Recuperación de sángrepe oñembyaty ñande ruguy, ojefiltra ha oñemoĩ jey ñandéve. Umi doktór ndojapói peteĩchapa koʼã tratamiénto, upévare ñaporandu porã vaʼerã mbaʼépa ojapóta ñanderehe.

Jadesidi hag̃ua iporã ñañeporandu: “Ojepeʼáramo che ruguy ha ndokorrevéi sapyʼami che vénare, haʼétapa che ruguynteha voi ha natekotevẽiha ‘oñeñohẽ yvýpe’? (Deuteronomio 12:23, 24). Chepyʼaguapýtapa ojepeʼáramo che ruguy, oñemoĩ ipype pohã ha oñemoinge jey che retepýpe? Ahechakuaápa haʼéramo ndaipotaiha ojeporu che ruguy ndaikatumoʼãiha avei ajapouka análisis, hemodiális ha aiporu pe bomba de circulación extracorpórea?”.

Ñandete jadesidivaʼerã mbaʼépa jaipota ojejapo ñande ruguýre jajopera jave. Péicha avei umi análisis ha tratamiénto ojepeʼahápe ñande ruguy, oñembojeheʼa pohãre ha oñemoĩ jey ñandéve.