Vom La Na’am Tuuma Zamesegɔ Viisegɔ Gɔŋɔ
© 2023 Watch Tower Bible and Tract Society of Pennsylvania
MARCH 4-10
NAAYINƐ TUULUM YƐLA | YOOMA 16-17
‘Yehowa N Iti Som Bɔ’ɔra Mam’
w18.12-E 26 ¶11
Bunbilipaalesi, Ya Ta’an Tara Vom Sebo N Ani Soŋa
NYƆƔƐ ZƆSONƆ
Kaalɛ Yooma 16:3. David yuun mi eŋa n wan eŋɛ se’em ta’an nyɔɣɛ zɔsonɔ mɛ. A yuun san naɛ la sɛba n nɔŋɛ Yehowa bɔna, a ‘puurɛ ni pee mɛ.’ A zɔdoma yuun dela ‘birikindoma.’ Yuumadaana ayima me tɔɣɛ a zɔdoma yele la bala. A yeti: ‘Mam dela zɔ bo sɛba woo n zoti ho, la sɛba woo n doli ho pa’alegɔ la.’ (Ym. 119:63) Wuu ton zamesɛ sɛla zaseŋɔ sɛka n tole la poan la, ho me wan ta’an nyɔɣɛ zɔtɔ la sɛba n zoti Yehowa, la ka pakɛ la ba yuuma n zuni se’em.
w14-E 2/15 29 ¶4
‘Bisa Yehowa N Som Se’em La’
David yuun yeti: ‘Yehowa, hon n bo’ori mam sɛla n de mam bunɔ. Hon n tari mam lɔɣɔrɔ ti sɛla kan daam tɔ. Mam beene woo dela zɛsoŋa beene.’ (Ym. 16:5, 6) David puurɛ yuun pee mɛ la sɛla n de eŋa ‘bunɔ.’ Bala dela eŋa n tari bɔnsoŋa la Yehowa ge ta’an pu’usa en la. Wuu David la, yeledaaŋɔ paari to mɛ ge la bala za’a, to nyɛti kã’a zo’e zo’e mɛ vo’osum poan! Basɛ ya ti to kɔ’ɔn pu’usa Yehowa ge me basɛ ti to puurɛ pee la a vo’osum pu’usegɔ yire la.
w08-E 2/15 3 ¶2-3
Basɛ Ti Yehowa Dɛna Yia Ho Vom Poan
To wan ta’an zamesɛ yɛla zo’e zo’e Baabule poan nɛreba n de wuu Abraham, Sarah, Moses, Arut, David, Ester, tuuntuna Paul la nɛreba basɛba me zɛ’an. To me wan ta’an zamesɛ sɛla yese sɛba ti Baabule la ka tɔɣɛ ba yele zo’e la zɛ’an. To san ti’isa taɣesa Baabule poan yɛla, la wan soŋɛ tɔ ti to eŋɛ sɛla ti yuumadaana la yele la. A yuun yeti: ‘Naayinɛ ti mam dekɛ tolese n nɛŋa daarewoo. Se’ere n sɔi la, eŋa n boi n zuɔ nu’o bɔba. Sɛla ka boi n wan bike mam.’ (Ym. 16:8) Gulesegɔ wa vuurɛ?
Soogɛa yuun ni zãla a su’a la a zuɔ nu’o ge zãla a tɛ’ɛlega la a gɔbega nu’o. Bala la, a ni ka nyaŋɛ te’ele a zuɔ bɔba la soŋa ge a tadaana san bɔna a zuɔ bɔba zabera, a tadaana la n ni tɛ’ɛla en. To san tɛ̃ra Yehowa yele saŋa woo ge ita eŋa n boti sɛla, a wan te’ele to. Bala la, basɛ ya ti to sɔsɛ ya Baabule poan yɛla n wan ta’an kpemese to sakerɛ se’em ti to ‘dekɛ Yehowa tolese to nɛŋa daarewoo.’
Vo’osum Poan Yɛla
it-2-E 714
Nimbaa
Ba san dekɛ Hebru yelebire la n de ʼi·shohnʹ (Tɛ 32:10; Mag 7:2) la ʽaʹyin (niho) laɣum taaba, la vuurɛ dela “niho la bia.” Bala mea nɔɔ ti ba dekɛ yelebire la n de bath (vuurɛ n de bipugela) tum tuuma Fabelegɔ 2:18 ti la vuurɛ dɛna “niho la bipugela.” Yelebɛa wa za’a vuurɛ dela nimbaa. Ba dekɛ yelebɛa ayi wa laɣum taaba mɛ Yooma 17:8 poan (ʼi·shohnʹ bath-ʽaʹyin), ti la vuurɛ dɛna “niho la bia bii niho la bipugela” (“nimbeeleho la nimbaa,” NWT). La pa’alɛ la hon ni bisɛ ayima nimbaa poan nyɛ homea ti ho ana pika pika se’em la.
Niho la baŋeri la yɛla kalam. Hali zɔnko pika pika bii sɛla fii san lui ku poan, ku ni baŋɛ mɛ kalam. Niho la bɔbese’ere n ani yiliyili la n te’eli nimbaa la. Bala la, bɔbedenɛ san sa’am, la ta’an basɛ ti nɛra kan nyɛta soŋa bii a fɔ. Baabule la dekɛ yelebɛa la n de ‘nimbaa’ bii ‘nimbeeleho’ la pa’alɛ la sɛla ti nɛra nara ti a tara dɛ soŋa soŋa. La me nari ti to tara Naayinɛ lɔɔ la soŋa soŋa. (Mag 7:2) Tɛɛnhegɔ 32:10 yeti Naayinɛ yuun te’eli Israeldoma la mɛ wuu eŋa mea ‘nimbaa’ la. David yuun zusɛ Naayinɛ ti a tɛ’ɛla ge bisa en wuu nɛra n tari a ‘nimbaa’ soŋa se’em la. (Ym 17:8) A yuun boti la Yehowa eŋɛ kalam soŋɛ en a dindoma san yeti ba zabɛ la en. (Dekɛ makɛ Zek 2:8; bilam ba dekɛ la Hebru yelebire n de ba·vathʹ ʽaʹyin, “nimbeeleho,” tum tuuma.)—Bisɛ EYE (NIHO).
MARCH 11-17
NAAYINƐ TUULUM YƐLA | YOOMA 18
‘Yehowa N Fãari Mam Basa’
w09-E 5/1 14 ¶4-5
Hon Bɔkeri Baabule Poan Maɣesa?
Baabule la dekɛ Yehowa makɛ mɛ la lɔɣɔrɔ. Baabule la tɔɣɛ a yele yeti a dela ‘Israel taŋa.’ Baabule la le dekɛ en makɛ la ‘taŋa’ la ‘suka zɛ’an.’ (2 Samuel 23:3; Yooma 18:2; Tɛɛnhegɔ 32:4) Beni n sɔi ti ba dekɛ Yehowa makɛ la yele ana? Wuu taŋa n kɔ’ɔn gã ka bikera se’em la, bala mea ti Yehowa me dɛna suka zɛ’an bɔ’ɔra hɔ.
Yooma gɔŋɔ la dekɛ Yehowa makɛ la yɛla zo’e zo’e n pa’alɛ Yehowa n ani se’em. Makerɛ, Yooma 84:11 yeti Yehowa dela ‘wuntɛɛŋa, la zaberɛ tɛ’ɛlega,’ se’ere n sɔi la eŋa n bo’ori nɛɛsum, vom, paŋa la gu’a. Yooma 121:5 me yeti ‘Naayinɛ dela ma’asum kena la hɔ.’ Wuu ma’asum n wan ta’an gu ho wuntɛɛŋa tuulega poan se’em la, Yehowa me wan ta’an soŋɛ sɛba n pu’useri en ge ti wuŋerɛ paara ba la. A wan te’ele ba a ‘nu’usin’ bii a ‘kelumpaɣesi poan.’—Isaiah 51:16; Yooma 17:8; 36:7.
it-2-E 1161 ¶7
Kɔ̃a
Naayinɛ wuni a yamesi kɔ̃a mɛ. Sɛba woo n pu’useri Yehowa vo’osum la yelemɛŋɛrɛ poan la san zusɛ en, a wan kelese ba, la ka pakɛ la ban tɔɣeri yetɔɣesebo. Leyɛ’ɛsa, ba san puɣum zusɛ ba suuren, Naayinɛ wan ‘kelese’ ba se’ere n sɔi la eŋa n mi sɛla n boi asaala suuren. (Ym 66:19; 86:6; 116:1; 1Sa 1:13; Ne 2:4) Naayinɛ keleseri sɛba woo n nameseri ge ɛɛra soŋerɛ a zɛ’an la mɛ. A me wuni ge mina nɛresɛba za’a n zɛregeri eŋa la a yamesi la mɛ.—Pin 21:17; Ym 55:18, 19; 69:33; 94:9-11; Yer 23:25.
w22.04-E 3 ¶1
Ho Wan Eŋɛ Se’em Ta’an Ŋmibera Putɛyiila Poan
2. Ti’isɛ. Ho san ti’isɛ lebe pooren, ho wan nyɛ yelese’a n yuun paɛ hɔ ti Yehowa soŋɛ hɔ ti ho ta’an ŋmibe a poan. To san ti’isɛ bisɛ Yehowa n soŋɛ a yamesi diimi sa se’em, la eŋa n soŋeri tomam me se’em, la wan soŋɛ tɔ ti to tara paŋa la sakerɛ a poan. (Ym. 18:17-19) Keema ayima yu’urɛ n de Joshua yeti: “Mam gulesɛ yelese’a ti mam zusɛ Yehowa ti a lebese mam la biŋe mɛ. Wana ni soŋɛ mam mɛ ti n tɛ̃ra mam n ni zusɛ Yehowa ti a ni bo mam yelese’a n pakɛ mam se’em la.” Yelemɛnɛrɛ, to san ti’isa taɣesa Yehowa n eŋɛ sɛla bo to, to ni malum nyɛ la paŋa ta’an ŋmibe to yeledaaŋɔ la poan.
Vo’osum Poan Yɛla
it-1-E 432 ¶2
Kerub
Nɛreba basɛba tiʼisɛ ti kerubdoma la yuun dela bunsilimasiiro n tari kelumpaɣesi ti baɣa kaaberiba yuun ni ŋmɛ kɛ̃ʼɛsɛ dangɔɔma poan la. Ge kerubdoma la yuun daɣɛ bala. Diimi Yudadoma yɛla kɔʼɔn basɛ ti la niɛ peelumi ti kerubdoma wa yuun tari la asaala naanɛ ge Baabule la ka tɔɣɛ de yele. Kerubdoma wa ti ba yuun eŋɛ ba ti ba som seʼem la yuun zeʼele bo la malesi la n som la. Nɛreba la yuun doose la Yehowa mea n paʼalɛ Moses seʼem la nima nima maalɛ Kerubdoma wa. (Yeh 25:9) Tuuntuna Paul yuun tɔɣɛ ba yele ti, ʼkerubdoma n som n pĩ beʼem duusego liŋa la.ʼ (Heb 9:5) Kerubdoma la yuun ni bɔna la Yehowa nɛŋan. Yehowa yuun yeti: ‘Bilam ti ho wan nyɛ mam. N ni wan ze’ele la kerubdoma la n yaɣɛ mam nɔbiŋere daka liŋa zuo la, tiŋasuka.’ (Yɛh 25:22; Kan 7:89) Bala la, Baabule la le yeti Yehowa dela ‘se’em n zĩ Kerubdoma la zuo.’ (1Sa 4:4; 2Sa 6:2; 2Na 19:15; 1Ye 13:6; Ym 80:1; 99:1; Isa 37:16) Kerubdoma la yuun ze’ele bo la Yehowa n bã’ari ‘toroko’ sɛka la. (1Ye 28:18) Kerubdoma la kelumpaɣesi n te’eli toroko la ge me basɛ ti ku zɔta kalam. David yuun dekɛ Yehowa n eŋɛ kalam soŋɛ en se’em la makɛ mɛ la nɛra n ‘zom kerubdoma zuo ɛ̃kɛ.’—2Sa 22:11; Ym 18:10.
MARCH 18-24
NAAYINƐ TUULUM YƐLA | YOOMA 19-21
‘Saazuo Wa Pa’ali La Naayinɛ N Som Se’em’
w04-E 1/1 8 ¶1-2
Basɛ Ya Ti To Za’a Mɔɔlɛ Yehowa N Som Se’em La
YESSE dayɔa David yuun dela dunkeena bɔna Betlehem tiŋa. Se’em ma’a ti a yuun ni bisera a sɔ piisi la, saŋa zo’e zo’e, a yuun ni bisa ŋmarebɛa n boi saazuo la mɛ. Nɔkpe’ene kai ti a yuun tĩɛ yele aŋa mɛ, se’em ma’a ti Naayinɛ vo’osum la yuun soŋɛ en ti a yuum yuunɛ la n boi Yooma 19 la. La yeti: ‘Saazuo wa paali la Naayinɛ n som se’em. Saazuo pa’ali la a nu’o tuuma n ani se’em. Ba yetɔɣum paɛ tiŋa wa luɣerɛ woo poan mɛ.’—Yooma 19:1, 4.
Saazuo lɔɣɔrɔ la woo kɔ’ɔn pa’ala Yehowa n som se’em mɛ saŋa woo. Naaŋɔ lɔɣɔrɔ la za’a pa’alɛ to la Yehowa n som se’em la. To san ti’isɛ Yehowa lɔɣɔrɔ n pɛ̃ɣeri en ‘tiŋa wa luɣerɛ woo’ se’em la, la ni dɛna la ɔmi’isa. Nɛresɛba n tari sakerɛ me pɛ̃ɣeri en mɛ. Yuum yuuna ayima yele nɛresɛba n tari sakerɛ la yeti: ‘Pɛ̃ɣɛ ya Naayinɛ la a soŋa, la a paŋa la. Bo ya en pɛ̃ka sɛka n nari a yusonɛ la.’ (Yooma 96:7, 8) Nɛresɛba n tari bɔnsoŋa la Yehowa pɛ̃ɣeri en mɛ la pupeelum. To pɛ̃ɣeri Naayinɛ la wani?
w04-E 6/1 11 ¶8-10
Naaŋɔ Lɔɣɔrɔ Pa’ali La Naayinɛ N Som Se’em!
David nyaa le tɔɣɛ la Yehowa naaŋɔ lɔkɔ ayima n de yelekirega yele ti: ‘Naayinɛ maalɛ wuntɛɛŋa wa suɣerɛ mɛ saazuo sa bo en, ti a yɛsera na wuu pɔɣedita n ni nan suɣɛ bɔna deo nyaa ni yɛsera la pupeelum wuu nɛra n eŋɛ sɛla nyaŋɛ la. Wuntɛɛŋa wa ni yese la bulika, niɛ yese na, tara tara ta lui zɛ’an kayima me sa. Sɛla ka boi ti a bugum la ka paara.’— Yooma 19:4-6.
Ho san dekɛ wuntɛɛŋa la makɛ la ŋmarebɛa, wuntɛɛŋa la ka kãregɛ bala sa. Ge la bala za’a wuntɛɛŋa la kãregɛ gana planɛt sɛba n vileŋeri kaara ka la mɛ. Gɔŋɔ kuyima yeti wuntɛɛŋa la tibesum paɛ wuu tingole wa tibesum sugumnɔɔrɛ 330,000. To wan ta’an yeti wuntɛɛŋa la kãregɛ paɛ wuu tomam solar system wa! Wuntɛɛŋa la zãɛ la tingole wa paɛ wuu mɛɛla tustusa piwɛ la batã. Wuntɛɛŋa la n tari pansɛka vɛ’ɛra lɔɣɔrɔ la basɛ ti tingole la ka ba’ɛ lɛna ka ge me ka ba’ɛ zãɛ la ka. Wuntɛɛŋa la paŋa wana fii n paari tingole wa ge la bala za’a, wuntɛɛŋa la kelum soŋera mɛ ti vom bɔna.
Yuumadaana la dekɛ wuntɛɛŋa la makɛ mɛ la ‘nɛra’ n ze’ele tingole wa dapɔya bɔba zɔ yakɛ zaɣenɔya bɔba ge nyaa lebe a ‘suɣerɛ’ poan yu’uŋɔ. Yinɛ san lui, la ni ana wuu wuntɛɛŋa la kɛ̃ la ‘suɣerɛ’ poan ti a vo’ose la. Beere san ni yilegɛ, ka ni yese me na wuu ‘pɔɣedita n ni nan suɣɛ bɔna deo nyaa ni yɛsera la pupeelum’ se’em la. David yuun dela dunkeena. Bala la, a yuun mi la ni ma’ara se’em yu’uŋɔ. (Pin’ileŋɔ 31:40) A yuun ni tɛ̃ra wuntɛɛŋa n ni nyɛkɛ ti la ana en wam se’em la mɛ. Wuu ‘buraa n tari paŋa’ la, wuntɛɛŋa la ni ka taregɛ se’em ma’a ti ka ni ze’ele dapɔya bɔba ta lui zaɣenɔya bɔba la.
g95-E 11/8 7 ¶3
Nɛreba Zeeni Yehowa N De Naaŋɔdaana La Mɛ
To san basɛ ti to puurɛ pee la naaŋɔ lɔɣɔrɔ zo’e zo’e n kaɛ to mum la n som se’em, la wan soŋɛ tɔ ti to baŋɛ Naaŋɔdaana la soŋa soŋa. Saŋa kayima, Yezu yuun yele a podɔleba la ti ba ma’ɛ bamesi bisɛ mɔpuuro la n zo’ori Galilee tiŋa la. A yeti: ‘Bisɛ mɔpuuro n boi bɔ̃’ɔ poan n zo’ori se’em ge zamesɛ sɛla. Ba ka tuni bii ba wuɣera ge mam yeti ya mɛ ti hali Solomon mea la a yu’urɛ la za’a yuun ka yɛ lɔɣɔrɔ n som wuu bana.’ (Matu 6:28, 29) Naayinɛ n biseri mɔpuuro ti ba som se’em la basɛ ti to tɛ̃ra ti A fabeli to yele mɛ paa.
Vo’osum Poan Yɛla
it-1-E 1073
Hebru, II
Ba me ta’an dekɛ synthetic parallelism tum tuuma yelesum la poan. Bala pa’alɛ ti yelesum la bɔbese’ere n pa’asɛ buyi la ni ka yeen taɣesɛ la yia bɔberɛ la n yele sɛla. Yi’i bɔberɛ la me ka tɔɣeri sɛla n boi de to’ore la yia bɔberɛ la ge yi’i bɔberɛ la ni tuɣum tɔɣɛ la sɛla pa’asɛ ti yele la niɛ peelumi pa’asɛ. Yooma 19:7-9 dela makerɛ n pa’alɛ yele wa:
Yehowa lɔɔ la ani la kasi,
bɔ’ɔra paŋa.
Yehowa tiisegɔ yɛla la dela yelemɛŋɛrɛ,
basera ti yɛm pɔ’ɔredaana la tara yɛm.
Yehowa nɔya dela tontɔɔ,
ni basɛ ti suure la tara pupeelum;
Yehowa nɔɔrɛ ani la filam,
ni basɛ ti nini la nyaɣera.
Yehowa zoolum dela kasi
ge bɔna wuusa.
Yehowa gãkerɛ dela yelemɛŋɛrɛ;
ba za’a dela tontɔɔ.
Dãalɛ basɛ ti yelesum woo yi’i bɔberɛ la n basɛ ti to bɔkɛ yelesum la za’a soŋa soŋa. Bala la, kaalegɔ zɛ’an woo poan, yelesum woo tari la bɔba ayi n naari taaba. Yi’i bɔberɛ la n soŋɛ tɔ ti to bɔkɛ yia bɔberɛ la soŋa. Makerɛ, lan yeti ‘bɔ’ɔra paŋa’ la n soŋɛ tɔ ti to bɔkɛ ‘Yehowa lɔɔ la n ani kasi’ se’em. Leyɛ’ɛsa, lan yeti ‘basera ti yɛm pɔ’ɔredaana la tara yɛm’ la n soŋɛ tɔ ti to bɔkɛ ‘Yehowa tiisegɔ yɛla n de yelemɛŋɛrɛ’ se’em.’ Yelesum woo n tari bɔba ayi la basɛ ti yelesum la za’a naara la taaba soŋa soŋa. Bɔberɛ woo n makɛ taaba la me basɛ ti yelesum la n gã se’em la tara la nimpiilum ti bɔkerɛ bɔna bim.
MARCH 25-31
NAAYINƐ TUULUM YƐLA | YOOMA 22
Baabule La Yuun Tɔɣɛ Yezu Kum Yɛla Biŋe Mɛ
w11-E 8/15 15 ¶16
Ba Yuun Nyɛ Mɛzaaya La Mɛ!
La wan ana wuu Naayinɛ zaɣesɛ Mɛzaaya la mɛ. (Kaalɛ Yooma 22:1.) Yetɔɣebiŋere wa yuun tum tuuma la se’em ma’a ti ‘Yezu ta kaasɛ ba tiŋa yetɔɣum poan kekeko yeti, Eli, Eli, lama sabaktani? La vuurɛ dela, mam Naayinɛ, mam Naayinɛ beni zuo ti ho zaɣesɛ mam?’ (Mark 15:34) Bala ka pa’alɛ ti Yezu yuun ka tari sakerɛ a saazuo Sɔ la poan. Naayinɛ yuun ka gu Yezu dɛŋa poan, la wan eŋɛ se’em ti a dindoma la ta’an mɛlesɛ en paa baŋɛ nyaa Krista wan tara birikinte. Yezu n yuun kaasɛ se’em la basɛ ti sɛla n boi Yooma 22:1 tum tuuma mɛ.
w11-E 8/15 15 ¶13
Ba Yuun Nyɛ Mɛzaaya La Mɛ!
David yuun tɔɣɛ biŋe ti ba wan kese Mɛzaaya la. (Kaalɛ Yooma 22:7, 8.) Yezu n yuun yuli namesegɔ dɔɔ la zuo la, nɛreba yuun keseri en mɛ. Matu yeti: ‘Ti sɛba n doli bilam tɔla la lɔbera ba zuto tuura Yezu ge yɛta ti, Hon se’em n yeti ho wan gbi Naayinɛ Yire la basɛ ge malum mɛ ku dabesa atã poan la, faaɛ homea basɛ! Ho san dɛna Naayinɛ Dayɔa, ze’ele dɔɔ la zuo sige na!’ Malema nɛŋadoma, gɔnguleseba la keendoma la me yuun keseri en mɛ yɛta ti: ‘A faari a taaba basa ge kan ta’an faaɛ amea basɛ! A dela Israel Naba! Basɛ ti a ze’ele dɔɔ la zuo sige na ti to nyɛ ge sakɛ bo en. A delum la Naayinɛ. Basɛ ti Naayinɛ la faaɛ en nananawa. Se’ere n sɔi la a yeti, eŋa dela Naayinɛ dayɔa.’ (Mt. 27:39-43) Ge la bala za’a, Yezu yuun ŋmibe mɛ ge ka lerege sanɛ. Bisɛ eŋa n yuun eŋɛ makesonɛ bo to se’em!
w11-E 8/15 15 ¶14
Ba Yuun Nyɛ Mɛzaaya La Mɛ!
Ba wan ŋmɛ gbaŋa Mɛzaaya la lɔɣeyɛɛtɔ zuo. Yuumadaana la yeti: ‘Ba tɔ̃rɛ la mam lɔɣɔrɔ bo taaba ge ŋmɛ gbaŋa mam lɔɣeyɛɛtɔ zuo.’ (Ym. 22:18) La yuun sirum eŋɛ la bala. Baabule la yeti, ‘Arom soogɛpa la n kpa en dɔɔ la zuo la, ba nyaa ŋmɛ la gbaŋa ti ba tɔ̃rɛ a lɔɣɔrɔ la.’—Mt. 27:35; kaalɛ Yon 19:23, 24.
Vo’osum Poan Yɛla
w06-E 11/1 29 ¶7
Tara Gilema Bɔ’ɔra To Laɣesegɔ
La yele pakɛ mɛ ti to tara gilema bɔ’ɔra to laɣesegɔ. Sore deyima ti to wan ta’an eŋɛ bala dela to naɛ la to mabiisi yuuna Na’am la yuuma to laɣesegɔ poan. Ba gulesɛ to yuuma la zo’e zo’e ti ba ana wuu zusega la. Bala la, yuuna yuuma wa la gilema. Tuuntuna Paul yuun dekɛ la Yooma 22 tɔɣɛ Yezu yele yeti: ‘Mam wan tɔɣɛ ho yu’urɛ wa bo n mea suurɔ la n yizuodoma. Mam wan ze’ele nɛreba laɣeŋɔ tiŋasuka pɛ̃ɣɛ hɔ.’ (Hebru 2:12) Bala la, la nari ti to ni zĩ’a se’em ma’a ti kuka zuodaana ni yeti to isige yuum la. To me san yuuna, to basɛ ti to puti’irɛ bɔna yelebɛa la poan. Basɛ ya ti to tɔɣesa yuumadaana la to san yuuna. A yuun yeti: ‘Mam wan pɛ̃ɣɛ Yehowa la n suure za’a tontɔɔdoma zɛ’an, la tansugere la poan.’ (Yooma 111:1) Yelemɛŋɛrɛ, ton boti to yuuna pɛ̃ɣera Yehowa la n sɔi ti la nara ti to ni te’ele keŋɛ zamesegɔ ge me ni zĩ’ire ta paɛ ba’asegɔ.
w03-E 9/1 20 ¶1
Pɛ̃ɣɛ Yehowa ‘Tansugere La Tiŋasuka’
Wuu diimi sa la, ba eŋɛ la maaseŋɔ ti to ta’an tɔɣera to sakerɛ yɛla ‘tansugere la tiŋasuka.’ Nɛra woo ni nyɛ yɔ’ɔ mɛ ti a bo lebesego se’em ma’a ti ba ni soke kɛleseriba la sɛla tansugere zamesegɔ poan. Da bisɛ zeem ho lebesego la n wan ta’an soŋɛ mabiisi se’em. Makerɛ, lebesego n pa’alɛ to wan ta’an gu tomea yɛla poan se’em wan kpemese mabiisi giila ti ba tara Baabule naresum yɛla tuna tuuma. Leyɛ’ɛsa, lebesego n pa’alɛ Baabule gulesegɔ vuurɛ bii n tɔɣeri sɛla ti ho nyɛ homea zamesegɔ poan ta’an kpemese mabiisi giila ti ba me zamesa soŋa soŋa.
APRIL 1-7
NAAYINƐ TUULUM YƐLA | YOOMA 23-25
‘Yehowa N De Mam Dunkeena’
w11-E 5/1 31 ¶3
‘Yehowa N De Mam Dunkeena’
Yehowa pa’ali a piisi mɛ. Piisi n ka tari dunkeena ta’an bɔregɛ. Bala mea nɔɔ ti tomam me nara ti to basɛ ti Naayinɛ pa’ala tɔ. (Yeremia 10:23) David yuun yeti, Yehowa pa’ali a nɛreba la ‘yaama n ani soŋa’ zɛ’an, la ‘ko’om n boi zɛ’an ti la ana buɣa buɣa.’ A tari ba dɔla la ‘tontɔɔ sarɔtɔ poan.’ (Kaalegɔ zɛ’an 2, 3) Gulesegɔ wa n dekɛ Naayinɛ makɛ la dunkeena se’em la basɛ ti to mina ti to wan ta’an dekɛ tomea delum en. To san dɔla a vo’osum la n pa’ali to se’em Baabule la poan la, to wan tara pupeelum ti dabeem kan tara tɔ.
w11-E 5/1 31 ¶4
‘Yehowa N De Mam Dunkeena’
Yehowa te’eli a piisi mɛ. Piisi san ka tara dunkeena, dabeem n ni tara ba ti ba ɛɛra yoo yoo. Yehowa yele a nɛreba ti ba da zɔta dabeem, la san puɣum dɛna ti yeledaaŋɔ n paari ba ti la ana wuu ba ‘keni la bɔ̃’ɔ poan ti la ana gbareti.’ (Kaalegɔ zɛ’an 4) Yehowa kɔ’ɔn bisera ba mɛ ge me ana lɛɛ ti a soŋɛ ba. A wan bo ba yɛm la paŋa ti ba ta’an ŋmibe yeledaaŋɔ poan.—Filipi 4:13; Yames 1:2-5.
w11-E 5/1 31 ¶5
‘Yehowa N De Mam Dunkeena’
Yehowa diiseri a piisi mɛ. Dunkeena n ni ɛ dia bo a piisi. Yehowa ma’a n wan ta’an bo to vo’osum poan dia. (Matu 5:3) Yelesonɛ la dela, Yehowa n de mina n bo’ori yɛri yɛri la zuo, a bo’ori a yamesi la vo’osum poan dia zo’e zo’e. (Kaalegɔ zɛ’an 5) Baabule la, la Baabule gɔnɔ n de wuu magazim wa ti ho kaala wa dela vo’osum poan dia n soŋeri tɔ ti to baŋera vom vuurɛ, la Naayinɛ n tari putɛsɛka bɔ’ɔra tɔ.
Vo’osum Poan Yɛla
w11-E 2/15 24 ¶1-3
Nɔŋɛ Tontɔɔ Tuuma La Ho Suure Za’a
YEHOWA doli la a Yelesum, la a zilam vo’osum la poan pa’ala a nɛreba ti ba dɔla ‘tontɔɔ sarɔtɔ poan.’ (Ym. 23:3) Ton ka di mi’a la zuo, to ta’an ta buregɛ mɛ. La ni dɛna la to tiregɛ paa ta’an le tuna sɛla n de tontɔɔ. Bem n wan soŋɛ tɔ ti to ta’an eŋɛ bala? Wuu Yezu la, la nari ti to nɔŋɛ tontɔɔ tuuma.—Kaalɛ Yooma 45:7.
Bem n de ‘tontɔɔ sarɔtɔ la’? ‘Sarɔtɔ’ wa dela Yehowa tontɔɔ pa’alegɔ. Hebru la Greek poan, nɛra san tuna “tontɔɔ tuuma,” la pa’alɛ ti a tiregeri mɛ dɔla naresum yɛla. Yehowa n de ‘tontɔɔ tuuma kɛ̃’a zɛ’an’ la zuo, a yamesi puurɛ ni pee mɛ ti ba dekɛ bamea delum en ti a pa’alɛ ba sose’ere n nari ti ba dɔla.—Yer. 50:7.
To san dɔla Yehowa tontɔɔ pa’alegɔ, la to suure za’a, a puurɛ wan pee. (Tɛɛ. 32:4) To wan ta’an pɔsɛ ita bala to san zamesa Yehowa yɛla Baabule la poan. To san zamesa a yɛla pa’asa ge me vuta du’ura en, la wan soŋɛ tɔ ti to nɔŋɛ a tontɔɔ tuuma la malum pa’asɛ. (Yam. 4:8) To me san yeti to kɔ’ɛ puti’irɛ ninmɔ’ɔrɛ yele poan, la dela to dekɛ Naayinɛ Yelesum, la a pa’alegɔ la tum tuuma.
APRIL 8-14
NAAYINƐ TUULUM YƐLA | YOOMA 26-28
David N Yuun Eŋɛ Se’em Basɛ Ti A Birikinte La Kpe’em
w04-E 12/1 14 ¶8-9
Tara Birikinte Pu’usa Yehowa
David yuun zusɛ yeti: ‘Naayinɛ, ɛ n suuren, la n puti’irɛ wa poan, la ho baŋɛ mam n de nɛra se’em taaba.’ (Yooma 26:2) Wɔ̃sum poan, nɛra suure ze’ele bo la eŋa n ti’iseri yɛla se’em, yelese’a n sɔi ti a ita yɛla, la eŋa n bɔkeri yɛla se’em. David n yuun zusɛ yeti Yehowa ɛ a suuren la, a yuun boti la Naayinɛ viisɛ eŋa n ti’iseri yɛla se’em soŋa soŋa.
David yuun zusɛ mɛ ti Naayinɛ tee a suure ti la ana filam. Sodeni poan ti Yehowa ni tee ton sirum ani se’em to suuren la? David yuun yeti: ‘Mam wan pɛ̃ɣɛ Naayinɛ, se’em n ka’ani mam la. Mam san puɣum ga’a yu’uŋɔ, mam suure tɔɣeri pa’ala mam mɛ.’ (Yooma 16:7) Bala vuurɛ dela bem? Bala pa’alɛ ti David yuun basɛ ti Naayinɛ ka’aŋɔ kɛ̃ la a suure, ti bala yuun tee eŋa n ti’iseri ge gɛɛla yɛla se’em. To me san tara Naayinɛ pa’alegɔ tuna tuuma ge me dɔla a tigere la n pa’ali to yelese’a la, la wan soŋɛ tɔ. To san zusɛ Yehowa ti a tee ton ti’iseri se’em, la wan soŋɛ tɔ ti to tara birikinte.
w04-E 12/1 15 ¶12-13
Tara Birikinte Pu’usa Yehowa
David yuun le tɔɣɛ la yele deyima n yuun basɛ ti a birikinte la kpe’em. A yeti: ‘Mam ka zĩ la pumpɔreŋɔdoma, mam ka doli birikɔɣedoma. Mam yaɛ yelebe’eteba mɛ. N me ka zĩ’iti la putɔpa.’ (Yooma 26:4, 5) David yuun ka naɛ la putɔpa zĩ’ita. A me yuun ka nyɔɣeri zɔtɔ be’ero.
Ge tomam me? Tomam me wan zaɣesɛ ti to kan dɔla nɛresɛba n ka tari yelemɛŋɛrɛ, T.V poan, vidiyodoma poan, intanɛt poan bii yɛla ase’a poan? To wan zaɣesɛ ti to kan dɔla nɛresɛba n suɣeri bamam n sirum ani se’em la? To sukuu tadaandoma la tomam n naɛ la sɛba tuna ta’an parum ti ba dela to zɔdoma ge yelemɛŋɛrɛ la dela, ba tari la putɛbe’o. To wan bɔta ti to zɔdoma dɛna nɛresɛba n ka tari Naayinɛ pa’alegɔ tuna tuuma yoi? A yelege n meadoma ta’an ita wuu tari la putɛsonɛ ge ba tuɣum bɔta la to basɛ Yehowa pu’usegɔ. Ge mabiisi san bɔna tansugere la poan ge tuna nigum nigum tuuma? Bamam me suɣeri la ban ani se’em. Jayson n de keendoma soŋerɛdaana yuun tari la zɔdoma n ani bala a bunbilimen. A yeti: “Daarɛ deyima ti ayima yele mam yeti: ‘Ton iti sɛla nananawa yele ka pakɛ, se’ere n sɔi la tinpaalega la san wa’ana, to yeti to ki mɛ. To puɣum kan baŋɛ ti to koŋe sɛla.’ Yetɔɣum ana taaba n yuun basɛ ti mam baŋɛ ti ba dela zɔtɔ be’ero. Mam ka boti tinpaalega la pĩɛ mam.” Jayson yuun ka le dɔla nɛreba n ani bala. Tuuntuna Paul yuun kaɣɛ to yeti: ‘Da basɛ ya ti ba pã’asɛ ya. Zɔtɔ be’ero sa’ani la halesoma.’ (1 Korint 15:33) Bisɛ lan de ninmɔ’ɔrɛ se’em ti to basɛ zɔtɔ be’ero dɔlega!
w04-E 12/1 16 ¶17-18
Tara Birikinte Pu’usa Yehowa
Suɣerɛ la, la kaabegɔ bimbine la n yuun boi bim la yuun dela zɛsɛka ti Israeldoma kena pu’usa Yehowa. David puurɛ yuun pee mɛ la suɣerɛ la ti a yeti: ‘Naayinɛ, mam nɔŋɛ ho yire la ti ho bɔna de poan la mɛ.’—Yooma 26:8.
Tomam me nɔŋɛ zɛse’esi ti to laɣesa taaba zamesa Yehowa yɛla la yoi? To Na’am Pu’usegɔ Deto la dela zɛse’esi ti nɛreba n boi gingilega la poan kena zamesa Yehowa yɛla. Leyɛ’ɛsa, yuunɛ woo to ni eŋɛ la tinkãtɛ laɣesegɔ, gingilega laɣesegɔ, la laɣesegɔ n boi de to’ore. To san ni laɣesɛ taaba bala, to ni zamesɛ la Yehowa ‘pa’alegɔ yɛla.’ To san ‘nɔŋɛ’ a pa’alegɔ yɛla la, to inya wan kita ti to kena zamesegɔ ge me ni ana kɛli kɛlesa. (Yooma 119:167) Bisɛ lan ni dɛna giilekpemesego se’em ti to bɔna la to mabiisi n fabeli to yele ge me soŋera tɔ ti to kelum tara birikinte!—Hebru 10:24, 25.
Vo’osum Poan Yɛla
w06-E 7/15 28 ¶15
Yehowa Ni Faaɛ Sɛba N Nameseri La Basɛ Mɛ
David yuun yuum yeti: ‘Hali mam mea sɔ la n ma san zaɣesɛ mam, Yehowa mea wan to’e mam.’ (Yooma 27:10) Bisɛ lan de subuɣelegɔ se’em la ton baŋɛ ti Yehowa nɔŋɛ to mɛ gana dɔɣereba n nɔŋɛ ba kɔma se’em la! To dɔɣereba san vɛɣena tɔ bii zaɣesɛ tɔ, la ni wuŋɛ to mɛ paa ge bala ni ka tee Yehowa n fabeli to yele se’em la. (Arom 8:38, 39) Tɛ̃ra ti Naayinɛ ni ve’e la sɛba ti a nɔŋɛ la lɛm amea. (Yon 3:16; 6:44) La ka pakɛ la nɛreba n iti ho se’em, ho saazuo Sɔ la nɔŋɛ ho mɛ!
APRIL 15-21
NAAYINƐ TUULUM YƐLA | YOOMA 29-31
Demesego Pa’alɛ La Naayinɛ Nɔŋerɛ
it-1-E 802 ¶3
Nɛŋa
Naayinɛ san ‘suɣɛ a nɛŋa,’ bɔŋa la n ni pa’alɛ la vuurɛ n de se’em. Saŋa zo’e zo’e la, Baabule la san yeti Yehowa suɣɛ la a nɛŋa, la pa’alɛ ti a zaɣesɛ la nɛra. La ta’an dɛna ti nɛra la ka doose Naayinɛ nɔɔrɛ n sɔi ti a me zaɣesɛ en. Makerɛ dela Israeldoma la n yuun ni ka doose Naayinɛ nɔɔrɛ se’em la. (Yob 34:29; Ym 30:5-8; Isa 54:8; 59:2) Saŋa ase’a, la pa’alɛ ti Yehowa ni gura la eŋa mea saŋa ti a tum. (Ym 13:1-3) David yuun zusɛ Naayinɛ yeti, ‘da basɛ ti ho nini bisa n be’em wa.’ Bala pa’alɛ ti a yuun boti la Naayinɛ di sugeri bo en.—Ym 51:9; dekɛ makɛ Ym 10:11.
w07-E 3/1 19 ¶1
Tara Pupeelum Gura Yehowa
To ta’an dekɛ Yehowa demesego n soŋeri to se’em la makɛ la tiwɔla n mu’uri fii fii se’em. Baabule la tɔɣɛ Naayinɛ demesego n tari nyuurɔ se’em la yeti: ‘Sɛba n baŋɛ ti la de ma’a ti ba demese ba n ni dɛna sɛba n tari suma’asum ge dɛna tontɔɔdoma.’ (Hebru 12:11) Wuu tiwɔla n mu’uri fii fii se’em la, bala mea nɔɔ ti Naayinɛ san kumesa tɔ, to kan ta’an kɔ’ɔn tee buyina. La dela fii fii. Makerɛ, to san eŋɛ sɛla tue ti yɔ’ɔ seko ti to tara tansugere la poan la pĩɛ to nu’usin, la dela to ma’ɛ tomea gura Naayinɛ. Bala wan soŋɛ tɔ ti to giila kan kɔ’ɔsɛ. To san bɔna bɔnkaŋa poan, David yetɔɣum la wan kpemese to giila. A yeti: ‘Naayinɛ sunsɔa ka yuuri ge a nimbɔ̃zore la tuɣum bɔna la bala yɛ’ɛsa. Kɛlega ta’an kele yu’uŋɔ ge beere yilegeri mɛ la nyɛɛma.’ (Yooma 30:5) To san ma’ɛ tomea gura ge tara Baabule la, la tigere la n pa’alɛ to sɛla la tuna tuuma, to wan tara ‘nyɛɛma.’
w21.10-E 6 ¶18
Bem N Pa’alɛ Ti Nɛra Sirum Basɛ A Be’em?
Nɛresɛka ti ba yese en tansugere la poan wan eŋɛ pa’alɛ ti a sirum basɛ a be’em mɛ a san kena tansugere zamesegɔ saŋa woo ge me dɔla keendoma la n ka’am en ti a zusa ge zamesa la. A me nari ti a tiregɛ basɛ yelese’a n yuun ta’asɛ ti a tum be’em la. A san tiregɛ maalɛ eŋa la Yehowa bɔŋa la, a suure ta’an ga’a ma’asumi ti Yehowa wan di sugeri bo en. Keendoma la me wan to’e en lebe tansugere la poan. Bala la, keendoma san bɔta ba baŋɛ nyaa nɛra la sirum tee ya, ba ni geele yele la mɛ soŋa soŋa. Ba mi ti nɛra woo bɔŋa boi la de to’ore. Keendoma ka nari ti ba dekɛ sunsɔa gãkɛ nɛra la.
Vo’osum Poan Yɛla
w06-E 5/15 19 ¶13
Yooma Gɔŋɔ La Bɔberɛ Ayima Yelekpina
31:23—Sodeni poan ti Naayinɛ ni lebese yɔ putɔpa la? Ba yɔɔrɛ dela tubedɔlegerɛ. Tontɔɔdaana san ka mina ge eŋɛ sɛla tue, Yehowa ni demese en mɛ. Putɔpa la n ka boti ba basɛ ba be’em tuuma la zuo, Yehowa wan dɔlegɛ ba tuba.—Magaha 11:31; 1 Peter 4:18.
APRIL 22-28
NAAYINƐ TUULUM YƐLA | YOOMA 32-33
Beni N Sɔi Ti La Nara Ti Ho Purɛ Ho Be’em?
w93-E 3/15 9 ¶7
Yehowa Nimbɔ̃zore La Faari To Mɛ Susa’aŋɔ Poan
To san tum be’em, la ta’an ni kpe’em bo to mɛ ti to purɛ to be’em la. Hali la ta’an kpe’em bo to ti to yele Yehowa. Bem n wan ta’an eŋɛ to san ka purɛ to be’em la? David tɔɣɛ ti la bɔna Yooma 32 poan yeti: ‘Mam n ani bãalam, ka purɛ n be’em ge ũhura la n be’em wa daarewoo la, mam inya ki la za’a. Bulika la yu’uŋɔ za’a, Yehowa nameseri mam mɛ. Mam paŋa kɛ̃ɛsɛ la za’a wuu warɛ ko’om la.’ (Kaalegɔ zɛ’an 3, 4) David n yuun tum be’em ge ziɣera ti a suɣɛ dɛ ge me ka bɔta ti nɛreba baŋɛ ti a putɛkeeŋa n daani en la yuun basɛ ti a inya ki la za’a. A paŋa yuun kɛ̃ɛsɛ mɛ ti la ana wuu warɛ n ni ze’ele ti tiisi ku’ɛ se’em la. Daanse’ere a yuun bɛ̃ mɛ ge ti putɛyooro me daana en. La yeen dɛna se’em, a yuun ka le tara pupeelum. Tomam me san bɔna bɔnkaŋa taaba poan, to wan eŋɛ la wani?
cl-E 262 ¶8
Yehowa Kɔ’ɔn ‘Maasum Mɛ Ti A Di Sugeri’
David n yuun nyaa tee la, a yeti: ‘Pooren ti mam purɛ n be’em bo ho; Mam ka suɣɛ n tuure la. Ti ho me di sugeri bo mam.’ (Yooma 32:5) Hebru yelebire la ti ba lerege yeti ‘di sugeri bo’ la, vuurɛ dela ho “ɔbegɛ” bii ho “zɛ” sɛla. Ban dekɛ yelebire la tum tuuma Yooma 32:5 poan se’em la pa’alɛ ti ba yese la nɛra la “be’em” basɛ. Bala la, la yuun ani wuu Yehowa tukɛ la David be’em la n ani wuu zeero la basɛ. Nɔkpe’ene kai ti wana yuun basɛ ti David nyaa vo’ose mɛ. (Yooma 32:3) Wana wa basɛ ti to me tara puti’irɛ ti to san tara sakerɛ Yezu lua bunɔ la poan ge zusɛ Naayinɛ ti a di sugeri bo to, a wan yese be’em la to zuo.—Matu 20:28.
w01-E 6/1 30 ¶1
To San Purɛ To Be’em, To Wan Nyɛ Tibegɔ
David n yuun purɛ a be’em la, a suure yuun ka le sa’am. To san kaala David n gulesɛ eŋa n yuun purɛ a be’em se’em la, to baŋɛ ti a yuun nyaa boi la fai. A me yuun kɔ’ɔn lu la suure ti a tara yelemɛŋɛrɛ pu’usa Naayinɛ. Makerɛ dela sɛla n boi Yooma 32. Kaalegɔ zɛ’an 1 la yeti: ‘Pupeelum boi mɛ la nɛresɛka ti ba di sugeri bo en la, se’em be’em ti ba basɛ bo en la.’ La ka pakɛ la be’em la n zuni se’em, nɛra la san sirum basɛ a be’em la, a wan tara pupeelum. Wuu David la, la nari ti nɛra la sakɛ ti a tue mɛ. (2 Samuel 12:13) David yuun ka tiregeri ti a bo amea buurɔ Yehowa nɛŋan bii a dekɛ yele la dɔɣelɛ basɛba zuo. Kaalegɔ zɛ’an 5 yeti: ‘Pooren ti mam purɛ n be’em bo ho. Mam ka suɣɛ n tuure la. Mam yeti: Mam wan purɛ n be’em bo Yehowa. Ti ho me di sugeri bo mam.’ To san yese to suure poan purɛ to be’em, to putɛkeeŋa la kan le daana tɔ.
Vo’osum Poan Yɛla
w06-E 5/15 20 ¶1
Yooma Gɔŋɔ La Bɔberɛ Ayima Yelekpina
33:6—Bem n de Yehowa nɔɔrɛ ‘sabeo’ la? Sabeo la ze’ele bo la Naayinɛ paŋa bii a zilam vo’osum la ti a dekɛ naam saazuo la. (Pin’ileŋɔ 1:1, 2) Baabule la yi’iri de la Naayinɛ nɔɔrɛ sabeo, se’ere n sɔi la wuu sabeo n tari paŋa se’em la, Naayinɛ ta’an tum dɛ zɛ’an n zãɛ ti la tum eŋa n boti sɛla.
APRIL 29–MAY 5
NAAYINƐ TUULUM YƐLA | YOOMA 34-35
‘Pɛ̃ɣera Yehowa Saŋa Woo’
w07-E 3/1 22 ¶11
To Naɛ Taaba Zɛkɛ Yehowa Yu’urɛ La
‘Mam wan pɛ̃ɣɛ Yehowa saŋa woo. Mam nɔɔrɛ wan pɛ̃ɣɛ en saŋa woo.’ (Yooma 34:1) Ban yuun sa’ɛ David amea tiŋa ti a ɛɛra nyaara la, a yuun ta’an fabela a innaanɛ poan yɛla ge a yuun ka basɛ ti yele aŋa gu en ti a kan pɛ̃ɣera Yehowa. Bisɛ lan de makesonɛ se’em bɔ’ɔra tɔ, wuŋerɛ san paara tɔ! Tomam la to mabiisi n boi woo, to boi la sukuu woo, tuuma zɛ’an woo bii na’am mɔɔlegɔ poan woo, to boti la to pɛ̃ɣera Yehowa. Bala n de ninmɔ’ɔrɛ paa bɔ’ɔra tɔ. Yɛla zo’e zo’e n sɔi ti la nara ti to pɛ̃ɣera Yehowa. Makerɛ, to kan nyaŋɛ zamesɛ Yehowa naaŋɔ lɔɣɔrɔ la za’a ba’asɛ. Leyɛ’ɛsa, bisɛ eŋa n doose a tigere la n boi tingɔŋɔ wa zuo la poan tum tuunse’a! Yɔɔma beere wa poan, Yehowa doose la nɛreba n ka di mi’a poan tum tuunkãra. To kan ta’an dekɛ Naayinɛ tuuma makɛ la tuunse’a ti tingɔŋɔ wa nɛrezureba tuna. David yuun gulesɛ yeti: ‘N Daana, yinɛ ka boi wan dekɛ makɛ la hon, bii se’em tuuma bɔna wan dekɛ makɛ la hon tuuma wa.’ Hon ka sakɛ bala yoi?—Yooma 86:8.
w07-E 3/1 22 ¶13
To Naɛ Taaba Zɛkɛ Yehowa Yu’urɛ La
‘Mam nyɔ̃’ɔ ŋmɛ’a boi la Yehowa poan. Sɛba n siregeri bamesi wan nyɛɛna.’ (Yooma 34:2) David yuun ka ŋmɛ nyɔ̃’ɔ la eŋa n nyaŋɛ tum tuunse’a la. Makerɛ, a yuun ka ŋmɛ nyɔ̃’ɔ la eŋa n yuun zabɛ nyaŋɛ Gat tiŋa naba la. David yuun baŋɛ ti se’em ma’a ti a yuun bɔna Gat la, la dela Yehowa n yuun te’ele en ge soŋɛ en ti a ta’an pĩɛ. (Magaha 21:1) Bala zuo la, David yuun ŋmɛ’ɛri nyɔ̃’ɔ la Yehowa poan ge daɣɛ amea poan. David n yuun eŋɛ bala la yuun soŋɛ sɛba n siregeri bamea la mɛ ti ba vurege du Yehowa. Yezu me yuun zɛkɛ Yehowa yu’urɛ la mɛ ti bala yuun basɛ ti sɛba n siregeri bamea la vurege du Naayinɛ ti A pa’ala ba. Zina beere wa, sirege n meadoma n ze’ele tisi woo poan naɛ mɛ la looredoma n boi tingole wa za’a poan pu’usa Naayinɛ ge ti Yezu dɛna ba Zuodaana. (Kolose 1:18) Sirege n meadoma san ni wum Naayinɛ nɛreba n pɛ̃ɣeri a yu’urɛ se’em la, la ni kɛ̃ ba suure mɛ. La me ni ana ba la bala mea nɔɔ ba san ni wum ti Naayinɛ nɛreba mɔɔla Baabule yelesum sebo ti zilam vo’osum la soŋɛ ba ti ba bɔkɛ la.—Yon 6:44; Tooma 16:14.
w07-E 3/1 23 ¶15
To Naɛ Taaba Zɛkɛ Yehowa Yu’urɛ La
‘Mam soke la Naayinɛ ti a lerege mam. A yese mam yelese’a woo n tari mam dabeem la poan.’ (Yooma 34:4) David n tɔɣɛ sɛla wa yele yuun pakɛ en mɛ paa. Bala la, a yuun tɔ̃kɛ yeti: ‘Mam n de tarema wa kaasɛ mɛ, ti Naayinɛ wum n kaasega la ti mam nyɛ faarɛ n daaŋɔ woo poan.’ (Yooma 34:6) To san naɛ la to mabiisi sɔsa, la dela yɔ’ɔ bɔ’ɔra tɔ ti to tɔɣɛ Yehowa n soŋɛ to se’em ti to ta’an ŋmibe wuŋerɛ poan. Bala wan kpemese to mabiisi la sakerɛ wuu David yetɔɣum la n yuun kpemese a zɔdoma la sakerɛ se’em la. David zɔdoma la yuun dekɛ bamea delum la Yehowa ‘ti a basɛ ti ba niɛ wuu ŋmarega la ti nyanɛ kan malum di ba.’ (Yooma 34:5) La boi bim ti Naba Saul yuun digeri ba mɛ ge nyanɛ yuun ka di ba. Ba yuun mi soŋa soŋa ti Naayinɛ boi mɛ la David. Bala n sɔi ti ba nɛsi yuun niɛ wuu ŋmarega la. Bala mea nɔɔ ti sɛba n nan zameseri yelemɛŋɛrɛ la, la sɛba n puɣum dɛna yelemɛŋɛrɛ Kristakɔma ti la yue ni dekɛ bamea delum Yehowa ti a soŋɛ ba. Ban nyɛ Naayinɛ n soŋɛ ba se’em la zuo, ba nɛŋa ni niɛ mɛ. Ba kɔ’ɔn lu la suure ti ba kelum tara yelemɛŋɛrɛ.
Vo’osum Poan Yɛla
w06-E 5/15 20 ¶2
Yooma Gɔŋɔ La Bɔberɛ Ayima Yelekpina
35:19—David n yuun zusɛ ti Naayinɛ da basɛ ti sɛba n yaɛ en la mumese en la ba nini la vuurɛ? David dindoma la san mumese en la ba nini, la pa’alɛ ti ba puurɛ n pee la ban nyaŋɛ tum en putoo la. David yuun zusɛ Naayinɛ ti a da basɛ ti bala tum.