Hon Mi?

Malemadoma la n yuun boi Yerusalem pu’usegɔ yire la poan la san ni kaabɛ dusi la ba’asɛ, ba ni ka’ɛ ziim la basɛ la bɛ?

YUUNƐ woo, diimi Israel malemadoma la yuun ni dekɛ la dusi zo’e zo’e kaabɛ pu’usegɔ yire la poan. Yuun kɔbesɛka n deŋɛ nɛŋa Yudadoma gɔnmi’ila Josephus pa’alɛ ti, ba ni ku la piisi n gaŋɛ 250,000 Azootele de’eŋo dabeserɛ la. Bala la, ziim zo’e zo’e n ni kɔ’ɔn bɔna bimbine la zuo. (Mal. 1:​10, 11; Kan. 28:​16, 19) Ba ni ka’ɛ ziim wa basɛ la bɛ?

Sɛba n tũ’uri tiŋa viisa diimi yɛla nyɛ la gɔta n lɛm pu’usegɔ yire sɛka ti Herod yuun mɛ ti ba nyaa sa’am ku yuun 70 Y.B. la. Ba yuun ka’aseri dusi zo’e zo’e ziim wa basera la gɔta wa poan.

To geele yɛla ayi n yuun basɛ ti kaabegɔ bimbine wa ana filam:

• Yogoro n yuun boi bimbine la pulin: Yudadoma gɔnkɛka n tɔɣeri ba lɔɔ, la malema yɛla ti ba gulesɛ ku ti la gaŋɛ yuun 200 tɔɣɛ pa’alɛ la bala mea nɔɔ. Ku yeti: “Yogoro toyi n yuun boi kaabegɔ bimbine la kinkɛlesi. Dusi ziim la, la ko’om la ti ba yuun ni tara pɛɛra la ni zɔ yibegɛ la yoko la poan nyaa ta sige Kidron Bũ’ɔ la poan.”

  Gɔŋɔ n tɔɣeri pa’ala zina beere wa Yudadoma yɛla yeti sɛba n tũ’uri tiŋa viisa diimi yɛla la me tɔɣɛ la bala mea nɔɔ. Sɛba n tũ’uri tiŋa viisa diimi yɛla la yeti yogoro n yuun sirum boi ti ziim la zɔta dɔla bim.

• Ko’om zo’e zo’e n yuun boi bim: Malemadoma la yuun tari la ko’om zo’e zo’e pɛɛra bimbine la ti ziim la ta’an zɔta sigera yoko la poan soŋa. Ko’om zo’e zo’e n yuun boi tiŋa la poan la zuo, malemadoma la yuun ni nyɛta ko’om mɛ pɛɛra saŋa woo. Ba yuun tũ la lɔɔlesi ti ko’om ta’an zɔta dɔla bim kɛ̃’ɛra pu’usegɔ yire la poan. Ba me yuun tũ la bulisi ge me mɛ sɛla ti ko’om ta’an gã bim. Gɔnmi’ila Joseph Patrich yeti: “Pu’usegɔ yire kana ma’a n yuun tari ko’om zo’e zo’e ge me pɛɛra bimbine la ti kobe’ero la yɛsera soŋa.”