Jajepokuaáke ñag̃uahẽ órape!

SAPYʼÁNTE hasy ñandéve ñag̃uahẽ hag̃ua órape. Pór ehémplo, oĩ vése javiahavaʼerã mombyry, oĩ hetaiterei veíkulo tapére, térã ñanerembiapoitereígui ndaikatúi ñasẽ voi. Upéicharõ jepe, ñañehaʼãvaʼerã ñag̃uahẽ órape. Oparupiete ojeguerohory umi og̃uahẽvape voi porã itravahohápe, umichagua ningo ombaʼapo porãve ha ikatu jajerovia hese. Umi og̃uahẽva tárde katu ombokaiguepa iñirũnguérape ha ikatu nosẽporãi hembiapokuéra. Oĩ og̃uahẽva tárde mboʼehaópe, ha umíva noaprendéi mbaʼeve operdepa rupi kláse. Ha jahátarõ doktórpe térã dentístape, ñag̃uahẽvaʼerã voimi, peichaʼỹrõ noñeñatendeporãi ñanderehe.

Heta tetãme, umi hénte ndojepokuaái voínte og̃uahẽ órape, ha peichagua lája ikatu ova ñanderehe. Ha oimérõ ñande upéicha ñande lája, ñañehaʼãvaʼerã ñakambia. Upearã tekotevẽ ñantende mbaʼérepa iñimportánte ñag̃uahẽ órape. Mbaʼérepa ñañehaʼãvaʼerã jajapo upéva? Mbaʼépa ñanepytyvõta upearã? Mbaʼe iporãvapa jahupytýta ñag̃uahẽramo órape?

Jehová ojapo opa mbaʼe hiʼoraitépe

Hiʼãite ñandéve ñahaʼanga Ñandejárape ha jajapo avei opa mbaʼe hiʼórape (Efe. 5:1). Haʼe katuete okumpli umi mbaʼe heʼíva hiʼaraitépe. Pór ehémplo, oguerútarõ guare pe ama guasu ohundi hag̃ua umi hénte aña, heʼi Noépe: “Ejapo [...] peteĩ várko guasu”. Og̃uahẽmbotaitévo pe ára heʼi chupe oike hag̃ua pe várkope: ‘Koʼágui 7 arahápe amongýta yvy ári 40 ára ha pyhare pukukue, ha ahundíta opa oikovéva’. Ha upeichaite oiko: “Ohasa rire 7 ára y oñepyrũ ojahoʼi yvy ape” (Gén. 6:14, ÑÑB; 7:4, 10). Epensamína, mbaʼépa oikovaʼerãmoʼã Noé ha ifamília ndoikéirire órape? Jahechaháicha, ojapovaʼerã hikuái opa mbaʼe hiʼórape Jehová ojapoháicha.

Upe rire 450 áño haguépe, Jehová heʼi Abrahánpe ifamiliarégui outaha pe Ñemoñare oñepromevaʼekue (Gén. 17:15-17). Arakaʼépa onaséta? Jehová heʼi: ‘Águi un áñope’. Oikoparakaʼe upéva? La Biblia heʼi: ‘Sara hyeguasu ha imemby peteĩ mitãkuimbaʼe Abrahán ituja riréma, upe ára Ñandejára heʼi haguépe’ (Gén. 17:21; 21:2).

Ñandejára Ñeʼẽme jajuhu heta ehémplo ohechaukáva Jehová akóinte ojapoha opa mbaʼe hiʼoraitépe (Jer. 25:11-13; Dan. 4:20-25; 9:25). Upévare iporã ñañatende meme, cháke Jehová ára guasu og̃uahẽta itiempoitépe, heʼiháicha la Biblia. Ñande yvypórape g̃uarã haʼete ku imbeguéva, péro Ñandejára Ñeʼẽ heʼi: “Hiʼárape og̃uahẽta” (Hab. 2:3).

Jaservi porã hag̃ua Jehovápe tekotevẽ jajapo opa mbaʼe hiʼoraitépe

Yma Israélpe oĩvaʼekue “ára oñemboykéva Ñandejárape g̃uarã”. Ha ogueromanduʼa hag̃ua umíva, tekotevẽ vaʼekue umi kuimbaʼe og̃uahẽ voi porã umi arete oikotahápe (Lev. 23:2, 4). Hiʼarive Jehová voi omoĩ mbaʼe órapa ojejapovaʼerã umi sakrifísio (Éxo. 29:38, 39; Lev. 23:37, 38). Péva ohechauka Jehová oipotaha jajapo opa mbaʼe itiempoitépe.

Síglo primérope Pablo omombeʼuvaʼekue umi kristiáno Corintoyguápe mbaʼéichapa ojejapovaʼerã umi rreunión. Haʼe heʼi: “Tojejapo opa [...] mbaʼe hekopete ha hendaitépe” (1 Cor. 14:40, ÑÑB). Upearã umi rreunión oñepyrũvaʼerã hiʼoraitépe. Ha Jehová opensáva arakaʼeve nokambiái (Mal. 3:6). Upéicharõ, mbaʼépa jajapovaʼerã ñag̃uahẽ voimi hag̃ua salónpe rreunionrã?

Mbaʼépa jajapovaʼerã ñag̃uahẽ hag̃ua órape?

Ñapensavaʼerã mbaʼépa ikatu oiko tapére (Pro. 21:5). Pór ehémplo, jahátaramo peteĩ lugárpe, iporãnepa ñasẽ óra potaitépentema? Ajépa iporãvéta ñasẽ voimiéramo, ani ág̃a oiko peteĩ mbaʼe ñahaʼarõʼỹva (Ecl. 9:11). Peteĩ mitãrusu hérava José heʼi: “Ñag̃uahẽ hag̃ua órape jakalkula porã vaʼerã mboy tiémpope ñag̃uahẽta pe jahasehápe”.a

Umi ermáno ombaʼapóva oñehaʼãvaʼerã osẽ voimi itravahohágui ikatu hag̃uáicha og̃uahẽ órape rreunionrã. Jahechami mbaʼépa ojapo peteĩ ermáno Etiopiaygua. Oñekambiárõ guare itraváho óra, haʼe ohechakuaa okumplítaramo upéva og̃uahẽtaha cuarenta y cinco minúto tárde rreunionhápe. Upémarõ ojerure peteĩ iñirũme ou hag̃ua voimie rreunión díape ha upéi haʼe omyengoviataha chupe ombaʼapóvo siete óra ivése.

Umi ifamiliaretávape ijetuʼuve og̃uahẽ hag̃ua órape salónpe. Añetehápe sy hína pe ombosakoʼíva imembykuérape, péro entéro hogaygua oipytyvõvaʼerã chupe. Peteĩ ermána Mexicoygua hérava Esperanza, omongakuaákuri haʼeño 8 mitã. Koʼág̃a pe ijypykue oreko 23 áño ha ipahague katu 5 áño. Haʼe omombeʼu mbaʼépa oipytyvõ chupekuéra akóinte og̃uahẽ hag̃ua voi porã rreunionhápe: “Umi che memby kuña tuichavéva chepytyvõ opreparávo umi michĩvévape. Péicha ikatu ajapopa che rembiapo ogapypegua, ha cheháma ajeprepara rosẽ hag̃ua órape”. Jahechaháicha ko família omoĩ óra osẽ hag̃ua ha enterove oñopytyvõ upearã.

Mbaʼe iporãvapa jahupyty ñag̃uahẽ voíramo rreunionhápe?

Jahecháramo ideprovechoha ñandéve ñag̃uahẽ órape rreunionhápe, katuete ñañehaʼãta upearã. Peteĩ mitãkuña hérava Sandra, ojepokuaa og̃uahẽ voi salónpe, ha haʼe omombeʼu: “Avyʼa ikatu haguére amomaitei umi ermánope, añemongeta hendivekuéra ha péicha aikuaa porãve chupekuéra”. Ha ñag̃uahẽ voimíramomante ikatu ñañeʼẽ umi ermánondi ha jaikuaa mbaʼe mbaʼépa ohasáraʼe hikuái oservívo Jehovápe. Ha ñande voi ikatu ñamombarete chupekuéra ñaimévo upépe ha ñañemongetávo hendivekuéra. Péicha ñañomokyreʼỹta “jajoayhuve ha hetave mbaʼe iporãva jajapo hag̃ua” (Heb. 10:24, 25).

Katuete ñaimevaʼerã japurahéi ha ñañemboʼe hag̃ua. Koʼã mbaʼe rupive ñamombaʼeguasu avei Ñandejárape (Sal. 149:1). Umi purahéi ñanemokyreʼỹ jajapo hag̃ua iporãva, ha japredika meme hag̃ua. Ñanemanduʼavaʼerã Jehová heʼi hague itémplore ‘ñemboʼe róga’ (Isa. 56:7). Koʼág̃a rupi ñañembyaty avei ñañemboʼe hag̃ua Ñandejárape. Pe rreunión oñepyrũvo jajapóma peteĩ ñemboʼe jajerure hag̃ua Jehovápe tañanemboʼe ha tomeʼẽ ñandéve ijespíritu. Upéva ñanepytyvõ avei ñamoinge hag̃ua ñane akã ha ñane korasõme umi mbaʼe ojeʼéva. Upévare ñañehaʼãmbaitevaʼerã ñaime purahéi ha ñemboʼerã.

Helen, orekóva 23 áño, omombeʼu mbaʼérepa og̃uahẽ voi rreunionrã: “Péicha ahechauka Jehovápe mbaʼeichaitépa ahayhu chupe. Aikuaa opa mbaʼe ñahendúva upépe ouha chugui, ha umi purahéi ha ñemboʼe jepe iñimportanteha”. Ajépa iporãitéta ñapensáramo ko ermánaicha! Upévare ñañehaʼãkena ñag̃uahẽ órape, mamo jahahápe, ha koʼýte jahátaramo rreunionhápe.

[Nóta]

[Nóta oĩva taʼanga ndive páhina 26]

Ñañembosakoʼi voi porã

[Nóta oĩva taʼanga ndive páhina 26]

Ikatu oiko peteĩ mbaʼe ñahaʼarõʼỹva

[Nóta oĩva taʼanga ndive páhina 26]

Javyʼa ñag̃uahẽrõ voi rreunionrã