Zamesɛ Sɛla Na’am Mɔɔlegɔdoma Sɛba N Kumesɛ La Zɛ’an
To puurɛ pee mɛ la to tari na’am mɔɔlegɔdoma sɛba n kumesɛ bɔna to tansugere la. Yuuma zo’e zo’e n wana ti ba ze’a kankaŋi pu’usa Yehowa. Basɛba me nyɛ kumesegɔ ba na’am mɔɔlegɔ tuuma poan ti la ka yue. Na’am mɔɔlegɔdoma wa n tum na’am mɔɔlegɔ tuuma la yue se’em la, baŋɛ ti Yezu n sirum pa’ali Krista tansuga la ba’asegɔ dabesa wa poan. (Matu 28:19, 20) Ba nyɛti la ‘paŋa n gani za’a’ tuna ba na’am mɔɔlegɔ tuuma la, hali la gurebisɛ la yeletooro poan. (2 Kor. 4:7) To wan nyaŋɛ zamesɛ yɛla zo’e zo’e yese na’am mɔɔlegɔdoma sɛba n kumesɛ wa zɛ’an. Ba san ni nyɛ yɔ’ɔ, ba ni bɔta ti ba pa’alɛ basɛba ba mi sɛla la. (Yoom 71:18) Bala la, la nari ti to kpeŋe tomea zamesɛ yɛla ba zɛ’an. Sarɔkuni poan?
Na’am Mɔɔlegɔ Poan. Sɛba n ka kumesɛ la san bɔta ti ba mina pa’alegɔ na’am mɔɔlegɔ poan, la dela ba zamesɛ ta’an kumesɛ. Ba wan ta’an zamesɛ yɛla zo’e zo’e ba san bisa mabiisi n kumesɛ ge pa’ala se’em na’am mɔɔlegɔ poan. (Bisɛ February 15, 2015-E, Watchtower, “Kɔ’ɔn Tuulegera Mɛ Na’am Mɔɔlegɔ La Poan,” bɔberɛ butã la zuo n de “Soŋɛ Ya Sɛba N Ka Kumesɛ La.”) Hon nyɛ nyuurɔ la wani, hon naɛ la mabiisi wa tum na’am mɔɔlegɔ poan la?
Hon kan bɔta ti ho doose na’am mɔɔlegɔ daana n kumesɛ keŋɛ na’am mɔɔlegɔ? Na’am mɔɔlegɔ daana n kumesɛ wa inya san ka bara, ho ta’an ni yibegɛ tari ho Baabule zamesegɔ daana keŋɛ a zɛ’an ta zamesɛ. Zamesegɔ la san ba’asɛ, soke na’am mɔɔlegɔ daana la sɛla ti a nyɛ ge bɔta ti a ka’am hɔ.
Naɛ La Ba Sɔsɛ: Ho san bɔta ho baŋɛ na’am mɔɔlegɔdoma sɛba n kumesɛ la soŋa, la dela ho naɛ la ba sɔsera. Ho san ita ho deodoma zamesegɔ, beem ba ayima ti ya sɔsɛ. Na’am mɔɔlegɔ daana inya san ka bara, ho kan maasum homea keŋɛ a yire ti ya ta eŋɛ deodoma pu’usegɔ? Soke en eŋa n eŋɛ se’em nyɛ yelemɛŋɛrɛ la. Bem kã’a ti a nyɛ? Hon nyɛ ti tansugere la zo’e la wani? A puurɛ pee la wani la eŋa n pu’useri Yehowa la?
Bɔkera ba ge mina ti daɣɛ sɛla woo ti ba wan nyaŋɛ eŋɛ. Wuu to za’a waabi n ani se’em la, na’am mɔɔlegɔdoma sɛba n kumesɛ la me mi’ilum boi la tɔka tɔka. (Arom 12:6-8) Basɛba kuregɛ mɛ ge me kan le ta’an tum na’am mɔɔlegɔ tuuma la zo’e. La bala la za’a, to wan ta’an kelum zamesɛ sɛla ba zɛ’an la bamam n pu’usɛ Yehowa yue se’em la.