La Boi Bim Ti Mam Yuun Zoti La Valum Ge Mam Yuun Dela Satiŋa Na’am Yetɔɣum Yalegerɛdaana

Ba yuun dɔɣɛ mam la yuun 1951, Vienna n boi Austria tiŋa. Mam dɔɣereba yuun dela Katolikdoma. Mam yuun zoti la valum ge mam yuun sakɛ ti Naayinɛ boi ge me zusera en saŋa woo. Mam n yuun de yuuma awɛi la ti Yehowa Sɛɛradoma yuun zamesa mam sɔ ti pooren ti mam ma me yuun laɣum zamesa.

To yuun boi la Döbling Tansugere n boi Vienna. Mam la n deodoma yuun laɣum ita la yɛla zo’e zo’e. To yuun ni laɣum kaala Baabule la mɛ, kena zamesegɔ ge me soŋera tuna laɣesegɔ tuuma. Mam sɔ yuun pa’alɛ mam la mam bunbilimen ti mam tara nɔŋerɛ bɔ’ɔra Yehowa. Mam sɔ yuun kɔ’ɔn zusera mɛ ti mam la mam yibega la ta dɛna sore ŋmɛ’adoma. Ge la daɣɛ mam n yuun boti n eŋɛ sɛla n bala.

MAM N PƆSƐ TƐM WOO NA’AM TUUMA LA SE’EM

Mam yuun dela yuun 14 ge muse ko’om yuun 1965. Ge la yuun kpe’em bo mam mɛ ti n tɔɣɛ bo nɛresɛba ti n ka mina. Mam yuun ni ti’isɛ ti mam tadaandoma nyani mam mɛ. Ge mam me yuun boti la ba nɔŋɛ mam yele. Mam n yuun muse ko’om la, la yuun ka yue ti mam yuun nyɔɣɛ kɔnsɛba n ka pu’useri Yehowa zɔtɔ. La boi bim ti mam yuun nɔŋɛ n dɔla ba mɛ ge mam putɛkeeŋa n yuun daani mam la mam n dekɛ saŋa zo’e zo’e naɛ la ba ɛɛra la. Ge mam yuun ka nyaŋɛ basɛ ba dɔlega. Bem n yuun soŋɛ mam?

Sankaŋa la ti pugela ayima n yuun de yuun 16 ti a yu’urɛ dɛna Dorothée yuun wa’an to tansugere la poan. Dorothée yuun tulegeri mɛ na’am mɔɔlegɔ tuuma la poan. Mam yuun gani Dorothée mɛ ge mam yuun ka tulegeri na’am mɔɔlegɔ tuuma la poan. Mam yuun yele n mea ti: ‘Mam dɔɣereba dela Sɛɛradoma ge Dorothée dɔɣereba ka mi yelemɛŋɛrɛ la. A yuun biseri la a ma n de bã’ara ge saŋa woo a kɔ’ɔn bɔna la na’am mɔɔlegɔ poan!’ A makesonɛ la soŋɛ mam mɛ ti mam bɔta ti n tum zo’e zo’e bo Yehowa. La ka yue ti mam la Dorothée yuun laɣum tuna sore ŋmɛ’a soŋerɛ tuuma la ge nyaa ta dɛna daarewoo sore ŋmɛ’adoma. Mam me yuun nyaa tari la pupeelum na’am mɔɔlegɔ tuuma la poan wuu Dorothée la. Eŋa n yuun soŋɛ mam ti mam pɔsɛ zamesɛ la nɛra na’am mɔɔlegɔ poan. La ka yue ti la yuun dɛna naana bɔ’ɔra mam ti n tɔɣɛ bo nɛreba yire la yire, la zɛ’an woo.

Mam yuun tum sore ŋmɛ’a tuuma la paɛ la yuunɛ ti mabia ayima n ze’ele Austria ti a yu’urɛ dɛna Heinz wa’an to tansugere la poan na. A yuun zamesɛ yelemɛŋɛrɛ la Canada tiŋa poan se’em ma’a ti a yuun keŋɛ ti a ta kaɛ a suɔ n de Sɛɛradaana la. Heinz yuun dela sore ŋmɛ’adaana n boi a to’ore ti ba tari en wa’an to tansugere la na. Mam suure n yuun kɛ̃ en. A yuun boti la a dɛna satiŋa na’am yetɔɣum yalegerɛdaana ge daɣɛ mam n yuun boti sɛla n bala. Bala la, mam yuun ka basɛ ti a baŋɛ ti mam suure kɛ̃ en. Ge pooren, mam la Heinz yuun pɔsɛ lɛɣera la taaba ge ti mam nyaa ta ele en ti to laɣum tuna sore ŋmɛ’a tuuma la Austria tiŋa.

MAM YUUN BOTI LA N TUM SATIŊA NA’AM YETƆƔUM YALEGERƐ TUUMA LA

Heinz yuun ni yele mam ti eŋa boti la a tum satiŋa na’am yetɔɣum yalegerɛ tuuma la. A ni ka pɛregɛ mam ge a ni soke mam yeti, “Ton ka tari kɔma wa, to wan ta’an tum zo’e zo’e bo Yehowa?” Mam n yuun zoti valum la zuo, dabeem n yuun tari mam ti n tum satiŋa na’am yetɔɣum yalegerɛ tuuma la. Hali la bala, mam yuun nyaŋɛ tum sore ŋmɛ’a tuuma la ge la yuun kpe’em bo mam mɛ ti n tum satiŋa na’am yetɔɣum yalegerɛ tuuma la. Heinz n yuun kelum soŋera mam ti mam ti’isa satiŋa na’am yetɔɣum yalegerɛ tuuma la yele. A yuun ni kpemese mam giila ti n ti’isa nɛreba yele gana mam wan ti’isa n mea yele. A ka’aŋɔ wa yuun soŋɛ mam mɛ paa.

Fii fii mam yuun nyaa boti n tum la satiŋa na’am yetɔɣum yalegerɛ tuuma la. Bala la, to yuun gulesɛ la gɔŋɔ tisɛ ti to boti la to keŋɛ Gilead Sukuu. Ge mabisɛka n yuun biseri tigere yile la, yuun yele mam ti n basɛ ti n nɔɔrɛ kpeŋe la Solemiine yetɔɣum la. Mam yuun eŋɛ la bala. La yuun eŋɛ to la pakerɛ la yuuma atã pooren ti ba tari to keŋɛ Yugoslavia tansugere n boi Salzburg, Austria tiŋa la. To yuun dekɛ la yuuma ayoobe tum na’am mɔɔlegɔ tuuma la ge me dekɛ yuunɛ tum kaarɛ tuuma la bim. Serbo-Croatia yetɔɣum la yuun kpe’em mɛ ge to yuun tari la Baabule zamesegɔdoma zo’e zo’e.

Yuun 1979 poan, mabisɛba n yuun biseri Tigere yile la yuun yele to ti to keŋɛ Bulgaria ta bɔna bim saŋa fii. Ban yuun gu to na’am tuuma la tiŋa la poan la zuo ti ba yele to ti to eŋɛ wuu to ye tiŋa la poan ti to ta vo’ose mɛ. Ba yuun yeti to dekɛ gɔnpiɣesi suɣɛ keŋɛ ta bo mabipɔɣesi banuu n boi Bulgaria tinkãtɛ la n de Sofia la ge to san paɛ bim, to da mɔɔla. Dabeem n yuun tari mam ge Yehowa yuun soŋɛ mam mɛ. Mam yuun baŋɛ ti mabipɔɣesi la yuun tari la sukpe’ene ge ti ba puurɛ me pee, la boi bim ti pulesi san nyɛ ba, ba wan nyɔkɛ ba ta paɣɛ. Ba makesonɛ la yuun basɛ ti mam me tara la sukpe’ene ti n me tum tuunɛ woo ti Yehowa tigere la wan dekɛ bo mam.

Pooren ti to yuun le gulesɛ ti to keŋɛ Gilead Sukuu, ti ba bo to yɔ’ɔ. To yuun ti’isɛ ti ba yeti ba eŋɛ sukuu la Solemiine yetɔɣum poan United States tiŋa. Ge November 1981 ti tigere la yuun yeti ba pɔsɛ sukuu wa Germany tiŋa. Ban yuun eŋɛ sukuu la Germany yetɔɣum poan la yuun soŋɛ mam mɛ ti mam ta’an bɔkɛ. Ba nyaa wan tari to keŋɛ la bɛ?

MƆƆLA ZABERƐ TIŊA

Ba yuun tari to keŋɛ la Kenya! Ge Kenya tigere yile la yuun soke to yeti, to wan bɔta ti to ta mɔɔla Uganda tiŋa? La gaŋɛ yuun pia ti soogɛa kpɛ’ɛma ayima yu’urɛ n de General Idi Amin yuun sa’ɛ Uganda tiŋa zuodaana ge tee soe bisera tiŋa la. A bisega la poan, nɛreba tusa n yuun ki ge ti zo’e zo’e me yuun namesa. Yuun 1979 la poan ti ba me yuun sa’ɛ Idi Amin ti a zɔ yese tiŋa la poan. Daanse’ere ho bɔkɛ sɛla n sɔi ti dabeem yuun tara mam ti n keŋɛ tiŋa la poan. Ge Gilead sukuu la yuun kumesɛ to mɛ soŋa ti to dekɛ tomea delum Yehowa. Bala la, to yuun sakɛ mɛ keŋɛ.

Uganda kɛ̃’a yuun kpe’em mɛ. Gɔmɛt la yuun ka ta’an bɔ’ɔra a nɛreba ko’om, bugum la yelese’a n pakɛ ba. Ho me yuun kan ta’an dekɛ fon yi nɛra. Ba yuun tari la bugundɔɔrɔ ŋmɛ̃’ɛra nɛreba ge faara ba, yele yele wuu yu’uŋɔ. Yinɛ san lui nɛra woo ni bɔna la a yire ge zusa ti nɛra da wa’an ba yire na fã bii ku ba. La boi bim ti la yuun kpe’em bo to mabiisi la mɛ Uganda tiŋa ge ba yuun kelum tara la sakerɛ pu’usa Yehowa la pupeelum!

Yuun 1982 poan ti mam la Heinz yuun keŋɛ Kampala n de Uganda tinkãtɛ la poan. Ŋmaresi sinuu poan, to yuun kɛ̃’ɛri la Sam la Christina Waiswa yire, la ba kɔma banuu, la ba suurɔ banaasi. Mabia Waiswa la a yidoma yuun ni di la buyina ma’a daanyinɛ. Sɛla fii ti ba yuun tara la, ba yuun ni dekɛ mɛ ti to laɣum di. Mam la Heinz n yuun kɛ̃’ɛri la Waiswa yidoma la, to yuun zamesɛ la yɛla zo’e zo’e ba zɛ’an n soŋɛ tɔ to satiŋa na’am yetɔɣum yalegerɛ tuuma la poan. Makerɛ, to yuun ni dekɛ la ko’om fii sɔ ge tɔɣelɛ ko’om bumɔ mea nɔɔ dekɛ flashɛ to bangira. Yuun 1983 poan, to yuun nyɛ la yire n boi Kampala tiŋa ti zaberɛ ka bɔna bilam bɔba ti to yuun keŋɛ ta kɛ̃’ɛra.

To yuun nɔŋɛ la to mɔɔla Kampala tiŋa. Mam tɛ̃ri ti ŋmarega ayina poan to yuun bo la magazines 4,000! Ge sɛla n gaŋɛ za’a dela nɛreba la n yuun to’e yelemɛŋɛrɛ la se’em la. Ba yuun zoti la Naayinɛ ge nɔŋɛ Baabule yɛla. Mam la Heinz yuun ni tara la nɛreba 10 ta paɛ 15 zamesa ba. To me yuun zamesɛ la yɛla zo’e zo’e to Baabule zamesegɔdoma la zɛ’an. Makerɛ, ba yuun keni la nama kena zamesegɔ bakwai woo la pupeelum.

Yuun 1985 la 1986 poan, zabekãra ayi n yuun sige Uganda tiŋa. To yuun ni nyɛ la kɔma n zãli bugundɔɔ kãra. Ba yuun dekɛ kɔma wa ti ba dɛna la soogɛpa ge me basɛ ti ba gu’ura sore. Sankaŋa la, to yuun zuseri ɛɛra la Yehowa soŋɛ tɔ ti to tara yɛm ge me ta’an gu tomea dɛŋa poan mɔɔla yelesoma la ti dabeem da tara tɔ. Yehowa yuun kelese to zusega la. To san ni seke nɛra ti a kelese Na’am yelesoma la, to dabeem la ni mɛlum mɛ.

To me yuun le mɔɔla bɔ’ɔra la saama. Makerɛ, to yuun ta seke la Murat la Dilbar Ibatullin n de nɛra la pɔɣa n ze’ele Tatarstan (Central Russia). Murat yuun dela asibitin tuntuna. Nɛra la a pɔɣa wa yuun muse la ko’om ge pu’usa Yehowa. Pooren, mam yuun ta seke la pɔka ayima n ze’ele Ukraine ti a yu’urɛ dɛna Tatjana Vileyska. A yuun boti la a ku amea. Ge Tatjana n yuun ta muse ko’om la, a yuun keŋɛ la Ukraine ta soŋera ti ba lɛregera to gɔnɔ la Ukraine yetɔɣum poan.a

YELEDAAŊƆ ASE’A

Yuun 1991 poan ti mam la Heinz yuun bɔna Austria ti tigere yile la yuun yele to ti to keŋɛ Bulgaria. Yuuma zo’e zo’e ti ba dekɛ nu’o paɣelɛ to na’am tuuma la zuo Europe tisi ase’a poan. Ge yɛla yuun tee mɛ ti Yehowa Sɛɛradoma nyaa tara yɔ’ɔ mɔɔla tin-aŋa poan. Bulgaria yuun laɣum pa’asɛ bim mɛ. Wuu mam puɣum yele ni se’em la, mam la Heinz yuun dekɛ la to gɔnɔ la suɣɛ kɛ̃ tiŋa la poan se’em ma’a ti ba yuun dekɛ nu’o paɣelɛ to tuuma la zuo la. Ge nananawa, to nyaa keŋɛ bim ti to ta mɔɔlɛ mɛ.

Ba yuun yeti to keŋɛ Bulgaria ge to da lebe Uganda. Bala la, to yuun ka lebe Uganda ta vaɛ to lɔɣɔrɔ bii keese mabiisi la ge to yuun keŋɛ la Germany tigere yile la ta to’e loore keŋɛ Bulgaria. Ba yuun yeti to bisera gurup n boi Sofia ti mabiisi 20 bɔna bim la.

Yeledaaŋɔ zo’e zo’e n yuun paɛ tɔ Bulgaria. Yia la, to yuun ka wuni ba yetɔɣum la. Leyɛ’ɛsa, gɔnseto ma’a ti to yuun tara Bulgaria yetɔɣum poan dela The Truth That Leads to Eternal Life la My Book of Bible Stories. La yuun kpe’em bo to mɛ ti to ni dekɛ gɔnɔ wa pɔsɛ Baabule zamesegɔ. Hali la to yeledaaŋɔ la za’a, to yuun ni kɔ’ɔn tulegera la na’am mɔɔlegɔ la poan ge me nyɛta nɛŋa tɔlega. Ge Bulgaria Orthodox pu’usegɔdoma la yuun ka boti to mɔɔla ge me basɛ ti yaarɛ paara tɔ.

Yuun 1994 poan ti gɔmɛt la yuun ka le dekɛ Yehowa Sɛɛradoma pa’asɛ pu’usegɔdoma poan ti Bulgariadoma la me ti’isa ti to pu’usegɔ la dela dɛŋa. Ba yuun nyɔɣɛ la to mabiisi la basɛba. Lasebaarɛ bɔ’ɔreba la TV stationdoma yuun parum la yɛla bo Yehowa Sɛɛradoma. Ba yuun yeti Yehowa Sɛɛradoma kuuri la ba kɔma se’ere n sɔi la, ba ka to’oseri ziim bɔ’ɔra ba ge me pã’asa ba pu’usegɔ nɛreba ti ba kuura bamesi. La yuun kpe’em bo mam la Heinz mɛ ti to mɔɔla. To san ni bɔna na’am mɔɔlegɔ poan, nɛreba ni nyabera to mɛ, yi’ira pulesi ge tara kuga lɔbera tɔ. La yuun kpe’em mɛ ti to tari gɔnɔ kɛ̃ tiŋa la poan ge haɛ zɛ’an ita zamesegɔ. Hali to yuun boi la laɣesegɔ ayima poan ti pulesi yuun wa’ana sa’am de basɛ. Mam la Heinz yuun ka tabelɛ nyɛ yele ana. Uganda nɛreba la n yuun boti nɛreba yele se’em la, yuun boi la ba to’ore la nɛrebana wa! Bem n yuun soŋɛ tɔ ti to ta’an ŋmɛ̃resɛ tomea ti to giila ka kɔ’ɔsɛ?

Ton yuun ni naɛ la to mabiisi la bɔna la n yuun ni basɛ ti to tara pupeelum. Ba yuun nɔŋɛ yelemɛŋɛrɛ la mɛ ge ti ba puurɛ me yuun pee la ton soŋɛ ba se’em la. Ba yuun ani la du’a du’a la taaba ge me yuun soŋera taaba. To yuun baŋɛ ti to wan ta’an tara pupeelum tuunɛ woo poan to san nɔŋɛ nɛreba.

Yuuma fii pooren, la yuun nyaa dela naana bɔ’ɔra tɔ ti to mɔɔla. Yuun 1998 poan, gɔmɛt la yuun le bo la yɔ’ɔ ti Yehowa Sɛɛradoma bɔna tiŋa la poan pu’usa. Bala yuun basɛ ti to lerege la to gɔnɔ la zo’e zo’e Bulgaria yetɔɣum poan. Ge ti yuun 2004 poan ti to yuun mɛ tigere yile nyaa kã dɛ bo Yehowa. Nananawa, tansuga 57 n boi Bulgaria ti na’am mɔɔlegɔdoma dɛna 2,953. Yuun 2024, nɛreba 6,475 n yuun wa’an Tiirɛ Dia la na. Mabipɔɣesi banuu ma’a n yuun boi Sofia ge nananawa, tansuga bawɛi n boi bim! Mam la Heinz ta’an yeti to sirum nyɛ bunpika la n nyaa wi’ɛ kɛ̃ tuhure se’em Bulgaria tiŋa.—Isa. 60:22.

TON YUUN ŊMIBE YELESE’A POAN

Bã’asi zo’e zo’e n yuun nyɔkɛ mam. Yuun se’a n tole la, dɔgetadoma yuun baŋɛ ti mam tari la kaɣerɛ. Hali ba yuun le nyɛ la kaɣerɛ ayima mam zuo poan. Ba yuun tiregɛ mɛ tibɛ mam ti kaɣerɛ la sɔna bɛ’ɛna ge ti mam le keŋɛ India ti dɔgeta yuun ta dekɛ awa 12 eŋɛ mam ɔperesa sirege kaɣerɛ la. Lan yuun ta sɔna bɛ’ɛna India tigere yile la, to yuun lebe la Bulgaria ta tɔ̃kɛ to tuuma la.

Bãsɛka me n yuun nyɔkɛ Heinz dela buuri poan bã’a ti ba yi’ira ti Huntington. Bã’a la n yuun nyɔkɛ en la, a yuun ka ta’an kena, ka ta’an tɔɣera ge me kan ta’an ita sɛsɛla. Bã’a la n yuun ta gaŋera nu’usi la, mam n yuun kɔ’ɔn soŋera en. Saŋa kasɛka, mam ni ba’ɛ taregɛ mɛ ti mam fabela ti n kan le ta’an bisera en. Ge mabia ayima n de bunbilipaalega ti a yu’urɛ dɛna Bobi n yuun ni dekɛ Heinz ti ba keŋɛ ta mɔɔlɛ. Valum yuun ka tari Bobi la Heinz n yuun ni tɔɣera ge ita amea se’em la. Mam san ni keŋɛ zɛ’an, Bobi n yuun ni soŋɛ Heinz. La boi bim ti mam la Heinz ka dɔɣɛ kɔma ge Yehowa bo to la Bobi ti a dɛna to bia!—Mr. 10:​29, 30.

Ɔberega bã’a n yuun le nyɔkɛ Heinz. Nimbaalega la dela, a yuun ki la yuun 2015. La yuun ani mam la bura la Heinz n ka boi la ge ti la me ita mam wuu a ka ki la. Ge mam n kelum ti’isera a yele se’em la ani wuu a kelum vɔna mɛ! (Lu. 20:38) Dabeserɛ woo poan, mam ni tĩɛ la eŋa n ni ka’am mam se’em la. Mam puurɛ pee mɛ la ton ta’an naɛ taaba pu’usɛ Yehowa yuuma zo’e zo’e poan la.

MAM PUURƐ PEE MƐ LA YEHOWA N SOŊƐ TO SE’EM LA

Yehowa kɔ’ɔn soŋɛ mam mɛ ti mam nyaŋɛ ŋmibe n yeledaaŋɔ la woo. A le soŋɛ mam ti n ta’an basɛ n valum la ge me dɛna satiŋa na’am yetɔɣum yalegerɛdaana n nɔŋɛ nɛreba. (2 Tim. 1:7) Mam pu’usɛ Yehowa la eŋa n soŋɛ mam la mam yibega ti to za’a laɣum bɔna tɛm woo na’am tuuma la poan la. Eŋa la a sira nyaa kaari la tansuga se’a n tɔɣeri Serbia yetɔɣum n boi Europe. Ton yuun de kɔma ti mam sɔ zusɛ ɛɛra sɛla la, Yehowa lebese a zusega la!

Baabule zamesegɔ bo’ori mam la suma’asum. Mam san ni bɔna yeletooro poan ti mam ni “sohɛ” zo’e wuu Yezu n yuun eŋɛ se’em la. (Lu. 22:44) Sore deyima poan ti Yehowa doose lebese mam zusega dela nɔŋerɛ la itisoŋɔ la ti mabiisi la n boi mam tansugere la n boi Sofia ita bɔ’ɔra mam la. Ba yuun ni beem mam mɛ ti n wa’ana naɛ la ba ti to sɔsɛ ge me ni basɛ ti mam baŋɛ ti ba nɔŋɛ mam mɛ. Wana wa za’a ni basɛ ti mam puurɛ n pee.

Mam ni ti’isa taɣesa la kum isigere la yele. Mam puti’irɛ poan, mam biseri nyɛta la mam deodoma la za’a tinpaalega la poan. Mam nyɛti mam dɔɣereba ti ba ze la to yire la nɛŋan ge me dɛna bunbilipaalesi wuu ban yuun ani se’em ba pɔɣedire saŋa la. Mam nyɛ mam yibega n boi bim duɣera dia ti Heinz me ze’a lɛm a yeho. Mam san ni ti’isa yele ana, la ni basɛ ti mam tara la pupeelum ge me soŋera mam ti n ta’an ŋmibera. Bala ni basɛ ti mam pɛ̃ɣɛ la Yehowa.

Mam san ti’isa yelesoma se’a ti Yehowa eŋɛ bo mam, la eŋa n wan ta eŋɛ yelesoma se’a bo mam la, la ni ana mam wuu lan yuun ani David se’em ti a gulesɛ Yooma 27:​13, 14 yeti: “Mam tare sakerɛ te mam wan nyɛ Na’ayenɛ etesoŋɔ teŋa wa zuo. Gura Na’ayenɛ. Kpemehe ho mɛŋa, ge delom Na’ayenɛ.”