Soŋɛ Baabule Zamesegɔdoma Ti Ba Kɔ’ɛ Ba Puti’irɛ Pu’usa Yehowa

1-2. (a) Beni n sɔi ti Baabule zamesegɔdoma basɛba gu’una ka bɔta ti ba kɔ’ɛ ba puti’irɛ pu’usa Yehowa? (b) To wan sɔsɛ la bem zaseŋɔ wa poan?

Yɛla ase’a n yuun basɛ ti hon gu’una ka bɔta ti ho dɛna Yehowa Sɛɛradaana? Daanse’ere dabeem n yuun basɛ ti ho ti’isa ti ho zɔdoma, ho tuuma tadaandoma bii ho deodoma wan daana hɔ. Bii ho yuun ti’isɛ ti ho kan ta’an dɔla Naayinɛ pa’alegɔ la. La yuun san ana ho bala, ho wan bɔkɛ sɛla n sɔi ti ho Baabule zamesegɔdaana la gu’una ka bɔta ti a dɛna Yehowa Sɛɛradaana.

² Yezu yuun bɔkɛ ti yele-aŋa taaba ta’an basɛ ti nɛra kan nyɛta nɛŋa tɔlega yelemɛŋɛrɛ la poan. (Mt. 13:​20-22) A yuun ka gɛ̃ sɛba n yuun gu’uni ti ba doose en la basɛ. Ge a yuun tuɣum pa’alɛ a podɔleba la ban wan eŋɛ se’em ta’an (1) baŋɛ sɛla n gu’uri ba ti ba ka nyɛta nɛŋa tɔlega, (2) tara nɔŋerɛ bɔ’ɔra Yehowa, (3) basɛ ti Yehowa dɛna yia ba vom poan, la (4) pa’ala ba ban wan ta’an ŋmibe yaarɛ poan se’em. To san bɔta ti to soŋɛ to Baabule zamesegɔdoma ti ba sɛ ze’ele kankaŋi yelemɛŋɛrɛ la poan, to wan eŋɛ la wani ta’an tɔɣesa Yezu n yuun pa’alɛ a podɔleba se’em la, to san tara Tara Vom Somɔ Daarewoo! gɔŋɔ la pa’ala ba?

SOŊƐ HO BAABULE ZAMESEGƆDAANA TI A MINA YELESE’A N GU’URI EN TI A KA NYƐTA NƐŊA TƆLEGA

3. Bem n yuun wan ta’an gu Nikodemus ti a kan dɛna Yezu podɔla?

³ Nikodemus yuun dela nɛrezure Yuda tiŋa poan. Ge sɛla n yuun basɛ ti la kpe’em bo en ti a dɔla Yezu. Yezu n yuun pɔsɛ a na’am mɔɔlegɔ tuuma la, ŋmaresi siyoobe pooren ti Nikodemus baŋɛ ti Naayinɛ n tum en. (Yon 3:​1, 2) Ge Nikodemus yuun li’isɛ keŋɛ Yezu zɛ’an la yu’uŋɔ. Beni n sɔi? Se’ere n sɔi la dabeem n yuun tari en la Yudadoma la. (Yon 7:13; 12:42) Daanse’ere a yuun ti’isɛ ti a san dɛna Yezu podɔla, a kan le nyɛ a kpe’eŋo la.a

4. Yezu yuun soŋɛ Nikodemus la wani ti a bɔkɛ Naayinɛ n boti a eŋɛ sɛla?

⁴ Nikodemus yuun mi Lɔɔ la ge la yuun nari ti ba soŋɛ en ti a mina Yehowa n boti a eŋɛ sɛla. Yezu yuun soŋɛ en la wani? Yezu yuun nyɛ la nɛŋa bo Nikodemus hali sɔsɛ la en yu’uŋɔ. Yezu yuun yele Nikodemus eŋa n nari ti a eŋɛ sɛla ta’an dɛna a podɔla. A basɛ a be’em, muse ko’om ge tara sakerɛ bɔ’ɔra Naayinɛ Dayua la.—Yon 3:​5, 14-21.

5. Ho wan eŋɛ la wani soŋɛ ho Baabule zamesegɔdaana ti a mina yelese’a n gu’uri en ti a ka nyɛta nɛŋa tɔlega?

⁵ Hali Baabule zamesegɔdaana san puɣum mina gulesegɔ la soŋa soŋa, la wan nara ti to soŋɛ en ti a mina sɛla n gu’uri en ti a ka nyɛta nɛŋa tɔlega. Makerɛ, la ta’an dɛna ti a dekɛ la saŋa zo’e zo’e yee a tuuma poan bii a yidoma n ka boti a dɛna Yehowa Sɛɛradaana. Wuu Yezu la, nyɛta nɛŋa soŋera ho Baabule zamesegɔdaana la. Ho ta’an beem en ti ya ee zɛ’an zi’ire ge nyɛ sɛla ma’alɛ nɔɔrɛ. Ya san zi’a sɔsera, bala ta’an basɛ ti a yele ho sɛla n daani en. Soŋɛ en ti a baŋɛ eŋa n wan ta’an eŋɛ teere se’a ge me basɛ ti a baŋɛ ti a iti teere wa ti Yehowa puurɛ n pee ge daɣɛ hon.

6. Ho wan eŋɛ la wani ta’an soŋɛ ho Baabule zamesegɔdaana ti a tara eŋa n zameseri sɛla la tuna tuuma? (1 Korint 16:13)

⁶ Ho Baabule zamesegɔdaana san mina ti Yehowa wan soŋɛ en ti a dɔla Baabule pa’alegɔ, bala wan basɛ ti a tara eŋa n zameseri sɛla la tuna tuuma. (Kaalɛ 1 Korint 16:13.) Hon wan soŋɛ en se’em la ta’an ana wuu sukuu tikiya n pa’ali a kɔma se’em la. Ti’isɛ bisɛ sansɛka ti ho yuun kena sukuu la. Tikiya kani ti hon yuun ba’ɛ nɔŋɛ? Daanse’ere ho puurɛ pee la tikiya sɛka n yuun ma’ɛ amea soŋɛ hɔ ti ho mina ti ho wan nyaŋɛ eŋɛ sɛla n nari ti ho eŋɛ. Bala mea nɔɔ, Baabule pa’alegɔdaana ka yeen nara ti a pa’ala a Baabule zamesegɔdaana la sɛla ti Naayinɛ bɔta ma’a ge a wan basɛ ti a Baabule zamesegɔdaana la baŋɛ ti Naayinɛ wan soŋɛ en ti a eŋɛ teere se’a n nari. Ho wan eŋɛ la wani ta’an eŋɛ bala?

SOŊƐ HO BAABULEZAMESEGƆDAANA LA TI A TARA NƆŊERƐ ZO’E ZO’E BƆ’ƆRA YEHOWA

7. Yezu yuun soŋɛ a kɛleseriba la wani ti ba tara nɔŋerɛ zo’e zo’e bɔ’ɔra Yehowa?

⁷ Yezu yuun mi ti a podɔleba la san tara nɔŋerɛ bɔ’ɔra Naayinɛ, la wan basɛ ti ba tara sɛla ti ba zamesa la tuna tuuma. A yuun ni pa’ala a podɔleba la yelese’a n wan basɛ ti ba tara nɔŋerɛ zo’e zo’e bɔ’ɔra ba saazuo Sɔ la. Makerɛ, a yuun dekɛ Yehowa makɛ la buraa n iti som bɔ’ɔra a kɔma. (Mt. 7:​9-11) Nɛresɛba n yuun keleseri Yezu la, basɛba yuun ta’an kan tara sɔ n tari giile. Makɛ bisɛ lan yuun ani Yezu kɛleseriba la se’em eŋa n yuun bo makerɛ pa’ala sɔ n tari giile ge to’e a biyaalega la. Yezu yuun soŋɛ nɛreba ti ba baŋɛ ti Yehowa nɔŋɛ nɛreba mɛ paa ge me bɔta ti a soŋɛ ba.—Lu. 15:​20-24.

8. Ho wan eŋɛ la wani ta’an soŋɛ ho Baabule zamesegɔdaana ti a tara nɔŋerɛ zo’e zo’e bɔ’ɔra Yehowa?

⁸ Hon me wan ta’an soŋɛ ho Baabule zamesegɔdaana ti a tara nɔŋerɛ zo’e zo’e bɔ’ɔra Yehowa doose la hon wan pa’ala en ti a mina Naayinɛ hala la. Zamesegɔ woo poan, soŋɛ ho Baabule zamesegɔdaana la ti a bɔkɛ eŋa n zameseri sɛla la n pa’alɛ Yehowa n nɔŋɛ en se’em. Ho san pa’ala en lua bunɔ la yele, basɛ ti a baŋɛ la yele n pakɛ en se’em. (Arom 5:8; 1 Yo. 4:10) Baabule zamesegɔdaana san bɔkɛ Yehowa n nɔŋɛ en se’em, a me wan nɔŋɛ Yehowa la bala mea nɔɔ.—Ga. 2:20.

9. Bem n yuun soŋɛ Michael ti a tee a vom?

⁹ To geele ya Michael n ze’ele Indonesia yele la bisɛ. Ba yuun uge en la yelemɛŋɛrɛ la poan ge a yuun ka muse ko’om. Eŋa n yuun ta dɛna yuun 18 la ti a loŋe tiŋa ta tukera loore. Pooren ti a yuun ta di pɔɣa, basɛ a deodoma la ge le loŋe tiŋa ta tuna. La yuun ka yue ti a pɔɣa, la a bipugela pɔsɛ zamesa Baabule la ge nyɛta nɛŋa tɔlega. Michael ma n yuun ta ki la, a yuun kule la yire ta bisera a sɔ ge me sakɛ ti ba zamesa en Baabule la. Michael n yuun bisɛ “Viisɛ Pa’asɛ” bɔberɛ la n boi Tara Vom Somɔ Daarewoo! zaseŋɔ 27 la, la yuun kɛ̃ a suure. Michael yuun ti’isɛ la lan yuun ani Yehowa se’em, eŋa n yuun nyɛ ti a Dayua la namesa la, ti a nintam yɛsera. A puurɛ yuun pee mɛ la lua bunɔ la ti a tee ge nyaa muse ko’om.

SOŊƐ HO BAABULE ZAMESEGƆDAANA TI A BASƐ TI YEHOWA DƐNA YIA A VOM POAN

10. Yezu yuun soŋɛ a podɔleba la wani ti ba mina yelese’a n pakɛ paa? (Luke 5:​5-11) (Bisɛ foote la.)

¹⁰ Diimi podɔleba la yuun mi ti Yezu n de pu’ulumbiŋere Mɛzaaya la ge la nari ti ba soŋɛ ba ti basɛ ti na’am mɔɔlegɔ tuuma la dɛna yia ba vom poan. Peter la Andrew yuun puɣum dɛna la Yezu podɔleba eŋa n yuun yeti ba naɛ la en tuna tɛm woo la. (Mt. 4:​18, 19) Bamam la Yames la Yon yuun laɣum nyɔɣera la zim. Ba tuuma la yuun ani la soŋa. (Mr. 1:​16-20) Peter la Andrew n yuun “dekɛ ba yogohe la bahɛ” la, daanse’ere ba yuun maasum mɛ ee sɛla bo ba deodoma ge nyaa dɔla Yezu. Bem n yuun soŋɛ ba ti ba basɛ ti na’am mɔɔlegɔ la yele pakɛ ba gana ligeri? Luke gɔŋɔ la yeti Yezu yuun tum la yelekirega n basɛ ti ba tara sakerɛ ti Yehowa wan diisa ba.—Kaalɛ Luke 5:​5-11.

11. Ho wan eŋɛ la wani dekɛ homea zi’irego poan yɛla kpemese ho Baabule zamesegɔdaana giila ti a sakerɛ kpe’em?

¹¹ To kan nyaŋɛ tum yelekiresi wuu Yezu la ge to wan ta’an tɔɣɛ zi’irego poan yɛla pa’alɛ Yehowa n soŋɛ sɛba n basɛ ti na’am la dɛna yia ba vom poan la. Makerɛ, hon tɛ̃ri Yehowa n yuun soŋɛ ho se’em, se’em ma’a ti ho yuun kena zamesegɔ la? Daanse’ere ho yuun nyɛ la ho tuumadaana la ge tɔɣɛ pa’alɛ en sɛla n sɔi ti ho ka bɔta ti ho tum zɔɛ ti la giŋɛ ho zamesegɔ kenɛ. Tɔɣɛ pa’alɛ ho Baabule zamesegɔdaana la ho sakerɛ n kpe’em se’em la Yehowa n soŋɛ hɔ ti ho dekɛ a pu’usegɔ la deŋɛ nɛŋa la.

12. (a) Beni n sɔi ti la nara ti to ni yele mabiisi to’ore to’ore ti ba doose to keŋɛ ta zamesɛ la nɛra? (b) Ho wan eŋɛ la wani dekɛ vidiyodoma soŋɛ ho Baabule zamesegɔdaana? Bo makerɛ.

¹² Mabiisi me san tɔɣɛ ban eŋɛ teere se’a ta’an dekɛ Yehowa pu’usegɔ deŋɛ nɛŋa bo ho Baabule zamesegɔdaana la, la wan soŋɛ en. Bala la, yele mabiisi to’ore to’ore ti ba doose ho keŋɛ ta zamesɛ la en. Basɛ ti ba tɔɣɛ pa’alɛ ban eŋɛ se’em baŋɛ yelemɛŋɛrɛ la, la ban eŋɛ teere se’a ta’an basɛ ti Yehowa pu’usegɔ dɛna yia. Leyɛ’ɛsa, ɛ saŋa ti hon la ho Baabule zamesegɔdaana la laɣum bisɛ vidiyodoma la n boi “Viisɛ Pa’asɛ” bii “Ɛ Bisɛ” bɔberɛ la n boi Tara Vom Somɔ Daarewoo! gɔŋɔ la poan. To san sɔsera zaseŋɔ 37 ge bisɛ vidiyo la zuo n de Yehowa Wan Basɛ Ti To Nyɛta Sɛla N Pakɛ Tɔ ba’asɛ, tɔɣɛ pa’alɛ Yehowa n wan soŋɛ en se’em a san dekɛ a pu’usegɔ deŋɛ nɛŋa.

SOŊƐ HO BAABULE ZAMESEGƆDAANA TI A TA’AN ŊMIBE YAARƐ POAN

13. Yezu yuun maasum a podɔleba la wani gura yaarɛ?

¹³ Yezu yuun yele a podɔleba la ti nɛreba wan yaɛ ba hali la ba yidoma. (Mt. 5:11; 10:​22, 36) Lan yuun gee fii la Yezu ki la, a yuun yele a podɔleba la ti ban pu’useri Yehowa la zuo, ba ta’an ku ba. (Mt. 24:9; Yon 15:20; 16:2) A yuun yele ba ti ba san bɔna na’am mɔɔlegɔ tuuma la poan, ba bisa bamea soŋa. Makerɛ, a yuun yele ba ti ba da ŋmɛ̃’ɛra nɔkpe’ene la nɛreba. Ba me bisa ba yetɔɣum la ba itigɔ soŋa ta’an kelum mɔɔla.

14. To wan eŋɛ la wani soŋɛ Baabule zamesegɔdaana ti a maasum gura yaarɛ? (2 Timoti 3:12)

¹⁴ Wuu Yezu la, to ta’an tɔɣɛ pa’alɛ to Baabule zamesegɔdaana la sɛla ti a tuuma tadaandoma, a zɔdoma bii a yidoma ta’an tɔɣɛ bii eŋɛ ti la pa’alɛ ti ba yaɛ en mɛ, eŋa n zameseri Baabule la zuo. (Kaalɛ 2 Timoti 3:12.) A tuuma tadaandoma ta’an ita en sia sia, eŋa n tari Baabule pa’alegɔ tuna tuuma la zuo. Hali amea suurɔ ta’an zɛregera en, eŋa n zameseri Baabule la zuo. To san te’ele maasum Baabule zamesegɔdoma la, ba wan ta’an ŋmibe yaarɛ poan.

15. Bem n wan soŋɛ Baabule zamesegɔdaana ti a mina eŋa n wan eŋɛ sɛla a yidoma san yaɛ en?

¹⁵ La san dɛna ti a yidoma n yaɛ en, soŋɛ en ti a baŋɛ sɛla n sɔi ti ba sunsɔa nyie la eŋa la Yehowa Sɛɛradoma n zameseri Baabule la. A yidoma ta’an ti’isa ti Yehowa Sɛɛradoma pã’aseri la nɛreba bii ba dela nɛreyaalesi. Hali Yezu yidoma puurɛ yuun ka pee la eŋa n yuun iti sɛla la. (Mr. 3:21; Yon 7:5) Pa’alɛ ho Baabule zamesegɔdaana la ti a nyɔkera amea ge mina guŋerɛ a san tɔɣera bɔ’ɔra a yidoma bii nɛreba.

16. To wan eŋɛ la wani ta’an soŋɛ to Baabule zamesegɔdaana ti a tɔɣɛ a sakerɛ yɛla?

¹⁶ A yidoma san puɣum bɔta ti ba zamesɛ yɛla pa’asɛ, la ani soŋa ti a da kɔ’ɔn bɔta ti a tɔɣɛ yɛla zo’e zo’e. A san eŋɛ bala, la wan nyuŋe ba ti ba kan le bɔta ti ba naɛ la en sɔsɛ a sakerɛ yɛla la. Bala la, kpemese ho Baabule zamesegɔdaana la giila ti a tɔɣɛ a sakerɛ yɛla fii ti a yidoma wan bɔta ti ba zamesɛ yɛla pa’asɛ pooren. (Kol. 4:6) A ta’an pa’alɛ a yidoma la ti ba keŋɛ jw.org. Bala wan soŋɛ ba ti bamea ta’an zamesɛ Yehowa Sɛɛradoma yɛla pa’asɛ.

17. Ho wan eŋɛ la wani soŋɛ ho Baabule zamesegɔdaana ti a ta’an sɔsɛ la nɛresɛba n tari putɛ̃yooro la Yehowa Sɛɛradoma la? (Bisɛ foote la.)

¹⁷ Ho ta’an keŋɛ jw.org ta dekɛ “Sokese’a Ti Nɛreba Sɔkera” bɔberɛ la pa’alɛ ho Baabule zamesegɔdaana sokese’a ti a yidoma bii a tuumadoma ta’an soke en. (2 Tim. 2:​24, 25) Ya san zamesɛ zaseŋɔ woo ba’asɛ, ni sɔsɛ ya “Nɛreba Basɛba Yeti” bɔberɛ la n boi Tara Vom Somɔ Daarewoo! gɔŋɔ la poan la. Kpemese ho Baabule zamesegɔdaana la giila ti a ni tɔɣɛ eŋa n bɔkɛ yele la se’em. La yele san pakɛ, ho ta’an pa’alɛ en eŋa n wan ta’an lebese ni soŋa se’em. Ho san pa’alɛ en yele ana wa soŋa, a wan ta’an tɔɣɛ po’e a sakerɛ la.

18. Ho wan kpemese ho Baabule zamesegɔdaana giila la wani ti a tɔɣera a sakerɛ yɛla na’am mɔɔlegɔ poan? (Matu 10:27)

¹⁸ Yezu yele a podɔleba la ti ba mɔɔlɛ yelesoma la bo nɛreba. (Kaalɛ Matu 10:27.) Baabule zamesegɔdaana san te’ele tɔɣera a sakerɛ yɛla bɔ’ɔra nɛreba, a wan dekɛ amea delum Yehowa ge baŋɛ eŋa n soŋeri en se’em. Ho wan eŋɛ la wani soŋɛ ho Baabule zamesegɔdaana ti a ta’an eŋɛ bala? Tansugere la san yeti ba keŋɛ zɛ’an ta mɔɔlɛ, kpemese ho Baabule zamesegɔdaana la giila ti a bisɛ eŋa n wan eŋɛ se’em ta’an nyɛ yɔ’ɔ dɛna na’am mɔɔlegɔdaana. Yele en lan wan dɛna naana se’em bo en ti a me mɔɔla sankaŋa. A me ta’an le nyɛ yɔ’ɔ bɔ’ɔra yetɔɣum bakwai la poan zamesegɔ la ti la kumesa en. A san ita bala, a wan mina eŋa n wan tɔɣera a sakerɛ yɛla se’em bɔ’ɔra nɛreba.

TARA PUTI’IRƐ TI HO BAABULE ZAMESEGƆDAANA LA WAN TA’AN EŊƐ SƐLA PEE YEHOWA PUURƐ

19. Yezu yuun eŋɛ la wani pa’alɛ a podɔleba la ti ba wan ta’an eŋɛ sɛla pee Yehowa puurɛ ge to wan ta’an tɔɣesa en la wani?

¹⁹ Yezu n yuun yeti a lebe saazuo la, a yuun yele a podɔleba la ti ba wan ta le naɛ la en bɔna. Ba yuun ka bɔkɛ ti Yezu tɔɣeri la saazuo kenɛ yele. La boi bim ti Yezu podɔleba la yuun ka bɔkɛ sɛla woo ge a yuun mi ti ba boti la ba eŋɛ sɛla pee Yehowa puurɛ. (Yon 14:​1-5, 8) Yezu yuun mi ti la wan yue ge ti ba nyaa bɔkɛ yɛla ase’a n de wuu ba saazuo kenɛ la yele. (Yon 16:12) Wuu Yezu la, tomam me wan eŋɛ pa’alɛ to Baabule zamesegɔdoma la ti to mi ti ba wan ta’an eŋɛ sɛla pee Yehowa puurɛ.

20. Mabipɔka ayima n boi Malawi eŋɛ la bem pa’alɛ ti a Baabule zamesegɔdaana wan ta’an eŋɛ sɛla pee Yehowa puurɛ?

²⁰ To tari puti’irɛ ti to Baabule zamesegɔdaana la boti la a eŋɛ sɛla n ani soŋa. Geele mabipɔka Chifundo n ze’ele Malawi tiŋa yele la bisɛ. A yuun pɔsɛ zamesa la Alinafe Tara Vom Somɔ Daarewoo! gɔŋɔ la. Alinafe keni la Katolik pu’usegɔ. Ban yuun zamesɛ zaseŋɔ 14 ba’asɛ la, Chifundo yuun soke a Baabule zamesegɔdaana la a puti’irɛ n de sɛla la nɛreba n tari wɔ̃sum lɔɣɔrɔ pu’usa la. Alinafe sunsɔa n yuun nyie ti a yeti, “Bala ka pakɛ hɔ!” Chifundo yuun ti’isɛ ti ba zamesegɔ la sa’am mɛ n bala. A yuun di’ise la suure kelum zamesa la Alinafe ge tara puti’irɛ ti a wan ta bɔkɛ. Ŋmaresi fii pooren, ba yuun zameseri la zaseŋɔ 34 ti Chifundo soke en yeti: “Hon zamesɛ Baabule mina yelemɛŋɛrɛ Naayinɛ Yehowa la soŋɛ hon la wani ta paɛ zina?” Chifundo yeti, “Alinafe yuun tɔɣɛ la yelesoma zo’e zo’e ge pa’alɛ ti Yehowa Sɛɛradoma ka iti yelese’a ti Baabule tɔɣɛ giisɛ la.” La yuun ka yue ti Alinafe ka le tara wɔ̃sum lɔɣɔrɔ pu’usa ge nyaa nyɛ yɔ’ɔ ta’an muse ko’om.

21. To wan eŋɛ la wani kpemese Baabule zamesegɔdaana giila ti a kɔ’ɛ a puti’irɛ pu’usa Yehowa?

²¹ La boi bim ti Yehowa n “bahɛ te la yɛhera” ge tomam tari yɔ’ɔ mɛ ti to soŋera Baabule zamesegɔdaana ti a nyɛta nɛŋa tɔlega. (1 Ko. 3:7) To ka yeen pa’ala en la Naayinɛ n boti sɛla ma’a ge to ni soŋɛ en mɛ ti a tara nɔŋerɛ zo’e zo’e bɔ’ɔra Yehowa. To me ni kpemese la a giila ti a eŋɛ pa’alɛ ti a tari nɔŋerɛ zo’e zo’e bɔ’ɔra Yehowa ge basɛ ti Yehowa dɛna yia. To pa’ali en lan nari ti a dekɛ amea delum Yehowa se’em biɣi biɣi poan. To san tara puti’irɛ ti a wan ta’an eŋɛ bala, la wan basɛ ti a ze’a kankaŋi ta’an dɔla Yehowa pa’alegɔ ti yelemɛŋɛrɛ la dɛna a denɛ.