Vom La Na’am Tuuma Zamesegɔ Viisegɔ Gɔŋɔ
© 2024 Watch Tower Bible and Tract Society of Pennsylvania
JULY 1-7
NAAYINƐ TUULUM YƐLA YOOMA 57-59
Yehowa Ni Basɛ Ti Nyanɛ Di Sɛba N Giiseri A Nɛreba La Mɛ
bt 220-221 ¶14-15
‘Ta Paɛ Tingɔŋɔ Wa Zɛse’esi N Zaaɛ La Poan’
Stephen yuun dekɛ la sukpe’ene mɔɔlɛ ge ti a dindoma la nyaa ku en. (Tm. 6:5; 7:54-60) Se’em ma’a ti ‘yaarɛ la yuun ta gaŋɛ nu’usi’ la, podɔleba la za’a yuun zɔ yiregɛ la Yudea la Samaria tisi poan ti la gee tuuntuneba la ma’a. Ge la bala za’a, ba yuun kelum mɔɔla mɛ. Filip yuun keŋɛ la Samaria ta mɔɔlɛ ‘Krista yelesoma la’ ti nɛreba la yuun kelese. (Tm. 8:1-8, 14, 15, 25) Leyɛ’ɛsa, Baabule la yeti: ‘Sɛba n yuun yiregɛ namesegɔ la n yuun sige ban ku Stephen la zuo la, yuun zɔ ta paɛ la Foenisia la Kiprus la Antiok tisi poan tɔɣera Yezu yɛla bɔ’ɔra sɛba n de Yudadoma la ma’a. Ge burase’esi n yuun bo Kiprus la Kirene tisi poan la yuun keŋɛ la Antiok tiŋa poan ta mɔɔlɛ Daana Yezu yelesoma la bo sɛba n daɣɛ Yudadoma la.’ (Tm. 11:19, 20) Sankaŋa, yaarɛ la yuun basɛ ti ba ta’an mɔɔlɛ Na’am yelesoma la zɛ’an woo mɛ.
Tomam saŋa wa me, yele aŋa taaba yuun eŋɛ mɛ Soviet Union saŋa la. Yele yele wuu yuun 1950 bɔba, ba yuun sa’ɛ Yehowa Sɛɛradoma zo’e zo’e keŋɛ la Siberia. Ban yuun yiregɛ zɛ’an woo la zuo, ba yuun kɔ’ɔn mɔɔla yelesoma la mɛ tiŋa la za’a poan. Mabiisi la yuun kan ta’an nyɛ ligeri keŋɛ sore n paɛ wuu miila 6,000 (10,000 km) ta mɔɔlɛ yelesoma la! Ge gɔmɛt la mea n yuun tari ba keŋɛ tiŋa la poan. Mabia ayima yeti, “Kpɛ’ɛndoma la mea n yuun basɛ ti nɛreba zo’e zo’e n boi Siberia baŋɛ yelemɛŋɛrɛ la.”
Vo’osum Poan Yɛla
‘Ze’a Kankaŋi, Da Miina’
Kɔ’ɔn ze’a kankaŋi. Naba David yuun yeti eŋa kan malum basɛ nɔŋerɛ se’ere ti a tara bɔ’ɔra Yehowa la. Wana yuun basɛ ti a gulesɛ yeti: ‘O Naayinɛ, mam suure kɔ’ɔn ze’a la kankaŋi.’ (Ym. 57:7) Tomam me wan ta’an ze’a kankaŋi to san yese to suuren dekɛ tomea delum Yehowa. (Kaalɛ Yooma 112:7.) Bisɛ yele wa n yuun soŋɛ Bob ti to sɔsɛ a yele la se’em. Ban yuun yele en ti ba wan dekɛ ziim ze’ele, la yele san ta pakɛ ti ba dekɛ kɛ̃’ɛsi en la, a yuun kɔ’ɔn lebese ba bilam bilam yeti la san wan ta dɛna ti ba dekɛ ziim kɛ̃’ɛsɛ en, eŋa wan yese asibitin la poan. Pooren, Bob yuun yeti, “Mam yuun ka ti’isɛ buyi buyi bii n fabela sɛla n wan eŋɛ.”
Bob n yuun te’ele kɔ’ɛ a puti’irɛ ge nyaa keŋɛ asibitin la zuo a yuun nyaŋɛ ze’ele kankaŋi mɛ. Yia la, a yuun boti la a basɛ ti Yehowa puurɛ pee. N yi’i, a yuun zamesɛ Baabule la mɛ la to gɔnɔ la ta’an baŋɛ vom la ziim n de tuulum se’em. N tã’a, a yuun sakɛ ti a san dɔla Yehowa pa’alegɔ a wan nyɛ nyuurɔ. Tomam me wan ta’an ze’a kankaŋi la ka pakɛ la daaŋɔ seto n wan paɛ tɔ.
JULY 8-14
NAAYINƐ TUULUM YƐLA YOOMA 60-62
Yehowa Basɛ Ti To Bɔna La Fai Ge Tɛ’ɛla Tɔ Ti To Ze’a Kankaŋi
it-2 1118 ¶7
Dewoko
Makerɛ. Sɛba n tari sakerɛ ge nana Naayinɛ la boi la fai. David yuun yeti: ‘Hon Yehowa n de mam suka zɛ’an, hon de mam tɛ’ɛla ge tɛ’ɛla mam n dindoma nu’usin.’ (Ym. 61:3) Sɛba n mi a yu’urɛ la vuurɛ ge dekɛ bamea delum en la, ka nari ti ba zɔ dabeem se’ere n sɔi la ‘Yehowa yu’urɛ la dela dewoko ti tontɔɔdoma zɔta kɛ̃’ɛra fai.’—Mag. 18:10; dekɛ makɛ 1Sa 17:45-47.
it-2 1084 ¶8
Suɣerɛ
Ba yuun dekɛ ‘suɣerɛ’ makɛ la yɛla ase’a saŋa zo’e zo’e. Nɛra yuun ni gã la suɣerɛ poan vɔ’ɔsa ge ti la me gu’ura en ti daaŋɔ da paara en. (Pin. 18:1) Diimi sa la, ban yuun ni tɔ’ɔsa saama se’em la zuo, saama yuun mi ti nɛreba san to’e ba kɛ̃ ba suɣerɛ poan la pa’alɛ ti ba bo’ori ba la gilema ge ti ba wan saam ba soŋa. Wana wa zuo ti Liligere 7:15 tɔɣɛ nɛrekuuŋɔ la yele yeti, ‘Naayinɛ wan yɛregɛ a suɣerɛ la pĩ ba,’ ti la pa’alɛ ti a wan tɛ’ɛla ba ti ba bɔna fai. (Ym. 61:3, 4) Isaiah yuun dekɛ Zion makɛ ti a ani wuu dela Naayinɛ pɔɣa. A yuun yeti Zion nari ti a maasum amea ta’an bisɛ a kɔma. Baabule la tɔɣɛ a yele yeti ‘a yalegɛ a suɣerɛ la.’ (Isa. 54:2) Bala pa’alɛ ti, a yalegɛ gu’a zɛ’an la bo a kɔma.
w02 4/15 16 ¶14
Yehowa Lɔɔ Soŋeri To Mɛ
Naayinɛ lɔɔ ka teeri. To boi la biɣi biɣi dabesa poan ge Yehowa kɔ’ɔn ze’a la kankaŋi. A me boi la wuusa. (Yooma 90:2) Amea yeti: ‘Mam dela Yehowa, mam ka teeri.’ (Malaki 3:6) To wan ta’an dekɛ tomea delum Naayinɛ pa’alegɔ n boi Baabule la poan la. La ka ani wuu asaala puti’irɛ n kɔ’ɔn tɛɛra saŋa woo se’em la. (Yames 1:17) Makerɛ, yuuma zo’e zo’e n wana ti sɛba n zameseri asaala puti’irɛ yɛla yeti la dela dɔɣereba basɛ ba kɔma ti ba ita bamea n boti sɛla. Ge pooren, basɛba yuun tee ba puti’irɛ mɛ ge sakɛ ti ba kã’aŋɔ la ka ani soŋa. Yele aŋa wa kɔ’ɔn tara nɛreba puti’irɛ yɛɣelena mɛ. Ge Yehowa ka ani bala. Yuuma zo’e zo’e n wana ti Baabule la bo kã’aŋɔ pa’alɛ dɔɣereba n wan doose nɔŋerɛ sore poan bisa ba kɔma se’em. Tuuntuna Paul gulesɛ yeti: ‘Sɔdoma wa, da vɛɣelena ya, ya kɔma ge dekɛ ya Yehowa tubedɔlegerɛ, la a pa’alegɔ la ugera ba.’ (Epesus 6:4) Bisɛ lan de pupeelum se’em ti to baŋɛ ti to wan ta’an dekɛ tomea delum Yehowa pa’alegɔ se’ere n sɔi la a pa’alegɔ la kan makɛ tee!
Vo’osum Poan Yɛla
w06 6/1 11 ¶6
Yooma Gɔŋɔ La Bɔberɛ Buyi Yelepkina
62:11. Naayinɛ ka eeri paŋa nɛra zɛ’an. Paŋa ze’ele la eŋa zɛ’an na. ‘Eŋa n sɔi paŋa.’
JULY 15-21
NAAYINƐ TUULUM YƐLA YOOMA 63-65
‘Ho Yelemɛŋɛrɛ Nɔŋerɛ La Gani Vom’
w01 10/15 15-16 ¶17-18
Ani N Wan Basɛ Ti Naayinɛ Kan Nɔŋɛ Tɔ?
Naayinɛ nɔŋerɛ la yele pakɛ hon la wani? La ani ho wuu lan yuun ani David se’em la? A yuun yeti: ‘Ho zu’usegɔ la n gani vom la zuo, mam wan pɛɣɛ la hon. Mam pɛɣeri la hon n vom wa woo poan; n wan ŋmɛ nupo’ɔ yi la hon yu’urɛ.’ (Yooma 63:3, 4) Sɛla boi tingɔŋɔ wa poan n ani soŋa paɛ Naayinɛ n nɔŋɛ to se’em ge tara bɔnsoŋa la to la? Makerɛ, ho san tara bɔnsoŋa la Naayinɛ ti la bɔ’ɔra hɔ suma’asum la pupeelum, bala gani hon kɔ’ɔn mɔ’ɛ nini ɛɛra ti ho vom ana lumta. (Luke 12:15) Ba vuuse Kristakɔma basɛba ti ba zaɣesɛ Yehowa san daɣena bala, ba wan ku ba. Yele wa yuun paɛ Yehowa Sɛɛradoma zo’e zo’e mɛ ban yuun paɣɛ ba Nazi camp la poan Tingɔŋɔ Wa Za’a Zaberɛ II la. Nɛreba fii wa ma’a n yuun zaɣesɛ Yehowa ge mabiisi zo’e zo’e yuun kɔ’ɔn ze’a la kankaŋi ge lu ba suure ti la san dɛna la ba ku ba, ba maasum ya. Sɛba n nɔŋɛ Naayinɛ la tari puti’irɛ ti Naayinɛ wan bo ba sɛla ti tingɔŋɔ la kan nyaŋɛ bo ba, n de a bo ba vom somɔ daarewoo. (Mark 8:34-36) Hali sɛla n boi gana daarewoo nyɔvore.
Yehowa san ka bɔna la tɔ, to kan ta’an vɔna daarewoo. Yeen ti’isɛ bisɛ vom n wan ta ana se’em to Naaŋɔdaana la san ka bɔna la tɔ. To vom wan ana la bura ti la kan tara vuurɛ. Yehowa bo a nɛreba la tuunsoma ba’asegɔ dabesa wa poan. Bala la, to ta’an tara sakerɛ ti Yehowa, Se’em N Basɛ Ti To Tara Puti’irɛ la san bo to daarewoo nyɔvore, a wan basɛ ti to zamesa ge tuna tuunsoma. (Pa’ala 3:11) To kan ta’an malum viisɛ Naayinɛ ‘som, la a yɛm la ba’asɛ.’—Arom 11:33.
w19.12 28 ¶4
‘Bo’ori Ya Fara Sɛla Woo Poan’
La ani soŋa ti to puurɛ pee la Naayinɛ n eŋɛ sɛla bo to la. Nɔkpe’ene kai ti, saŋa ase’a ho ni ti’isɛ bisɛ la eŋa n soŋɛ hɔ vo’osum poan la inganɛ poan se’em ge kelum soŋera ho la. (Tɛɛ. 8:17, 18; Tm. 14:17) Nyɛta saŋa la ho ti’isa taɣesa Naayinɛ n kã bo hon la ho mabiisi ti la ka tara makerɛ se’em la. Ho san ti’isa taɣesa ho Naaŋɔdaana la n bo’ori yɛri yɛri se’em la, la wan basɛ ti ho puurɛ pee la en. Bala me wan basɛ ti ho baŋɛ ti a nɔŋɛ ho mɛ ge ti a puurɛ pee la hɔ.—1 Yo. 4:9.
w15 10/15 24 ¶7
Kɔ’ɔn Ti’isa Taɣesa Vo’osum Poan Yɛla
Kaalegɔ ka tɔi paɛ ho san ti’isa taɣesa. Ho san bɔta ti ho ti’isa taɣesa, la dela ho puti’irɛ bɔna hon kaali sɛla la poan. Bala n sɔi ti to puti’irɛ ni ta’an keŋɛ yelese’a n ka ba’ɛ pakɛ la poan. Bala la, sansɛka n ani soŋa ti ho wan ta’an ti’isa taɣesa dela ho san vɔ’ɔsa bii ho boi la zɛ’an ti voole ka bɔna. Yoomadaana la yuun baŋɛ ti sansɛka n ani soŋa ti a wan ta’an ti’isa taɣesa dela yu’uŋɔ bii a san gã’arɛ isige. (Ym. 63:6) Yezu yuun ani la kasi ge a yuun baŋɛ ti a san bɔna zɛ’an n ani baalam ti’isa taɣesa ge zusera, nyuurɔ bo bim mɛ.—Lu. 6:12.
w09 7/15 16 ¶6
Tɔɣesa Yezu—Tara Nɔŋerɛ Ho San Pa’ala Nɛreba
To puurɛ ni pee mɛ ti to tɔɣɛ yelese’a ti to nɔŋɛ la yele. To san tɔɣɛ sɛla ti to nɔŋɛ yele, to puurɛ ni kɔ’ɔn pee mɛ ti la ana to mama. To san tɔɣɛ nɛra ti to nɔŋɛ en yele to puurɛ ni pee mɛ. To ni kɔ’ɔn bɔta ti to tɔɣɛ ton mi nɛra la yele se’em bo nɛreba. To ni pɛɣera en mɛ, na’asa en ge tɛ’ɛla en. Sɛla n sɔi ti to ita bala dela, to boti la nɛreba me nɔŋɛ en ge baŋɛ halese’a ti a tara la.
Vo’osum Poan Yɛla
w07 11/15 15 ¶6
Hon Basɛ Ti La Ana Nɛreba Mama?
La kpe’em mɛ ti ho mɛ yire gana ti ho gbire basɛ. Bala mea, la ni kpe’em mɛ ti to tɔɣɛ yetɔɣesomɔ ge la ka tɔi ti to tɔɣɛ yetɔɣepɔ̃’ɔsa. Ton ka di mi’a la zuo to tuuri mɛ. Naba Solomon yuun yeti: ‘Tontɔɔ nɛra ka boi tingɔŋɔ wa zuo n kɔ’ɔn tuna som ma’a ge ka makɛ tuna be’em.’ (Pa. 7:20) La ni ka kpe’em ti ho nyɛ nɛra tuure ge tɔɣɛ sɛla kɔ’ɔsɛ a giila. (Ym. 64:2-4) Ge la nari ti to tiregɛ ta’an mina ton wan eŋɛ se’em ta’an tɔɣɛ sɛla kpemese nɛra giila.
JULY 22-28
NAAYINƐ TUULUM YƐLA YOOMA 66-68
Yehowa N Zɛɛri To Zeero La
Yehowa N Lebeseri To Zusega Se’em
La dela to tara sakerɛ ta’an baŋɛ Yehowa n lebeseri to zusega la se’em. Yehowa ka lebeseri to zusega yelekirega sore poan ge eŋa n lebeseri to zusega se’em la dela sɛla n wan soŋɛ tɔ ti to kelum tara yelemɛŋɛrɛ bɔ’ɔra to saazuo Sɔ la. Bala la, ni kɔ’ɔn bisa Yehowa n wan lebese ho zusega la se’em. La yuun ani mabipɔka Yoko wuu Yehowa ka lebeseri a zusega me la. Bala la, a yuun pɔsɛ gulesɛ la yelese’a ti a zusɛ Yehowa ti a eŋɛ bo en la biŋe mɛ. Pooren, eŋa n yuun lebe ta bisɛ yelese’a ti a gulesɛ la, a yuun baŋɛ ti Yehowa lebese a zusega la zo’e zo’e mɛ hali yelese’a ti a zusɛ ge tamɛ ba yele la. Saŋa ase’a, tomam me ni nara ti to su’use ge ti’isɛ taɣesɛ Yehowa n lebese to zusega se’em.—Ym. 66:19, 20.
w10 12/1 23 ¶6
Tara Giile Bɔ’ɔra Dɔɣera Ayina Ma’a N Biseri A Kɔma
Yehowa n basɛ ti ba gulesɛ yuuma se’a ti Israeldoma la yuun ni yuuna pɛɣera en ba pu’usegɔ poan la. Yeen ti’isɛ bisɛ Israel pɔkɔpa, la kiibesi puurɛ n yuun ni pee se’em ba san yuuna yuuma wa. Yuuma wa ni tiɛ ba ti Yehowa dela ba ‘Sɔ’ la ba ‘gãkeredaana’ ge me wan soŋɛ ba. (Ym. 68:5; 146:9) Tomam me ta’an kpemese dɔɣera ayina ma’a n biseri a kɔma giila ti a suure sukɛ. Ruth dela dɔɣera ayina ma’a n biseri a kɔma. Ge a kelum tɛ̃ra yuun 20 n tole ti buraa ayima n uge a kɔma soŋa yuun yele en yeti: “Wai, ho kɔ’ɔn mɔɔra mɛ bisera ho kɔma la soŋa. Tara bala.” Ruth yeti: “Eŋa n yuun yele mam sɛla la soŋɛ mam mɛ paa.” Yelemɛŋɛrɛ, ‘yetɔɣesomɔ ani wuu tiim n ani soŋa.’ La wan ta’an kpemese dɔɣera ayina ma’a n biseri a kɔma giila ti la eŋɛ to pakerɛ. (Mag. 15:4, Contemporary English Version) Ti’isɛ bisɛ yele wana mɔpi ti ho wan ta’an tɔɣɛ kpemese dɔɣera ayina ma’a n biseri a kɔma giila.
w09 4/1 31 ¶1
Yehowa Dela Kiibesi Sɔ
‘NAAYINƐ dela kiibesi Sɔ ge bɔna a zilam zɛ’an sa.’ (Ym. 68:5) Gulesegɔ wa soŋɛ tɔ ti to baŋɛ Yehowa n tari giile se’em bɔ’ɔra kiibesi. Eŋa n yuun dekɛ lɔɔse’a bo Israeldoma la pa’alɛ ti dɔɣera san ki ge basɛ a bia, la ni daana en mɛ paa. To geele bisɛ Baabule la n pɔsɛ tɔɣera kiibesi yele se’em ti la bɔna Yɛhega 22:22-24.
Yehowa Wan Soŋɛ Hɔ Ti Ho Nyɛta Nɛŋa Tɔlega
Kaalɛ Yooma 40:5. Nɛra san zɔna zoore, a puti’irɛ dela a zom ta paɛ zoore la saazuo sa. Ge zoore la tari la zɛ’ɛsi ti a wan ta’an teke ge bisɛ zɛ’ɛsi la n som se’em. Bala mea nɔɔ, ho san ŋmibera yele poan nyɛta nɛŋa ti’isera Yehowa n soŋeri ho se’em. Dabeserɛ woo poan, ni soke homea yeti: ‘Yehowa soŋɛ mam la wani zina? La boi bim ti n yeledaaŋɔ la kelum bɔna mɛ ge Yehowa soŋeri mam la wani ti n ta’an ŋmibera?’ Ni tiregɛ ti’isɛ baŋɛ yelese’a ti Yehowa eŋɛ soŋɛ hɔ.
Vo’osum Poan Yɛla
w06 6/1 10 ¶5
Yooma Gɔŋɔ La Bɔberɛ Buyi Yelepkina
68:18—Bani n yuun de ‘buraasi n de bo’olum’ la? Buraasi wa yuun dela sɛba ti Israeldoma la yuun zabɛ nyaŋɛ ba ti ba dɛna ba yamesi Pu’ulumbiŋere Tiŋa la poan. Pooren, ba yuun loe buraasi wa mɛ ti ba soŋera Levidoma la.—Ezr. 8:20.
JULY 29–AUGUST 4
NAAYINƐ TUULUM YƐLA YOOMA 69
Ban Tɔɣɛ Yezu Vom Yɛla Se’em Ti La Bɔna Yooma 69
w11 8/15 11 ¶17
Ba Yuun Guri Mɛzaaya La Mɛ
Ba wan yaɛ Mɛzaaya la, la yoo. (Ym. 69:4) Tuuntuna Yon yuun gulesɛ Yezu n yuun tɔɣɛ sɛla la ti: ‘Ba wan tari ni buurɔ mam san ka wa’ani na eŋɛ yelese’a ti nɛra nan ka tabelɛ eŋɛ ba nɛŋa wa. Ge ba nyɛ mam n eŋɛ yelese’a la mɛ ge kelum yaɛ mam la n Sɔ la. Ge yeledena wa daa eŋɛ ti sɛla ti ba gulesɛ ba Pa’alegɔ la poan la wan sirum tum. La yuun yeti, ‘Ba yaɛ mam la yoo.’ (Yon 15:24, 25) ‘Pa’alegɔ’ la vuurɛ dela Gulesegɔ la za’a. (Yon 10:34; 12:34) Yelesoma gɔnɔ la pa’alɛ ti ba yuun yaɛ Yezu mɛ yele yele wuu Yuda pu’usegɔ nɛŋadoma la. Leyɛ’ɛsa, Krista yuun yeti: ‘Sɛbadoma n ka sakɛ Naayinɛ yelesum kan ta’an yaɛ ya. Ge san dɛna mam, ba yaɛ mam mɛ. Se’ere n sɔi la mam kɔ’ɔn yɛta ba mɛ ti ban boi bɔnsɛka taaba la ka ani soŋa.’—Yon 7:7.
w10 12/15 8 ¶7-8
Mɔ’ɛ Nini La Yelemɛŋɛrɛ Pu’usegɔ
Yele deyima yuun eŋɛ Yezu vom poan mɛ ti la pa’alɛ eŋa n yuun mɔ’ɛ nini se’em la yelemɛŋɛrɛ pu’usegɔ. La yuun dela yuun 30 Y.B. poan Azɔɔtole saŋa la, se’em ma’a ti Yezu yuun pɔsɛ a na’am mɔɔlegɔ tuuma la. Yezu la a podɔleba la yuun keŋɛ la Yerusalem pu’usegɔ yire ta nyɛ ti ‘buraasi kɔɔsa nii la piisi la dayɛna ge ti basɛba me zi’a bim tɛɛra ligeri.’ Yezu yuun eŋɛ la bem ge bala yuun basɛ ti a podɔleba la baŋɛ la bem?—Kaalɛ Yon 2:13-17.
Yezu n yuun yele ge eŋɛ sɛla la yuun basɛ ti a podɔleba la tiɛ la David n yuun gulesɛ sɛla la yeti: ‘Mam n nɔŋɛ ho yire wa se’em la n pirɛ mam.’ (Ym. 69:9) Bem zuo? Yezu n yuun eŋɛ sɛla la yuun basɛ ti a vom bɔna la dɛŋa poan. Se’ere n sɔi la, la yuun dela pu’usegɔ nɛŋadoma, malemadoma, gɔnguleseba, la nɛreba basɛba n yuun ta’asɛ ti ba dɔla nigum nigum sore poan bɔta ligeri pu’usegɔ yire la poan. Yezu n yuun boti a pirege pu’usegɔ nɛŋadoma la nyanɛ la n basɛ ti a eŋɛ bala. A podɔleba la yuun sirum baŋɛ ti a ‘nɔŋɛ Naayinɛ yire mɛ’ bii a mɔ’ɛ nini la yelemɛŋɛrɛ pu’usegɔ. Hon mɔ’ɛ nini vuurɛ? La boi de to’ore la wani la hon nari ti ho ita yɛla atɔtɔ?
g95 10/22 31 ¶4
Susa’aŋɔ Ta’an Basɛ Ti Ho Ki?
Nɛreba basɛba yeti susa’aŋɔ yuun ta’an basɛ ti Yezu Krista ki. Baabule la tɔɣɛ a yele yeti: ‘Tuurɛ ma’a n sa’am mam suure ti mam ka bɔta n mea.’ (Ym. 69:20) Yele wa vuurɛ? La yuun ta’an dɛna ti lan yuun gee fii ti Yezu ki la, a suure n yuun sa’am ti la wuna en. (Mt. 27:46; Lu. 22:44; Heb. 5:7) Leyɛ’ɛsa, to wan ta’an yeti Yezu suure yuun sa’am mɛ se’ere n sɔi la eŋa n yuun ki ti ba dekɛ kanɛ lu a luɣerɛ la, ‘ko’om la ziim’ n yuun yese na. Suure la san tara daaŋɔ, la ta’an basɛ ti ziim zo’e zo’e ta gã’a ho nyũ’ɔ bɔba. Bala ta’an basɛ ti ‘ziim, la ko’om’ yɛsera na.—Yon 19:34.
it-2 650
Yabega Tia
Ba yuun tɔɣɛ Mɛzaaya la yele yeti ba wan bo en la ‘yabega’ ti la dɛna a dia. (Ym. 69:21) Yele wa yuun tum mɛ se’em ma’a ti ba dekɛ ya’ahɔ gɛregɛ daam bo Yezu Krista ti a ta’an nyu ti too la sige. Ge eŋa n yuun lem bisɛ la a yuun zaɣesɛ de mɛ. Matu (27:34) n yuun tɔɣɛ yetɔɣebiŋere wa n tum tuuma se’em la, la dekɛ la Greek yelebire n de kho·leʹ (ya’ahɔ) tum tuuma. Yelebire kaŋa mea nɔɔ ti Yooma 69:21 dekɛ tum tuuma Greek Septuagint la poan. Ge Mark yelesoma gɔŋɔ la yeti, ba yuun dekɛ la muur gɛregɛ daam bo en (Mr. 15:23), wana wa basɛ ti to sakɛ ti ‘yabega tia’ la yuun dela ‘ya’ahɔ’ bii ‘muur.’ La ta’an dɛna ti ba yuun dekɛ la ya’ahɔ la muur gɛregɛ daam la.
Vo’osum Poan Yɛla
w99 1/15 18 ¶11
Kɔ’ɔn Zusera Naayinɛ
Nɛreba zo’e zo’e ni zusɛ Naayinɛ mɛ ba san ɛɛra sɛla. Ge ton nɔŋɛ Yehowa Naayinɛ la zuo, la nari ti to pɛɣera en ge bɔ’ɔra en fara to san zusa to ma’a bii nɛrekuuŋɔ poan. Tuuntuna Paul yuun yeti: ‘Da fabeli ya sɛsɛla yele ge sɛla woo poan doose ya zusega la beleŋo la pɛ̃ka poan ta’an basɛ ti Naayinɛ baŋɛ ya boti sɛla, ti Naayinɛ suma’asum la n gani asaala woo bɔkerɛ la wan gu ya sunya la ya puti’irɛ doose Krista Yezu poan.’ (Flp. 4:6, 7) La ka nari ti to zusega dɛna beleŋo ma’a ge la nari ti to pu’usa Yehowa la eŋa n kã bo to vo’osum la inganɛ poan la. (Mag. 10:22) Yoomadaana la yuun yeti: ‘Basɛ ya ti pɛka dɛna kaabegɔ ti ya kaabɛ bo Naayinɛ ge bo Gaŋɛ Za’a Naayinɛ la yan biŋe ya nɔya ti ya bo en sɛla.’ (Ym. 50:14) David n yuun zusɛ se’em la dela sɛla n kɛ̃ to suure. A yuun yeti: ‘Mam wan pɛɣɛ Naayinɛ yu’urɛ wa la yuunɛ. Mam wan na’asɛ en ge bo en fara.’ (Ym. 69:30) To me san zusera to ma’a bii nɛrekuuŋɔ poan la nari ti to eŋɛ la bala.
AUGUST 5-11
NAAYINƐ TUULUM YƐLA YOOMA 70-72
Tɔɣɛ Naayinɛ Paŋa La Yele Bo ‘Dɔɣepa’asɛ Sɛka N Taɣelɛ La’
w99 9/1 18 ¶17
Bunbilipaalesi—Kumesɛ Yamea Ta’an Tara Bɔkerɛ!
To san wan ta’an zaɣesɛ Sitaana bɛ̃tɔ la, la nari ti to kɔ’ɔn pigera ge tara sukpe’ene. Se’ere n sɔi la saŋa ase’a la ta’an ni ana to wuu to boi la to ma’a. La ta’an ni ana wuu to tadaandoma la tingɔŋɔ la za’a n pɛ̃regeri tɔ. David yuun zusɛ yeti: ‘Hon poan ti mam tara puti’irɛ n Daana, hon Naayinɛ ti mam nam n bunbilimen na. Naayinɛ, mam bunbilimen sa ti ho pa’alɛ mam tara tara la zina, mam kelum mɔɔla la ho nyalema tuuma la.’ (Ym. 71:5, 17) To mi ti David yuun tari la sukpe’ene. Ge sankani ti a yuun nyɛ sukpe’ene la? A bunbilemen! Ge ti a nyaa ku Goliat la, a yuun tari la sukpe’ene bisera a sɔ piisi la, hali ku gbeɣɛnɛ la saseŋa. (1 Sa. 17:34-37) Ge David yuun dekɛ pɛ̃ka la za’a bo la Yehowa la eŋa n yuun soŋɛ en ti a ta’an eŋɛ sɛla la. A yuun yeti, ‘mam tari puti’irɛ la hon poan n bunbilimen na.’ David n yuun dekɛ amea delum Yehowa la yuun soŋɛ en mɛ ti a nyaŋɛ yeledaaŋɔ woo n yuun paɛ en. Hon me san dekɛ homea delum Yehowa, a wan bo ho sukpe’ene la paŋa ti ho ta’an ‘zabɛ nyaŋɛ tingɔŋɔ wa.’—1 Yo. 5:4.
g04 10/8 23 ¶3
La Nari Ti To Ita Bunkureba La Wani?
Yoomadaana la yuun zusɛ yeti: ‘Da basɛ mam n buranya’anɛ poan bii ho basɛ mam n paŋa ba’asegɔ saŋa.’ (Ym. 71:9) Yehowa yamesi san puɣum ti’isa ti ba ka tari vuurɛ, Yehowa kan malum ‘basɛ ba.’ Yoomadaana la yuun ka ti’isɛ ti Yehowa basɛ en mɛ. Ge eŋa n yuun kuregɛ la, a yuun mi ti la yele pakɛ mɛ ti a dekɛ amea delum a Naaŋɔdaana la. To san tara yelemɛŋɛrɛ wuu yoomadaana la, Yehowa wan soŋɛ tɔ to vom dabesa za’a. (Ym. 18:25) Saŋa ase’a, a ni doose la mabiisi la poan soŋɛ tɔ.
w14 1/15 23 ¶4-5
Pu’usɛ Yehowa Ge Ti Biɣi Biɣi Dabesa La Nyaa Paɛ
Ho san pu’usɛ Yehowa yuuma zo’e zo’e n wana, soke homea yeti, ‘Mam n kelum tara paŋa fii wa la, n wan ta’an eŋɛ la bem n vom poan?’ Hon de Kristabia n tari mi’ilum zo’e zo’e la, ho tari la yɔ’ɔ ase’a ti nɛreba basɛba ka tara. Ho ta’an tɔɣɛ pa’alɛ bunbilipaalesi hon zamesɛ Yehowa yɛla se’em. Ho ta’an kpemese nɛreba giila ho san tɔɣɛ ho zi’irego poan yɛla bo ba. Naba David yuun zusɛ ti a ta’an nyɛ yɔ’ɔ eŋɛ bala. A yuun yeti: ‘O Naayinɛ, mam bunbilemen sa ti ho pa’alɛ mam. . . O Naayinɛ, da basɛ mam n kuregerɛ saŋa bii n buranya’anɛ saŋa. Basɛ ti n mɔɔlɛ ho paŋa yɛla wa bo dɔɣepa’asɛ sɛka n taɣelɛ la.’—Ym. 71:17, 18.
Ho wan eŋɛ la wani ta’an dekɛ ho mi’ilum la soŋɛ nɛreba? Ho wan nyaŋɛ beem bunbilipaalesi ti ba wa’an ho yire na ti ya sɔsɛ? Ho wan ta’an naɛ la ba ti ya keŋɛ na’am mɔɔlegɔ ge pa’alɛ ba Yehowa pu’usegɔ n tari pupeelum se’em? Diimi nɛra Elihu yuun yeti: ‘Bunkutɛ n mi tɔɣum ti kuregerɛ ta’an pa’ala yɛm.’ (Yob 32:7) Tuuntuna Paul yuun yeti Kristakɔma pɔɣesi dekɛ ba yetɔɣum la ba itigɔ kpemese nɛreba giila. A yuun gulesɛ yeti: ‘Basɛ ti pɔɣesɛba n de bunkureba la pa’ala sɛla n ani soŋa.’—Titus 2:3.
Vo’osum Poan Yɛla
it-1 768
Eufrates
Israel Tisi La Bɛɛna N Pɔsɛ Zɛ’an Ge Teke Zɛ’an. Naayinɛ yuun bo Abraham nɔɔrɛ ti a wan bo Abraham yaasi tisi n pɔsɛ ‘Egypt kolaa ta paɛ Eufrates tiŋa kolaa kãtɛ la.’ (Pin. 15:18) A yuun tɔɣɛ la yele aŋa mea nɔɔ bo Israeldoma la. (Yɛh. 23:31; Tɛɛ. 1:7, 8; 11:24; Yos. 1:4) Yia Yelebiŋ’a 5:9 pa’alɛ ti Reuben yizuo nɛreba basɛba yuun yalegɛ ba kɛ̃’a zɛ’an ‘ta kɛ̃ la pɔɣentia poan ta paɛ Eufrates kolaa la bɔba’ ge ti David yuun nyaa di na’am. Ho san ze’ele ‘Gilead dapɔya bɔba’ yɛ’ɛsa Eufrates, la paɛ wuu kilomita 800 (500 mi). Wana ta’an pa’alɛ ti Reubendoma la yuun yalegɛ ba kɛ̃’a zɛ’an la ze’ele la ‘Gilead dapɔya bɔba’ (1 Yel. 5:10) ta paɛ Syria pɔɣentia la nɔgene. Pɔɣentia wa yalegɛ ta paɛ la Eufrates kolaa la. (RS la JB yeti, “ze’ele pɔɣentia la n pɔsɛ zɛ’an ta paɛ Eufrates kolaa la nɔɔren.”) La ta’an dɛna ti Yehowa pu’ulumbiŋ’a la yuun tum tuuma la David la Solomon bisega poan se’em ma’a ti Israeldoma yuun zabɛ toe Aram tiŋa Zoba ge yalegɛ ba beene la ti la paɛ Eufrates kolaa la bɔba, ta kaɛ Syria saazuo bɔba. (2 Sa. 8:3; 1 Na. 4:21; 1 Yel. 18:3-8; 2 Yel. 9:26) Nɛreba n yuun mi Eufrates wa la zuo ba yuun yi’iri dɛ ti ‘Kolaa la.’—Yos. 24:2, 15; Ym. 72:8.
AUGUST 12-18
NAAYINƐ TUULUM YƐLA YOOMA 73-74
To Wan Eŋɛ La Bem To Nini San Pɔsɛ Tɛ̃ta Sɛba N Ka Pu’useri Naayinɛ?
w20.12 19 ¶14
‘Yehowa Faari Sɛba Giila N Kɔ’ɔsɛ La Mɛ’
Se’em n gulesɛ Yooma 73 la yuun ze’ele la Levi buuri la poan. Bala zuo, a yuun tari la yɔkãtɛ tuna Yehowa yire la poan. Ge saŋa ase’a, a giila yuun kɔ’ɔsɛ mɛ. Bem zuo? A nini yuun pɔsɛ tɛ̃ta la putɔpa, la zɛkɛ n meadoma, yɛla n yuun keni soŋa bɔ’ɔra ba la zuo ge daɣɛ ba be’em tuuma la zuo. (Ym. 73:2-9, 11-14) La yuun ani wuu ba nyɛti sɛla woo ti ba bɔta mɛ n de, taresum, vom somɔ ge me ka tara putɛyiila. Yɛla n yuun keni soŋa bɔ’ɔra ba la yuun basɛ ti yoomadaana la giila kɔ’ɔsɛ mɛ ti a yeti: ‘Mam suure wa dela tontɔɔ la yoo, mam nu’usi n ka tari dɛɣerɔ wa dela yoo.’ La niɛ peelumi ti, bala yuun ta’an basɛ ti eŋa la Yehowa bɔŋa la sa’am.
w20.12 19-20 ¶15-16
‘Yehowa Faari Sɛba Giila N Kɔ’ɔsɛ La Mɛ’
Kaalɛ Yooma 73:16-19, 22-25. Levi buraa wa yuun ‘kɛ̃ la Naayinɛ yire la poan.’ La yuun ta’an dɛna ti a tadaandoma yuun boi bim mɛ. Bilam ti a yuun ti’isɛ yele la soŋa ge zusɛ de poan. Bala yuun basɛ ti a baŋɛ ti yelese’a ti a ti’isa la dela yeleyooro. A yuun le baŋɛ ti eŋa la Yehowa bɔŋa la ta’an sa’am. A yuun le bɔkɛ ti putɔpa la boi la ‘zɛ’an n sɛregeri’ ge ti ‘ba wan sa’am ba.’ La yuun nari ti yoomadaana la bisɛ nyɛta yɛla wuu Yehowa n bisɛ nyɛta yɛla se’em la, lan wan eŋɛ se’em ti a nini kan tɛ̃ta nɛreba bii a giila kɔ’ɔsɛ. Eŋa n yuun eŋɛ bala la yuun basɛ ti a le tara la suma’asum la pupeelum. A yuun yeti: ‘Sɛla ka boi tinparɛ wa zuo ti mam bɔta gana Yehowa.’
Ton zamesɛ sɛla. La ka nari ti to basɛ ti to nini tɛ̃ta la be’emdoma. Ba pupeelum la ka yuuri. Ba ka tari beere sa’am puti’irɛ. (Pa. 8:12, 13) To nini san tɛ̃ta ba, to giila ta’an kɔ’ɔsɛ ti tomam la Yehowa bɔŋa la sa’am. Bala, la san ana wuu ho nini tɛ̃ti mɛ la be’emdoma, eŋɛ sɛla ti yoomadaana la yuun eŋɛ la. Kɛlesa Naayinɛ ka’aŋɔ ge naɛ la sɛba n iti Yehowa n boti sɛla la bɔna. Ho san tara pupeelum Yehowa poan, ho wan tara pupeelum wuusa. Ho me wan kɔ’ɔn bɔna ‘nyɔvore’ sore la zuo.—1 Tim. 6:19.
w14 4/15 4 ¶5
Tɔɣesa Moses Sakerɛ La
Ho wan eŋɛ la wani ta’an zaɣesɛ ‘konkoma’asum be’ero’? Da makɛ tamɛ ti konkoma’asum be’ero ka tari vuurɛ. Tara sakerɛ ti ‘tingɔŋɔ wa la sɛla woo n boi ka poan ti nɛreba nɔŋɛ la wan tole.’ (1 Yo. 2:15-17) Ti’isɛ taɣesɛ sɛla n wan paɛ be’emdoma. Ba boi la ‘zɛ’an n sɛregeri’ ge ti ‘ba wan sa’am ba!’ (Ym. 73:18, 19) La san ana ho wuu ho tum be’em, soke homea yeti, ‘Mam boti la ta ana mam la wani beere sa’am?’
w13 2/15 25-26 ¶3-5
Da Basɛ Ti Naayinɛ Som La Piɛ Ho Nu’usin
Yoomadaana la yuun tari puti’irɛ ti Yehowa wan gurɛ a zuɔ nu’o ge basɛ ti a nyɛ na’asegɔ. (Kaalɛ Yooma 73:23, 24.) Yehowa basɛ ti to nyɛta na’asegɔ la wani? Yehowa basɛ ti a yelemɛŋɛrɛ yamesi nyɛta na’asegɔ la sarɔtɔ zo’e zo’e poan. A ni kã bo to mɛ ti to bɔkɛ a puti’irɛ n de sɛla. (1 Ko. 2:7) A basɛ ti sɛba n keleseri a yetɔɣum ge nana en la tara la bɔnsoŋa la en.—Yam. 4:8.
Yehowa na’asɛ a yamesi mɛ bo ba tuulum tuunɛ n de na’am mɔɔlegɔ tuuma la. (2 Ko. 4:1, 7) Tuunɛ wa basɛ ti to nyɛta la na’asegɔ. Ba san bo ho tuunɛ tansugere la poan tum tuunɛ la ti la dekɛ pɛ̃ka bo Yehowa ge me ta’an soŋera nɛreba. Yehowa yeti: ‘Sɛba n na’aseri mam la ti n wan na’asɛ ba.’ (1 Sa. 2:30) Sɛba n iti bala la tari la yusonɛ la Yehowa ti nɛreba me pɛɣera ba.—Mag. 11:16; 22:1.
Ge mina n ‘guri Yehowa ge dɔla a sarɔtɔ la’ tari la bem beere sa’am puti’irɛ? Yehowa pu’ulum biŋe ti: ‘A wan zɛ̃kɛ hɔ ti ho to’e tiŋa la, ho nini wan nyɛ putɔpa ti a sa’am ba se’em.’ (Ym. 37:34) Se’em n guri Yehowa la tari puti’irɛ ti a wan na’asɛ en ge bo en daarewoo nyɔvore.—Ym. 37:29.
Vo’osum Poan Yɛla
it-2 240
Leviatan
Yooma 74 tɔɣɛ pa’alɛ la Naayinɛ n faari a nɛreba se’em. Kaalegɔ zɛ’an 13 la 14 tɔɣɛ pa’alɛ la eŋa n yuun faaɛ Israeldoma la, Egyptdoma nu’usin se’em. Yelesum la n de ‘ateko poan bunsɛla la [Heb., than·ni·nimʹ, bii tan·ninʹ]’ dela ‘Leviatan.’ Ban wɔ̃rɛ Leviatan zuto la ta’an dɛna ban yuun sa’am Faro la a soogɛpa la, se’em ma’a ti Israeldoma basɛ Egypt tiŋa la. Aram yetɔɣum poan, ba lerege ‘Faro nɛreba n tari paŋa’ la yeti ‘Leviatan zuto.’ (Dekɛ makɛ Eze. 29:3-5, bilam ti ba dekɛ Faro makɛ la ‘ateko poan bunsɛkãtɛ’ n boi Nile kolaa la poan; Eze 32:2 me yele la bala.) Isaiah 27:1 pa’alɛ ti Leviatan (LXX, ‘seerego la’) dela tingɔŋɔ wa sɔ’ɔlum ti se’em ti ba yi’ira ti ‘bunsɛla’ bii ‘seerego’ la sɔna bisera. (Lil. 12:9) Yetɔɣebiŋere la pa’alɛ ti yɛla wan tee ana soŋa bɔ’ɔra Israel. Bala la, Yehowa n wan sa’am Leviatan la pa’alɛ ti a wan sa’am Babilon. Ge kaalegɔ zɛ’an 12 la 13 tɔɣeri la Asiria la Egypt yele. Wana zuo, Leviatan vuurɛ dela tingɔŋɔ wa za’a tigere bii sɔ’ɔlum n giiseri Yehowa la a nɛreba.
AUGUST 19-25
NAAYINƐ TUULUM YƐLA YOOMA 75-77
Beni N Sɔi Ti La Ka Nara Ti To Ŋmɛ’ɛra Nyũ’ɔ?
w18.01 28 ¶4-5
Bisɛ Nɛreba N Boi To’ore To’ore Se’em
Paul yuun yeti nɛreba wan nɔŋɛ bamea la ligeri ma’a. A yuun le yeti nɛreba wan ŋmɛ’ɛra ba nyũ’ɔ, pa’ala bamea ge zɛkera bamea. Nɛresɛba n tari hala ana wa ni ti’isa ti bamam n tã ita sɛla, ba inganɛ n ani se’em, ba taresum bii ban tari kpe’eŋo la zuo ba gani nɛra woo mɛ. Ba ni bɔta ti nɛreba kɔ’ɔn bɔta ba yele. Gɔnmi’ila ayima tɔɣɛ nɛresɛka n kɔ’ɔn zɛ̃kera amea yele yeti: “A suure poan la ani wuu kaabegɔ bimbine n boi bim ti a kaabera amea.” Nɛreba basɛba yeti zɛ̃kɛ n mea dela halebe’ero ti hali sɛba n zɛ̃keri bamea la ka boti dɛ nɛreba poan.
Yehowa kiseri zɛ̃kɛ n mea mɛ. A yaɛ ‘pa’alɛ n meadaana’ mɛ. (Mag. 6:16, 17) Nɛra san zɛ̃kera amea, a kan ta’an dɛna Naayinɛ zɔ. (Ym. 10:4) Sitaana n tari hale kaŋa. (1 Tim. 3:6) Ge nimbaalega yele la dela, Naayinɛ yamesi basɛba yuun zɛ̃kɛ bamea mɛ. Yuda naba Uzia yuun tari la yelɛmɛŋɛrɛ yuuma zo’e zo’e poan. Ge Baabule la yeti, ‘Eŋa n yuun ta kpe’em bala la, pa’alɛ n mea pirɛ en mɛ ti a galum amea, ka le dɛna birikina Yehowa a Naayinɛ la nɛŋa ge kɛ̃ Naayinɛ yire la poan ti amea nyɔ̃ ko’ɛnka bimbine la zuo.’ Pooren, Naba Hezekia yuun zɛ̃kɛ la amea saŋa fii poan.—2 Yel. 26:16; 32:25, 26.
w06 7/15 11 ¶2
Yooma Gɔŋɔ La Bɔberɛ Butã la Bunaasi Yelepkina
75:4, 5, 10—‘Iila’ la ze’ele boi la bem? Duŋa iila dela a paŋa. Bala la, ‘iila’ ta’an ze’ele bo paŋa. Yehowa zɛ̃keri a nɛreba iila mɛ ge ‘ŋmata putɔpa iila basera.’ Ba kaɣɛ tɔ ti to da ‘zɛ̃kera to iila,’ ti la pa’alɛ ti to da zɛ̃kera tomea bii to pa’ala tomea. Yehowa n zɛ̃keri to la zuo, la nari ti to geele yɔ’ɔ woo ti to tara tuna tansugere la poan ti la ze’ele la eŋa zɛ’an.—Ym. 75:7.
Vo’osum Poan Yɛla
w06 7/15 11 ¶3
Yooma Gɔŋɔ La Bɔberɛ Butã la Bunaasi Yelepkina
76:10—‘Asaala san eŋɛ sunsɔa’ Naayinɛ ni nyɛ pɛ̃ka la wani? Naayinɛ san bo yɔ’ɔ ti nɛreba eŋɛ sunsɔa la tɔ ton de a yamesi la zuo, yelesonɛ ta’an ze’ele bim na. Wuŋerɛ woo n wan paɛ tɔ la, ta’an kumesɛ tɔ. Yehowa ni bo yɔ’ɔ mɛ ti namesegɔ paɛ tɔ ta paɛ beense’ere ti la wan kumesɛ tɔ. (1 Pe. 5:10) ‘Asaala sunsɔyiisum n gee la ni bo Naayinɛ la na’asegɔ.’ Ge to san namesɛ ta ki? Wana wa me ta’an dekɛ pɛ̃ka bo Yehowa se’ere n sɔi la sɛba n nyɛ ton ŋmibe se’em la wan pɔsɛ na’asa Naayinɛ.
AUGUST 26–SEPTEMBER 1
NAAYINƐ TUULUM YƐLA YOOMA 78
Israeldoma N Yuun Ka Tari Sakerɛ La Dela Kaka Bɔ’ɔra Tɔ
w96 12/1 29-30
Bem Zuo Ti La Nara Ti To ‘Tɛ̃ra Yelese’a N Eŋɛ Tole La’?
Nimbaalega yele la dela, Israeldoma la yuun kɔ’ɔn tuna la be’em la ban yuun tamɛ yelese’a ti Yehowa eŋɛ bo ba la. Bala yuun basɛ ti bem n eŋɛ? ‘Ba yuun gurɛ Naayinɛ bisɛ mɛ sugumnɔɔrɛ zo’e zo’e. Ba me yuun basɛ ti Israel Zilam Daana la suure sa’am mɛ. Ba ka tɛ̃ri Naayinɛ paŋa la bii daanse’ere daarɛ ti a faaɛ ba se’em n mugeseri ba la nu’usin la.’ (Ym. 78:41, 42) Ban yuun ka doli Yehowa nɔya la yuun basɛ ti a zaɣesɛ ba mɛ.—Mt. 21:42, 43.
Yoomadaana la eŋɛ la makesonɛ bo to la eŋa n yuun yeti: ‘Mam wan tɛ̃ra Naayinɛ tuuma la, mam wan tɛ̃ra hon Naayinɛ nyalema tuuma ti ho tum yuuma sa la. Mam wan ti’isa ho tuuma la za’a yele, mam wan ti’isa taɣesa hon iti yelese’a la.’ (Ym. 77:11, 12) To san ti’isa taɣesa Yehowa n puɣum eŋɛ sɛla n pa’alɛ ti a nɔŋɛ to mɛ la, la wan kpemese to giila ti to puurɛ pee la en. Leyɛ’ɛsa, to san kɔ’ɔn ‘tɛ̃ra yelese’a n eŋɛ tole la,’ la kan basɛ ti to giila kɔ’ɔsɛ ge la wan tuɣum kpemese to giila ti to tiregɛ la to paŋa za’a kɔ’ɔn ŋmibera.
w06 7/15 17 ¶16
‘Bisɛ Homea Soŋa La Ho Da Nyɔ̃na’
To san nyɔ̃na to ni kɔ’ɔn ti’isa la tomea la to yeledaaŋɔ la yele. To ni kɔ’ɔn tamɛ Yehowa n kã bo to se’em, la ton de a Sɛɛradoma la. La nari ti to kɔ’ɔn tɛ̃ra eŋa n kã bo to se’em la saŋa woo, lan wan eŋɛ se’em ti to da nyɔ̃na. Makerɛ, la dela yɔkãtɛ bɔ’ɔra tɔ la Yehowa yu’urɛ n bo to zuo la. (Isa. 43:10) To wan ta’an tara bɔnsoŋa la en ge tɔɣɛ bo se’em n keleseri zusega la saŋa woo. (Ym. 65:2; Yam. 4:8) To vom tari la vuurɛ se’ere n sɔi la to bɔkɛ ti Yehowa bisega n ani soŋa ge me tɛ̃ra ti la dela yɔ’ɔ bɔ’ɔra tɔ ti to tara birikinte bɔ’ɔra Naayinɛ. (Mag. 27:11) To tari yɔ’ɔ ti to tuna Na’am mɔɔlegɔ tuuma la saŋa woo. (Mt. 24:14) Ton tari sakerɛ Yezu Krista lua bunɔ la poan la basɛ ti to putɛkeeŋa ana la fa’a. (Yon 3:16) To san ŋmibera to wan nyɛ kã’a.
w11 7/1 10 ¶3-4
Nɛreba Itigɔ Ni Basɛ Ti La Ana Yehowa La Wani?
Yoomadaana la yuun yeti: ‘Ba yuun eŋɛ kpenkpasi la en mɛ goo la poan!’ (Kaalegɔ zɛ’an 40) Kaalegɔ zɛ’an n taɣelɛ la tɔ̃kɛ yeti: ‘Ba yuun gurɛ Naayinɛ bisɛ mɛ sugumnɔɔrɛ zo’e zo’e.’ (Kaalegɔ zɛ’an 41) Daalɛ basɛ ti yoomadaana la yuun pa’alɛ la ban yuun eŋɛ kpenkpasi se’em. Yehowa n yuun faaɛ ba Egyptdoma nu’usin basɛ la, la yuun ka yue ti ba eŋɛ kpenkpasi la en goo la poan. Ba yuun nyɔ̃ni Naayinɛ mɛ ge yɛta yeti Naayinɛ ka boti a bisɛ ba ge me kan ta’an bisɛ ba. (Kan. 14:1-4) Baabule viisegɔ gɔŋɔ ayima yeti yele la n de ‘ba yuun eŋɛ kpenkpasi la en mɛ’ la ta’an le dɛna ti ‘ba suure n yuun kãbɛ Naayinɛ nɛŋa’ bii ‘ba yuun yele Naayinɛ yeti ba kan sakɛ bo en.’ Ge la bala za’a, Yehowa ni zɔ a nɛreba nimbũ’ɔ mɛ ge di sugeri bo ba, ba san ni tee. Ge ba yuun ni le nyɔ̃na mɛ ge ita kpenkpasi bala mea nɔɔ.—Ym. 78:10-19, 38.
La yuun ani Yehowa la wani a nɛreba san ni eŋɛ kpenkpasi? Kaalegɔ zɛ’an 40 la yeti, ‘ba yuun ni basɛ ti a suure sa’am mɛ.’ Leregere ayima yeti ‘ba yuun ni basɛ ti a kɛla mɛ.’ Baabule viisegɔ gɔŋɔ ayima pa’alɛ ti: “La vuurɛ n de se’em dela Hebrudoma la itigɔ la yuun dela sɛla n wan basɛ ti la wuŋɛ hɔ wuu bia n ka nani ge ita kpenkpasi n wan basɛ ti la wuŋɛ hɔ se’em la.” Wuu bisɛka tuba n kpa n wan ta’an basɛ ti a dɔɣereba suure sa’am se’em la, Israeldoma n yuun iti kpenkpasi wa yuun basɛ ti ‘Israel Zilamdaana la suure sa’am mɛ.’—Kaalegɔ zɛ’an 41.
Vo’osum Poan Yɛla
w06 7/15 11 ¶4
Yooma Gɔŋɔ La Bɔberɛ Butã la Bunaasi Yelepkina
78:24, 25; tiŋanɔɔrɛ yelesum—Bem zuo ti ba yeti mana dela ‘saazuo dia’ la ‘malesi dia’? Yetɔɣum buna wa ka pa’alɛ ti mana yuun dela malesi dia. La yuun dela ‘saazuo dia’ se’ere n sɔi la Naayinɛ n yuun ni dekɛ bo ba. (Ym. 105:40) Malesi n kɛ̃’ɛri saazuo la zuo, yelesum la n de ‘malesi dia’ la vuurɛ ta’an dɛna ti Naayinɛ se’em n boi saazuo la n dekɛ bo ba. (Ym. 11:4) Yehowa yuun ta’an le doose malesi poan dekɛ mana la bo Israeldoma la.