11 MOSES
“Keŋɛ Faro Zen’an”
MOSES yuun tee mɛ. Eŋa n yuun yese Egypt tiŋa yuuma zo’e zo’e n wana. La ani wuu a yuun ka le ti’isa ti eŋa n wan faaɛ Israeldoma la yamenɛ poan. Sankaŋa la, a yuun dela yuun 80 ge tara pɔɣa, la kɔma bayi. Yuun 40 ti a yuun sirige amea tuna ge me bisera a dɛɛma piisi Midiandoma tiŋa n ba’ɛ tulegɛ la poan.
Yehowa yuun nyɛ Moses n tee se’em la mɛ. Daarɛ deyima, a yuun basɛ ti Moses nyɛ la bugum n diti tuntuo, Horeb (Sinai) Zoore la tilin. Ge tuntuo la yuun ka diti ba’asera. Moses n yuun paɛ ti a bisɛ la, Yehowa yuun doose la maleka poan tɔɣɛ bo Moses bugum la poan. Naayinɛ yuun yele Moses yeti a lebe Egypt ta faaɛ Eŋa nɛreba la basɛ! Naayinɛ yuun pa’alɛ Moses a zilam yu’urɛ n de Yehowa la vuurɛ mɛ. Naayinɛ yuun yeti: ‘Mam Wan Eŋɛ Mam N Boti N Eŋɛ Sɛla Woo.’ Bala yuun kpemese Moses giila mɛ. Bala la, Yehowa wan ta’an faaɛ a nɛreba la n mɛleseri la basɛ ge me basɛ ti ba ta dɛna tinkãtɛ.
Ge Moses yuun kelum tara la puti’ira ayi ayi. A yuun bisɛ ti eŋa ka kumesɛ ti a ze’ele Faro nɛŋan tɔɣɛ bo en. Yehowa yuun demese Moses mɛ ge bo en paŋa ti a ta’an tum yelekiresi. Baabule la poan, kalam n de zɛsɛka n deŋɛ ti Yehowa basɛ ti nɛra tum yelekiresi. Naayinɛ yuun basɛ ti Moses suɔ Aron n soŋera en ge dɛna a yetɔɣumdaana. Moses yuun nan ka boti a sakɛ tum tuunɛ la ti Naayinɛ dekɛ bo en la ge pooren, a yuun sakɛ mɛ. A yuun nyaa dela se’em ti Yehowa loe en ti a faaɛ A nɛreba la.—Heb. 11:26.
Aron yuun ta seke Moses la Horeb zoore la zuo, ti ba yuun lebe Egypt tiŋa ge nyaa keŋɛ ta nyɛ Faro. Ge ban yuun tɔɣɛ bo Faro ba’asɛ la, a sunsɔa yuun nyie mɛ. Naba wa yuun ka basɛ ti Israeldoma la yese ge a yuun tuɣum basɛ ti ba tuna gana la bala! Bala ti Yehowa nyaa tum Moses ti a lebe Faro zɛ’an ta yele en too sɛka n wan deŋɛ sige ba zuo. Too la yuun sirum sige ba zuo mɛ! Yehowa yuun basɛ ti Nile Kulaa kãtɛ la lebege la ziim ge Faro yuun ka basɛ ti ba keŋɛ. Yehowa yuun kelum tuna Moses mɛ ti a kena Faro zɛ’an ge ni yele en too sɛka n wan le sige ba zuo. Yehowa yuun ni yele Moses ti a “keŋɛ Faro zen’an,” ti a me ni dekɛ sukpe’ene keŋɛ. Ge naba wa n zɛ̃kɛ amea la yuun ka kelese.
Too bunaasi la poan, Yehowa yuun te’ele a nɛreba mɛ ge basɛ ti too la sige Egyptdoma la ma’a zuo ti la wuŋɛ ba. Too la za’a yuun basɛ ti la niɛ peelumi ti Egyptdoma yina, la sɛba n tuni tiim tuuma, la Faro mea ka tari paŋa. Ge Faro suure yuun taɣelum mɛ ti a ka basɛ ti Israeldoma la keŋɛ. Too sɛka n pa’asɛ buwɛi la n yuun sige la, Egyptdoma la n kɛ̃’ɛri zɛ’an la yuun ani la gbareti ge ti Israeldoma la tara niɛsum. Yia la, Faro yuun sakɛ ti a wan basɛ ti ba keŋɛ ge a yuun le tee la a puti’irɛ. A yuun yele Moses yeti a san le nɛ na’arɛ eŋa zɛ’an, a wan ki.
La boi bim ti Faro sunsɔa yuun ni nyie mɛ ge Moses yuun kelum kena a zɛ’an mɛ yɛta en Yehowa n yele sɛla
Too sɛka n pa’asɛ pia la n yuun sige Egyptdoma zuo la, ba dayɔkeema woo, la ba duŋa woo bikeema yuun ki mɛ. Faro dayua me yuun ki mɛ. Yele wa yuun dela nyanɛ bo Faro, ti a nyaa yi Moses ti a wa’ana. Bala la, Yehowa yuun le basɛ ti Moses lebe la Faro zɛ’an. Faro yuun bo Israeldoma la yɔ’ɔ ti ba keŋɛ ge nyaa yele Moses ti a kã bo en. Bala pooren la, Moses yuun ka le makɛ keŋɛ a zɛ’an. Abraham n yuun kɛ̃ Pu’ulumbiŋere Tiŋa la, yuun 430 pooren ti Israeldoma la yuun nyaa ta bɔna fai! Ba yuun ka le dɛna yamesi. Ban yuun yese Egypt tiŋa la, “te nɛresɛba n dagɛ Israel buuri la me zo’e” doose ba keŋɛ. Daanse’ere ba zo’e zo’e yuun dela Egyptdoma. Ge Faro yuun le tee la a puti’irɛ. A yuun laɣesɛ la a soogɛpa zo’e zo’e ge zɔ tabegɛ Israeldoma la!
Moses la Israeldoma la n yuun paɛ Mɔɣɛ Mɔlega la nɔɔren la, la yuun ani wuu ba ka tari ŋmɛregeri zɛ’an. Dabeem n yuun tari Israeldoma la. Bala, Moses yuun zusɛ la Yehowa ti a soŋɛ ba. Yehowa yuun soŋɛ ba mɛ ge tum yelekirega paa bo ba. A yuun ga’ɛ la Mɔɣɛ Mɔlega la ti Israeldoma la nɛ kɛ’ɛŋa yakɛ. Faro n yuun nyɛ ti Israeldoma la tole me la, eŋa la a soogɛpa la yuun zɔ tabegɛ ba mɛ. Ge Israeldoma la n yuun yakɛ ba’asɛ la, Yehowa yuun basɛ mɛ ti ko’om la uruge laɣum taaba di Egypt soogɛpa la za’a. Soogɛpa wa n yuun tari paŋa gana za’a sankaŋa la yuun ki mɛ!
Moses yuun ka makɛ tamɛ yelenyalema wa. A sakerɛ yuun nyaa kpe’em mɛ pa’asɛ. A yuun bisɛ Naayinɛ nɛreba paɛ la yuun 40. A yuun dela yuun 120 ge nyaa ki. Moses yuun eŋɛ pa’alɛ ti a tari la sakerɛ, nɔŋerɛ la sukpe’ene.
Kaalɛ Baabule zɛ’ɛsi wa:
Sɔsɛ ya sokere wa:
Moses yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. To ka mi Faro sɛka n yuun biseri Egypt sankaŋa la yu’urɛ. Egyptdoma gɔŋɔ me ka boi n tɔɣɛ Israeldoma Yɛhega la yele. Ge beni n sɔi ti to wan ta’an sakɛ ti Baabule yele wa dela yelemɛŋɛrɛ? (g04-E 4/8 7 ¶4–9 ¶1)
2. Beni n sɔi ti nɛreba yuun zɔta Faro? (w14-E 4/15 8 ¶1) Bisɛ foote A
PRISMA ARCHIVO/Alamy Stock Photo
Foote A: Faro ayima foote ti ba ŋmɛ eŋɛ lalega zuo
3. Sodeni poan ti Too Pia la yuun pa’alɛ ti Egyptdoma yina la ka tari paŋa? (it-E “Gods and Goddesses” ¶24-26)
4. Bem n pa’alɛ ti Yehowa yuun ga’ɛ la sore yaleŋa Mɔɣɛ Mɔlega la poan ge Israeldoma n yuun yakɛ la kãlɛ yuun ta’an dɛna la wani? (it-E “Exodus” ¶46-51) Bisɛ foote B
Foote B: Ho san ze’a Sinai ateko nɔɔrɛ bɔba, ho nyɛti la Mɔɣɛ Mɔlega la zɛsɛka ti Israeldoma la yuun ta’an doose yakɛ la
Ti’isɛ Hon Wan Dekɛ Tum Tuuma Se’em
Moses makerɛ la wan soŋɛ to la wani, la san ana to wuu to ka kumesɛ ti to tum Yehowa tuuma? (Yɛh. 4:10; 7:6, 7)
Tomam me wan eŋɛ la wani ta’an soŋɛ to mabiisi zina beere wa wuu Aron n yuun soŋɛ Moses se’em ti a tara sukpe’ene tuna la? (Yɛh. 4:14-16) Bisɛ foote D
Foote D
Ho wan eŋɛ la wani ta’an tɔɣesa Moses n yuun tari sukpe’ene se’em la?
Ti’isɛ Taɣesɛ Yehowa Yele
Moses yele wa pa’alɛ mam ti Yehowa ani la wani?
Moses yele wa makɛ la Yehowa puti’irɛ la wani?
Yehowa san ta isige Moses kum poan, mam wan soke en la bem?
Zamesɛ Yɛla Pa’asɛ
Geele Yehowa yu’urɛ la vuurɛ n wan ta’an soŋɛ kɔma ti ba tara sukpe’ene se’em.
Moses n yuun nyɛ yelese’a la yuun soŋɛ en la wani ti a bɔkɛ Yehowa n ani se’em soŋa soŋa?