Piu umpu ulsrøpen kasraktø uñchun

Jesús eshkaik køn nui wentautø ampupelø misrtrappe piu umpu ulsramik køncha (leu Mateo 28:19, 20). Trupe, ¿piu umpu ulsraikpe maik kø? ¿Piu umpu ulsrøntrappe chi maramik kø?

1. ¿Piu umpu ulsraikpe maik kø?

Griegotrikmaype piu umpu ulsraikpe, piu umpu asr ørøpa kewanøp latawainkøn. Jesúswan piu umpu ulsrøpen, Jordán piyu asr ørøpa kewanik køpik køn, trukutri “piu umbugurri” wepatrik køn (Marcos 1:9, 10). Møya cierton Cristoi wentautø ampupelan piu umpu ulsrøntrappe trektøwai marøpelø køn.

2. ¿Kan misak piu umpu ulsrøpen chi kenamarøp pasra?

Kan misak piu umpu ulsrøpen, nui øsik unikwan Jeupawan yantø trana pasraik kenamaran. Trupe, ¿namui øsik unikwan Jeupawan trantrap chi maramik kø? Piu umpu ulsrøntrappe kan miainuk Jeupawan namtø putramisra, tru “na øsik uninkatikpe ñuyelan marøp uñchur cha køtrømisrar cha”. Trektøwai tru miainuk tru “ñuntø adorap pasramøntrun cha, ñuyelanmetrik metrap pasra marøp, chu uratøkucha ñi karuilan møra maramøntrun cha”. Trektøwai, Jesús maik marilan martrap køtrømisramik køn, tru Jesús trentaikwan: “Møikkøben nai mendig uñig købene, nøasiitø nuimburabigwangøba isumøtø, [...] nai mendig arrum nebunrrun cha” (Mateo 16:24). Kan misak nui øsik unikwan trana, piu umpu ulsrøpen, Jeupawaimpa nui misakmeraimpa tap linchipik køntrun.

3. ¿Piu umpu ulsrøntrappe chi maramik kø?

Piu umpu ulsrøntrappe, Jeupawanmetrik nø maik kuikwan nepua asha, nuinuk fe tøkakømik køn (leu Hebreos 11:6). Treek marøp yape fe nemisra, Jeupawan mas untarawa, katøkanelan Jeupawaimpurap waminchip trektøwai Bibliayu maik karuilan møra marøp inchun (2 Timoteo 4:2; 1 Juan 5:3). Trukutri Jeupawayelø “kui asamdeelø” amøñipen, Jeupawan nui øsik unikwan trana, piu umpu ulsramtik køntrun (Colosenses 1:9, 10).a

MAS NEPUA KUSREU

4. ¿Jesús piu umpu ulsrainukkutri chi kusrentrap?

Jesús piu umpu ulsraimpurap mas nepua kusrentrappe, ley Mateo 3:13-17. Yu leinuk pinaku paílan waminchap:

• ¿Jesúswan piu umpu ulsrøp uras kan unø srø kal-laiktø kuik kø chinta?

• ¿Jesúswai turpala pi itølusiktø kuik kø chinta? ¿Kape mantø kuik kø?

Jesús piu umpu chap ulsrøwape, Jeupa nun martrai karuikwan pølpasra marøp mentik køn. Ley Lucas 3:21-23 incha Juan 6:38, yu leinuk pinaku paíkwan waminchap:

• Jesús piu umpu ulsrainukkutri, ¿chiwan metrap pasra marik kø?

5. Piu umpu ulsramikpe kaimamtikpe kømøn

Jeupawan nui øsik unikwan trana, piu umpu ulsramikpe srøtøpe kørik kui intinkucha, Jeupa maik kuikwan aship yainuk, øyeek isua maramik kørik kui inchimøntrun. Misakmera møilø mantø isua marikwan nepua ashchappe, VIDEUN asay.

VIDEU: Jeupapa tap lincha pasraikwan mas mur køntrai mar (1:11)

Ley Juan 17:3 incha Santiago 1:5, yu leinuk pinaku paíkwan waminchap:

• ¿Kan misakwan piu umpu ulsrøntrai chi purukuntrera?

1. Jeupawan namui øsik unikwan trantrap kan oración maramik køn, tru Jeupawan chu urastøkucha nuyelan martrap køtrømisrar cha chipik.

2. Nam piu umpu ulsrøpen, maya misakmerai malau, namui øsik unikwan Jeupawan tranøp pøntraik kenamartrun.

6. Nam piu umpu ulsrøpen Jeupawai yawelø misrtrun

Nam piu umpu ulsrøpen, Pirø ørøpa namui nuchalan kan yawelø lataik tøkakøntrun. Chu køpen kal-lawar kuintøkucha, namui køreiløpe pekmayelø kømøn, masken nam søtøløpa Biblia maik karuikwan møra martrap inchipelø ker. Ley Salmo 25:14 incha 1 Pedro 2:17, yu leinuk pinaku paíkwan waminchap:

• Ik versículosmera leimpala, ¿piu umpu ulsraikpe namun mantø purukuntrera?

¿CHI KUSREKU?

Jesús trentaik køn nui wentautø ampupelø misrtrappe piu umpu ulsramik køncha. Tru treek martrap, Jeupawainuk fe tøkakøp, nun møra marøp trektøwai kan oraciónyu Jeupawan namui øsik unikwan tranøp intamik køn.

Kusreikwan katøle isuntrap

• ¿Piu umpu ulsraikpe maik kø? ¿Incha chinchatre nuik kø?

• ¿Piu umpu ulsrøpen chi kenamara?

• ¿Jeupawan nui øsik unikwan trantraptø incha piu umpu ulsrøntraptø chi maramik kø?

MAS NEPUA ASH

Piu umpu ulsraimpurap møiløpe chi isa waminchipelø kuikwan katøkane ciertonmay kuikwan ash.

“¿Piu umpu ulsraik ciertonpe maik kø?” (jw.org yu pørilø)

Ñi piu umpu ulsrøntrai chi purukuntrapelan ash.

“¿Ñune chitre piu umpu ulsrøntrai inchera?” (Asha Eshkapik, marzo 2020wai)

Kan møk piu umpu ulsrøntraptø tap isua marikwan nepua ash.

“Naasiktøwai ciertonik maik kuikwan nepua ashchai purukuik køn” (Asha Eshkapik, 1 febrero 2013wai)

Piu umpu ulsrøpen chi tapeløtø utøntrap kui trektøwai piu umpu ulsrøntraptø chi maramik kuikwan ash.

“¿Yantø piu umpu ulsrøntrap kø chinta?” (Lo que los jóvenes preguntan. Respuestas prácticas [volumen 2], capítulo 37)