Yob Gɔŋɔ La Wan Ta’an Soŋɛ Tɔ Yeledaaŋɔ San Paɛ Tɔ

1-2. Beni n sɔi ti la ana soŋa ti to kaala Yob gɔŋɔ la?

DABESA ana wa, hon puurɛ pee ya la hon kaalɛ Yob gɔŋɔ la? La boi bim ti ba gulesɛ gɔŋɔ wa ti la paɛ wuu yuun 3,500 n tole ge diimi gɔŋɔ wa laɣum pa’asɛ la gɔnseto n di mi’a tinparɛ wa zuo. Nɛreba pɛ̃ɣeri se’emdaana n gulesɛ gɔnɔ wa la, sɛla n sɔi la yelebɛa se’a n boi bim la bɔkerɛ ka tɔi. Ku me ani la soŋa ge kɛ̃’ɛra suure. Moses n yuun gulesɛ gɔŋɔ wa ge la dela Yehowa n yuun basɛ ti a gulesɛ ku.—2 Tim. 3:16.

² Yob gɔŋɔ la dela tuulum gɔŋɔ n laɣum pa’asɛ Baabule la poan. Bem zuo? Gɔŋɔ la soŋɛ tɔ ti to bɔkɛ ti malesi la nɛresaaleba nari ti ba loe pu’usa Yehowa la ban tari nɔŋerɛ bɔ’ɔra en ge bɔta ti a yu’urɛ la ana zilam la zuo. La me le pa’alɛ tɔ la Yehowa hala la n di mi’a se’em la, n de wuu nɔŋerɛ, yɛm, tontɔɔ gãkerɛ la paŋa. Makerɛ, Yob gɔŋɔ la pa’alɛ ti Yehowa dela “Gaŋɛ Zan’an” daana sugumnɔɔrɛ 31 gana Baabule gɔnseto n gee la za’a. Yob gɔŋɔ la le pa’alɛ sɛla n sɔi ti Naayinɛ bo yɔ’ɔ ti namesegɔ bɔna ge me tara sokese’a n pakɛ nɛresaaleba la lebesego.

3. To san zamesa Yob gɔŋɔ la, la wan soŋɛ to la wani?

³ Wuu nɛra n ni yaɣa zoore zuo ge nyɛta zɛ’an woo soŋa se’em la, bala mea ti Yob gɔŋɔ la soŋera tɔ ti to gɛɛla yeletooro se’a n paari to la wuu Yehowa n geele ba se’em la. Basɛ ya ti to bisɛ Yob gɔŋɔ la n wan soŋɛ tɔ se’em. To wan zamesɛ baŋɛ Israeldoma la n yuun wan nyɛ ni nyuurɔ se’em Yob yele la poan la tomam me n wan nyɛ nyuurɔ se’em zina beere wa. To me wan le zamesɛ baŋɛ ton wan dekɛ Baabule yele wa soŋɛ nɛreba se’em.

NAAYINƐ YUUN BO LA YƆ’Ɔ TI YOB NAMESA

4. Beni n sɔi ti Yob yuun bɔna a to’ore la Israeldoma la n yuun boi Egypt la?

⁴ Se’em ma’a ti Israeldoma la yuun dɛna yamesi Egypt tiŋa la, ti Yob me yuun kɛ̃’ɛri la Uz. Daanse’ere tiŋa wa yuun boi la Pu’ulumbiŋere Tiŋa la zuɔ bɔba, lɛm Arabia saazuo bɔba. Israeldoma la n yuun boi Egypt la, basɛba yuun kaaberi la baɣa ge Yob yuun ka ani bala. A yuun tari la sakerɛ pu’usa Yehowa. (Yos. 24:14; Eze. 20:8) Yehowa yuun tɔɣɛ Yob yele yeti: “Nɛra ka boe teŋparɛ la zuo ana wo enŋa.”a (Yob 1:8) Yob yuun dela buntata ge me tara yu’urɛ. A yuun dela nɛrezure paa Uz tiŋa la poan. (Yob 1:3) Yelemɛŋɛrɛ, Yob yuun tari la sakerɛ pu’usa Yehowa ti nɛreba mina en, bɔ’ɔra en gilema. Sitaana me sunsɔa n yuun nyie la Yob paa!

5. Beni n sɔi ti Yehowa yuun bo yɔ’ɔ ti Yob namesa? (Yob 1:​20-22; 2:​9, 10)

⁵ Sitaana yuun yeti la san wuŋɛ Yob a wan basɛ Yehowa pu’usegɔ. (Yob 1:​7-11; 2:​2-5) Yehowa yuun nɔŋɛ Yob mɛ paa. Ge Yehowa yuun bo Sitaana yɔ’ɔ ti a eŋɛ pa’alɛ nyaa eŋa n tɔɣɛ Yob yele se’em la dela yelemɛŋɛrɛ bii la daɣɛ. (Yob 1:​12-19; 2:​6-8) Sitaana yuun basɛ ti Yob dusi za’a ki mɛ, ti a kɔma pia me ki ge basɛ ti sankana nyɔkɛ Yob kɔ’ɔn ze’ele a zulaa ta paɛ a natala. La boi bim ti Sitaana yuun basɛ ti Yob namesɛ mɛ paa ge Yob yuun kelum tara la sakerɛ pu’usa Yehowa. (Kaalɛ Yob 1:​20-22; 2:​9, 10.) Pooren, Yehowa yuun tibɛ Yob, basɛ ti a le tara ge le basɛ ti a dɔɣɛ kɔma pia ti nɛreba le bɔ’ɔra en gilema. Leyɛ’ɛsa, Yehowa yuun kã bo Yob ti a vɔi paɛ yuun 140. Bala la, Yob yuun nyɛ a yaasi, la a yaanyi’i mɛ. (Yob 42:​10-13, 16) Yehowa yamesi n yuun boi diimi sa la, yuun wan ta’an zamesɛ la bem ge tomam me wan ta’an zamesɛ la bem zina beere wa?

6. Yob yele la yuun wan ta’an soŋɛ Israeldoma la wani? (Bisɛ foote la.)

⁶ Lan yuun wan soŋɛ ni Israeldoma la se’em. Israeldoma yuun namesɛ mɛ Egypt tiŋa. Makerɛ, Yosua la Kaleb yuun dela yamesi ba bunbilimen. Leyɛ‘ɛsa, basɛba tuure zuo ti ba yuun namesɛ yuun 40 pɔɣetia la poan. Israeldoma la yuun san mi ni yeletooro se’a n yuun paɛ Yob ge ti pooren ti a vom yuun tee se’em la, la yuun wan soŋɛ ni bamam la ba kɔma, la ba yaasi. Ba yuun wan baŋɛ ti Sitaana n ta’asɛ ba namesegɔ la. Ba me wan bɔkɛ soŋa soŋa sɛla n sɔi ti Naayinɛ bo yɔ’ɔ ti namesegɔ bɔna. Ba wan le baŋɛ ti Naayinɛ nɔŋɛ sɛba n tari yelemɛŋɛrɛ pu’usa en hali la yeledaaŋɔ poan ge me kã’ara bɔ’ɔra ba.

7-8. Yob gɔŋɔ la wan ta’an soŋɛ sɛba ti namesegɔ paara ba la wani? Bo makerɛ.

⁷ Lan wan soŋɛ to se’em. Nimbaalega la dela, nɛreba zo’e zo’e ka tari sakerɛ bɔ’ɔra Naayinɛ sɛla n sɔi la ba ka bɔkɛ sɛla n ta’asɛ ti be’em paara nɛresondoma. Geele Hazelb n ze’ele Rwanda yele la bisɛ. Eŋa n yuun de bunbilipaalega la, a yuun tari sakerɛ ti Naayinɛ boi. Ge yeletooro zo’e zo’e n yuun paɛ en. A dɔɣereba yuun basɛ taaba mɛ ge ti a ma tee ele. Burakana wa yuun mɛleseri en mɛ. Buraa n yuun le zɛ en. Hazel yuun keni la pu’usegɔ ge a ka nyɛti subuɣelegɔ. Pooren, Hazel yuun tɔɣɛ la a yeledaaŋɔ bo Naayinɛ. A yeti: “Naayinɛ, mam ni zusa la hon, mam kɔ’ɔn tiregera ti n tum la sɛla n ani soŋa ge ho ni dekɛ la be’em lebese yɔ mam. Nananawa, mam yeti n basɛ ho mɛ ge ita sɛla ti n mea bɔta.” To suure sa’am mɛ la nɛreba n ani wuu Hazel, ti nɛreba pã’asɛ ba ti ba ti’isa ti Naayinɛ n ta’asɛ ti ba namesa la!

⁸ Yob gɔŋɔ la basɛ ti to baŋɛ ti la daɣɛ Naayinɛ n basɛ ti to namesa ge la dela Sitaana! To me le zamesɛ baŋɛ ti yeletooro san paara nɛra, la daɣɛ la a tuunbe’ero n ta’asɛ ti a namesa. Baabule la yeti ‘yeledi’ima ta’an paɛ’ nɛra woo. (Pa. 9:11; Yob 4:​1, 8) To me zamesɛ baŋɛ ti to san tara sakerɛ ge ŋmibera yeletooro woo poan to wan basɛ ti Yehowa ta’an lebese Sitaana ɛregerɛ la. Bala wan soŋɛ tɔ ti to ta’an tɔɣɛ po’e Yehowa yu’urɛ la. (Yob 2:3; Mag. 27:11) To ka tari ton zamesɛ sɛla la dɛ’ɛna. Sɛla ti to zamesɛ la n soŋɛ tɔ ti to mina sɛla n sɔi ti namesegɔ paara tɔ. Pooren ti Yehowa Sɛɛradoma yuun zamesɛ Hazel Baabule la, ti a nyaa bɔkɛ ti la daɣɛ Naayinɛ n ta’asɛ ti a namesa. A yeti: “Mam nyaa yuun yese la n suure za’a zusɛ Naayinɛ. Mam yuun yele Yehowa yeti, mam n daa yeti n kan le pu’usa hɔ la, la daɣɛ bala. Mam yuun yeen tɔɣɛ mɛ ge mam yuun ka mi ho soŋa. Nananawa ti mam nyaa bɔkɛ ti Yehowa nɔŋɛ mam. Mam puurɛ nyaa pee mɛ.” Bisɛ to puurɛ n pee se’em la ton mi sɛla n sɔi ti Naayinɛ bo yɔ’ɔ ti namesegɔ bɔna! Nyaa basɛ ya ti to geele ya Yob yele la n wan soŋɛ to se’em yeletooro san paara tɔ.

YOB YELE LA N SOŊERI TO SE’EM TI TO TA’AN ŊMIBERA

9. Yob yuun iti la bem a namesegɔ la poan? (Yames 5:11)

⁹ Ti’isɛ bisɛ ti ho nyɛ la Yob ti a zi’a tampɛɣelum poan, ti a inya za’a puɣelum ti la wuna en. A ingɔŋɔ la yuun sa’am mɛ ge ti a le dɔŋɛ. Yob yuun ka tari paŋa n wan ta’an eŋɛ sɛla. A yuun ni dekɛ la sawɛɛŋa ɛbesa a mɛŋa ge me nyɔna. Yob yuun ka yeen vɔna mɛ ge a yuun ŋmiberi mɛ, tara sakerɛ ge dekɛ a mea delum Yehowa. (Kaalɛ Yames 5:11.) Bem n yuun soŋɛ en ti a ta’an ŋmibera?

10. Yob la Yehowa tiŋasuka yuun ani la wani? Tɔɣɛ pa’alɛ.

¹⁰ Yob yuun tɔɣɛ lan ani en se’em la bo Yehowa. (Yob 10:​1, 2; 16:20) Makerɛ, a zuo 3 la yeti, Yob suure n yuun sa’am ti a tɔɣɛ yeletooro la za’a n paɛ en la ge ti’isa ti Yehowa n ta’asɛ. A zɔdoma batã la yuun yele en ti a be’em la zuo ti Naayinɛ basɛ ti la wuna en bala ge Yob yuun yeti eŋa dela yelemɛŋɛrɛdaana. Saŋa ase’a Yob yuun ni tɔɣɛ ti la ana wuu eŋa dela tontɔɔdaana gana Naayinɛ. (Yob 10:​1-3; 32:​1, 2; 35:​1, 2) Ge Yob le yeti saŋa ase’a eŋa ni tɔɣera la gɔɔn-yetɔɣum sɛla n sɔi la eŋa ni tiregera ti a basɛ ti ba baŋɛ ti a dela yelemɛŋɛrɛdaana. (Yob 6:​3, 26) A zuo 31 la poan, Yob boti la Naayinɛ lebese en yeti, a ka eŋɛ sɛsɛla ti la nara ti Naayinɛ dɔlegɛ a tuberɛ. (Yob 31:35) Yob yuun ka nari ti a soke Naayinɛ baŋɛ sɛla n ta’asɛ ti a namesa.

11. Yob n yuun tɔɣeri a birikinte yele la, Yehowa yuun lebese en la wani?

¹¹ Nananawa ti to nyaa bɔkɛ ti Yob yuun tari la bɔnsoŋa la Yehowa n sɔi ti a yuun tɔɣera bala la ge me tara sakerɛ ti Yehowa wan gãkɛ en soŋa. Yehowa yuun doose la kubesego poan tɔɣɛ bo Yob ge a yuun ka tɔɣɛ nima nima sɛla n ta’asɛ Yob namesegɔ la. A me yuun ka dɔlegɛ Yob tuberɛ la eŋa n yuun tɔɣɛ lan ani en se’em la bii eŋa n yeti a ka tari taalɛ la. Ge Yehowa yuun ka’am en mɛ wuu sɔ n pa’ali a bia se’em la. Lan yuun nari se’em n bala. Bala zuo la, Yob yuun sirege la amea ti la pa’alɛ ti a puɣum ka mina sɛsɛla ge me tee eŋa n tɔɣeri se’em la. (Yob 31:6; 40:​4, 5; 42:​1-6) Yob yele wa yuun wan ta’an soŋɛ ni diimi nɛreba la wani ge la me wan soŋɛ tomam la wani zina beere wa?

12. Yob yele la yuun wan soŋɛ Israeldoma la wani?

¹² Lan yuun wan soŋɛ Israeldoma la se’em. Israeldoma la yuun wan ta’an zamesɛ ni sɛla Yob yele la poan. To geele Moses yele la bisɛ. La yuun daɣɛ naana ti Moses bisera Israeldoma la. Saŋa zo’e zo’e, ba yuun ni ka nam Yehowa bala me yuun ni basɛ ti Moses suure n sa’am. Israeldoma la yuun ni nyɔna la Yehowa la san ni kpe’em bo ba ge Moses yuun ni zusɛ la Yehowa ti a soŋɛ en biɣi biɣi saŋa poan. (Yɛh. 16:​6-8; Kan. 11:​10-14; 14:​1-4, 11; 16:​41, 49; 17:5) Yob yele la yuun wan ta’an soŋɛ Moses se’em ma’a ti Yehowa dɔlegɛ a tuberɛ la. Makerɛ, lan yuun ta gee fii la Israeldoma la kɛ̃ Pu’ulumbiŋere Tiŋa la, Moses sunsɔa yuun nyie mɛ ti a “kanbelɛ tɔgɛ yetɔgom” ge ka pɛ̃ɣɛ Yehowa. (Ym. 106:​32, 33) Bala zuo ti Yehowa ka basɛ ti Moses kɛ̃ Pu’ulumbiŋere Tiŋa la. (Tɛɛ. 32:​50-52) Yehowa n yuun dɔlegɛ Moses tɔberɛ la, la yuun daam Moses mɛ ge a yuun sirege la amea sakɛ. Yob yele wa yuun wan soŋɛ ni ba yaasi ti ba ta’an ŋmibe yeledaaŋɔ se’a n paari ba la. Yehowa yamesi ta’an ti’isa taɣesa Yob yele wa ti la soŋɛ ba ti ba ni yele Yehowa lan ani ba se’em. Ge la me nari ti ba tɛ̃ra ti ba daɣɛ tontɔɔdoma. Leyɛ’ɛsa, la nari ti ba ni sirege bamea kelese Yehowa, a san dɔlegɛ ba tuberɛ.

13. Yob yele la wan soŋɛ to la wani ti to ta’an ŋmibera? (Hebru 10:36)

¹³ Lan wan soŋɛ to se’em. To boi la biɣi biɣi saŋa ti la nara ti to tara sakerɛ ta’an pu’usa Yehowa ta paɛ ba’asegɔ. (Kaalɛ Hebru 10:36.) Daanse’ere to bɛ̃’ɛri mɛ, putɛyiila n tari tɔ bii yeledaaŋɔ n paari tɔ to yire poan. La ta’an dɛna ti to yire nɛra bii to zɔ n ki bii yɛla ase’a n paari tɔ. Saŋa ase’a, nɛreba yetɔɣum bii ba itigɔ ta’an basɛ ti la kpe’em bo to ti to ŋmibera. (Mag. 12:18) Ge Yob yele la basɛ ti to baŋɛ ti to wan ta’an tɔɣɛ to suure yele bo Yehowa ge tara puti’irɛ ti a wan kelese to. (1 Yo. 5:14) Saŋa ase’a, to zusega la san ta ana wuu to ‘tɔɣeri mɛ ge ka ti’isa’ wuu Yob n yuun tɔɣɛ se’em la, Yehowa kan zɛregɛ tɔ. Ge Naayinɛ wan bo to paŋa la yɛm ti to ta’an ŋmibe. (2 Yel. 16:9; Yam. 1:5) La me san nara, a me ta’an le ka’am to wuu eŋa n yuun ka’am Yob se’em la. Yob yele la le pa’alɛ ton wan eŋɛ se’em ta’an ŋmibe se’em ma’a ti Yehowa, A tigere la bii to zɔdoma ka’ana tɔ. (Heb. 12:​5-7) Wuu Yob n yuun sirege amea ge nyɛ nyuurɔ se’em la, bala mea nɔɔ ti tomam me wan nyɛ nyuurɔ tomam me san sakɛ to’e ka’aŋɔ. (2 Ko. 13:11) Bisɛ ton zamesɛ yelese’a Yob gɔŋɔ la poan! Nananawa basɛ ya ti to bisɛ ton wan eŋɛ se’em ta’an dekɛ Yob yele la soŋɛ nɛreba me.

DEKƐ YOB YELE LA SOŊƐ NƐREBA

14. To san bɔna na’am mɔɔlegɔ poan, to wan ta’an tɔɣɛ la bem pa’alɛ nɛreba ti ba bɔkɛ sɛla n sɔi ti namesegɔ bɔna?

¹⁴ Hon tabelɛ bɔna na’am mɔɔlegɔ poan ti nɛra soke ho sɛla n sɔi ti namesegɔ bɔna? Hon daa lebese la wani? Daanse’ere ho daa dekɛ la Baabule la pa’alɛ en sɛla n yuun eŋɛ Eden gaadin la poan. Ho daa ta’an yele en ti Sitaana n de kolekpabɛ’a la n yuun parum bo Adam la Hawa ti ba eŋɛ kpenkpasi la Naayinɛ. (Pin. 3:​1-6) Ho le pa’alɛ en ti Adam la Hawa n yuun eŋɛ kpenkpasi la, bala pooren ti namesegɔ la kum bɔna. (Arom 5:12) Ho nyaa yele en ti Naayinɛ bo la yɔ’ɔ ti nɛresaaleba baŋɛ ti Sitaana dela pumpɔrema ge me basɛ ti nɛreba mɔɔla yelesoma ti beere sa’am, nɛresaaleba wan ta ana kasi. (Lil. 21:​3, 4) Hon yele sɛla wa ani soŋa. La me wan soŋɛ nɛreba zo’e zo’e ti ba bɔkɛ sɛla n sɔi ti namesegɔ bɔna.

15. Nɛra san soke to sɛla n sɔi ti namesegɔ bɔna, to wan ta’an dekɛ Yob yele la soŋɛ en la wani? (Bisɛ fɔɔra la.)

¹⁵ Sore deyima ti to wan ta’an le pa’alɛ nɛreba ti ba bɔkɛ sɛla n sɔi ti namesegɔ bɔna dela to tɔɣɛ Yob yele la bo ba. Ho ta’an pɛ̃ɣɛ nɛra la, la eŋa n soke ti a baŋɛ yele wa la. Nyaa yele en ti nɛresonkɔ ayima yu’urɛ n de Yob yuun soke la sokere wa mea nɔɔ. A yuun ti’isɛ ti Naayinɛ n basɛ ti a namesa. (Yob 7:​17-21) Hon la se’em n sɔseri la puurɛ ta’an pee la eŋa n baŋɛ ti nɛreba tabelɛ soke sokere wa mɛ diimi sa. Ho nyaa ta’an yeti, Yob gɔŋɔ la basɛ ti to baŋɛ ti Sitaana n yuun basɛ ti Yob namesa. Sitaana yuun eŋɛ bala ti a pa’alɛ ti punya’anɛ zuo ti nɛresaaleba pu’usa Naayinɛ. Ho ta’an tɔ̃kɛ yeti, la boi bim ti la daɣɛ Naayinɛ n yuun basɛ ti Yob namesa ge a yuun boti la a eŋɛ pa’alɛ ti nɛresaaleba wan ta’an yese ba suuren pu’usa en ti valum waɛ Sitaana. Ho nyaa ta’an yele en ti pooren, Naayinɛ yuun kã bo Yob mɛ la a birikinte la. Bala la, to wan ta’an buɣelɛ nɛreba suure ti ba bɔkɛ ti la daɣɛ Yehowa n basɛ ti ba namesa.

16. Bo makerɛ pa’alɛ Yob yele la n wan ta’an soŋɛ nɛra n nameseri se’em.

¹⁶ Geele Yob yele la n soŋɛ Mario se’em. Daarɛ deyima yuun 2021 poan ti mabipɔka ayima yuun tara fon dita sɛɛra. A yuun yi la Mario yia. A yuun kaalɛ la Baabule gulesegɔ bo en ge basɛ ti a baŋɛ ti Naayinɛ ka yeen kɛlesa la to zusega ge a pu’ulum la yelesoma biŋe to beere sa’am. A me yuun yele en ti hali nananawa, Naayinɛ keleseri to zusega mɛ. Mabipɔka la yuun soke Mario ti a baŋɛ lan ani en se’em la gulesegɔ la ti ba kaalɛ la. Mario yuun yele en ti, eŋa boi ni bim gulesa la gɔŋɔ ti a bo a deodoma ti eŋa nɔŋɛ ba ge nyaa yeti a ku amea. A le yeti, “Mam sakɛ ti Naayinɛ boi ge mam kɔ’ɔn ti’isa ni ti a tamɛ mam yele mɛ.” Pooren, mabipɔka la yuun le yi en mɛ ti ba sɔsɛ Yob yele la. Mario yuun kɔ’ɛ a puti’irɛ ti a wan kaalɛ Yon gɔŋɔ la za’a. Bala la, to mabipɔka la yuun dekɛ la New World Translation of the Holy Scriptures link bo en. Bem n yuun eŋɛ? Mario yuun sakɛ ti ba zamesɛ en Baabule la ti a baŋɛ Naayinɛ la n nɔŋɛ en ge me ti’isa a yele la soŋa soŋa.

17. Beni n sɔi ti hon puurɛ pee la Yehowa n yuun basɛ ti ba gulesɛ Yob yele la eŋɛ Baabule la poan la? (Yob 34:12)

¹⁷ Yelemɛŋɛrɛ, Baabule la tari pansɛka n wan ta’an tee to vom ge me buɣelɛ sɛba n nameseri la suure. (Heb. 4:12) To puurɛ pee mɛ la Yehowa n yuun basɛ ti ba gulesɛ Yob yele la eŋɛ Baabule la poan ti to kaala la! (Yob 19:​23, 24) Yob gɔŋɔ la basɛ ti to tara suure lua ti “yelemɛŋɛrɛ Yenɛ kan tom be’em.” (Kaalɛ Yob 34:12.) La me pa’alɛ tɔ sɛla n sɔi ti Naayinɛ bo yɔ’ɔ ti namesegɔ bɔna, la ton wan eŋɛ se’em ta’an ŋmibe. To me ta’an dekɛ yele ana buɣelɛ sɛba n nameseri la suure. Zaseŋɔ seko n taɣelɛ la poan, to wan zamesɛ baŋɛ Yob gɔŋɔ la n wan ta’an soŋɛ to se’em to san ka’ana nɛra.