Oñeporandúva jepi

¿Mbaʼérepa kristianokuéra oñatende porã vaʼerã oipuru jave umi aplikasión oenvia térã orresivi hag̃ua mensáhe?

Heta ermáno oipuru pe teknolohía oñekomunika hag̃ua ihentekuéra ha ótro ermanokuérandi. Péro pe kristiáno ijerovia mbaretéva orekóta enkuénta ko konsého: “Pe iñentendídova ohechakuaa pe pelígro ha ojere chugui, péro umi ivýrova katu derechoite oho upépe ha upéi osufri odesidi vai haguére” (Prov. 27:12).

Ñande ningo jaagradeseterei Jehovápe ñandeprotehese haguére. Upévare ndajajeheʼái umi oporomoingo vaisévare, umi expulsádore, térã umi ogueroviakasévare umi enseñánsa oĩ vaíva (Rom. 16:17; 1 Cor. 5:11; 2 Juan 10, 11). Oĩ umi ermáno térã umi ojeheʼáva ermanokuérare nokumplíriva umi léi oĩva la Bíbliape (2 Tim. 2:20, 21). Ñande ningo jareko enkuénta koʼã mbaʼe jaiporavo jave ñane amigorã. Péro ijetuʼúta jajapo hag̃ua upéva jaipurúnteramo peteĩ aplikasión ñañekomunika hag̃ua hendivekuéra.

Ñañatende porã vaʼerã mávarepa jajeheʼáta hína, koʼýte jaikéta mbaʼérõ peteĩ grúpo tuichávape ñamensahea hag̃ua. Oĩ ermáno oike vaʼekue umi grúpo tuichávape, ha upe rire oñaprovlema. Péro ijetuʼúta peteĩ ermáno térã ermánape oñatende porã hag̃ua, pe grúpope oñeĩramo mas de 100 térã míles voi. Por ehémplo, ijetuʼúta jaikuaa hag̃ua mbaʼeichaguápa enterove oĩva pe grúpope ha ijerovia mbaretépa hikuái. Ñapensamína mbaʼépa heʼi vaʼekue pe oskrivi vaʼekue Salmo 26:4: “Umi ijapúva ni mbaʼevéicharõ ndahaʼéi che amígo, ha ndajeheʼái umi hovamokõivare”. Upéva ohechauka iporãvetaha jaipurúramo peteĩ aplikasión ñamensahea hag̃ua umi persóna jaikuaa porãvandi añoiténte.

Michĩramo jepe pe grúpo, peteĩ kristiáno tekotevẽ oñatende mboy tiémpopa haʼe oipuru omensahea hag̃ua, ha mbaʼe rehepa oñeñeʼẽ upépe. Ndovaléi ñapensa ñarresponde vaʼerãha katuete umi mensahekuéra tahaʼe haʼéva umi téma oñeñeʼẽha hína, térã mboy tiémporepa ojesegi oñeñeʼẽ upévare. Pablo oavisa vaʼekue Timotéope oĩtaha ‘ojepokuaáva ichismóso ha oñentremete ótro ojapóvare’ (1 Tim. 5:13). Ñane tiémpope upéicha avei ikatu oiko umi teknolohía rupive.

Peteĩ kristiáno ijerovia mbaretéva ndoikomoʼãi oporokritika ni ohendu umi ojapóvape upéva, ni ndoikomoʼãi omosarambi umi informasión ótro ermáno rehegua natekotevẽiva ojekuaa (Sal. 15:3; Prov. 20:19). Avei ndoikomoʼãi omombeʼu umi istória ijexaherádova, térã umi informasión ndojekuaaporãiva siértopa (Efes. 4:25). Ñande ningo jareko voi heta informasión oñeguenohẽva la Bíbliagui, ha umi infórme ikatúvare ñakonfia ñande sítio jw.org-pe, ha umi prográma osẽvape káda mes JW Broadcástingpe.

Oĩ umi ermáno oipurúva koʼã aplikasión oofrese, ovende térã ojogua hag̃ua algún prodúkto, térã oofrese hag̃ua traváho. Koʼã mbaʼe ningo negósio delihénsia ha ndovaléi ñambojeheʼa pe adorasión ñameʼẽvare Jehovápe. Ñande kristianokuéra ‘nañandeplatarayhuséi’, ha upévare ndajajaprovechamoʼãi ñane ermanokuérare ñagana hag̃ua pláta (Heb. 13:5).

¿Jaipuru vaʼerãpa umi aplikasión oñemensahea hag̃ua jajerure hag̃ua kolavorasión umi ermáno oikotevẽvape g̃uarã, térã umi ohupyty vaʼekuépe g̃uarã desástre naturál? Ñande ningo jahayhu ñane ermanokuérape ha jajepyʼapy hesekuéra. Upévare ñaipytyvõse ha ñamokyreʼỹse jepi umi oikotevẽvape (Sant. 2:15, 16). Péro ñañehaʼãramo jajapo upéva peteĩ grúpo tuicháva rupive, ñande káusare ikatu ijetuʼuve oipytyvõ porã hag̃ua chupekuéra pe sukursál térã umi ansianokuéra (1 Tim. 5:3, 4, 9, 10, 16). Ha katuete ndajaipotái avei umi ótro opensa ñande jarekoha peteĩ asignasión espesiál ñañangareko hag̃ua ñane ermanokuérare.

Ñande ningo jajapose entéro mbaʼe ñambotuicha hag̃ua Ñandejárape (1 Cor. 10:31). Upévare jaipuru jave peteĩ aplikasión oñemensahea hag̃ua térã ótra teknolohía, ñañatende porãkena ha ñapensa umi pelígro oĩvare.