Umi mbaʼe jaikuaaséva

◼ Iporãpa umi testígo de Jehová omosarambi nóta térã gravasión peteĩ diskúrsogui?

Umi diskúrso ningo ñanemokyreʼỹ ha ñanemombarete (Hech. 15:32). Upévare katuete ñamombeʼuse umi nohenduivaʼekuépe. Ha jaikuaaháicha ñane tiémpope hetaiterei mbaʼe osẽ pyahu ha upéicha rupi sapyʼaitépe ikatu oñembohasa ótrope umi diskúrso ojegravavaʼekue. Oĩ oñongatúva heta diskúrso ogravapyre ha imbaʼeporãségui oiporuka térã ograva jey iñamigokuérape. Ha oĩ katu ambue omoĩva Internétpe oñemboguejy hag̃ua upégui.

Noĩvaíri ningo añete jagraváramo umi diskúrso ñahendu hag̃ua ñande térã ñanderogayguakuéra. Ha ikatu voi umi ansiáno ojapo térã ojapouka upéva umi ermáno hasykatúvape g̃uarã ha ndaikatúiva oĩ rreunionhápe. Upéicharamo jepe oĩ ambue mbaʼe ohechaukáva ndovaleiha oñemosarambi koʼã diskúrso.

Jaikuaaháicha ojeprepara jave umi diskúrso oñepensa upe kongregasión oikotevẽvare, ha umi mbaʼe ojeʼéva ikatu ojejagarra vai ambue kongregasiónpe. Avei hasy jaikuaa hag̃ua arakaʼe ha mávapa ojapo upe diskúrso. Upévare ndaikatúi jajeroviapa oĩ porãne hag̃ua upe informasión heʼihaichaite umi puvlikasiónpe, térã noiméipa hína osẽma ipyahuvéva (Luc. 1:1-4). Avei oñemosarambíramo umi nóta térã gravasión ikatu oĩ omombaʼetereíva upe ojapovaʼekuépe térã pe diskursánte voi oñemombaʼeguasuse (1 Cor. 3:5-7).

Tembiguái jeroviaha ha iñarandúva ombaʼapo jejopy omeʼẽ hag̃ua ñandéve umi informasión ‘ñaikotevẽhaichaite ha hiʼoraitépe’ (Luc. 12:42, NM). Umíva apytépe oĩ umi diskúrso ojejapóva testígo de Jehová kongregasiónpe, ha umi gravasión ikatu ñamboguejy Internétgui (www.jw.org). Upévare jajeroviákena pe tembiguái jeroviaha ha iñarandúva, pe Cuerpo Gobernante rupive, akóinte omeʼẽha ñandéve umi mbaʼe ñaikotevẽva jajepytaso mbarete hag̃ua Jehová ykére (Hech. 16:4, 5).