Ho Kum Daarɛ Gulesɛ Mɛ Gã?

Baabule la lebesego

Aayi, ba ka gulesɛ ho kum daarɛ. Baabule la yeti saŋa zo’e zo’e la, ‘yeledi’ima’ n ta’aseri kum ge daɣɛ pa’ala.​​—Pa’ala 9:​11.

Baabule la ka yeti ‘kum saŋa’ boi mɛ la?

Ɛɛ, Pa’ala 3:2 yeti ‘dɔɣum saŋa boi mɛ, ti kum saŋa bɔna. Burega saŋa boi mɛ, ti kɛ’a saŋa bɔna.’ (King James Version) Ge yelesum la n boi Baabule kaalegɔ zɛ’an wa pa’alɛ la vom n pɔseri se’em ge ba’asera se’em. (Pa’ala 3:​1-8) Wuu Naayinɛ n ka pɛ̃regeri kaara ti a buta eŋa n boti dabese’ere la, bala mea nɔɔ ti a ka gulesɛ to kum daarɛ. Lan de se’em dela, to da basɛ ti vom yɛla to’e to saŋa za’a ti to kan tɛ̃ra to Naaŋɔdaana la yele.​​—Pa’ala 3:​11; 12:​1, 13.

Nɛra vom ta’an wɔɣɛ pa’asɛ mɛ

La boi bim ti yɛla ta’an di’i to ge to san kɔ’ɛ to puti’irɛ soŋa yɛla poan to wan ta’an vɔi yue. Baabule la yeti: ‘Yɛmdaana pa’alegɔ tari la vom, ti nɛra wan ta’an pĩɛ kum bɛ̃regɔ poan.’ (Magaha 13:14) Bala mea nɔɔ ti Moses yuun yele Israeldoma la yeti ba san nana Yehowa nɔya la ba wan ‘vɔna yue.’ (Tɛɛnhegɔ 6:2) Ge to san tuna sɛla n ka ani soŋa bii tuna gberetuuma to wan ta’an ki kalam.​​—Pa’ala 7:​17.

To san tara yɛm bii bisera tomea soŋa la se’em mɛ, to kan ta’an pĩɛ kum. (Arom 5:​12) Ge yɛla wan ta tee. Baabule la pu’ulumbiŋe ti saŋa keni na ti ‘kum kan le bɔna.’​​—Liligere 21:4.