19 YEFTA LA A POYUA LA
Ba Yuun Tum La Ban Biŋe Nɔɔrɛ Se’em La
ISRAELDOMA yuun le pɔsɛ kãabera la baɣa. Bala zuo ti Yehowa yuun basɛ ti Ammondoma la mugese ba yuun 18. (Ken. 10:8) Pooren, ba yuun sakɛ ti ba tue mɛ, sa’am ba baɣa la ge nyaa le pɔsɛ pu’usa Yehowa. Ge la yuun ka yue ti Ammondoma la laɣesɛ taaba Gilead tiŋa ti ba zabɛ la Israeldoma la.
Gilead tiŋa keendoma la yuun yele la buraa ayima yu’urɛ n de Yefta ti a dɛna ba nɛŋadaana ge tari ba keŋɛ zaberɛ la. Yefta yuun puɣum zɔ yese Gilead mɛ, se’ere n sɔi la a suurɔ basɛba yuun ka iti en soŋa. Ge Yefta yuun ka yeti a suurɔ la n eŋɛ en se’em la zuo a kan soŋɛ nɛreba la. A yuun sakɛ ti a wan lebe ta soŋɛ ba. Yia la, a yuun boti la eŋa la Ammondoma la sɔsɛ bɔkɛ taaba ge da zabɛ. Ammondoma naba la yuun yeti ba fã la eŋa tisi. Bala la, Yefta yuun tum la nɛreba a zɛ’an. Yefta nɛreba la yuun basɛ ti la kɔ’ɔn niɛ peelumi bo naba wa ti tisi la daɣɛ eŋa denɛ. Yefta n tɔɣɛ sɛla la pa’alɛ ti a yuun mi la eŋɛ se’em ti Yehowa dekɛ tisi la eŋɛ Israeldoma nu’usi, la Yehowa n soŋɛ Israeldoma la se’em ti ba zabɛ nyaŋɛ tinse’esi n gilege ba la. Ge Ammondoma naba la yuun ka nam. A yuun kɔ’ɔn bɔta la ba zabɛ!
Yefta n yuun boi bim maasena ti a zabɛ la, Yehowa vo’osum n yuun boi la en. Bala la, Yefta yuun daɣɛ gberego la eŋa n yuun biŋe nɔɔrɛ la Yehowa la. A yuun yele Yehowa yeti: “Ho han seren wan dekɛ Ammondoma wa eŋɛ mam nu’uhen, ge ho han bahɛ te mam nyaŋe Ammondoma ge lɛbera kula la popeelom, te sɛla woo n ze’ele n nayaŋa nɔɔrɛ [yese] na to’ohɛ mam wan dɛna Na’ayenɛ denɛ ge n wan dekɛ kaanbɛ nyɔ’an bo’olom bo ho.”
Yefta yuun boti a yeti eŋa wan sirum dekɛ nɛra kãabɛ? Aayi. Yehowa yuun yele a nɛreba ti ba da kuura nɛreba kãabera, se’ere n sɔi la a yaɛ bala mɛ. (Tɛɛ. 18:10, 12) Bala la, Yefta n yuun yeti se’em woo n yese na yia tu’usɛ en la wan dɛna “Na’ayenɛ denɛ” la pa’alɛ ti nɛrekaŋa wan dekɛ a vom za’a tuna bɔ’ɔra Yehowa. Daanse’ere, nɛra la wan bɔna la suɣerɛ la n boi Silo la tuna. Yefta yuun mi ti la ta’an ta kpe’em bo en ti a tum eŋa n biŋe nɔse’ere la. A yuun tari la bia ayina ma’a n de pugela. La ta’an ta dɛna a bia wa ti a nɔŋɛ la n wan yese yia tu’usɛ en.
Yefta n yuun biŋe nɔɔrɛ la ba’asɛ la ti a keŋɛ zaberɛ la. A yuun dekɛ la sukpe’ene tari a soogɛpa la yese zaberɛ la, ti Yehowa me yuun soŋɛ ba ti ba nyaŋɛ. Ba yuun ku ba dindoma la mɛ ge sa’am Ammondoma tisi 20 ti la ka tana ita.
Yefta n yuun leberi kula la, a puurɛ n yuun pee. Daanse’ere, a yuun kɔ’ɔn ti’isa ti a yameŋa n wan yese yia na tu’usɛ en ge la daɣɛ bala n yuun eŋɛ. A poyua la n yuun tuɣum yese yia na, ŋmɛ’ɛra sinyaɣesi ge wa’ara tu’usa en! Yefta n nyɛ bala la, a suure n sa’am ti a aasum a futo ge kaasɛ yeti: “N pɔyɔa! Ho bahɛ te mam suunre sagom.”
Yefta yuun biŋe la nɔɔrɛ n wan kpe’em bo eŋa la a poyua la ti ba doose
Yefta poyua la yuun mi ti a sɔ n biŋe nɔse’ere la wan basɛ ti eŋa vom tee. A wan tuna bɔ’ɔra Yehowa a vom dabesa za’a. Bala la, a kan ta’an ele, kan benti a dɔɣɛ kɔma. Bala yuun dela susa’aŋɔ yele paa bɔ’ɔra pɔɣesi sankaŋa. Ge pugela wa n tari sukpe’ene la yuun yele a sɔ la yeti: “Ho biŋe la nɔɔrɛ la Na’ayenɛ, yi dekɛ mam tom hom biŋe ho nɔɔrɛ la se’em la.” A yuun yele a sɔ la ti a bo en saŋa fii ti a naɛ la a zɔdoma kele la eŋa n kan ta’an ele bii dɔɣɛ kɔma la.
Yefta poyua la yuun tari la sukpe’ene. A me yuun ka ti’iseri amea ma’a yele. Bala zuo la, yuunɛ woo, Israel pɔɣesa’ara la ni keŋɛ la a zɛ’an ta buɣelɛ a suure ge me pɛ̃ɣɛ en. Ba ni bɔna la en la dabesa anaasi. La yuun dela yɔ’ɔ kãtɛ la eŋa n yuun tuni bɔ’ɔra Yehowa suɣerɛ la poan la. Daanse’ere sankaŋa ti Samuel me yuun boi la bilam. Yefta poyua wa yuun laɣum bisera Samuel ge me kpɛmesa a giila se’em ma’a ti Samuel yuun zɔ’ɔra la yoi? To ka mi ge la me san dɛna bala, pugela wa puurɛ yuun wan pee paa, se’ere n sɔi la a yuun ka tari kɔma. Ton mi sɛla dela, hali la nɛreba basɛba n yuun tuni yalumtuuma suɣerɛ la poan la, Yefta poyua la yuun kelum tara la yelemɛŋɛrɛ bɔ’ɔra Yehowa. (1 Sa. 2:22) A yuun ka laɣum tuna yalumtuuma. Baabule la yeti: “[A] daa ka mi boraahe.”
Tuntuna Paul yuun purɛ Yefta yu’urɛ pa’asɛ sɛba n yuun tari sakerɛ paa la poan mɛ. (Heb. 11:32) Yefta la a poyua la yuun tari la sukpe’ene paa. Yefta yuun zaberi bɔ’ɔra la Naayinɛ nɛreba ge ti a poyua la me yuun soŋɛ en la a suure za’a. Yefta n yuun biŋe nɔɔrɛ la Yehowa la, la boi bim ti la yuun kpe’em mɛ ge eŋa la a poyua la yuun doose de mɛ!
Kaalɛ Baabule zɛ’ɛsi wa:
Sɔsɛ ya sokere wa:
Yefta la a poyua la yuun eŋɛ la wani pa’alɛ ti ba tari sukpe’ene?
Viisɛ Pa’asɛ
1. Bem n pa’alɛ ti Ammondoma la n yuun zaberi la Israeldoma la yuun boti la ba sa’am yelemɛŋɛrɛ pu’usegɔ? (it-E “Jephthah” ¶6) Bisɛ foote A
Foote A: “Te ba vaɛ ba baga la lobe bahɛ, ge [pu’usa Yehowa].”—Ken. 10:16
2. Yefta yuun eŋɛ la bem ti la wɔ̃na la Yakob n yuun eŋɛ sɛla se’em ma’a ti a me yuun biŋe nɔɔrɛ la Yehowa la? (it-E “Jephthah” ¶11)
3. Beni n sɔi ti la yuun kpe’em paa ti Yefta tum eŋa n biŋe nɔɔrɛ se’em la? (w17.04-E 4 ¶6)
4. Ba yuun dɔɣɛ nɔdɛ’ɛsa Samuel la 1180 G.Y.B. bɔba. Bala la, bem n pa’alɛ ti daanse’ere Yefta poyua la n yuun keŋɛ ta tuna suɣerɛ la poan la, Samuel me yuun boi la bilam? (it-E “Jephthah” ¶2; bisɛ daka la zuo n de “Yizuo Nɛŋadoma Saŋa La Ta Paɛ Gãkerɛdoma Saŋa La.”)
Ti’isɛ Hon Wan Dekɛ Tum Tuuma Se’em
Dɔɣereba san tɔɣesa Yefta n yuun tari sukpe’ene se’em la, bala wan soŋɛ ba kɔma la wani?
Israel pɔɣesa’ara la yuun ni keŋɛ la Yefta poyua la zɛ’an ta pɛ̃ɣɛ en ge me kpemese a giila ti a kelum tara sukpe’ene. Kristakɔma wan ta’an tɔɣesa ba la wani zina beere wa? Bisɛ foote B
Foote B
Ho wan eŋɛ la wani ta’an tɔɣesa Yefta la a poyua la sukpe’ene la?
Ti’isɛ Taɣesɛ Yehowa Yele
Yefta la a poyua la yele wa pa’alɛ mam ti Yehowa ani la wani?
Yefta la a poyua la yele wa makɛ la Yehowa puti’irɛ la wani?
Yehowa san ta isige Yefta la a poyua la kum poan, mam wan soke ba la bem?
Zamesɛ Yɛla Pa’asɛ
Yefta poyua la makesonɛ la wan ta’an soŋɛ Kristakɔma n de nɛreyɔna la wani?
Bisɛ Yefta la a poyua la yele la n wan soŋɛ to se’em ti to kɔ’ɔn tara yelemɛŋɛrɛ bɔ’ɔra Yehowa.