Armagedón: ¿Mbaʼépa heʼise hetápe g̃uarã?

‘Ombyaty umi mburuvicha guasúpe, peteĩ lugár héravape evréo ñeʼẽme Armagedón.’ (REVELACIÓN [APOCALIPSIS] 16:16)

¿MBAʼE rehépa nde repensa rehendúvo pe ñeʼẽ Armagedón? Ikatu oime repensa peteĩ ñehundi guasu rehe. Ko ñeʼẽ ningo peteĩ hendápente jatopa la Bíbliape, upéicharõ jepe pyʼỹinte oñeñeʼẽ hese téle, rrádio ha Internétpe, ha umi rrelihión omoakãva oñeʼẽ avei hese.

¿Mbaʼépa heta tapicha opensa Armagedón rehe? ¿Ohópa la Biblia omboʼévare? Iporã ningo reikuaa upéva. ¿Mbaʼérepa? Reikuaáramo pe añetegua ikatu nderekyhyjevéi, rehaʼarõ iporãva tenonderãme ha rekambia upe repensáva Ñandejárare.

Ehesaʼỹijo mbohapy mbaʼe oñepensáva Armagedón rehe ha embojoja la Biblia omboʼévare.

1. ARMAGEDÓN: ÑEHUNDI GUASU OGUERÚVA YVYPORAKUÉRA.

Heta periodísta ha investigadór oiporu pe ñeʼẽ Armagedón oñeʼẽ hag̃ua peteĩ ñehundi guasu oguerúvare yvyporakuéra. Pór ehémplo, ojeporúmi oñeñeʼẽ hag̃ua umi mokõi gérra mundiál oikovaʼekuére. Heta oĩ okyhyjevaʼekue Estados Unidos ha Unión Soviética oñorairõ ha oiporúrõ g̃uarã umi arma atómica, upévare ko ñorairõ oikomoʼãvaʼekuépe umi notísia ombohéra “armagedón nuclear”. Koʼág̃a rupi, heta iñarandúvape oipyʼapy pe kontaminasión okambiárõ g̃uarã pe clima ha heʼi hikuái oupotaiteha peteĩ “armagedón climático”.

¿Mbaʼépa ohechauka upéva? Yvypóra oguerekoha ipoguýpe ko yvy ha opa mbaʼe oikovéva oĩva pype. Ha umi goviérno ndojapóiramo mbaʼeve, ko yvy oñembyaietetaha.

¿Mbaʼépa omboʼe la Biblia? Ñandejára ndohejamoʼãiha yvyporakuéra ohundi ko yvy. La Biblia heʼi Jehováa ‘ndojaporeíri hague ko yvy’, síno ojapo hague ‘ojeiko hag̃ua pype’ (Isaías 45:18). Oheja rangue yvyporakuéra ohundiete ko yvy, Ñandejára ‘ohundíta umi ombyaívape ko yvy’ (Revelación [Apocalipsis] 11:18).

2. ARMAGEDÓN: ÑEHUNDI GUASU OGUERÚVA YVYRYRÝI HA AMBUE MBAʼE.

Oĩ tetã umi periodísta oiporuha pe ñeʼẽ Armagedón oñeʼẽ jave peteĩ ñehundi guasu oguerúva rehe yvyryrýi ha ambue mbaʼe. Pór ehémplo pe áño 2010 ohasavaʼekuépe, peteĩ notísiape heʼi “‘Armagedón’ en Haití”. Oñeʼẽ umi ohasa asývare, omanovaʼekuére ha hetave mbaʼe vai ojapovaʼekue rehe pe yvyryrýi upe tetãme. Ambue periodísta ha umi pelíkula ojapóva oiporu avei Armagedón oñeʼẽ hag̃ua umi mbaʼe oikótavare tenonderãme. Pór ehémplo, oiporu Armagedón ohechauka hag̃ua mbaʼépa ikatu oiko peteĩ asteróide ochokáramo ko yvýre.

¿Mbaʼépa ohechauka upéva? Armagedón haʼeha peteĩ mbaʼe oikóva ñaimoʼãʼỹre ha ojukáva heta inoséntepe, ha ndaikatuiha jajapo mbaʼeve guasu jajehekýi hag̃ua chugui.

¿Mbaʼépa omboʼe la Biblia? Armagedón nohundimoʼãiha opavavépe, síno umi hénte iñañávapente. La Biblia opromete koʼẽrõitéma ‘opataha umi iñañáva’ (Salmo 37:10).

3. ÑANDEJÁRA OHUNDÍTA KO YVY ARMAGEDÓNPE.

Heta tapicha irrelihiósova oimoʼã umi imarangatúva oñorairõtaha umi iñañáva ndive ha upéicha oñehunditaha ko yvy. Peteĩ estúdio ojapovaʼekue Estados Unídospe Princeton Survey Research Associates, ohechauka cuarenta por ciento umi tapicha ogueroviaha ko múndo oñehunditaha “Armagedónpe”.

¿Mbaʼépa ohechauka upéva? Ñandejára nañandeapói hague jaiko hag̃ua opa árare ko yvy ape ári ha ndojapói hague ko yvy opa ára g̃uarã. Ñandeapo hague ñamano hag̃uánte voi.

¿Mbaʼépa omboʼe la Biblia? La Biblia ohechauka porã Ñandejára ‘ojapo hague ko yvy ha omopyenda porã ani hag̃ua okuʼe arakaʼeve’ (Salmo 104:5, ÑÑB). Ha umi tapicha oikóvare ko yvy ape ári, Ñandejára Ñeʼẽ heʼi: ‘Hekopotĩvape opytáta ko yvy ha upépe haʼekuéra oikóta opa árare’ (Salmo 37:29).

Heta mbaʼe ningo ojeʼe Armagedón rehe, péro la Biblia omboʼéva idiferénte. Upéicharõ, ¿mbaʼépa hína pe añetegua?

[Nóta]