10 MOSES
A Yuun Loe La Loesonɛ
LA YUUN daɣɛ Moses mea dɔɣereba n de Hebrudoma la n yuun siɣɛ a yu’urɛ yeti Moses ge la yuun dela Egypt naba poyua la n yuun ugeri en la n siɣɛ en bala. Sɛla n sɔi ti a yuun siɣɛ a yu’urɛ yeti Moses dela, yu’urɛ wa vuurɛ ani wuu dela, “Nɛra Ti Ba Faaɛ En Ko’om Poan.” A me yuun sirum faaɛ Moses la ko’om poan. A yuun ta’an ti’isa ti Moses beere wan ta dɛna nɛrezure Egypt nayire la poan. A puurɛ yuun pee mɛ la eŋa n yuun nyɛ Moses n keŋɛ sukuu kãtɛ Egypt tiŋa la. Baabule la yeti: “Moses daa . . . zamehɛ Egiptdoma etegɔ zan’an” mɛ.
Moses n yuun zo’e nyaa ta dɛna bunbilipaalega la, a yuun kɔ’ɔn bɔna la a to’ore. Baabule la yeti a yuun dela “yamdaana a yetɔgom la a tooma poan.” A yuun ta’an loe ni ti a dɛna buntata bii a nyɛ yu’urɛ bii a dita nyɛlum Egypt tiŋa. Ge Moses yuun mi ti a san ti’isa yele aŋa, a kan ta’an pu’usa Yehowa soŋa. Bala la, Moses yuun nari ti a kɔ’ɛ a puti’irɛ baŋɛ eŋa n wan dekɛ a vom eŋɛ sɛla.
Moses n yuun paɛ yuun 40 la ti a yuun basɛ ti nɛreba baŋɛ eŋa n kɔ’ɛ a puti’irɛ ti a eŋɛ sɛla. Baabule la yeti, “Moses yuun . . . nam Yenɛ mɛ n sɔe te [eŋa n] ta de’a bonkotɛ la, a ka sakɛ te nɛreba yi’ira en Faro pɔyɔa bia, en bote . . . a lagom nameha la Yenɛ nɛreba nyana a nyɛta lɔgɔtonɔ woo n tar[i] be’em ge me ka bɔna wuuha” la. A yuun loe la loesonɛ. Eŋa n yuun kɔ’ɛ a puti’irɛ se’em la pa’alɛ ti a tari la sakerɛ, la sukpe’ene. Ge a yuun tue yɛla ase’a poan mɛ.
Moses yuun mi ti Israeldoma la dela “a sɔɔnrɔ.” A me yuun boti la a soŋɛ a suurɔ la, se’ere n sɔi la ba yuun mɛleseri ba mɛ. Daarɛ deyima ti a yese ti a ta bisɛ ban mɛleseri Israeldoma la se’em. A yuun ta nyɛ la Egypt buraa n ŋmɛ’ɛri Hebru nɛra. Daanse’ere, Egypt nɛra wa yuun dela kpɛ’ɛma. Moses yuun yele Egypt buraa wa ti a basɛ eŋa n iti sɛla la yoi? To ka mi. Ge Baabule la yeti, “Moses behɛ bilam zan’an” mɛ. Daanse’ere a yuun biseri ti a baŋɛ nyaa nɛra boi bilam n wan soŋɛ Israel nɛra la ge a yuun ka nyɛ nɛnɛra. Bala la, Moses yuun eŋɛ la sɛla. A yuun “ko [Egypt] teŋa nɛra la” mɛ. A yuun sirum boti la a ku ni buraa la yoi? Bii a sunsɔa n yuun ba’ɛ nyie ti a ŋmɛ en gaŋɛ ti a ki? Baabule la ka yele to ge Moses yuun nyaa baŋɛ ti a boi la yele poan. Bala zuo la, a yuun suɣɛ mɛ pĩ nɛra la.
Yiimbeere ti a le yese. A yuun nyɛ la Hebrudoma bayi n zaberi, ti a bɔta ti a pɔ̃sɛ ba. Ge ba poan ayima yuun yele la sɛla ti Moses paleŋa ɛ̃kɛ. A yuun yeti: “Ane n bo ho sore te ho behera, ge gankera tomam? Ho yeti ho ko mam me wo hom zam ko [Egypt] nɛra la se’em la?” Bilam bilam ti Moses baŋɛ ti nɛreba baŋɛ yele la, ti dabeem kɛ̃ en.
Yɛla yuun ka keni wuu Moses n yuun ti’iseri se’em la. Moses yuun ti’iseri la bem yele? Baabule la yeti: “Moses n daa eŋɛ bala la a daa tɛn’ɛhe te a mea buuri la wan bɔkɛ te Yenɛ yete a dekɛ la enŋa Moses te a fan ba bahɛ, ge ba daa ka bɔkɛ dena wa.” La ani wuu Moses yuun ti’isɛ ti Naayinɛ n loe eŋa ti a faaɛ Israeldoma la yese Egypt tiŋa ti ba da le dɛna yamesi. Ge Moses yuun ka bɔkɛ ti saŋa la nan ka paɛ ti Yehowa faaɛ Israeldoma la. Moses me yuun ka ti’isɛ ti amea nɛreba wan tara halesɛka ti ba tara la. Israeldoma la yuun ka tɔresɛ Moses wa n de Hebru nɛra ti ba uge en nayire poan la.
Moses wan loe ti a dɛna buntata, tara kpe’eŋo? Bii a wan soŋera la Yehowa nɛreba?
Moses yuun ti’isɛ ti eŋa maasum mɛ ti a faaɛ Yehowa nɛreba Egypt tiŋa ti ba da le dɛna yamesi ge yɛla zo’e zo’e yuun pa’alɛ ti a nan ka maasum. Yehowa yuun mi ti la nari ti a kumesɛ Moses pa’asɛ. Yelemɛŋɛrɛ la dela, a yuun tari la sukpe’ene, tara paŋa ge me tara yɛm “a yetɔgom poan.” Ge a yuun kelum nara ti a tara la halɛ deyima ti Yehowa nɔŋɛ paa, n de sirege n mea. Moses tabelɛ eŋɛ la kãbi kãbi ku Egypt nɛra ti la ka yue ti Faro wum de yele. Faro yuun ka bo Moses yɔ’ɔ ti a tɔɣɛ sɛla n eŋɛ ge a yuun tuɣum ɛɛra ti a ku en mɛ. Bala zuo la, Moses yuun zɔ mɛ yese Egypt tiŋa.
Moses yuun ka mi sɛla n wan paɛ en. A yuun basɛ taresum, la lumta vom, la yu’urɛ ti a yuun tara Egypt tiŋa la mɛ ge zɔ. A yuun nari ti a tara la sukpe’ene paa ta’an basɛ a tiŋa ge keŋɛ Midian tiŋa n zaaɛ la. A yuun kɛ̃’ɛra la tiŋa wa n de kɛ’ɛŋa zɛ’an yuuma zo’e zo’e. A yuun dela, “saana teŋa [la] poan.” A vom wan ana la wani? A wan kelum dɛna nɛra n tari sukpe’ene? A wan tara sirege n mea wuu Yehowa n boti se’em la? To bisɛ ya.
Kaalɛ Baabule zɛ’ɛsi wa:
Sɔsɛ ya sokere wa:
Moses yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Bem diimi yɛla n basɛ ti to baŋɛ ti Israeldoma la yuun sirum dela yamesi bɔna Egypt tiŋa? (w20.03-E 30) Bisɛ foote A
Courtesy Brooklyn Museum, gift of Theodora Wilbour
Foote A: Egypt gɔŋɔ n tari yamesi yu’ura ti Hebrudoma yu’ura n gaŋɛ 40 bɔna bim. Bala pa’alɛ ti Israeldoma yuun sirum dela yamesi bɔna Egypt tiŋa
2. Moses yuun zamesɛ la bem a dɔɣereba zɛ’an? Sodeni poan ti a me yuun “zamehɛ Egiptdoma etegɔ zan’an”? (Tm. 7:22; w02-E 6/15 10 ¶2-5)
3. Egyptdoma yuun ni laɛ kum la wani? La yuun wan ana Egyptdoma la wani, la Moses n yuun ku ba nɛra, suɣɛ pĩ en ge ka maalɛ kum la wuu bamam n maali ba kum se’em la? (it-E “Egypt, Egyptian” ¶28) Bisɛ foote B
Foote B: Egypt nɛra n ki ti ba maalɛ a inya biŋe
4. Moses yuun zɔ keŋɛ la Midian tiŋa. Bem yɛla poan ti Midiandoma, la Israeldoma yuun dɛna buyina? (it-E “Midian” No. 2 ¶1-2)
Ti’isɛ Hon Wan Dekɛ Tum Tuuma Se’em
Moses yele la wan ta’an soŋɛ ho la wani ti ho ta’an di’isa ho sunsɔa?
Bunbilipaalesi wan ta’an tɔɣesɛ Moses la wani ge me ta’an kɔ’ɛ ba puti’irɛ eŋɛ sɛla n ani soŋa? Bisɛ foote D
Foote D
Ho wan eŋɛ la wani ta’an tɔɣesa Moses sukpe’ene la?
Ti’isɛ Taɣesɛ Yehowa Yele
Moses yele wa pa’alɛ mam ti Yehowa ani la wani?
Moses yele wa makɛ la Yehowa puti’irɛ la wani?
Yehowa san ta isige Moses kum poan, mam wan soke en la bem?
Zamesɛ Yɛla Pa’asɛ
Bisɛ hon wan eŋɛ se’em ta’an tɔɣesa Moses n yuun yese a suuren soŋera nɛreba la.
Tɔɣesa Sɛba N Tari Sakerɛ La Ge Daɣɛ Sɛba N Ka Tari Sakerɛ—Moses, Daɣɛ Faro (2:27)
Moses yuun zaɣesɛ la taresum, la wan eŋɛ se’em ti a ta’an pu’usa Yehowa. Yɛm boi bim ti nɛra eŋɛ bala zina beere wa?