Beem Nɛreba

1. Tɛm buni ti to wan pɔsɛ beem nɛreba ti ba wa’an to laɣesegɔ la na?

¹ Ho san tiregɛ duɣɛ dia n ani wam ti ho bo nɛreba bii ho zɔdoma, ho puurɛ wan pee mɛ ti ho beem ba ti ba wa’ana di. Bala mea nɔɔ, ti to laɣesegɔ wa poan ba maasum vo’osum dia ti ba bo to. Yehowa bo to la yɔ’ɔ ti la san ta gee bakwai atã la laɣesegɔ la paɛ, to beem nɛreba. Bem n wan basɛ ti to puurɛ pee ti to beem ba?

2. Beni n wan basɛ ti to ta’an beem nɛreba zo’e zo’e?

² To san ti’isɛ bisɛ Yehowa n pa’alɛ tɔ ti to nyɛta nyuurɔ se’em to laɣesegɔ woo poan la, to puurɛ wan pee ti to beem nɛreba. (Isa. 65:13, 14) La dela to tɛra ti, yuunɛ woo ti to ni beem nɛreba la tari nyuurɔ mɛ. (Bisɛ daka la n yeti, “La Tari Nyuurɔ Mɛ.”) Nɛresɛba ti to wan beem la, basɛba wan wa’an to laɣesegɔ la na sɛba me kan wa’ana. Ba za’a san puɣum ka nyaŋɛ wa’ana, to ania itigɔ la tari la pɛka bɔ’ɔra Yehowa ge pa’ala eŋa n nɔŋɛ nɛreba se’em.—Yoom 145:3, 7; Lili. 22:17.

3. To wan dekɛ beeŋɔ gɔŋɔ la tɔ̃rɛ la wani?

³ Keendoma tigesego woo nari ti ba bisɛ ba wan eŋɛ se’em ti gɔŋɔ la paɛ zɛ’an woo, hali la san dɛna ti ba ni basɛ gɔŋɔ la nɛra la san ka bɔna yire bii ba tɔ̃rɛ de nɛreba n boi zɛ’an. Bakwai ba’asegɔ poan woo, la dela to dekɛ magazines la beeŋɔ gɔŋɔ la laɣum bo. To san ta beem nɛreba la ba’asɛ, to puurɛ wan pee la to mi ti nɛreba zo’e zo’e wa’ana nyɛ Yehowa n bo’ori to vo’osum dia se’em.

La Tari Nyuurɔ Mɛ

Yuuma zo’e zo’e n tole ti to mabia n de pɔka yuun tara beeŋɔ gɔŋɔ bɔ’ɔra nɛreba ge yuun ti’isa ti daanse’ere ba kan wa’ana. A yuun yeti, ‘Nɛreba wa ti n bɛɛna wa nɔɔ wan wa’an laɣesegɔ wa na?’ Asibidaarɛ bulika laɣesegɔ la poan ti a nyɛ Sikh buraa n zi lɛm en, ti a tɔɣɛ bo en. Buraa la yetɔɣum poan ti a baŋɛ ti ba beem en mɛ ti a wa’ana. A yuun soke mabia la yɛla zo’e zo’e ti a yuun nyaŋɛ lebese en. Buraa la yuun pa’alɛ eŋa puurɛ n pee la to laɣesegɔ la, la to yɛ to lɔɣɔrɔ soŋa se’em la. Daandindaarɛ mea nɔɔ ti mabia wa le sɔsɛ bo nɛra la a pɔɣa me n zi lɛm en. Ti bamam me yeti ba beem bamam me ti ba doose loore wa’ana. Ba puurɛ yuun pee mɛ, ti ba yeti ba wan wa’an Alaserɛdaarɛ na. Bilam ti mabia wa nyaa baŋɛ ti yuunɛ woo ti to bɛɛna nɛreba la dela ninmɔ’ɔrɛ yele.
To laɣesegɔ ayima poan ti to mabia la a pɔɣa n de sore ŋmɛ’adoma tɔɣɛ bo nɛra la a pɔɣa n kuregɛ. Nɛra la a pɔɣa wa daa yeti zina ma’a ti bamam wa’an to laɣesegɔ wa na. To mabia la a pɔɣa la daa soke ba yeti, “Ani n beem ya?” Ti ba lebese yeti, “Tomam daa paɛ la yire na nyɛ beeŋɔ gɔŋɔ n gã to kuleŋa nɔɔrɛ.” Ba daa kaalɛ beeŋɔ gɔŋɔ la ge dekɛ address la n boi poore la gulesɛ tisɛ. Mabiisi basɛba daa eŋɛ wuntɛɛŋa dia bo ba. Ba daa nyɛ laɣesegɔ wa nyuurɔ mɛ hali yeti yiimbeere ba wan lebena. To mabiisi wa daa yeti ba wan keŋɛ ta zamesɛ ba.