Yob Gɔŋɔ La Wan Ta’an Soŋɛ Tɔ To San Ka’ana Nɛra

1-2. Bem yele n yuun paɛ Yob zɔdoma batã la, la Elihu?

YOB n yuun ta koŋe a taresum la za’a la, nɛreba zo’e zo’e n boi Uz tiŋa, la zɛse’esi n lɛm bim la yuun wum yele wa mɛ. Yob zɔdoma batã n de Elipaz, Bildad, la Zopar n yuun wum sɛla n paɛ Yob la, ba yuun keŋɛ la Uz tiŋa ti ba ta buɣelɛ Yob suure. Ge ban yuun nyɛ sɛla n paɛ Yob la, la yuun daam ba mɛ.

² Ti’isɛ yele wa bisɛ. La yuun wuni Yob mɛ se’ere n sɔi la, sɛla woo ti a yuun tara pĩɛ la a nu’usin. Ba zu la a nii, piisi, yuɣema la bosi zo’e zo’e ti basɛba me ki. Ba ku la a yamesi zo’e zo’e, ti a kɔma me ki. A kɔma la yɛa lui mɛ ti la lebege daboo. Bala za’a pooren la, bã’a n nyaa ŋmɛ Yob. Nɔtɔ n eŋɛ a inya za’a ti la wuna en. A zɔdoma la n yuun paɛ a zɛ’an la, ba nyɛ ti Yob zi la tampɛɣelum zuo ti a suure sa’am. Ba wan eŋɛ la wani? Ba yuun naɛ la Yob zi’a la dabesa ayopɔi ge ka ta’an yele sɛla buɣelɛ buraa wa ti la wuna en la suure. (Yob 2:​12, 13) Saŋa fii poan ti bunbilipaalega ayima yu’urɛ n de Elihu me wa’ana zi’ire lɛm buraasi wa. Yob nyaa pɔsɛ tɔɣera ti ba san ka dɔɣɛ ni eŋa, la sɔ̃i ni. (Yob 3:​1-3, 11) Yele wa niɛ peelumi ti Yob yuun eeri la soŋerɛ! Yob yuun eeri la a zɔdoma wa soŋɛ en. A zɔdoma wa yuun tari yɔ’ɔ ti ba kpemese Yob giila ti la pa’alɛ ti ba fabeli a yele. To bisɛ ban yuun eŋɛ se’em.

3. To wan sɔsɛ la bem zaseŋɔ wa poan?

³ Yehowa yuun basɛ ti Moses gulesɛ yelese’a ti Yob zɔdoma batã la, la Elihu eŋɛ la biŋe mɛ. Daanse’ere ho tɛ̃ri ti Elihu yuun tɔɣɛ la yelese’a ti Yehowa bɔta ti a tɔɣɛ. Ge Elipaz yuun tɔɣɛ la yelese’a ti bunbɛ’a yele en ti a tɔɣɛ. (Yob 4:​12-16; 33:​24, 25) Bala n sɔi ti ho san kaala Yob gɔŋɔ la, ho wan nyɛ ka’aŋɔ se’a n ani soŋa la ka’aŋɔ se’a n ka ani soŋa. To wan sɔsɛ baŋɛ Yob gɔŋɔ la n wan soŋɛ to se’em to san yeti to ka’am nɛra. Yia, to wan geele Yob zɔdoma batã la n yuun eŋɛ sɛla ti la ka ana soŋa. To nyaa wan sɔsɛ Elihu me n yuun eŋɛ sɛla ti la ana soŋa. Yele woo poan, to wan zamesɛ baŋɛ Yob gɔŋɔ la n yuun wan ta’an soŋɛ ni Israeldoma la se’em, la tomam me n wan ta’an zamesɛ sɛla zina beere wa.

YOB ZƆDOMA BATÃ LA N YUUN KA’AM EN SE’EM

4. Beni n sɔi ti Yob zɔdoma batã la yuun ka ta’an buɣelɛ a suure? (Bisɛ foote la.)

⁴ Baabule la yeti Yob zɔdoma batã la n yuun wum yelese’a n paɛ Yob la, ba yuun keŋɛ ti ba “ta pan’ahɛ, ge bogelɛ ba zɔ Yob suunre.” (Yob 2:11) Ge ba yuun ka buɣelɛ Yob suure la fii me. Beni n sɔi? Yɛla atã wa n pa’alɛ bala. Yia, ba yuun ka ma’ɛ bamea kelese Yob ta’an bɔkɛ a bɔŋa la n ani se’em. Makerɛ, ba yuun ti’isɛ ti Yob tue la Yehowa ti a dɔlegera a tuberɛ.a (Yob 4:7; 11:14) N yi’i, la boi bim ti yɛm yuun boi ba yetɔɣum la poan ge la yuun ka soŋɛ Yob. (Yob 13:12) Ba me yuun tɔɣɛ zɛregɛ Yob mɛ ti la daam en. Makerɛ, sugumnɔɔrɛ buyi ti Bildad yele Yob ti a ba’ɛ tɔɣera zɔ’ɔra mɛ. (Yob 8:2; 18:2) Saŋa ase’a me, buraasi wa ni tɔɣera la yetɔɣepɔ̃’ɔsa. Makerɛ, Zopar yuun yele Yob ti a dela “gerego.” (Yob 11:12) N tã’a, la boi bim ti ba yuun ka tãseri Yob ge ban yuun tɔɣɛ yele la se’em la yuun basɛ ti Yob ti’isa ti eŋa tum la be’em. (Yob 15:​7-11) A zɔdoma wa yuun kɔ’ɔn tiregera mɛ ti ba basɛ ti Yob baŋɛ ti a tum la be’em. Ba me yuun ka buɣelɛ a suure bii kpemese a giila.

5. Elipaz, Bildad la Zopar n yuun tɔɣɛ sɛla la yuun basɛ ti la ana Yob la wani?

⁵ Se’em ma’a ti Elipaz, Bildad la Zopar yuun tɔɣɛ ba’asɛ la, Yob suure yuun sa’am mɛ gaŋɛ lan yuun puɣum ana en se’em la. (Yob 19:2) Ban yuun zɛregɛ en ti a tum la be’em la n sɔi ti a yuun bɔta ti a tɔɣɛ po’e amea. To nyaa bɔkɛ sɛla n sɔi ti Yob yuun kɔ’ɔn mu’ɛ nini bɔta ti a tɔɣɛ pa’alɛ ti eŋa dela tontɔɔdaana, la sɛla n sɔi ti a yuun tɔɣɛ yelese’a n ka nari ni ti a tɔɣɛ la. (Yob 6:​3, 26) Yob zɔdoma batã la n yuun tɔɣɛ yelese’a la daɣɛ Yehowa puti’irɛ. Ba me yuun ka tari Yob giile. Bala zuo la, Sitaana yuun doose la ba poan kɔ’ɔsɛ Yob giila. (Yob 2:​4, 6) Yele wa yuun wan ta’an soŋɛ Israeldoma la wani ge la me wan ta’an soŋɛ tomam me la wani zina beere wa?

6. Israel keendoma la yuun wan ta’an zamesɛ la bem yele Yob zɔdoma batã la zɛ’an?

⁶ Lan yuun wan soŋɛ Israeldoma la se’em. Yehowa n yuun dekɛ a lɔɔ la bo Israeldoma la, a yuun loe la keendoma ti ba gãkera a nɛreba ge me soŋɛ ba ti ba ta’an dɔla a lɔɔ la. (Tɛɛ. 1:​15-18; 27:1) Keendoma wa yuun nari ti ba ni kelese soŋa ge ta’an ka’am bii gãkɛ nɛreba la. (2 Yel. 19:6) Ba me yuun nari ti ba soke baŋɛ yɛla ge daɣɛ ba ti’isa ti bamam mi yɛla la za’a. (Tɛɛ. 19:18) Keendoma wa yuun nari ti ba tɔɣera bãla bãla bɔ’ɔra sɛba n eeri soŋerɛ la. Beni n sɔi? Se’ere n sɔi la, ho san tãsera nɛra, daanse’ere a kan tɔɣɛ sɛla n boi a suuren. (Yɛh. 22:​22-24) Yele ana wa ti Israel keendoma la yuun nara ti ba zamesɛ Yob yele la poan.

7. Bani n yuun wan ta’an le ka’am nɛra ge Yob yele la yuun wan ta’an soŋɛ ba la wani? (Magaha 27:9)

⁷ Yelemɛŋɛrɛ, daɣɛ Israel keendoma la ma’a n yuun wan ta’an ka’am nɛra. Israel nɛra woo, a de bia bii bunkutɛ woo, a de pɔka bii buraa woo, a wan ta’an ka’am se’em woo n eeri soŋerɛ ti a ta’an pu’usa Naayinɛ soŋa ge me tara halesoma. (Ym. 141:5) Zɔsonɔ kɔ’ɔn tiregera mɛ ti ba ta’an ka’ana taaba soŋa. (Kaalɛ Magaha 27:9.) Israeldoma la san tiɛ ni Elipaz, Bildad la Zopar n yuun tɔɣɛ sɛla bo Yob la, ba wan baŋɛ ni yelese’a n ka nari ti ba tɔɣɛ la ban ka nari ti ba eŋɛ sɛla se’em ma’a ti ba ka’ana nɛra.

8. To san ka’ana nɛra, la nari ti to bisɛ tomea soŋa la bem poan? (Bisɛ fɔɔra la.)

⁸ Lan wan soŋɛ to se’em. To mabiisi san namesa, to ni kɔ’ɔn bɔta la to soŋɛ ba. Ge to san wan ta’an eŋɛ bala, la ka nari ti to tɔɣesa Yob zɔdoma batã la. Yia, la nari ti to baŋɛ yele la za’a ge nyaa ka’am nɛra la. N yi’i, la ka nari ti to tara tomea yɛla ka’ana nɛra la wuu Elipaz n yuun eŋɛ se’em la ge to tuɣum basɛ ti to ka’aŋɔ la ze’ele Naayinɛ Yelesum la poan. (Yob 4:8; 5:​3, 27) N tã’a, la ka nari ti to tãsera bii tɔɣera nɛra la yetɔɣepɔ̃’ɔsa. Tɛ̃ra ti Elipaz la a tadaandoma la yetɔɣum basɛba yuun dela yelemɛŋɛrɛ, hali ti tuntuna Paul yuun ta dekɛ Elipaz yɛla ase’a tɔɣɛ. (Dekɛ Yob 5:13 makɛ la 1 Korint 3:19.) Ge Elipaz, Bildad la Zopar n yuun tɔɣɛ Naayinɛ yele se’em la yuun daɣɛ yelemɛŋɛrɛ ge me daam Yob. Bala la, Yehowa yuun yeti ban tɔɣɛ yelese’a la daɣɛ yelemɛŋɛrɛ. (Yob 42:​7, 8) To san ka’ana nɛra, la ka nari ti to tɔɣɛ yelese’a n wan basɛ ti la ana wuu Yehowa ka fabeli nɛra la yele. Basɛ ya ti to nyaa sɔsɛ ton wan ta’an zamesɛ sɛla Elihu yele la poan.

ELIHU N YUUN KA’AM YOB SE’EM

9. Tɔɣɛ pa’alɛ sɛla n sɔi ti Yob yuun kelum ɛɛra subuɣelegɔ, se’em ma’a ti a zɔdoma la yuun tɔɣɛ ba’asɛ la ge Yehowa yuun soŋɛ en la wani?

⁹ Yob la a zɔdoma batã la yuun ŋmɛ nɔkpe’ene yue mɛ. Ban yuun tɔɣɛ zo’e la zuo, ba yetɔɣum la zo’e paɛ la Baabule gɔŋɔ zuto 28. Ban yuun ta tɔɣɛ ba’asɛ la, nɔkpe’ene kai ti ba za’a sunsɔa n yuun nyie. To nyaa bɔkɛ sɛla n sɔi ti Yob suure yuun kelum sa’am! A yuun kelum ɛɛra la subuɣelegɔ la ka’aŋɔ. Yehowa yuun soŋɛ Yob la wani? A yuun basɛ ti Elihu n ka’am en. Beni n sɔi ti Elihu n yuun paɛ bim la, a ka pɔsɛ tɔɣera? A yuun yeti: “Mam dela bia, te ho me dɛna bonkɛka, bala zuo, valom en tare ne mam te n yele ho n suunre n tare se’ere.” (Yob 32:​6, 7) Elihu n de bunbilipaalega wa yuun baŋɛ la yelese’ere ti nɛreba zo’e zo’e me baŋɛ zina beere wa: Bunkureba tari la yɛm se’ere n sɔi la, ba vɔi yue mɛ ge me zamesɛ yɛla zo’e zo’e ti bunbilipaalesi nan ka zamesɛ. Ge Elihu n yuun ma’ɛ amea kelese Yob la a zɔdoma la ba’asɛ la, a yuun ka le ta’an sina. A yuun yeti: “La dagɛ bonkɛgehe n tare yam, bii bonkoroba en bɔkere sɛla n de sera.” (Yob 32:9) Elihu yuun yeti bem ge a yuun tɔɣɛ de la wani?

10. Elihu yuun eŋɛ la bem ge nyaa ka’am Yob? (Yob 33:​6, 7)

¹⁰ Elihu yuun boti la a basɛ ti la ana Yob mama ge ti a nyaa ka’am en ti a ta’an kelese soŋa. Elihu yuun eŋɛ la wani? Yia, a yuun nyɔkɛ la amea. Sɛla n sɔi ti to baŋɛ wana dela, Baabule la yeti yia la, Elihu sunsɔa n yuun nyie. (Yob 32:​2-5) Ge Elihu yuun ka zɛregɛ Yob bii a tɔɣɛ en yetɔɣepɔ̃’ɔsa. A yuun tuɣum sirege la amea ge tɔɣera bɔ’ɔra Yob wuu a zɔ la. Makerɛ, a yuun yele Yob ti: “Mam ane mɛ wo hom ane se’em wa Yenɛ nɛŋan.” (Kaalɛ Yob 33:​6, 7.) Elihu yuun nyaa basɛ ti Yob baŋɛ ti eŋa kelese ni en mɛ soŋa soŋa. Hali a yuun kilese Yob yetɔɣum la za’a mɛ. (Yob 32:11; 33:​8-11) Elihu yuun eŋɛ la bala mea nɔɔ se’em ma’a ti a le ka’ana Yob la.—Yob 34:​5, 6, 9; 35:​1-4.

11. Elihu yuun ka’am Yob la wani? (Yob 33:1)

¹¹ Elihu n yuun ka’ani Yob la, a yuun eŋɛ pa’alɛ ti a bo’ori Yob gilema. Makerɛ, Elihu yuun ni yi la Yob yu’urɛ. Buraasi batã la yuun ka eŋɛ bala. (Kaalɛ Yob 33:1.) Daanse’ere Elihu yuun tiɛ ti Yob la a zɔdoma batã la n tɔɣeri ni la, eŋa inya n kiti ni ti a me tɔɣɛ. Bala la, a yuun bo Yob yɔ’ɔ ti a tɔɣɛ ge ti a nyaa ka’am en. (Yob 32:4; 33:32) Elihu yuun pa’alɛ Yob sɛla n basɛ ti yelese’a ti a tɔɣɛ la ka ana soŋa. A me yuun tiɛ en ti Yehowa tari la yɛm, paŋa, tontɔɔ gãkerɛ la yelemɛŋɛrɛ nɔŋerɛ. (Yob 36:​18, 21-26; 37:​23, 24) Elihu n yuun ka’am Yob se’em la yuun basɛ ti Yob nyaa maasum mɛ ti a kelese ka’aŋɔ se’a n ze’ele Yehowa zɛ’an la. (Yob 38:​1-3) Elihu yele wa yuun wan ta’an soŋɛ Israeldoma la wani ge la me wan ta’an soŋɛ tomam me la wani zina beere wa?

12. Yehowa yuun tari nɔdɛ’ɛseba soŋera a nɛreba la wani ge Elihu yele la wan ta’an soŋɛ ni Israeldoma la wani?

¹² Lan yuun wan soŋɛ Israeldoma la se’em. Yehowa yuun ni tara la a nɔdɛ’ɛseba pa’ala ge ka’ana Israeldoma la. Makerɛ, kemadoma saŋa, Yehowa yuun loe la nɔdɛ’ɛsa pɔka Debora ti a pa’ala ge gu’ura a nɛreba la. La boi bim ti Samuel me yuun dela bia ge Yehowa yuun loe la eŋa ti a pa’ala Israeldoma la. (Ken. 4:​4-7; 5:7; 1 Sa. 3:​19, 20) Nadoma saŋa la me, Yehowa yuun kɔ’ɔn lɔɔsa la nɔdɛ’ɛseba ti ba soŋera Israeldoma la ti ba ta’an pu’usa en yelemɛŋɛrɛ sore poan. Ge nɛreba la yuun san ita yelese’a ti Yehowa ka bɔta, a ni tum la a nɔdɛ’ɛseba la ti ba ka’am ba. (2 Sa. 12:​1-4; Tm. 3:24) Elihu makesonɛ la n boi Yob gɔŋɔ la poan la wan ta’an soŋɛ ni sɛba n tari sakerɛ la ti ba mina ban wan ta’an tɔɣɛ sɛla soŋɛ nɛresɛba n tue, ti la ana ba mama.

13. Kristakɔma wan ta’an kpemese ba mabiisi giila la wani?

¹³ Lan wan soŋɛ to se’em. Ton de Kristakɔma la, to san pa’ala nɛreba yelese’a n boi Baabule la poan, to basɛ ti ba mina la Naayinɛ puti’irɛ n boti sɛla. To me ni tɔɣera la yetɔɣesomɔ buɣela to mabiisi suure ge kpɛmesa ba giila. (1 Ko. 14:3) Keendoma nari ti ba bisɛ bamea soŋa ge ni ‘tɔɣera buɣa buɣa’ bɔ’ɔra mabiisi la, hali se’em ti ba ka’ana la sunsɔa san nyie ti a ‘tɔɣera bura bura.’—1 Tes. 5:14; Yob 6:3.

14-15. Bo makerɛ pa’alɛ keema n wan ta’an tɔɣesa Elihu se’em a san ka’ana nɛra.

¹⁴ Ti’isɛ yele wa bisɛ. Keema n baŋɛ ti mabipɔka n boi a tansugere la poan giila n kɔ’ɔsɛ. Keema la naɛ la mabia ayima keŋɛ ti ba ta kpemese mabipɔka wa giila. Bamam la mabipɔka la n zĩ sɔsera la, mabipɔka la yeti la boi bim ti eŋa kɔ’ɔn kena zamesegɔ la na’am mɔɔlegɔ mɛ ge eŋa ka tari pupeelum. Keema la wan eŋɛ la wani?

¹⁵ Yia, a wan tiregɛ bɔkɛ sɛla n ta’asɛ ti mabipɔka wa suure sa’am la. A san wan ta’an eŋɛ bala, la nari ti a ma’ɛ amea kelese en. Daanse’ere a ti’isɛ ti Yehowa ka nɔŋɛ en. Bii a fabeli la eŋa n wan eŋɛ se’em ta’an bisa amea. (Lu. 21:34) N yi’i, keema la wan pɛ̃ɣɛ mabipɔka wa la eŋa n tiregeri ita yelese’a la. Makerɛ, keema la wan pɛ̃ɣɛ en la eŋa n muuri ge kelum kena zamesegɔ la na’am mɔɔlegɔ la. N tã’a, keema la san bɔkɛ lan ani mabipɔka wa se’em, la sɛla n sɔi ti a ti’isa ti Yehowa ka nɔŋɛ en la, a nyaa wan dekɛ Baabule la soŋɛ en ti a baŋɛ ti Yehowa nɔŋɛ en.—Ga. 2:20.

KƆ’ƆN BASƐ TI YOB GƆŊƆ LA KELUM SOŊERA HƆ

16. To wan eŋɛ la wani kelum nyɛta nyuurɔ Yob gɔŋɔ la poan?

¹⁶ La niɛ peelumi ti to wan ta’an zamesɛ yɛla zo’e zo’e Yob gɔŋɔ la poan! Zaseŋɔ seko n tole la poan, Yob gɔŋɔ la basɛ ti to baŋɛ sɛla n sɔi ti Naayinɛ bo yɔ’ɔ ti namesegɔ bɔna, la ton wan eŋɛ se’em ta’an kelum tara yelemɛŋɛrɛ bɔ’ɔra Yehowa wuŋerɛ poan. Zaseŋɔ wa poan, to zamesɛ baŋɛ ti la nari ti to za’a tɔɣesa Elihu makesonɛ la to san ka’ana nɛreba ge daɣɛ Elipaz, Bildad la Zopar. Daanse’ere ho san nyɛ sɛla ge bɔta ti ho ka’am nɛra, la wan ana soŋa ti ho malum kaalɛ Yob gɔŋɔ la soŋa ge nyaa ka’am en. La me san yue ti ho nan ka le kaalɛ Yob gɔŋɔ la, la wan ana soŋa ti ho kaalɛ dɛ. Ho puurɛ wan pee. Ho wan baŋɛ ti yɛla zo’e zo’e boi bim mɛ n wan soŋɛ hɔ.