Yezu n bã buŋa kɛ̃’ɛra Yerusalem la pupeelum

Messiah Yetɔɣebiŋa La Sirum Eŋɛ Pa’alɛ Ti Yezu N Yuun De Messiah La?

Baabule la lebesego

Ɛɛ. Yezu n yuun boi tingɔŋɔ wa zuo la, ‘Messiah n de nɛŋadaana la’ n wan dɛna “teŋa wa zuo faanra” la yetɔɣebiŋa zo’e zo’e yuun tum tuuma mɛ. (Daniel 9:25; 1 Yon 4:14) Hali Yezu kum pooren, Messiah yetɔɣebiŋa la yuun kelum tuna tuuma mɛ.—Yooma 110:1; Tooma 2:34-36.

**“Messiah” vuurɛ?**

Hebru yelebire Ma·shi’ach (Messiah) la Greek yelebire Khri·stos (Krista) vuurɛ dela “Mina Ti Ba Loe.” Bala, “Yezu Krista” vuurɛ dela “Yezu N De Mina Ti Ba Loe” bii “Yezu N De Messiah La.”

Baabule saŋa la, ba yuun ni ka’ɛ la kaam eŋɛ nɛra zuo pa’alɛ ti ba loe en mɛ ti a tum tuunɛ n boi de toore. (Malema 8:12; 1 Samuel 16:13) Naayinɛ n yuun loe Yezu ti a dɛna Messiah la ge bo en kpe’eŋo zo’e zo’e. (Tooma 2:36) Naayinɛ yuun ka ka’ɛ la kaam eŋɛ Yezu zuo ge a yuun dekɛ la a zilam vo’osum la loe en.—Matu 3:16.

Messiah yetɔɣebiŋa yuun ta’an tum tuuma nɛreba zo’e zo’e poan?

Aayi. Wuu asaala woo nutalɛ n boi tɔka tɔka se’em la, Baabule yetɔɣebiŋa la me yuun tɔɣeri la Messiah bii Krista ayima ma’a yele. Ge Baabule la kaɣɛ tɔ ti “basɛba wan wa’ana parona te bama n de Krista ge nɔtɔgɔha ponpɔrɔŋdoma me wan wa’ana. Ba wan . . . eta yelekerehe te ba ta’an pan’ahɛ la nɛresɛba te Na’ayenɛ loe la, ba han wan nyaŋɛ.”—Matu 24:24.

Messiah la yuun wan ta wa’an la beere sa’am na?

Aayi. Baabule la yuun tɔɣɛ biŋe ti Messiah la wan dɛna la Israel Naba David yaaŋa. (Yooma 89:3, 4) Ge Yudadoma tuusum yɛla n pɔsɛ David saŋa la ka le bɔna. Tuusum yɛla wa yuun sa’am mɛ se’em ma’a ti Aromdoma yuun zabɛ nyaŋɛ Yerusalem yuun 70 Y.B. poan la.a Kɔ’ɔn pɔsɛ sankaŋa la nɛra ka boi n nyaŋɛ pa’alɛ ti eŋa ze’ele la David yizuo la poan. Ge Yezu saŋa la, tuusum yɛla la yuun boi mɛ hali ti a dinedoma la yuun ka nyaŋɛ pa’alɛ ti a daɣɛ David yaaŋa.—Matu 22:41-46.

Messiah yetɔɣebiŋa balɛ n boi Baabule la poan?

To kan ta’an baŋɛ Messiah yetɔɣebiŋa la kãlɛ wana mɔpi. Makerɛ, to kaali yetɔɣebiŋa se’em la boi la to’ore to’ore hali la gulesegɔ se’a ti la niɛ peelum ti la tɔɣeri la Messiah la yele. Gulesegɔ la n boi Isaiah 53:2-7 tɔɣeri la Messiah yetɔɣebiŋa zo’e zo’e yele. Nɛreba basɛba ta’an bisɛ ti gulesegɔ wa za’a dela yetɔɣebiŋere kayima ge ti basɛba me ta’an yeti la dela yetɔɣebiŋa to’ore to’ore.

Messiah yetɔɣebiŋa basɛba n yuun tum tuuma Yezu poan

Yetɔɣebiŋere	La boi la	La tum tuuma se’em
Abraham yaaŋa	Pin’ileŋɔ 22:17, 18	Matu 1:1
Abraham dayɔa Isaak yaaŋa	Pin’ileŋɔ 17:19	Matu 1:2
Ba dɔɣɛ en la Israeldoma la Yuda buuri poan	Pin’ileŋɔ 49:10	Matu 1:1, 3
Ze’ele Naba David tuusum poan	Isaiah 9:7	Matu 1:1
Pɔka n ka mi buraasi n dɔɣɛ en	Isaiah 7:14	Matu 1:18, 22, 23
Ba dɔɣɛ en la Betlehem	Mikah 5:2	Matu 2:1, 5, 6
Ba wan yi’ira en la Imanuelb	Isaiah 7:14	Matu 1:21-23
A dɔɣereba dɛla nasedoma	Isaiah 53:2	Luke 2:7
Ba ku la kɔma a dɔɣum pooren	Yeremia 31:15	Matu 2:16-18
Ba yi en yese la Egypt	Hosea 11:1	Matu 2:13-15
Ba yi’iri en la Nazaret nɛrac	Isaiah 11:1	Matu 2:23
Tuuntuna n deŋɛ a nɛŋa	Malaki 3:1	Matu 11:7-10
*Ba loe en ti a dɛna Messiah* la 29 Y.B. poan**d	Daniel 9:25	Matu 3:13-17
Naayinɛ yuun eŋɛ pa’alɛ ti A Dayɔa n bala	Yooma 2:7	Tooma 13:33, 34
A nɔŋɛ Naayinɛ yire mɛ	Yooma 69:9	Yon 2:13-17
Mɔɔla yelesoma la	Isaiah 61:1	Luke 4:16-21
Mɔɔlɛ Galilee tiŋa poan ti la dɛna nɛɛsum bo ba	Isaiah 9:1, 2	Matu 4:13-16
Tuna tuunkiresi wuu Moses la	Tɛɛnhegɔ 18:15	Tooma 2:22
Wuu Moses la, a tɔɣɛ la Naayinɛ puti’irɛ	Tɛɛnhegɔ 18:18, 19	Yon 12:49
Tibɛ bã’asi zo’e zo’e	Isaiah 53:4	Matu 8:16, 17
A yuun ka boti nɛreba pɛɣera en	Isaiah 42:2	Matu 12:17, 19
Zɔta tarumdoma nimbɔ̃’ɔ	Isaiah 42:3	Matu 12:9-20; Mark 6:34
Pa’alɛ Naayinɛ tontɔɔ gãkerɛ	Isaiah 42:1, 4	Matu 12:17-20
Dɛna Ka’am Kiregadaana	Isaiah 9:6, 7	Yon 6:68
Basɛ ti nɛreba baŋɛ Yehowa yu’urɛ	Yooma 22:22	Yon 17:6
Tara maɣesa pa’ala	Yooma 78:2	Matu 13:34, 35
Dɛna nɛŋadaana	Daniel 9:25	Matu 23:10
Nɛreba zo’e zo’e kan sakɛ bo en	Isaiah 53:1	Yon 12:37, 38
Dɛna kugere n wan pirɛ nɛreba	Isaiah 8:14, 15	Matu 21:42-44
Nɛreba wan zaɣesɛ en	Yooma 118:22, 23	Tooma 4:10, 11
Nɛreba wan yaɛ en	Yooma 69:4	Yon 15:24, 25
Wan bã buŋa kɛ Yerusalem la pupeelum	Zekaria 9:9	Matu 21:4-9
Kɔma wan pɛɣɛ en	Yooma 8:2	Matu 21:15, 16
Wan wa’an la Yehowa yu’urɛ poan	Yooma 118:26	Yon 12:12, 13
A zɔ wan dɔ̃rɛ en	Yooma 41:9	Yon 13:18
Ba wan koose en la sanlenpeela 30e	Zekaria 11:12, 13	Matu 26:14-16; 27:3-10
A zɔdoma yuun basɛ en mɛ	Zekaria 13:7	Matu 26:31, 56
Nɛreba wan parum bo en	Yooma 35:11	Matu 26:59-61
A kan lebese sɛba n parum bo en la	Isaiah 53:7	Matu 27:12-14
Tubesɛ nɔtɔɔrum ma’alɛ en	Isaiah 50:6	Matu 26:67; 27:27, 30
Ba wan ŋmɛ a zuo	Mikah 5:1	Mark 15:19
Ba wan ŋmɛ en	Isaiah 50:6	Yon 19:1
A kan zabɛ la sɛba n ŋmɛ’ɛri en la	Isaiah 50:6	Yon 18:22, 23
Gɔmɛt nɛŋadoma wan siisum bo en	Yooma 2:2	Luke 23:10-12
Ba wan kpa a nu’usi la a nama labelɛ dɔɔ	Yooma 22:16	Matu 27:35; Yon 20:25
Ba wan ŋmɛ gbaŋa tɔ̃rɛ a lɔɣɔrɔ	Yooma 22:18	Yon 19:23, 24
Dekɛ en laɣum la be’emdoma	Isaiah 53:12	Matu 27:38
Kɛsera ge tu’ura en	Yooma 22:7, 8	Matu 27:39-43
Namesɛ be’emdoma zuo	Isaiah 53:5, 6	1 Peter 2:23-25
La wan ana wuu Naayinɛ basɛ en mɛ	Yooma 22:1	Mark 15:34
Ba bo en la kotɛɛregɔ la ya’am ti a nyu	Yooma 69:21	Matu 27:34
Koyuuro wan tara en ge ti a nyaa ki	Yooma 22:15	Yon 19:28, 29
A wan ki	Isaiah 53:12	Mark 15:37
Yɔ lua bunɔ la ta’an yese be’em	Isaiah 53:12	Matu 20:28
Ba kan wɔregɛ a kɔba	Yooma 34:20	Yon 19:31-33, 36
Ba wan lu en	Zekaria 12:10	Yon 19:33-35, 37
Ba wan laaɛ en la buntateba	Isaiah 53:9	Matu 27:57-60
Isige kum poan	Yooma 16:10	Tooma 2:29-31
Ba wan tee mina n dɔ̃rɛ la	Yooma 109:8	Tooma 1:15-20
Zi’a Naayinɛ zuɔ nuo bɔba	Yooma 110:1	Tooma 2:34-36

a McClintock and Strong’s Cyclopedia yeti: “Nɔkpe’ene kai ti Yudadoma yizuto tuusum yɛla la yuun sa’am la Yerusalem sa’aŋɔ la poan ge daɣɛ ba yuun nan ka sa’am tiŋa la.”

b Hebru yu’urɛ Imanuel, vuurɛ n de “Yenɛ n boe la tɔ,” la pa’alɛ la Yezu n de Messiah la tuunɛ n de sɛla. Yezu n yuun wa’an tingɔŋɔ wa zuo na tum tuunse’a la pa’alɛ ti Naayinɛ boi mɛ la A yamesi.—Luke 2:27-32; 7:12-16.

c Yelebire la n de “Nazaret nɛra” ze’ele la Hebru yelebire neʹtser, vuurɛ n de “yile.”

d Ho san bɔta ti ho baŋɛ yelese’a n boi Baabule la poan n pa’alɛ ti Messiah la yuun wa’an la yuun 29 Y.B. poan, bisɛ “How Daniel’s Prophecy Foretells the Messiah’s Arrival.”

e Yetɔbiɣere wa boi la Zekaria gɔŋɔ la poan ge Baabule gɔngulesa Matu yeti, la dela “Yetɔgom sebo te Na’ayenɛ nɔtɔgɔha Yeremia daa tɔgɛ.” (Matu 27:9) Saŋa ase’a Yeremia gɔŋɔ la n yuun deŋɛ nɛŋa Gulesego la bɔberɛ seko ti ba yi’ira ti “Nɔtɔheba la.” (Luke 24:44) La niɛ peelum ti Matu yuun yi gɔnseto woo ti Zekaria pa’asɛ bim la ti “Yeremia” gɔŋɔ.