7 YAKOB
A Yuun Dekɛ La Sukpe’ene Faaɛ A Yire Nɛreba Basɛ
YAKOB n yuun ta kuregɛ la, a yuun yeti eŋa yuuma “ka zo’e” ge ti la me ‘kpe’em’ bo en. (Pin. 47:9) Eŋa n yele sɛla la dela yelemɛŋɛrɛ! Yuuma zo’e zo’e n tole la, a liiberɛ tadaana Esau n yuun boti a ku en ti a zɔ keŋɛ Haran. Yakob n yuun boi Haran la, a suure n yuun kɛ̃ Arakel ti a bɔta ti a di en. Ge Arakel sɔ Laban yuun pã’asɛ Yakob mɛ ge yuun tee basɛ ti a di Lea yia. Bala la, Yakob yuun tari la pɔɣeba bayi. Ba me yuun ni kɔ’ɔn zabera mɛ. Yakob yuun tum la yuuma zo’e zo’e bo Laban ge Laban yuun ni kisena en mɛ ge ka yɔɔra en la nari se’em. Ge la bala za’a, Yakob yuun tari la sukpe’ene, la sakerɛ ge me ŋmibera.
Daarɛ deyima ti Yehowa yele Yakob ti a basɛ Haran tiŋa ge lebe Kanaan. Ge a san eŋɛ bala, yele ta’an paɛ en se’ere n sɔi la Laban tari la punya’anɛ ge me ti’isa ti sɛla woo ti Yakob tara la dela eŋa denɛ. Yakob yuun sɔsɛ mɛ la Lea, la Arakel ge yele ba Yehowa n yele eŋa sɛla. Bala pooren ti Yakob dekɛ a pɔɣeba, la a kɔma keŋɛ ge ka keese Laban. Se’em ma’a ti Laban yuun baŋɛ ti Yakob eŋɛ la bala la, a yuun laɣesɛ la a nɛreba ge tabegɛ ba poore. A yuun ta nyɛ ba mɛ ge zɛregɛ Yakob la eŋa n yuun keŋɛ ge ka keese en la. Hali Laban yuun vuuse Yakob mɛ yeti, “Mam tare paŋa wan ta’an eŋɛ hɔ mam bote se’em.” Ge Yakob yuun dekɛ la sukpe’ene yele Laban yelemɛŋɛrɛ la n de se’em. A yuun yele Laban yeti a ka eŋɛ eŋa soŋa ge me kisum eŋa yuuma zo’e zo’e. Ge la bala za’a, Yakob yuun boti la suma’asum bɔna. Ba yuun biŋe la nɔɔrɛ ti ba wan tara suma’asum la taaba.
Yakob yuun tiregɛ tara la suma’asum la a yire nɛreba sɛba n yuun eŋɛ sunsɔa la en la. A me yuun nyɛ la sukpe’ene ta’an mɛ la maleka.
Ge Yakob yeledaaŋɔ la nan ka ba’asɛ. A suɔ Esau n yuun boi sore tu’usa en. Yuuma zo’e zo’e n tole la, Arebeka n de ba ma la yuun yele Yakob ti a suɔ Esau n boti a ku en. Esau yuun ti’isɛ ti Yakob fã en mɛ la eŋa n yuun to’e kã’a la ba sɔ zɛ’an la. Ge Yakob nyaa boti la eŋa la a suɔ Esau tara suma’asum la taaba. Yakob yuun wum ti buraasi 400 n doli Esau tu’usa eŋa la a deodoma. Baabule la yeti, “Dabeem n kɛn Yakob” ti a yɛm bɔi. Bala la, Yakob yuun dekɛ la bo’olum bo a yamesi ti ba tari ta bo Esau. Ge Yakob yuun ta’an fabela ti bo’olum wa ma’a kan ta’an ma’ɛ Esau suure.
Sɛla n yuun eŋɛ ti la dɛna pakerɛ. Dadendaarɛ yu’uŋɔ la, Yakob nyɛ la saana. Saana wa yuun dela Yehowa maleka. Ti maleka wa la Yakob pɔsɛ mɛɛra. Yakob yuun ti’isɛ ti maleka la wan kã bo en. Bala n yuun kpeŋe Yakob giila ti a mɛ la maleka la yue. La boi bim ti Yakob yuun dela yuun 97 ti maleka la me paŋa gana en ge a yuun kelum kɔ’ɔn mɛɛra mɛ. A yuun mɛ mɛ paa. Hali a yuun kaasɛ mɛ. (Ho. 12:4) Yakob yuun mi ti a san nyɛ kã’a Yehowa zɛ’an, la wan soŋɛ en. Bala zuo la, a yuun tiregɛ mɛ la a paŋa za’a ti a nyɛ kã’a la. Lan yuun ta yilegera la, maleka la yuun yeen kalum la Yakob yeo ti la alegɛ. Ge maleka la yuun yele Yakob la yelesonɛ. A yuun yele Yakob ti a yu’urɛ nyaa wan dɛna la Israel. Yu’urɛ la yuun dela yusonɛ. La vuurɛ dela nɛra n mɛɛri la Naayinɛ. Yu’urɛ la yuun kɔ’ɔn nara mɛ se’ere n sɔi la, Yakob yuun kɔ’ɔn tiregɛ mɛ la a paŋa za’a ti a nyɛ kã’a Yehowa zɛ’an.
Yakob yuun dũ’useri la bala ta paɛ a deodoma la n boi zɛ’an la. Pooren, a yuun nyɛ la Esau, la a nɛreba 400 n boi zazaarɛ kena tu’usa ba. Ti Yakob tole a deodoma la nɛŋan, eŋa a ma’a ti a tu’usɛ Esau la a nɛreba la za’a. Yakob n yuun ta pɔ̃ra Esau la, Yakob yuun kũ’ure tiŋa la sugumnɔɔrɛ buyopɔi ti Esau me zɔta tu’usa en. Ge Esau yuun ka zãli zaberɛ lɔkɔ. A yuun tuɣum zɔ mɛ ta kɔkɛ Yakob! Bamam bayi la yuun kaasɛ mɛ. Yakob n yuun sirege a mea ge dekɛ bo’olum bo Esau la zuo, bala yuun basɛ ti Esau sunsɔa la ma’ɛ mɛ. Daanse’ere, a puurɛ n yuun pee la Yakob n yuun tari sukpe’ene se’em la. Yakob yuun tiregɛ mɛ basɛ ti eŋa la a suɔ la tara suma’asum la taaba.
Yakob yeo n yuun alegɛ la zuo, a yuun dũ’useri la bala ta paɛ a kum. Yeledaaŋɔ zo’e zo’e yuun le paɛ en mɛ. Ge a yuun ka makɛ yeti a daa san baŋɛ ni a kan nana Yehowa bii a mɛ la maleka la. Yuuma zo’e zo’e pooren la, Yehowa n yuun pu’ulum biŋe ti a eŋɛ sɛla bo en la yuun sirum tum tuuma mɛ. A yuun basɛ ti Israel yaasi lebege la tinkãtɛ. (Pin. 28:14) Leyɛ’ɛsa, Baabule la ni yeti Yehowa dela “Yakob Yenɛ.” (Yɛh. 3:6) Yezu Krista mea yuun yi Naayinɛ bala mɛ. Yezu yuun le yeti Yehowa dela “Na’ayenɛ se’em n behere nɛresɛba n vɔe, ge dagɛ nɛresɛba n ki.” (Lu. 20:37, 38) Bala la, Yakob wan isige kum poan beere sa’am, se’ere n sɔi la Yehowa geele en ti a vɔi mɛ. Tinpaalega la poan, a yuuma wan zo’e ka tara kãlɛ ge ti a pupeelum kan tara makerɛ!
Kaalɛ Baabule zɛ’ɛsi wa:
Sɔsɛ ya sokere wa:
Yakob yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Beni n sɔi ti Yehowa yuun basɛ ti Yakob nyɛ bikeema kã’a la ge daɣɛ Esau? (w03-E 10/15 29 ¶2)
2. Yehowa yuun basɛ ti Yakob zaasum nyɛ la bem ge zaaseŋɔ la yuun basɛ ti Yakob tara suure lua la bem poan? (w03-E 10/15 28 ¶3–29 ¶1) Bisɛ foote A
Foote A
3. Beni n sɔi ti Yakob yuun tara sakerɛ ti a wan nyɛ kã’a maleka la zɛ’an? (w03-E 10/15 31 ¶1) Bisɛ foote B
Foote B
4. Se’em ma’a ti Yakob la a deodoma yuun bɔna Kanaan la, a yuun eŋɛ la wani te’ele ba ti tiŋa la nɛreba ka nyaŋɛ pã’asɛ ba? (w95-E 9/15 21 ¶4, tiŋanɔɔrɛ yelesum)
Ti’isɛ Hon Wan Dekɛ Tum Tuuma Se’em
Yakob yuun bisɛ ti la dela a zugbere tuunɛ ti a bisera Laban piisi la za’a soŋa soŋa. (Pin. 31:38-40) Sarɔtuni poan ti keendoma wan ta’an eŋɛ pa’alɛ ti ba biseri Yehowa piisi la n de ba mabiisi la soŋa soŋa? Bisɛ foote D
Foote D
Se’em ma’a ti dabeem yuun tara Yakob la, a yuun zusɛ la Yehowa. (Pin. 32:6-12) Yakob yele la soŋɛ hon la wani ti ho mina hon wan ta’an yele Naayinɛ sɛla ho zusega poan?
Ho wan eŋɛ la wani ta’an tɔɣesa Yakob sukpe’ene la?
Ti’isɛ Taɣesɛ Yehowa Yele
Yakob yele wa pa’alɛ mam ti Yehowa ani la wani?
Yakob yele wa makɛ la Yehowa puti’irɛ la wani?
Yehowa san ta isige Yakob kum poan, mam wan soke en la bem?
Zamesɛ Yɛla Pa’asɛ
To san baŋɛ ti to eŋɛ la sɛla ti la daam to mabia, to wan ta’an tɔɣesɛ Yakob la wani?
Dekɛ Yakob yele la n boi Baabule la poan la pa’alɛ ho deodoma.