Ñambaʼapo Jehovándi káda día

1. ¿Mbaʼéichapa ikatu hína ñambaʼapo Jehovándi?

JEHOVÁ ñandeapórõ guare, oipota vaʼekue ñambaʼapo hendive. Entéro yvypóra ningo ñaneimperfékto, upéicharõ jepe jaservíva guive Jehovápe ikatu ñambaʼapo hendive káda día. Por ehémplo, ñande haʼe hína “Ñandejára ajudánte” japredika jave pe marandu porã oñeʼẽva Ñandejára Rréinore, ha ñaipytyvõ jave umi héntepe oiko hag̃ua chuguikuéra Jesús disípulo (1 Cor. 3:5-9). Tuichaiterei priviléhio ningo ñande Apohare ipoderosoitéva ñandeporavo haguére jajapo hag̃ua ko traváho iñimportantetéva. Péro ndahaʼéi japredika javénte la ñambaʼapóva Jehovándi. Ko artíkulope jahecháta mbaʼéichapa ñambaʼapo hína Ñandejárandi: 1) ñaipytyvõ jave ñane hénte ha ñane ermanokuérape, 2) japororresivi porã jave, 3) ñañekuaveʼẽ jave kómo voluntário ñaipytyvõ hag̃ua Jehová organisasiónpe, ha 4) ñañehaʼã jave jajapove Jehová servísiope (Col. 3:23).

2. ¿Mbaʼérepa arakaʼeve nañakomparái vaʼerã umi mbaʼe ikatúva jajapo Jehová servísiope la ótro ikatúvare ojapo?

² Ñahesaʼỹijo aja ko artíkulo iporã ñanemanduʼa káda uno ñanediferenteha. Por ehémplo, oĩ imitãva térã ijedáva, hesãiva térã hasykatúva, oĩ avei umi ohasáva situasión ijetuʼúva, ha káda uno ñandekatupyry diferénte mbaʼépe. Upévare, aníkena ñakompara umi mbaʼe ikatúva jajapo Jehová servísiope la ótro ikatúvare ojapo. Apóstol Pablo heʼi vaʼekue: “Káda uno tojesareko umi mbaʼe ojapóvare, ha ani oñembojoja ótrore, péicha ikatúta ovyʼa hembiapóre ha ndahaʼéi oñembojoja haguére ótrore” (Gál. 6:4).

ÑAIPYTYVÕKENA ÑANE HÉNTE HA ÑANE ERMANOKUÉRAPE

3. ¿Mbaʼérepa ikatu jaʼe umi oñangareko porãva hogayguakuérare ombaʼapoha Ñandejárandi?

³ Jehová oipota isiervokuéra oñangareko hogayguakuérare. Por ehémplo, oĩ umi tekotevẽva ombaʼapo omantene hag̃ua ifamíliape. Heta sy opyta hógape oñatende hag̃ua imemby michĩvévare. Oĩ avei kristiáno tekotevẽva okuida ituakuéra ijedávare. Koʼã mbaʼe ningo iñimportanteterei jajapo. La Biblia heʼi: “Oĩramo nomantenéiva umi oĩvape ikárgope, ha koʼýte umi hogayguakuérape, upéva omboykéma ijerovia ha oĩ vaive peteĩ ojeroviaʼỹvagui” (1 Tim. 5:8). Jaguerekóramo heta rresponsavilida ñande rogapýpe, ikatu hína nahembyvéi ñandéve tiémpo jajapo hag̃ua entéro mbaʼe jajaposéva Jehová servísiope. Péro ani ñañedesanima. Jehová ovyʼa ñamoĩ jave ñane famíliape umi mbaʼe oikotevẽva (1 Cor. 10:31).

4. ¿Mbaʼéichapa tuakuéra omotenonde Ñandejára Rréino, ha mbaʼépa oiko ojapo jave hikuái upéva?

⁴ Hetaiterei sy ha túa ombaʼapo avei Ñandejárandi omokyreʼỹ jave ifamíliape ohupyty hag̃ua heta mbaʼe porã Jehová servísiope. Upévare ifamiliakuéra odesidi oservi Jehovápe de tiémpo kompléto, jepe oho mombyry hógagui. Umíva apytépe oĩ umi oservíva kómo misionéro, umi ojapóva iprekursorádo umi lugár oĩvehápe nesesida, ha avei umi oservíva Betélpe. Jaikuaaháicha, koʼã ermáno ohasase tiémpo ituakuérandi, péro heta vése ndaikatúi ojapo upéva oiko rupi mombyry. Upéicharõ jepe ituakuéra omokyreʼỹ chupekuéra osegi hag̃ua iservísiope tahaʼe haʼéva pe lugár oĩháme. ¿Mbaʼérepa tuakuéra ojapo upéva? Pórke ovyʼa ifamiliakuéra omotenonde haguére Jehovápe (3 Juan 4). Heta sy ha túa oñeñandu avei yma Ana oñeñandu haguéicha. Haʼe omeʼẽ vaʼekue imemby oservi hag̃ua Jehovápe. Koʼã sy ha túa osegíva Ana ehémplo, omombaʼeterei ikatu haguére péicha ombaʼapo Jehovándi (1 Sam. 1:28).

5. ¿Mbaʼéichapa ikatu ñaipytyvõ umi ermáno ha ermána ñane kongregasionguápe? (Ehecha pe taʼanga oĩva iñepyrũme).

⁵ Ndajarekóiramo pe rresponsavilida jakuida hag̃ua ñande rogayguakuérare, ikatu ñaipytyvõ umi ermáno hasývape térã ijedávape, ỹrõ umi oikotevẽvape ajúda ótro hendáicha. Ikatu avei ñaipytyvõ umi oñangarekóvape hesekuéra. ¿Oĩ piko ñane kongregasiónpe algúno oikotevẽva ñaipytyvõ chupe? Por ehémplo, ikatu oĩ peteĩ ermána oñangarekóva ituakuéra ijedámavare. ¿Ikatúne piko japyta ituakuérandi pe ermána ojapo hag̃ua ótra kósa upe aja? Avei ñañekuaveʼẽkuaa japorogueraha hag̃ua rreunionhápe, ñambaʼejogua hag̃ua peteĩ oikotevẽvape, térã jaraha hag̃ua peteĩ persónape ospitálpe ovisita hag̃ua ihénte hasývape. Jajapóramo koʼã mbaʼe, ikatu hína ñaipytyvõ Jehovápe ombohovái hag̃ua peteĩ persónape iñemboʼe (elee 1 Corintios 10:24).

JARRESIVI PORÃKENA ENTEROVÉPE

6. ¿Mbaʼépa heʼise japororresivi porã?

⁶ Ñandejára siervokuéra ojekuaa opárupi opororresivi porã haguére. Pe palávra griega ojepurúva la Bíbliape ojeʼe hag̃ua “perresivi porã” heʼise “penembaʼeporã umi extráño ndive” (Heb. 13:2). Ñandejára Ñeʼẽme jatopa heta ehémplo ñanemboʼéva mbaʼéichapa ikatu jarresivi porã ñande rapichápe (Gén. 18:1-5). Oñepresentáramo peteĩ oportunida ñaipytyvõ vaʼerã ñande rapichápe, ndahaʼéiramo jepe ñane ermáno (Gál. 6:10).

7. ¿Mbaʼéichapa ñanevenefisia jarresivi porãramo umi oservívape de tiémpo kompléto?

⁷ Ikatu avei ñambaʼapo Jehovándi jarresivi porã jave umi oservívape de tiémpo kompléto oikotevẽramo peteĩ lugár opyta hag̃ua (elee 3 Juan 5, 8). Jajapóramo upéva, katuete ñañomokyreʼỹta (Rom. 1:11, 12). Jahechamína mbaʼépa ojapo vaʼekue Olaf. Haʼe imitãrusúrõ guare, peteĩ superintendénte de sirkuíto soltéro ovisita ikongregasión, ha oikotevẽ peteĩ lugár opyta hag̃ua. Upérõ avave ndaikatúi vaʼekue orresivi hógape ko ermánope. Upévare Olaf oporandu ituakuéra ndahaʼéivape Testígo ikatúpa pe superintendénte opyta hendivekuéra. Haʼekuéra oasepta péro heʼi Oláfpe tekotevẽtaha oke sofápe, omeʼẽ hag̃ua pe ermánope la hupa. Olaf nombyasýi oofrese haguére hóga, pórke ohasa porãiterei vaʼekue pe ermánondi. Káda día, voi opuʼã hikuái ha odesajuna aja oñemongeta umi mbaʼe iñinteresántevare. Pe superintendénte de sirkuíto omokyreʼỹeterei kuri Oláfpe, ha haʼe odesidi oservi Jehovápe de tiémpo kompléto. Koʼág̃a ojapóma 40 áño Olaf oservi hague kómo misionéro diferénte tetãme.

8. ¿Mbaʼérepa ñanembaʼeporã vaʼerã ñande rapichándi norreaksionaporãiramo jepe hikuái? Emoĩ peteĩ ehémplo.

⁸ Siémpre ñanembaʼeporã vaʼerã umi extráñondi, jepe ñepyrũrã ndohechakuaái hikuái la jajapóva. Jahechamína peteĩ ehémplo. Peteĩ ermána española ostudia vaʼekue la Biblia peteĩ kuñakarai ecuatoriánandi hérava Yesica. Peteĩ vuéltape, ostudia aja hikuái Yesica oñepyrũ hasẽ ha ndaikatuvéi ojejoko. Upévare pe ermána oporandu chupe mbaʼépa ojehu chupe. Yesica heʼi pe ermánape ova mboyve Espáñape imboriahueterei hague. Avei omombeʼu peteĩ díape ndorekói hague mbaʼevete hoʼuka hag̃ua imembýpe, ymínte la orekóva. Upémarõ, oñehaʼã aja omonge imembýpe, ojerure asy Ñandejárape oipytyvõmi hag̃ua chupe. Upe riremi, mokõi ermána og̃uahẽ hógape ha omeʼẽ chupe peteĩ rrevísta. Péro haʼe iñeʼẽ arhél umi ermánape, omondoro upe rrevísta ha heʼi chupekuéra: “¿Kóvape piko hyg̃uatãta che memby?”. Umi ermána oñehaʼã okonsola Yésicape, péro haʼe nohenduséi chupekuéra. Upéi, umi ermána oheja Yesica rokẽme peteĩ kanásto tembiʼu reheve. Upe estúdio bíblico aja, Yesica hasẽ pórke oñemeʼẽ enkuénta ndohechakuaái hague Ñandejára ombohováirõ guare iñemboʼe. Upévare haʼe oĩma desidída oservitaha Jehovápe. Péicha jahecha, umi ermána imbaʼeporã rupi hendive tuichaiterei oipytyvõha chupe (Ecl. 11:1, 6).

ÑAÑEKUAVEʼẼKENA ÑAIPYTYVÕ HAG̃UA JEHOVÁ ORGANISASIÓNPE

9, 10. a) ¿Mbaʼe oportunidápa oreko rakaʼe umi israelita oipytyvõ hag̃ua Jehovápe? b) ¿Mbaʼe mbaʼépepa ikatu oipytyvõ umi kuimbaʼe oĩva kongregasiónpe?

⁹ Yma ningo umi israelita oreko vaʼekue heta oportunida oipytyvõ hag̃ua Jehovápe (Éx. 36:2; 1 Crón. 29:5; Neh. 11:2). Koʼág̃arupi ñande avei ikatu ñaipytyvõ heta hendáicha. Por ehémplo, ñandekatupyrýramo peteĩ traváhope ikatu jajeofrese jajapo hag̃ua upéva. Avei jaipurukuaa ñane tiémpo ha umi mbaʼerepy jarekóva jaajuda hag̃ua ñane ermáno ha ermanakuérape. Jajapóramo koʼã mbaʼe, javyʼaitereíta ha jarresivíta heta vendisión.

¹⁰ Ñandejára Ñeʼẽ omokyreʼỹ entéro kuimbaʼe oĩvape kongregasiónpe ombaʼapo hag̃ua Jehovándi oñehaʼãvo oservi kómo ansiáno ha siérvo ministeriál (1 Tim. 3:1, 8, 9; 1 Ped. 5:2, 3). Umi kuimbaʼe orekóva koʼã priviléhio oipytyvõ iñermanokuérape oservi porã hag̃ua Jehovápe (Hech. 6:1-4). ¿Ojerurémapa ndéve umi ansiáno eipytyvõ hag̃ua departaménto de literatúrape, eorganisa hag̃ua umi território ojepredikáva, embaʼapo hag̃ua mantenimiéntope ha umícha? Umi ermáno ombaʼapóva koʼã mbaʼépe heʼi ovyʼaitereiha ikatu haguére oipytyvõ kongregasiónpe.

11. ¿Mbaʼe iporãvapa ohupyty peteĩ ermána oservi rupi de voluntário konstruksiónpe?

¹¹ Umi ermáno oservíva kómo voluntário konstruksiónpe oreko jepi heta amígo pyahu. Peteĩ ermána hérava Margie ombaʼapo vaʼekue 18 áñore umi konstruksión de Salón del Réinope. Haʼe oñehaʼã kuri oentrena umi ermána imitãvévape ombaʼapóva avei umi konstruksiónpe. Upévare ko ermána heʼi umi oservíva kómo voluntário oñemopuʼãhápe Salón del Reino orekoha heta oportunida oñomokyreʼỹ hag̃ua (Rom. 1:12). Margie heʼi avei umi amíga oreko vaʼekue konstruksiónpe oipytyvõ hague chupe ombohováirõ guare umi situasión ijetuʼúva. Ha nde, ¿reñekuaveʼẽmapa reservi hag̃ua de voluntário konstruksiónpe? Ikatu hína rejapo upéva nandekatupyrýiramo jepe peteĩ ofísiope.

12. ¿Mbaʼéichapa nde ikatu eipytyvõ oiko rire peteĩ desástre naturál?

¹² Ñambaʼapo avei Jehovándi ñaipytyvõ jave ñane ermanokuérape oiko jave umi desástre naturál. Por ehémplo, ikatu hína ñakontrivui pláta umi situasiónpe g̃uarã (Juan 13:34, 35; Hech. 11:27-30). Avei ikatu ñaipytyvõ oñemopotĩ hag̃ua umi lugár oiko haguépe umi desástre naturál ha oñemyatyrõ hag̃ua umi mbaʼe oñembyai vaʼekue. Por ehémplo, Polóniape peteĩ inundasión ombyaipa vaʼekue ermána Gabriela róga. Upévare haʼe ovyʼaiterei ohechárõ guare umi ermáno oĩva upe sónape ouha oipytyvõ hag̃ua chupe. Gabriela imanduʼa jave umi mbaʼe ohasa vaʼekuére heʼi nombyasyiha ni michĩmi umi ikosakuéra operde vaʼekue, síno opensa meme umi mbaʼe ogana vaʼekuére. Haʼe heʼi: “Umi mbaʼe ahasáva ohechauka chéve ndajuhumoʼãiha ótra kósa iporãvéva pe kongregasión kristiánagui, ha aime rupi pype añeñandu porã ha avyʼa”. Heta ermáno oñepytyvõ vaʼekuépe oiko rire peteĩ desástre naturál oñeñandu avei upéicha. Entéro ermáno ombaʼapóva Jehovándi oipytyvõvo iñermanokuérape, ovyʼaiterei ojapo haguére upéva (elee Hechos 20:35 ha 2 Corintios 9:6, 7).

13. ¿Mbaʼérepa ikatu jaʼe ñañemoag̃uiveha Jehováre jaservíramo de voluntário? Emoĩ peteĩ ehémplo.

¹³ Peteĩ ermána hérava Stephanie ha unos kuánto puvlikadór ohechauka avei ombaʼapoha Ñandejárandi. Haʼekuéra oipytyvõ umi ermáno ova vaʼekuépe Estados Unídospe ojerrefugia hag̃ua pe gérra oikóvagui hetãme. Koʼã ermáno oipytyvõ umi refuhiádope otopa hag̃ua hogarã ha okonsegi hag̃ua avei umi muévle oikotevẽva. Stephanie heʼi: “Opokoiterei orerehe rohechávo mbaʼéichapa umi ermáno ovyʼa ha omombaʼe oĩ haguére mborayhu teete Ñandejára puévlope. Umi ermáno ningo opensa ore roipytyvõ hague chupekuéra, péro añetehápe haʼekuéra la orepytyvõvéva. Rohechávo mbaʼéichapa umi ermáno ojoayhu, iñunído ha ojerovia mbarete, roñemoag̃uive Jehováre. Koʼã mbaʼe orepytyvõ romombaʼeve hag̃ua opa mbaʼe rorresivíva iñorganisasión rupive”.

ÑAÑEHAʼÃKENA ÑAMBAʼAPOVE JEHOVÁ SERVÍSIOPE

14, 15. a) ¿Mbaʼépa oĩ vaʼekue dispuésto ojapo proféta Isaías? b) ¿Mbaʼépa ikatu jajapo jasegi hag̃ua Isaías ehémplo?

¹⁴ ¿Oĩpa ótra kósa ikatúva jajapove ñambaʼapo hag̃ua Jehovándi? ¿Ñañanimánepa jaha japredika peteĩ lugár tekotevẽhápe ojepredikave? Añetehápe ningo natekotevẽi katuete java mombyry jaservi hag̃ua Jehovápe. Péro oĩ ermáno ha ermána ikatúva ojapo upéva. Haʼekuéra ohechauka osegiha proféta Isaías ehémplo. Peteĩ jey, Jehová oporandu vaʼekue: “¿Mávapepa ikatu ajokuái? ¿Mávapepa ikatu ñamondo?”. Ha Isaías heʼi chupe: “Ápe ningo aĩ che. Chemondóna chéve” (Is. 6:8). ¿Ikatúpa ñaipytyvõ Jehová organisasiónpe ha ñaĩpa dispuésto jajapo upéva? ¿Mbaʼe oportunidápa jareko upearã?

¹⁵ Jesús omandárõ guare isegidorkuérape opredika ha ojapo hag̃ua disípulo heʼi kuri chupekuéra: “Hetaiterei oĩ pe kóga oñemonoʼõ vaʼerã, umi omonoʼõva katu saʼi” (Mat. 9:37, 38). ¿Ikatu piko jaservi kómo prekursór umi lugár oñekotevẽvehápe umi opredikávare? Térã, ¿ikatúpa ñaipytyvõ ótro ermáno térã ermánape ojapo hag̃ua upéva? Heta ermáno ohechauka mbaʼeichaite pevépa ohayhu Ñandejárape ha hapichápe oñehaʼã jave oservi kómo prekursór umi lugár oĩháme saʼi opredikáva. ¿Oĩpa ótra kósa ikatúva jajapo ñambaʼapove hag̃ua Jehová servísiope? Oiméramo upéicha, jaaprovechákena upe oportunida pórke katuete javyʼaitereíta.

16, 17. ¿Mbaʼe mbaʼépa ikatu jajapove Jehovápe g̃uarã?

¹⁶ ¿Reñanimánepa reservi Betélpe térã konstruksiónpe? Ikatu rejeofrese rembaʼapo hag̃ua un tiémporente térã ikatu rembaʼapo peteĩ térã hetave día káda semána. Jehová organisasión siémpre oikotevẽ umi ikatúvare oipytyvõ oñekotevẽhápe ha oĩva dispuésto ombaʼapo, ndojepokuaáiramo jepe ojapo pe traváho oñemeʼẽva chupekuéra. Jehová omombaʼeterei entéro umi ojesakrifikávape ha oĩva dispuésto ojapo la oñekotevẽva (Sal. 110:3).

¹⁷ Oimérõ ndekatupyryseve Jehová servísiope ikatu hína reñehaʼã rekumpli umi rrekisíto ikatu hag̃uáicha reho pe Eskuéla Oñembokatupyryve hag̃ua umi Opredikávape. Ko eskuéla ombokatupyry umi ermáno ha ermána iñakãguapývape ha oservímava voi de tiémpo kompléto. Péicha Jehová organisasión ikatúta oipuru porãve chupekuéra. Umi ohóva ko eskuélape oĩ vaʼerã dispuésto oservívo oñeasignahápe chupekuéra opa rire pe kúrso. ¿Reñanimánepa reho ko eskuélape ikatu hag̃uáicha rejapove Jehovápe g̃uarã? (1 Cor. 9:23).

18. ¿Mbaʼépa jahupyty ñambaʼapo haguére káda día Jehovándi?

¹⁸ Entéro jaservíva Jehovápe ñañehaʼã ñandepojera, ñanevuéno, ñanembaʼeporã ha japorohayhukuaa. Avei siémpre ñañeinteresa ñande rapicháre ha ñaipytyvõse chupe. Upéicha rupi ñañeñandu porã, javyʼa ha ñandepyʼaguapy (Gál. 5:22, 23). Tahaʼe haʼéva la ñane situasión, katuete javyʼavéta ñandepojeráramo Jehová ipojeraháicha ha jasegíramo ñamombaʼe ikatu haguére ñambaʼapo hendive (Prov. 3:9, 10).