Vom La Na’am Tuuma Zamesegɔ Viisegɔ Gɔŋɔ
© 2024 Watch Tower Bible and Tract Society of Pennsylvania
MAY 6-12
NAAYINƐ TUULUM YƐLA | YOOMA 36-37
‘Da Basɛ Ti Sɛla Daam Hɔ Putɔpa La Zuo’
w17.04-E 10 ¶4
Naayinɛ Na’am La Wan Sa’am La Bem?
Sodeni poan ti putɔpa daana tɔ zina beere wa? Tuuntuna Paul n yuun tɔɣɛ biŋe ti ‘la wan ta ana biɣi biɣi’ tomam saŋa wa la, a yuun le tɔ̃kɛ yeti: ‘Putɔpa, la nigum nigumdoma wan tum gaam be’ero.’ (2 Tim. 3:1-5, 13) Hon nyɛti yetɔɣebiŋere wa n tuni tuuma se’em? Putɔpa n de wuu kandaasi, nɛreyaalesi la nayigesi tabelɛ daam to zo’e zo’e mɛ. Basɛba putotuuma la kɔ’ɔn niɛ la peelumi ge basɛba nigeni mɛ tuna putoo. Yele ana san puɣum ka tabelɛ paɛ tomam mea, la kelum daana to mɛ. To suure n ni sa’am to san ni wum ba putotuuma la. Putɔpa n vɛɣeni kɔma, bunkureba la tarendoma se’em la ni dɛna la nɔyalegerɛ. Putɔpa wa kɔ’ɔn ita ba yɛla wuu dusi la ge me kɔ’ɔn tɔɣesa kolekpabɛ’ɛsi. (Yam. 3:15) Yelesonɛ la dela, Yehowa Yelesum la tari la yelesoma bɔ’ɔra tɔ.
w22.06-E 10 ¶10
Yehowa Kã’ari Bɔ’ɔra La Sɛba N Diti Sugeri Bɔ’ɔra Nɛreba
To san ugera yɛla, la wan pɔɣelum tɔ. Yehowa ka boti to ugera yɛla ti la daana tɔ. A boti la to tara pupeelum. (Kaalɛ Epesus 4:31, 32.) Yehowa ka’am to yeti to basɛ ‘sunsɔyiisum ge me zaɣesɛ nyabega.’ (Ym. 37:8) Yɛm boi bim ti to tara ka’aŋɔ wa tuna tuuma. To san ugera yɛla, la ta’an daam to imma’asum, la to ti’isegɔ. (Mag. 14:30) Nɛra san nyu yabega, la wan daam la eŋa mea. Bala mea nɔɔ ti to san ugera yɛla, la kan daam mina n tue to la ge la wan daam la tomam mea. Bala la, to san dita sugeri bɔ’ɔra nɛreba, to soŋeri la tomea. (Mag. 11:17) Bala ni basɛ ti to suure ga’a la ma’asumi ti to ta’an nyɛta nɛŋa tɔlega Yehowa pu’usegɔ poan.
w03-E 12/1 13 ¶20
‘Tara Pupeelum Yehowa Poan’
Sankaŋa la, ‘sirege n meadoma la n wan sɔna tingɔŋɔ la.’ (Yooma 37:11) Bani n de ‘sirege n meadoma’? ‘Sirege n meadoma la’ dela sɛba n ma’ɛ bamea gura Yehowa ti a maalɛ yeledaaŋɔ se’a n paari ba la. ‘Ba me wan tara pupeelum la suma’asum zo’e zo’e.’ (Yooma 37:11) Hali nananawa, ton boi yelemɛŋɛrɛ Kristakɔma tansugere la poan la zuo, to tari la pupeelum zo’e zo’e, vo’osum paradiisi la poan.
Vo’osum Poan Yɛla
it-2-E 445
Zoore
Sɛla n ka bikeri, bɔna wuusa bii wɔɣɛ. Zɔya ni ze’ele bo la sɛla n ka bikeri bii sɛla n boi wuusa. (Isa 54:10; Hab 3:6; dekɛ makɛ Ym 46:2.) Bala la, se’em ma’a ti yuumadaana la yuun yeti Yehowa tontɔɔ tuuma ani me wuu ‘zɔwoɣoro la,’ (Ym 36:6) daanse’ere a yuun boti a yeti Yehowa tontɔɔ tuuma ka teeri. Bii, zɔya n wɔɣɛ la zuo, la ta’an dɛna ti a boti a yeti Naayinɛ tontɔɔ tuuma la gani asaala puti’irɛ mɛ. (Dekɛ makɛ Isa 55:8, 9.) Liligere 16:20 yeti se’em ma’a ti ba ka’ɛ sɛla n boi lasɛka n pa’asɛ buyopɔi n ze’ele bo Naayinɛ sunsɔyiisum la, ‘zɔya la woo mɛlum mɛ.’ Bala pa’alɛ ti sɛla ka boi n wan ta’an li’isɛ Naayinɛ sunsɔyiisum, la nɔŋɛ la wɔɣɛ la se’em me.—Dekɛ makɛ Yer 4:23-26.
MAY 13-19
NAAYINƐ TUULUM YƐLA | YOOMA 38-39
Hon Wan Eŋɛ Se’em Ti Ho Tuure Yɛla Kan Ba’ɛ Daana Hɔ
w20.11-E 27 ¶12-13
“Basɛ Ti Ho Nini Bisa” Sɛla N Wan Eŋɛ Beere Sa’am
Kaalɛ 1 Yon 3:19, 20. Nɛreba zo’e zo’e tuure yɛla kelum daana ba mɛ. Makerɛ, nɛreba basɛba yuun iti la yelese’a n ka nari ge nyaa ta baŋɛ yelemɛŋɛrɛ la ti yele aŋa kelum daana ba. Mabiisi basɛba me n eŋɛ yelese’a ba ko’om musega pooren, kelum daana ba mɛ. La me ta’an ana to bala. (Arom 3:23) To boti la to ita sɛla n de tontɔɔ ge yelemɛŋɛrɛ la dela, ‘to za’a waabi tuuri mɛ saŋa zo’e zo’e.’ (Yam. 3:2; Arom 7:21-23) La boi bim ti to tuure yɛla san daana tɔ, to suure ni sa’am mɛ ge bala ta’an kelum soŋɛ tɔ. Beni n sɔi? Se’ere n sɔi la, susa’aŋɔ la ta’an basɛ ti to bɔta ti to tee. La me ta’an basɛ ti to malum lu to suure ti to kan le taɣesɛ tuure aŋa.—Heb. 12:12, 13.
Ge to tuure yɛla la ta’an ba’ɛ daana tɔ. Hali to ta’an kelum ti’isa to tuure la yele, se’em ma’a ti Yehowa puɣum eŋɛ pa’alɛ ti a di sugeri bo to mɛ. Putɛ-aŋa taaba ta’an daam tɔ. (Ym. 31:10; 38:3, 4) Sodeni poan? Geele mabipɔka ayima yele wa bisɛ. Eŋa n yuun tum be’em se’a la yuun daani en mɛ paa. A yeti: “Mam yuun ti’isɛ ti la ka nari ti n le ãregera n mea Yehowa tuuma poan, se’ere n sɔi la mam ka le nara.” La me tabelɛ ana to zo’e zo’e la bala. La yele pakɛ mɛ ti to da basɛ ti to tuure yɛla ba’ɛ daana tɔ. Yehowa san ka zaɣesɛ tɔ ge ti tomam tuɣum deŋɛ zaɣesɛ tomesi, bisɛ Sitaana puurɛ n wan pee se’em!—Dekɛ makɛ 2 Korint 2:5-7, 11.
w02-E 11/15 20 ¶1-2
To Wan Dekɛ To Saŋa Tum La Wani Ti Yehowa Puurɛ Pee?
TO VOM dabesa pɔ’ɛ mɛ ge me ka yuura. David n yuun ti’isɛ taɣesɛ to vom dabesa n pɔ’ɛ se’em la n basɛ ti a zusɛ yeti: ‘Naayinɛ, pa’alɛ mam, la wan ta ana mam se’em, la n dabesa n zuni se’em. Mam dabesa dela kunkute bɔna ho nu’usin, mam vom ka seke se’ere hon nɛŋan.’ David yuun boti la a yetɔɣum, la a itigɔ za’a pɛɛra Naayinɛ puurɛ. David yuun eŋɛ pa’alɛ ti a dekɛ amea delum la Naayinɛ. A yeti: ‘Mam puti’irɛ boi la hon poan.’ (Yooma 39:4, 5, 7) Yehowa yuun kelese mɛ. A yuun geele la David tuuma soŋa soŋa ge kã bo en.
La dela naana ti to basɛ ti to nini kɔ’ɔn mu’ɛ to tuuma poan ge me bɔta ti to ita yɛla kalam kalam. Wana ta’an basɛ ti to tara putɛyiila, se’ere n sɔi la to boti la to eŋɛ yɛla zo’e zo’e ge ti tɛm la me ka bɔna. Wuu David la, tomam me boti la to vɔna to vom ti Naayinɛ puurɛ pee. Yelemɛŋɛrɛ la dela, Yehowa nini kɔ’ɔn gã la tomam ayima ayima woo zuo. Yuuma 3,600 n wana ti Yob n yuun zoti Naayinɛ la yuun sakɛ ti Yehowa nyɛti sɛla woo ti eŋa ita mɛ. Yob yuun soke yeti: ‘A san ta yeti a bisɛ n itigɔ, n wan lerege en yeti bem?’ (Yob 31:4-6, 14) To wan ta’an basɛ ti to vom dabesa pee Naayinɛ puurɛ to san basɛ ti vo’osum poan yɛla deŋɛ nɛŋa to vom poan. La me nari ti to nana a nɔya ge tara to tɛm tuna tuuma soŋa soŋa. Basɛ ya ti to geele ya yele ana wa soŋa soŋa.
w21.10-E 15 ¶4
Hon Wan Eŋɛ Se’em Ta’an Le Nyɔɣɛ Yehowa Zɔtɔ
Zusa Yehowa saŋa woo. Ho Sɔ Yehowa mi ti ho san tum be’em ti la daana hɔ saŋa woo, la ta’an kpe’em bo ho ti ho zusɛ. (Arom 8:26) Ge la bala za’a, tiregɛ la ho ‘kɔ’ɔn zusera.’ Yele Yehowa ti ho kɔ’ɔn bɔta la ho le dɛna a zɔ. (Arom 12:12) Andrej yeti: “Mam be’em la daa ba’ɛ daana mam mɛ ti vi tara mam. Ge mam san ni zusɛ ba’asɛ, la ni ana mam la buɣa buɣa ti mam suure ga’a ma’asumi.” Ho san ka mina hon wan yele Yehowa sɛla, geele Naba David zusega n boi Yooma 51 la 65 la bisɛ.
Vo’osum Poan Yɛla
Eŋɛ Pa’alɛ Ti Ho Dela Yelemɛŋɛrɛdaana
Nyɔkɛ n mea yele pakɛ mɛ to san bɔta ti nɛreba dekɛ bamea delum to. Nyɔkɛ n mea wan soŋɛ tɔ ti to tana to nɔɔrɛ tara se’em ma’a ti la ita to wuu to tɔɣɛ suɣelum yele la. (Kaalɛ Magaha 10:19.) To ta’an baŋɛ ti, la ni kpe’em bo to mɛ ti to nyɔkera tomea, se’em ma’a ti to ni bɔna social media poan. To san ka bisɛ tomea soŋa, to ta’an ka mina ge tɔɣɛ suɣelum yɛla ti nɛrekuuŋɔ wum. To me san kɔ’ɔn mɔɔlɛ yele la elɛktrɔnik poan bala, to ka le tara yɔ’ɔ ti to pa’alɛ ban wan dekɛ tum tuuma se’em bii la wan daam nɛreba se’em. Nyɔkɛ n mea wan soŋɛ tɔ ti to ana siim, se’em ma’a ti sɛba n yaɛ to la pã’asa tɔ ti to tɔɣɛ suɣelum yɛla n wan basɛ ti dɛŋa paɛ to mabiisi. Yeledena ta’an eŋɛ mɛ ti pulesi sɔkera to yɛla tinsɛka ti ba dekɛ nu’o paɣelɛ to tuuma la zuo poan. To wan ta’an dekɛ naresum yele la n de to ‘dekɛ gareŋerɛ ga to nɔɔrɛ’ la tum tuuma yeledena, la yɛla ase’a me poan. (Ym. 39:1) To san bɔna la to deodoma, to zɔdoma, to mabiisi, la se’em woo, la nari ti to tara yelemɛŋɛrɛ. To san wan tara yelemɛŋɛrɛ, la nari ti to nyɔkera tomea.
MAY 20-26
NAAYINƐ TUULUM YƐLA | YOOMA 40-41
Beni N Sɔi Ti La Nara Ti To Soŋera Nɛreba?
w18.08-E 22 ¶16-18
Sɛba N Bo’ori Yɛri Yɛri Tari La Pupeelum
Nɛresɛba n sirum bo’ori yɛri yɛri ni ka ɛɛra ti nɛreba me bo ba lebese. Yezu yuun ti’iseri la bala yele, se’em ma’a ti a yuun yeti: ‘Ho san yeti ho yi nɛreba ho yire na, yi nasedoma, la kɔɔrenɔ, la wɔbesi, la fɔɔsi. Ho san eŋɛ bala, Naayinɛ wan kã kãsomɔ bo ho. Se’ere n sɔi la, sɛba ti ho yi la kan ta’an me yi ho.’ (Luke 14:13, 14) Baabule gɔngulesa ayima yeti, ‘Sɛba n sakɛ nu’o tĩirɛ nyɛti la kã’a.’ Ayima me yeti: ‘Pupeelum boi me la nɛresɛka n tari tarendoma giile.’ (Mag. 22:9; Ym. 41:1) Yelemɛŋɛrɛ, la nari ti to bɔ’ɔra yɛri yɛri, se’ere n sɔi la to san soŋera nɛreba, la bo’ori to la pupeelum.
Yezu yuun yeti, ‘ho wan tara pupeelum zo’e zo’e ho san bɔ’ɔra gana hon to’oseri.’ Se’em ma’a ti Paul yuun dekɛ Yezu yetɔɣum wa tum tuuma la, a yuun ka tɔɣeri la ton wan tɔ̃ta innaanɛ lɔɣɔrɔ ma’a yele. A me yuun tɔɣeri la ton wan kpɛmesa taaba giila, pa’ala ge me soŋera taaba se’em. (Tm. 20:31-35) Tuuntuna Paul yetɔɣum, la a itigɔ yuun pa’alɛ ti la nari ti to nɔŋɛ to mabiisi ge tara to saŋa, la to paŋa soŋera ba.
Nɛresɛba n viiseri nɛreba bɔŋa baŋɛ ti, to san bɔ’ɔra yɛri yɛri, la bo’ori la pupeelum. Gɔŋɔ kuyima yeti, “nɛreba puurɛ ni pee mɛ ba san soŋera nɛreba.” Nɛresɛba n eŋɛ viisegɔ la yeti ho san soŋera nɛreba, bala wan basɛ ti ho vom tara “vuurɛ, se’ere n sɔi la sɛla n pakɛ asaala n bala.” Bala zuo la, gɔnmi’ileba ni kpɛmesa nɛreba giila ti ba yese ba suure soŋera nɛreba, la wan eŋɛ se’em ti ba tara imma’asum la pupeelum. Wana wa daɣɛ yelepakerɛ bɔ’ɔra sɛba n sakɛ ti Baabule la dela Yehowa Yelesum. Eŋa n de to Naaŋɔdaana. A me nɔŋɛ to mɛ.—2 Tim. 3:16, 17.
w15-E 12/15 24 ¶7
Yehowa Wan Soŋɛ Hɔ
Wuu Naayinɛ diimi yamesi la, to san bɛ̃’ɛra, to eeri la Naayinɛ buɣelɛ to suure, bo to yɛm ge me soŋɛ tɔ. Naba David yuun yeti: ‘Pupeelum boi me la nɛresɛka n tari tarendoma giile. Yehowa wan faaɛ en daaŋɔ poan basɛ. Yehowa wan gu en ge basɛ ti a vɔna.’ (Ym. 41:1, 2) To mi ti sɛba n yuun boi David saŋa sa ge tara giile bɔ’ɔra tarendoma la yuun ka vɔi bala wuusa. Bala, David yuun ka pa’alɛ ti sɛba n tari giile wan vɔna wuusa yelekirega sore poan. David n yuun yele sɛla la vuurɛ dela Naayinɛ wan soŋɛ sɛba n tari giile bɔ’ɔra tarendoma la. Sodeni poan? David pa’alɛ de vuurɛ yeti: ‘A san bɛ̃’ɛra gã a gɔregɔ zuo, Yehowa wan bisɛ en; Yehowa wan kelum bisera en a bã’a gɔregɔ la zuo.’ (Ym. 41:3) Yelemɛŋɛrɛ, mina n tari giile bɔ’ɔra tarendoma mi ti Naayinɛ tɛ̃ri a yele, a tuunsoma la zuo. Naayinɛ n maalɛ to inya la ti ka tana tibera kamea se’em la zuo, a wan le nyɛ imma’asum.
w17.09-E 12 ¶17
Tɔɣesa Yehowa N Tari Giile Se’em La
La ka nari ti to ti’isa ti ton wan nyɛ nyuurɔ la ma’a n sɔi ti la nara ti to tara giile. Sɛla n pakɛ dela to tɔɣesa ge na’asa Yehowa Naayinɛ n de Mina n tari nɔŋerɛ, la giile la. (Mag. 14:31) A kɔ’ɔn eŋɛ la makesonɛ n di mi’a bo to. To san mɔ ge tɔɣesa en, to wan tara nɔŋerɛ la giile bɔ’ɔra to mabiisi, la to kpɛ’ɛsi.—Ga. 6:10; 1 Yo. 4:16.
Vo’osum Poan Yɛla
it-2-E 16
Yehowa
Baabule la za’a kɔ’ɔn tɔɣera la Yehowa ma’a n tari yɔ’ɔ ti a bisera la yele. Wana basɛ ti Yehowa Naayinɛ puti’irɛ n de a basɛ ti a yu’urɛ la ana zilam la niɛ la peelumi. Bala wan basɛ ti a yu’urɛ la ana fa’a ti nɛreba kan le zɛregera dɛ. Sɛla n gaŋɛ za’a dela, malesi, la asaala woo wan na’asa a zilam yu’urɛ la ti la pa’alɛ ti ba sakɛ la ba suure za’a ti Yehowa ma’a n tari yɔ’ɔ ti a bisera. Ban nɔŋɛ en la zuo, ba wan bɔta ti ba pu’usa en, bɔ’ɔra en gilema ge me tuna sɛla ti a bɔta. David n yuun zusɛ Yehowa se’em ti la bɔna Yooma 40:5-10 la pa’alɛ ti a me yuun iti la bala ge me bɔ’ɔra Yehowa yu’urɛ la gilema. (Dãalɛ tuuntuna Paul n yuun dekɛ Yooma gɔŋɔ la bɔberɛ dena makɛ la Yezu se’em ti la bɔna Heb 10:5-10.)
MAY 27–JUNE 2
NAAYINƐ TUULUM YƐLA | YOOMA 42-44
Nyɛta Nyuurɔ Naayinɛ Pa’alegɔ Poan
w06-E 6/1 9 ¶4
Yooma Gɔŋɔ La Bɔberɛ Buyi Yelekpina
42:4, 5, 11; 43:3-5. Daanse’ere sɛla n eŋɛ ti ho bɔna ho ma’a. Sɛla n wan soŋɛ ti ho ta’an ŋmibera dela ho ti’isa taɣesa hon la mabiisi n daa tari nyɛɛma se’em tansugere la poan. La boi bim ti pɔsega la, bala ta’an basɛ ti ho suure sa’am pa’asɛ ge la wan kelum soŋɛ hɔ ti ho tɛ̃ra ti Naayinɛ n de ho suka zɛ’an ti la nara ti ho basɛ ti a soŋɛ hɔ.
w12-E 1/15 15 ¶2
Zamesa La Pupeelum Ta’an Nyɛ Nyuurɔ
ZUSEGA: Ni deŋɛ nɛŋa zusɛ. (Ym. 42:8) Bem zuo? To san zamesa Baabule la, la pa’asɛ la to pu’usegɔ poan. Bala, la nari ti to zusɛ Yehowa ti a bo to a zilam vo’osum la ti to puti’irɛ ta’an ga’a bɔbeyinɛ. (Lu. 11:13) Barbara n de satiŋa na’am yetɔɣum yalegerɛdaana yeti: “Saŋa woo mam ni kɔ’ɔn zusɛ mɛ ge nyaa zamesɛ Baabule la. Mam san ni eŋɛ bala, la ni kɔ’ɔn ana mam wuu Yehowa n naɛ la mam bɔna ge ti a me nam bo mam iti sɛla la.” To san zusɛ ge nyaa zamesɛ, la ni yu’ɛ la to suure, la to puti’irɛ ti to ta’an bɔkɛ vo’osum poan dia la soŋa soŋa.
w16.09-E 5 ¶11-12
‘Da Basɛ Ti Ho Giila Kɔ’ɔsɛ’
Tiokrasi sukuudoma, Kristakɔma zamesegɔ, laɣesekãra la laɣesebibisi soŋeri to mɛ ti to sakerɛ kpe’em. Kumesegɔ wa kpeŋeri la to inya ti to ta’an lɔɔra vo’osum poan tuuma tuna ge me ta’an tuna Kristakɔma tuuma zo’e zo’e. (Ym. 119:32) Hon wan bɔta ti ho nyɛ nyuurɔ pa’alegɔ ana wa poan yoi?
Yehowa n yuun soŋɛ Israeldoma la ti ba zabɛ nyaŋɛ Amalekdoma, la Etiopiadoma. A me yuun bo Nehemia, la a nɛreba la paŋa ti ba ta’an tum ba mɛa tuuma la ba’asɛ. Naayinɛ wan soŋɛ tomam me ti to ta’an zɛ’a kankaŋi giisegɔ, mɛlesegɔ la putɛyiila poan, la wan eŋɛ se’em ti to ta’an tuna na’am mɔɔlegɔ tuuma la. (1 Pet. 5:10) To kan ɛɛra ti Yehowa soŋɛ tɔ yelekirega sore poan ge to wan tum to paŋa tɛka beene. Ton wan ta’an eŋɛ sɛla dela to kaala Baabule la daarewoo, maasena kena zamesegɔ bakwai woo, ita tomea zamesegɔ, la to deodoma pu’usegɔ ge me kɔ’ɔn zusera Yehowa saŋa woo. To kan makɛ basɛ ti daaŋɔ yɛla, la tuuma ase’a yele pakɛ tɔ gana yelese’a ti Yehowa tara kpɛmesa to giila ge bɔ’ɔra to paŋa la. Ho san bisɛ ti ho ka mɔɔra yele ana poan, zusɛ Yehowa ti a soŋɛ hɔ. Ho wan nyɛ ti a wan bo ho ‘paŋa, la susonɛ ti ho ta’an tum.’ (Flp. 2:13) Ho me wan ta’an eŋɛ la bem soŋɛ nɛreba ti ba giila da kɔ’ɔsɛ?
Vo’osum Poan Yɛla
it-1-E 1242
Sãseŋa
Baabule la poan, ba dekɛ sãseŋa makɛ la yɛla zo’e zo’e. Yob n yuun boi a fabelegɔ poan la, a yuun yeti eŋa ‘nyaa dela sãsi suɔ.’ (Yob 30:29) Ban yuun zabɛ nyaŋɛ Naayinɛ nɛreba la, yuumadaana la yuun dekɛ bala makɛ la sãsi n ni laɣesɛ ɔbera sɛba ti ba ku zaberɛ poan la. (dekɛ makɛ Ym 68:23) A yuun yeti: ‘Ho zã’ɛ tomam ta basɛ la sãsi zɛ’an.’ (Ym 44:19) Babilondoma la n yuun ta kaɛ Yerusalem mum yuun 607 G.Y.B. la, kom n yuun sige tiŋa la poan ti madoma kuura bamea kɔma. Bala ti Yeremia tɔɣɛ de yele yeti, hali sãsi biseri ba kɔma mɛ ge ‘mam nɛreba’ tuni la putotuuma.—Fab 4:3, 10.
JUNE 3-9
NAAYINƐ TUULUM YƐLA | YOOMA 45-47
Naba La Pɔɣedire Yuunɛ
w14-E 2/15 9-10 ¶8-9
Nyɛɛna, Pebila La Pɔɣedire La Zuo!
Kaalɛ Yooma 45:13, 14. Ba tɔɣɛ pɔka wa ti ba wan di en la yele ti a ‘som mɛ paa.’ Liligere 21:2 dekɛ pɔka wa makɛ la tiŋa n de Yerusalem Paalega, ‘ti ba maalɛ en soŋa soŋa ti ba bo a sira.’ Naayinɛ n basɛ ti tiŋa wa n ze’ele saazuo la nyaɣera. Tiŋa wa nyaɣeri ‘wuu tuulum kugere, wuu salenkuga n nyaɣeri’ se’em la. (Lil. 21:10, 11) Liligere gɔŋɔ la n tɔɣɛ pa’alɛ Yerusalem Paalega wa n nyaɣeri se’em. (Lil. 21:18-21) Yuumadaana la tɔɣɛ la sira la eŋa n yeti pɔka wa ‘som mɛ paa’ la! La sirum nari ti ba ta eŋɛ pɔɣedire wa saazuo.
Ba tari pɔka wa, ti ba maasum la wa’ana bo la Pɔɣedita la n de Mɛzaaya la. Mɛzaaya la puɣum maasena pɔka la mɛ, ‘tara yelesum la n ani wuu ko’om la pɛɛra’ en. Pɔka la dela ‘fa’a, ka tara tuure.’ (Ep. 5:26, 27) A pɔɣa wa me kɔ’ɔn baɣɛ la amea soŋa gura dabeserɛ la! ‘A yɛ la salema futo’ la ‘fuo n som paa, ti ba tari en ye’a naba la zɛ’an.’ Ba bo pɔka wa la ‘yɔ’ɔ ti a yɛ fupɛɛlega n ani yili yili ge me nyaɣera, se’ere n sɔi la fupɛɛlega la ze’ele bo la tontɔɔ tuuma ti zilamdoma la tuna la.’—Lil. 19:8.
w22.05-E 17 ¶10-12
Liligere Gɔŋɔ La N Pa’alɛ Ho Beere Sa’am N Wan Ta Ana Se’em
Yehowa wan eŋɛ la wani, se’em ma’a ti tisi la ta naɛ nɔɔrɛ zabera la a nɛreba la? A yeti: ‘Mam sunsɔyiisum wan tuulegɛ.’ (Eze. 38:18, 21-23) Liligere 19 pa’alɛ la sɛla n wan eŋɛ pooren. Yehowa wan tum A Dayɔa ti a gu A nɛreba ge zabɛ nyaŋɛ ba dindoma. Yezu wan naɛ la ‘saazuo pɛɛntɛɛreba la’ n de a yelemɛŋɛrɛ malesi, la 144,000 la zabɛ nyaŋɛ. (Lil. 17:14; 19:11-15) Zaberɛ wa wan ba’asɛ la wani? A wan sa’am tigere woo, la asaala woo n giiseri Yehowa!—Kaalɛ Liligere 19:19-21.
Ti’isɛ bisɛ la wan ta ana nɛresɛba n wan pĩɛ sa’aŋɔ wa se’em! Bisɛ lan wan dɛna pupeelum se’em! La boi bim ti ba san sa’am Babilon Kãtɛ La, malesi la za’a puurɛ wan pee ge pupeelum yele deyima n le bɔna. (Lil. 19:1-3) La dela Liligere gɔŋɔ la ba’asegɔ yele la n de ‘Pebila la pɔɣedire la.’—Lil. 19:6-9.
Sankani ti ba wan eŋɛ pɔɣedire la? La san ta gee fii ti Armagedon zaberɛ la pɔsɛ, nɛreba 144,000 la za’a wan ta bɔna la saazuo. Ge la daɣɛ sankaŋa ti ba wan eŋɛ Pebila la pɔɣedire la. (Kaalɛ Liligere 21:1, 2.) Ba wan eŋɛ Pebila la pɔɣedire la Armagedon zaberɛ la pooren. Sankaŋa la, Naayinɛ dindoma la za’a kan le bɔna.—Ym. 45:3, 4, 13-17.
it-2-E 1169
Zaberɛ
Zaberɛ la san ba’asɛ, suma’asum wan bɔna tingɔŋɔ wa zuo yuun tusere. Yooma gɔŋɔ la yeti: ‘A kɔ’ɔri la tahɔ ge sa’ana kanɛ. A dekɛ la bugum nyɔ̃ soogɛpa zaberɛ toto.’ Yele wa yuun pɔsɛ tum tuuma la se’em ma’a ti Yehowa yuun basɛ ti Israeldoma la tara suma’asum la eŋa n sa’am ba dindoma zaberɛ lɔɣɔrɔ la. Krista san ta sa’am a dindoma za’a Har–Magedon poan, tingole wa za’a wan ta pirɛ la nyɛɛma la suma’asum. (Ym 46:8-10) Sɛba n kure ‘ba su’usi ti la lebege niikɔ̃a ge kure ba kama ti la lebege kɛɛrenɔ,’ la sɛba n ka le ‘zamesa zaberɛ’ la ma’a n wan ta vɔna daarewoo. ‘Pɛɛntɛɛreba Yehowa n yele se’em n bala.’—Isa 2:4; Mik 4:3, 4.
Vo’osum Poan Yɛla
w17.04-E 11 ¶9
Naayinɛ Na’am La Wan Sa’am La Bem?
Bem n wan tee soe tiga se’a n ka tari yelemɛŋɛrɛ la? Armagedon pooren, tigere wan kelum bɔna tingɔŋɔ wa zuo me yoi? Baabule la yeti: ‘Ge tomam guri la sɛla ti Naayinɛ biŋe a nɔɔrɛ ti a eŋɛ la. Sɛla ti a biŋe a nɔɔrɛ ti a eŋɛ la dela a yeti a malum naam la saazuo paalega, la tiŋa wa zuo paalega. Bilam ti tontɔɔ bɔŋa wan bɔna.’ (2 Pet. 3:13) Gɔmɛtdoma za’a, la nɛresɛba n pa ba poore la kan le bɔna. Bem n wan tee soe? ‘Saazuo paalega la’ ze’ele bo la gɔmɛt paalega, ti ‘tinpaalega la’ ze’ele bo nɛresɛba ti gɔmɛt la wan ta bisera ba tingɔŋɔ wa zuo la. Yezu n de Na’am la Naba la wan ta basɛ ti sɛla woo ana ma’a ma’a wuu Yehowa mea n boti se’em la. (1 Ko. 14:33) Sɛla woo wan ta tigese soŋa soŋa ‘tinpaalega’ la poan. Buraasi n kumesɛ n wan ta bisera tɔ. (Ym. 45:16) Krista, la a nabiisi la n de 144,000 la n wan ta pa’ala ba. Ti’isɛ bisɛ la wan ta ana se’em, tingɔŋɔ wa gɔmɛtdoma za’a san kan le bɔna ti Yezu Na’am la ma’a soe bisera tingɔŋɔ wa za’a!
JUNE 10-16
NAAYINƐ TUULUM YƐLA | YOOMA 48-50
Dɔɣereba, Soŋɛ Ya Kɔma Ti Ba Dekɛ Bamea Delum Yehowa Tigere La Malum Pa’asɛ
w22.03-E 22 ¶11
Yelemɛŋɛrɛ Pu’usegɔ Wan Basɛ Ti Ho Pupeelum Malum Pa’asɛ
To pu’useri la Yehowa to san zamesa Baabule la ge tara pa’ala to kɔma. Vo’osego Daarɛ la yuun bo Israeldoma la yɔ’ɔ ti ba dekɛ ba daarewoo tuuma biŋe kinkɛleŋa ge tuna sɛla n wan basɛ ti bamam la Yehowa tara bɔnsoŋa. (Yɛh. 31:16, 17) Sɛba n tari yelemɛŋɛrɛ la yuun ni pa’ala ba kɔma la Yehowa yɛla. Tomam mea nari ti to tiregɛ nyɛ saŋa ta’an kaala ge zamesa Baabule la. Bala pa’asɛ la to pu’usegɔ poan ge me wan soŋɛ tɔ ti to vurege lɛm Yehowa. (Ym. 73:28) To me san naɛ la to deodoma zamesa, to wan ta’an soŋɛ to kɔma ti ba tara bɔnsoŋa la to saazuo Sɔ Yehowa.—Kaalɛ Yooma 48:13.
w11-E 3/15 19 ¶5-7
Sɛla N Sɔi Ti To Tara Pupeelum
‘Kaɛ ya Zion. Kaɛ Zion za’a mum. Kaalɛ a suka zɛ’ɛsi la. Basɛ ti ya sunya bɔna a dangoonkãra la poan. Ya kaara bisera dangoonkãra la woko. Bala ti ya wan ta’an tɔɣɛ de yele bo dɔɣepa’asɛ seto n keni na la.’ (Ym. 48:12, 13) Yuumadaana la yuun kpemese Israeldoma la giila ti ba kaara Yerusalem bisera. Yeen ti’isɛ bisɛ Israeldoma la puurɛ n yuun pee se’em, se’em ma’a ti ba yuun ni kena ba yuunɛ woo de’eŋo la ge nyɛta pu’usegɔ yire la n som se’em la. Nɔkpe’ene kai ti ba yuun ni ‘tɔɣera la de yele bɔ’ɔra dɔɣepa’asɛ seto n keni na la.’
Ti’isɛ Seba pɔɣenaba la yele bisɛ. Pɔka wa n yuun wum Solomon n tari yɛm se’em, la Solomon bisega n ani se’em la, a yuun ka sakɛ ti la dela yelemɛŋɛrɛ. Bem n yuun nyaa basɛ ti a sakɛ ti eŋa n wum yelese’a la dela yelemɛŋɛrɛ? A yeti, ‘Mam daa ka sakɛ bo ban yeti sɛla la san daɣena mam wa’ana ti mam mea nini nyɛ wa.’ (2 Yel. 9:6) Yelemɛŋɛrɛ la dela, ton ni nyɛ sɛla la ‘tomea nini,’ ni kɛ̃ la to suure.
Sodeni poan ti ho wan ta’an soŋɛ ho kɔma ti ba dekɛ ‘bamea nini’ nyɛ Yehowa tigere la n som se’em? Yehowa Sɛɛradoma tigere yile san lɛm yan kɛ̃’ɛri zɛ’an la, tiregɛ keŋɛ ta kaɛ de bisɛ. Makerɛ, Mandy la Bethany n yuun zo’e zɛ’an la, la ba tiŋa Betel yuun zaaɛ la taaba paɛ wuu mɛɛla 900 (km 1,500). Ge la bala za’a, ba dɔɣereba yuun ni mɔɔra mɛ tara ba kena kaara Betel, yele yele wuu se’em ma’a ti ba yuun zɔ’ɔra kura la. Ba yeti, “ge ti to yuun ta kaɛ Betel la, tomam yuun ti’isɛ ti Betel dela zɛ’an n mɔbegeri nɛreba ge ti la me dɛna bunkureba ma’a n tuni bim. Ge ton yuun keŋɛ bim la, to yuun nyɛ la bunbilipaalesi n tuni kpe’eŋo kpe’eŋo bɔ’ɔra Yehowa la pupeelum! To yuun baŋɛ ti Yehowa tigere la yeen daɣɛ la zɛpika la ti tomam yuun kɛ̃’ɛra la ma’a. To yuun san ni keŋɛ Betel, to ni nyɛ la vo’osum poan paŋa pa’asɛ.” Mandy la Bethany n yuun nyɛ Naayinɛ tigere la n som se’em la, la yuun kalum la ba suure ti ba pɔsɛ sore ŋmɛ’a tuuma. Pooren ti ba yi ba ti ba tuna Betel.
w12-E 8/15 12 ¶5
Kɔ’ɔn Pa Na’am La Poore!
Zamesɛ diimi yɛla. Nɛra san bɔta ti a dɛna tiŋa kayima nɛra, la ta’an nara ti a zamesɛ tiŋa la diimi yɛla. Bala mea nɔɔ ti sɛba n boti ba dɛna Naayinɛ Na’am la nɛreba me nara ti ba zamesɛ Na’am la yɛla soŋa soŋa. Geele Kora dayɔɔsi n yuun boi diimi Israel la makesonɛ la bisɛ. Ba yuun nɔŋɛ Yerusalem, la pu’usegɔ yire la mɛ ge me yuun ni tɔɣera tiŋa la diimi yɛla bɔ’ɔra nɛreba. La yuun daɣɛ yire la kuga n yuun basɛ ti ba puurɛ pee ge tiŋa la, la pu’usegɔ yire la n ze’ele bo sɛla la n yuun kɛ̃ ba suure. Yerusalem yuun dela Yehowa n de ‘Nakãtɛ la tiŋa.’ Bilam n yuun de zɛ’an ti nɛreba kena pu’usa Yehowa ge me zamesa A Lɔɔ la. Yehowa yuun tari la nɔŋerɛ bɔ’ɔra Yerusalem Naba n yuun biseri nɛresɛba la. (Kaalɛ Yooma 48:1, 2, 9, 12, 13.) Hon me nɔŋɛ ho zamesa Yehowa tigere la yɛla ge me tɔɣera de yele bɔ’ɔra nɛreba yoi? Ho san mu’ɛ nini zamesa Naayinɛ tigere la yɛla ge baŋɛ Yehowa n soŋeri a nɛreba se’em, ho wan sakɛ bo Naayinɛ Na’am la. Bala me wan basɛ ti ho inya kɔ’ɔn kita ti ho mɔɔlɛ Na’am la yelesoma bo nɛreba.—Yer. 9:24; Lu. 4:43.
Vo’osum Poan Yɛla
it-2-E 805
Taresum
Israel tiŋa la n yuun maali dia soŋa soŋa la zuo, Israeldoma la yuun kɔ’ɔn dita ge nyuura tiɣera mɛ. (1Na 4:20; Pa 5:18, 19) Ba taresum la me yuun te’eli ba mɛ. (Mag 10:15; Pa 7:12) Yehowa yuun boti la Israeldoma la tara pupeelum ba tuuma poan. (dekɛ makɛ Mag 6:6-11; 20:13; 24:33, 34) A me yuun kaɣɛ ba ti ba baŋɛ daaŋɔ se’a n wan paɛ ba, ba san zaɣesɛ eŋa ge tuɣum delum ba taresum la. (Tɛ 8:7-17; Ym 49:6-9; Mag 11:4; 18:10, 11; Yer 9:23, 24) A yuun tĩɛ ba ti taresum kan bɔna wuusa (Mag 23:4, 5), ba kan ta’an dekɛ taresum bo Naayinɛ ti a faaɛ ba kum poan basɛ. (Ym 49:6, 7) Taresum me kan ta’an soŋɛ sɛba n ki la (Ym 49:16, 17; Pa 5:15). A yuun basɛ ti ba baŋɛ ti ba san ba’ɛ nɔŋɛ ligeri, la wan basɛ ti ba tara kinkisum. Bala me wan basɛ ti Yehowa zaɣesɛ ba. (Mag 28:20; dekɛ makɛ Yer 5:26-28; 17:9-11.) La me yuun nari ti ba ‘na’asa Yehowa la ba tuulum lɔɣɔrɔ.’—Mag 3:9.
JUNE 17-23
NAAYINƐ TUULUM YƐLA | YOOMA 51-53
Tiregɛ Eŋɛ Yelese’a N Wan Basɛ Ti Ho Kan Tum Be’em
w19.01-E 15 ¶4-5
Ho Wan Eŋɛ La Wani Ta’an Gu Ho Suure?
Magaha 4:23 n dekɛ ‘suure’ tum tuuma se’em la vuurɛ dela “hon sirum de mina.” (Kaalɛ Yooma 51:6) Suure la ta’an ze’ele bo ton ti’iseri yelese’a, lan ani to se’em, yelese’a n sɔi ti to ita yɛla, la to kɔ̃resi n boi yelese’a poan. La dela ton sirum ani se’em to suuren ge daɣɛ nɛreba n yeen bisa nyɛta to se’em.
Bisɛ imma’asum yɛla n basɛ ti yele wa niɛ peelumi se’em. Yia la, to san wan tara imma’asum, la nari ti to dita dinɔ’ɔma ge me kpɛmesa to giila saŋa woo. Bala mea nɔɔ, to san wan tuulegɛ vo’osum poan, la nari ti to dita soŋa vo’osum poan ge me ita pa’ala ti to tari sakerɛ bɔ’ɔra Yehowa. Bala pa’alɛ ti ho tara hon zameseri sɛla la tuna tuuma ge me tɔɣera ho sakerɛ yɛla. (Arom 10:8-10; Yam. 2:26) Yi’i, bã’a ta’an bɔna to inya poan ge ti to ka mina ge tuɣum ti’isa ti to tari la imma’asum. Ton tuni vo’osum poan tuuma la zuo, to me ta’an ti’isa ti to sakerɛ la kpe’em mɛ ge kunkoma’asum be’ero ta’an bɔna to suuren. (1 Ko. 10:12; Yam. 1:14, 15) La nari ti to tɛ̃ra ti Sitaana boti la to ti’isa wuu eŋa n ti’iseri se’em la. Sodeni poan ti Sitaana ita bala? To me wan eŋɛ la wani gu tomea?
w15-E 6/15 14 ¶5-6
To Ta’an Kelum Ana Kasi
Ninmɔ’ɔrɛ yele deyima ti to wan ta’an eŋɛ pa’alɛ ti to dekɛ tomea delum Yehowa dela to zusɛ en ti a soŋɛ tɔ ti to ta’an zaɣesɛ putɛbe’ero. To san zusɛ Yehowa, a me wan vurege du to. A ni dekɛ la a zilam vo’osum la soŋɛ tɔ ti to ta’an zɛ’a kankaŋi zaɣesɛ putɛbe’ero ge ana kasi. Bala, basɛ ya ti to zusa Naayinɛ saŋa woo ti a soŋɛ tɔ ti to kan ti’isa ti’isegɔ yooro to suuren. (Ym. 19:14) La dela to ni sirege tomea zusɛ en ti a viisɛ to poan nyaa ‘tuure’ bii putɛbe’ero n wan ta’an basɛ ti to tum be’em boi to poan. (Ym. 139:23, 24) Leyɛ’ɛsa, to ni zusɛ Yehowa ti a soŋɛ tɔ ti to ta’an tara to birikinte la kankaŋi, yeledaaŋɔ poan.—Mt. 6:13.
Ban uge to se’em bii yelese’a ti to tabelɛ eŋɛ ta’an basɛ ti to kunkoma’asum kelum bɔna yelese’a ti Yehowa yaɛ la poan. La bala za’a, a wan ta’an soŋɛ tɔ ti to eŋɛ teere la wan eŋɛ se’em ti to ta’an pu’usa en ti a puurɛ pee. Naba David yuun baŋɛ bala mɛ. Se’em ma’a ti a yuun tum pɔɣedisa’aŋɔ la Batseba la, a yuun yele Yehowa yeti: ‘Naam suure se’ere n ka tari dɛɣerɔ eŋɛ n poan ge bo mam tontɔɔ vom sunboolum.’ (Ym. 51:10, 12) Ton de asaaleba la zuo, saŋa ase’a la ta’an ni kpe’em bo to ti to zaɣesɛ be’em ge Yehowa wan soŋɛ tɔ ti to kɔ’ɔn bɔta ti to nana en. Hali putɛbe’ero san nyɛ nyɛɣa to suuren, ti la kpe’em ti to ti’isa soŋa, Yehowa wan soŋɛ tɔ ti to dɔla a nɔya la soŋa soŋa. A wan ta’an gu yelese’a n wan basɛ ti daaŋɔ paɛ tɔ.—Ym. 119:133.
Vo’osum Poan Yɛla
it-1-E 644
Doeg
Doeg dela Edom buuri. Eŋa n yuun de Naba Saul dunkeema nɛŋadaana la yuun dela yɔ’ɔ kãtɛ. (1Sa 21:7; 22:9) La niɛ peelumi ti Doeg yuun dela satina. Daanse’ere la dela pɔtɛ, dɛɣerɔ tuunɛ bii kunkom bã’a zuo ti ba yuun pɛ̃regɛ tari en ta basɛ Nob tiŋa ti a bɔna Naayinɛ nɛŋan. Doeg yuun nyɛ Malema Nɛŋadaana Ahimelek n yuun dekɛ tuulum boroboro, la Goliat su’a la bo David la. Pooren, se’em ma’a ti Saul yuun sɔsera la a yamesi ge yɛta ba ti ba boti la ba kaɛ a poore la, Doeg yuun yele Saul la sɛla woo ti eŋa nyɛ Nob tiŋa. Saul yuun laɣesɛ la malema nɛŋadaana la, la malemadoma la n boi Nob tiŋa la ge soke Ahimelek se’ere n sɔi ti a eŋɛ bala. Bala pooren ti Saul yele a gu’ureba la ti ba ku malemadoma la. Gu’ureba la n zaɣesɛ la, Doeg kɔ’ɔn eŋɛ la kalam ku malemadoma 85, wuu naba la n bo nɔɔrɛ se’em la. Eŋa n ba’asɛ la ti a ku kɔma, la bunkureba, la dusi za’a n boi Nob tiŋa ge sa’am tiŋa la.—1Sa 22:6-20.
Wuu Yooma 52 n pa’alɛ se’em la, David yuun tɔɣɛ Doeg yele yeti: ‘Ho maaseni la sa’aŋɔ. Ho zɛleŋa diti me wuu baraga la. Ho dela pumpɔrema. Ho nɔŋɛ la be’em gana som ge nɔŋɛ pumpɔreŋɔ gana sira. Ho nɔŋɛ la yelese’a n diti sa’ana wuu bugum la. Ho nɔɔrɛ la mi la pumpɔreŋɔ.’—Ym 52:2-4.
JUNE 24-30
NAAYINƐ TUULUM YƐLA | YOOMA 54-56
Naayinɛ Boi Mɛ La Hɔ
w06-E 8/1 22 ¶10-11
Tara Yɛm Ge Zɔta Naayinɛ!
Saŋa kayima, David yuun zɔ ta suɣɛ la Gat tiŋa, Naba Akis zɛ’an. Goliat yuun ze’ele la Filisti tiŋa wa poan. (1 Samuel 21:10-15) Naba wa yamesi la yuun yeti David dela ba tiŋa la dima. David yuun eŋɛ la wani yele wa poan? A yuun yese la a suure za’a zusɛ Yehowa. (Yooma 56:1-4, 11-13) La boi bim ti David yuun eŋɛ amea wuu a zalɛ mɛ ta’an pĩɛ ge a yuun mi ti la dela Yehowa n faaɛ en basɛ yele wa poan. David n yuun kɔ’ɔn yese a suure za’a delum Yehowa ge me tara sakerɛ se’em la pa’alɛ ti a sirum zoti Naayinɛ.—Yooma 34:4-6, 9-11.
Wuu David la, to san zɔta Naayinɛ ge tara sakerɛ a pu’ulumbiŋ’a poan, la wan soŋɛ tɔ ti to ta’an ŋmibera yeledaaŋɔ poan. David yuun yeti: ‘Dekɛ ho yele la bo Naayinɛ. Nam en ge a wan soŋɛ hɔ.’ (Yooma 37:5) Bala ka pa’alɛ ti to yeen yele Yehowa to yeledaaŋɔ la ge zi’a ka ita sɛsɛla de poan ge kɔ’ɔn ɛɛra ti a soŋɛ tɔ. David yuun ka zusɛ ge yeen zi’a. A yuun dekɛ la yɛmsebo ti Yehowa bo en la tum tuuma. David yuun mi ti nɛresaala paŋa ma’a kan ta’an eŋɛ sɛsɛla. Tomam me nari ti to mina bala. To wan tum to paŋa beene ge basɛ sɛla n gee la bo Yehowa. Yelemɛŋɛrɛ, saŋa zo’e zo’e, la ni dɛna la to basɛ sɛla woo bo Yehowa. Sankaŋa ti tomam ayima ayima nara ti to eŋɛ pa’alɛ ti to zoti Yehowa. Bisɛ David n yuun yele sɛla wa n wan ta’an buɣelɛ to suure se’em! A yeti: ‘Sɛba n zoti Yehowa la tari la bɔnsoŋa la en.’—Yooma 25:14.
cl-E 243 ¶9
Sɛsɛla ‘Ka Boi N Wan Ta’an Basɛ Ti Naayinɛ Kan Nɔŋɛ Tɔ’
To san ŋmibera, Yehowa puurɛ ni pee mɛ. (Matu 24:13) Tɛ̃ra ti Sitaana boti la ho basɛ Yehowa pu’usegɔ. Ho san nyaŋɛ tara yelemɛŋɛrɛ bɔ’ɔra Yehowa dabeserɛ woo, ho ni pa’alɛ ti Sitaana dela pumpɔrema. (Magaha 27:11) Saŋa ase’a, ŋmibega ni daɣɛ naana. Bã’asi, nɔŋɔ, putɛyiila la daaŋɔ toseto ta’an ni basɛ ti la kpe’em bo to. Leyɛ’ɛsa, to san tara puti’irɛ ti sɛla wan eŋɛ ge ti la ka eŋɛ, la ni dɛna la giilekɔ’ɔsegɔ paa. (Magaha 13:12) To san ŋmibera daaŋɔ ana za’a poan, Yehowa ni bisɛ ti to dela tuulum nɛreba. Bala n sɔi ti Naba David yele Yehowa yeti a dekɛ eŋa nintam eŋɛ ‘talaŋa’ poan ge le soke yeti: ‘Sɛla woo n iti mam wa ka boi ho gɔŋɔ la poan me yoi?’ (Yooma 56:8) Yelemɛŋɛrɛ, Yehowa san ni bisɛ to nintam, la ton mɛleseri se’em ge kelum tiregera ti to tara yelemɛŋɛrɛ bɔ’ɔra en la, la ni dɛna la tuulum bɔ’ɔra en, ti a kan makɛ tamɛ.
w22.06-E 18 ¶16-17
Nɔŋerɛ Soŋeri To La Wani Ti To Ka Zɔta Dabeem?
Sitaana mi ti to nɔŋɛ vom mɛ. A yuun yeti to wan basɛ sɛla woo ti to tara, hali tomam la Yehowa bɔnsoŋa la to vom wa zuo. (Yob 2:4, 5) Bisɛ Sitaana n tɔɣɛ tue se’em! Leyɛ’ɛsa, Sitaana n de ‘se’em n basɛ ti to kiira’ ge me mina ti to zoti kum la zuo, a tari la kum vũusa tɔ, la wan eŋɛ se’em ti to zaɣesɛ Yehowa. (Heb. 2:14, 15) Saŋa ase’a, Sitaana, la a nɛreba ta’an ni vũusa Yehowa yamesi ti ba wan ku ba, ba san ka basɛ ba sakerɛ la. Saŋa ase’a me, bãyaalega san nyɔkɛ tɔ, Sitaana ni bɔta la a basɛ ti to zaɣesɛ Yehowa nɔɔrɛ. Dɔgetadoma, la to yidoma sɛba n ka pu’useri Yehowa ni bɔta la to galum Yehowa lɔɔ ge to’e ziim. Nɛreba basɛba me ta’an bɔta ti ba basɛ ti to loe tibegɔ seko n ka makɛ la Baabule naresum yɛla.
La boi bim ti to ka boti to ki ge to mi ti to san puɣum ki, Yehowa wan kelum nɔŋɛ tɔ. (Kaalɛ Arom 8:37-39.) Yehowa zɔdoma san ki, a ni tɛ̃ra ba yele mɛ wuu ba kelum vɔna me la. (Lu. 20:37, 38) A me kɔ’ɔn bɔta la a isige ba. (Yob 14:15) Lua bunɔ la dela sanɛ kãtɛ ti Yehowa yɔ, ti to ‘ta’an nyɛ daarewoo nyɔvore.’ (Yon 3:16) To mi Yehowa n nɔŋɛ tɔ ge fabela to yele se’em. To san puɣum bɛ̃’ɛra bii ba yeti ba ku to mɛ, to kan makɛ zaɣesɛ Yehowa. To wan tuɣum zusɛ en ti a bo to yɛm, la paŋa ge basɛ ti la ana to mama. Valérie la a sira yuun eŋɛ la bala.—Ym. 41:3.
Vo’osum Poan Yɛla
it-1-E 857-858
Te’ele Mina, Te’ele Pa’alɛ Beere Yele
Yudas Iskariot n yuun dɔ̃rɛ Yezu se’em la yuun basɛ ti Naayinɛ yetɔɣebiŋ’a n tum tuuma. La me yuun pa’alɛ ti Yehowa, la a Dayɔa la ta’an pa’alɛ beere yɛla. (Ym 41:9; 55:12, 13; 109:8; Tm 1:16-20) Ge bala ka pa’alɛ ti Naayinɛ yuun te’ele mina ti la dela Yudas n wan ta dɔ̃rɛ Yezu. Yetɔɣebiŋ’a la yuun yeti sɛba n doli Yezu la poan ayima n wan dɔ̃rɛ en ge la ka pa’alɛ lan wan dɛna mina wana mɔpi. Leyɛ’ɛsa, Naayinɛ yuun san te’ele mina ti la dela Yudas n wan dɔ̃rɛ Yezu, bala kan makɛ la Baabule naresum yɛla. Tuuntuna Paul pa’alɛ de yele ti: ‘Da kãbelɛ dekɛ ho nu’o paɣelɛ buraa kayima zuo. Ho san eŋɛ bala kalam ge ti a tum be’em, ho nu’o boi bim.’ (1Ti 5:22; dekɛ makɛ 3:6.) Yezu yuun zusɛ Yehowa la yu’uŋɔ za’a ge nyaa loe a podɔleba 12 la. Bala pa’alɛ ti a yuun boti la a dekɛ yɛm tum tuuma ta’an loe soŋa. (Lu 6:12-16) Yehowa yuun san te’ele mina ti Yudas n wan dɔ̃rɛ Yezu, bala kan makɛ la eŋa mea pa’alegɔ. La me wan pa’alɛ ti a nu’o n boi Yudas be’em la poan.
Bala, la niɛ peelumi ti ge ti Yezu nyaa loe Yudas ti a dɛna a podɔla la, sɛla yuun ka boi a suuren n pa’alɛ ti a wan ta dɔ̃rɛ Yezu. Yudas yuun basɛ ti Sitaana n nyaŋɛ en ti a zaɣesɛ Naayinɛ nɔɔrɛ ge nyaa ta dɛna nayiga la kandɔ̃ta. (Heb 12:14, 15; Yon 13:2; Tm 1:24, 25; Yam 1:14, 15; bisɛ JUDAS No. 4.) Yudas halebe’o wa yuun ta paɛ la beense’ere ti Yezu mea yuun nyaa viisɛ a suuren baŋɛ ti eŋa n wan ta dɔ̃rɛ en.—Yon 13:10, 11.