Weta Ko
Hẹn Azán Jehovah Tọn Do Ayiha mẹ Gligli
1. Etẹwẹ yin numọtolanmẹ towe, to whenuena hiẹ plọn to tintan whenu dọ pọngbọ sọn awubla titonu hoho ehe tọn mẹ ko sẹpọ?
DOPO to onú tintan he hiẹ plọn sọn Biblu mẹ lẹ wẹ yindọ lẹndai Jehovah tọn wẹ nado diọ aigba blebu zun paladisi de. To aihọn yọyọ enẹ mẹ, awhàn, sẹ́nhẹngba, ohẹ́n, azọ̀njijẹ, yajiji, po okú po ma na tin ba. Oṣiọ lẹ na tlẹ yin hinhẹngọwa ogbẹ̀. Nukundido jiawu nankọtọn die! Hẹndi opagbe ehe lẹpo tọn ko tin to yakẹ, na kunnudenu dohia dọ tintin tofi mayinukundomọ Klisti tọn taidi Ahọlu he to gandu ko bẹjẹeji to 1914 podọ sọn whenẹnu gbọ́n mí ko tin to azán godo tọn aihọn ylankan ehe tọn mẹ. To vivọnu azán godo tọn ehelẹ tọn, Jehovah na và titonu ylankan ehe sudo bo na hẹn aihọn yọyọ heyin opagbe etọn do lọ wá!
2. Etẹwẹ “azán Jehovah tọn” yin?
2 Biblu ylọ ojlẹ vasudo tọn he ja lọ dọ “azán Jehovah tọn.” (2 Pita 3:10, NW) E yin ‘azán homẹgble Jehovah tọn’ sọta aihọn Satani tọn blebu. (Zẹfania 2:3) E na wá opodo mlẹnmlẹn to “awhàn azán daho Jiwheyẹwhe Ganhunupotọ tọn lọ gbè . . . , [he yè nọ ylọ dọ] Amagẹdọni to ogbè Heblu tọn mẹ,” to ehe mẹ “ahọlu aigba po aihọn lẹpo po tọn” na yin vivasudo te. (Osọhia 16:14, 16) Be aliho he mẹ a to gbẹzan towe zan te dohia dọ hiẹ tindo nujikudo dọ “azán Jehovah tọn” ko sẹpọ ya?—Zẹfania 1:14-18; Jẹlemia 25:33.
3. (a) Whetẹnu wẹ azán Jehovah tọn na wá? (b) Etẹwutu e do yin alenu dọ Jehovah ma dọ ‘azán lọ kavi ganmẹ lọ’?
3 Biblu ma dọ azán he gbè Jesu Klisti na wá taidi Whẹdida-hẹnṣẹtọ Jehovah tọn sọta titonu Satani tọn ehe taun gba. Jesu dọmọ: “Ṣigba na azán nẹ tọn, kavi ojlẹ nẹ, mẹde ma yọnẹn, lala, yèdọ e ma yin angẹli he tin to olọn mẹ lẹ, kavi Ovi adavo Otọ́.” (Malku 13:32) Eyin mẹde ma yiwanna Jehovah sọn ahun mẹ wá, e sọgan jẹ azán etọn sisẹ́ do nukọn to ayihamẹ ji bo na to afọdona yanwle agbasa tọn lẹ. Ṣigba mẹhe yiwanna Jehovah nugbonugbo lẹ na sẹ̀n ẹn po ahun lẹpo po, mahopọnna whenuena titonu ylankan ehe na wá opodo.—Psalm 37:4; 1 Johanu 5:3.
4. Avase tẹwẹ Jesu na?
4 To hogbe avase tọn de mẹ hlan mẹhe yiwanna Jehovah lẹ, Jesu dọmọ: “Mì payi, na mì ni sọ nọ họ́ mìde, na mì ni sọ nọ hodẹ̀: na mì ma yọ́n whenuena ojlẹ lọ yin.” (Malku 13:33-37) E dotuhomẹna mí ma nado dike dùdù po nùnù po kavi ‘magbọjẹ gbẹ̀mẹ tọn lẹ’ ni yí whenu mítọn zẹjlẹgo bọ mí nado hẹn nujọnu-yinyin ojlẹ lẹ tọn bu.—Luku 21:34-36; Matiu 24:37-42.
5. Dile Pita basi zẹẹmẹ etọn do, etẹwẹ azán Jehovah tọn na hẹnwa?
5 Mọdopolọ Pita na ayinamẹ mí nado hẹn “wiwá azán [Jehovah] tọn tọn, ehe mẹ olọn lẹ na yímiyọ́n, bosọ yọ́, nugonu etọn lẹ nasọ gbọn yozò sinsinyẹn mẹ yọ́” do ayiha mẹ. Gandudu gbẹtọvi tọn lẹpo—he to “olọn lẹ” yin—na yin vivasudo, dile e na yin do na titonu ylankan ehe blebu—yèdọ “aigba”—po “nugonu etọn lẹ” po, enẹ wẹ, linlẹn po nuwiwa aihọn ylankan ehe tọn lẹ po, yèdọ walọ mẹdekannujijẹ sọn Jiwheyẹwhe dè tọn etọn podọ aliho gbẹzan mawé po yanwle agbasanu bibẹpli tọn etọn po. Ehelẹ na yin tẹndiọna gbọn “olọn yọyọ lẹ [Ahọluduta Jiwheyẹwhe tọn to olọn mẹ] po aigba yọyọ de po [ogbẹ́ yọyọ gbẹtọvi lẹ tọn to aigba ji]” to ehe mẹ ‘dodowiwa na gbayipe te’ dali. (2 Pita 3:10-13) Nujijọ budonamẹ aihọn tọn ehelẹ na bẹjẹeji to ajijimẹ podọ to azán po ganmẹ he mẹde ma yọnẹn po mẹ.—Matiu 24:44.
Mì Payi Ohia lẹ Go
6. (a) Obá tẹ mẹ wẹ gblọndo Jesu tọn hlan kanbiọ devi etọn lẹ tọn gando opodo titonu Juvi lẹ tọn go jẹ? (b) Adà gblọndo Jesu tọn tẹwẹ dọ̀n ayidonugo wá nujijọ po walọyizan lẹ po ji bẹsọn 1914?
6 To pọndohlan mẹ na ojlẹ he mẹ mí to gbẹ̀nọ te, mí dona jẹakọhẹ zẹẹmẹ gigọ́ he gando ohia azán godo tọn lẹ tọn go—yèdọ ‘vivọnu titonu ehe tọn.’ Flindọ to whenuena Jesu na gblọndo kanbiọ devi etọn lẹ tọn, heyin kinkàndai to Matiu 24:3 mẹ, delẹ to nuhe ji e dọhodo to wefọ 4 jẹ 22 mẹ lẹ tindo hẹndi kleun de poun do titonu Juvi lẹ tọn ji to gblagbla owhe 33 po 70 W.M. po mẹ. Ṣigba dọdai lọ ko tindo hẹndi nujọnu tọn etọn sọn 1914 gbọ́n, yèdọ ojlẹ ‘tintin tofi Klisti tọn po vivọnu titonu lọ tọn po.’ Matiu 24:23-28 dọ nuhe na jọ sọn 70 W.M. kakajẹ tintin tofi Klisti tọn whenu. Nujijọ he yè basi zẹẹmẹ etọn to Matiu 24:29–25:46 mẹ lẹ to jijọ to ojlẹ opodo tọn lọ mẹ.
7. (a) Naegbọn mílọsu dona nọ doayi lehe ninọmẹ egbehe tọn lẹ to ohia lọ hẹndi do go? (b) Na gblọndo kanbiọ he tin to vivọnu hukan ehe tọn lẹ, he do lehe ohia lọ lẹ ko to yinyin hinhẹndi sọn 1914 gbọ́n hia.
7 Mílọsu dona nọ doayi nujijọ po walọyizan lẹ po he to ohia lẹ hẹndi go. Nujijọ ehelẹ yiyijlẹdo dọdai Biblu tọn lẹ go na gọalọna mí nado hẹn azán Jehovah tọn do ayiha mẹ. E nasọ hẹn mí penugo nado nọ diọlinlẹnna mẹdevo lẹ to whenuena mí to avase na yé gando sisẹpọ azán enẹ tọn go. (Isaia 61:1, 2) Po yanwle ehelẹ po to ayiha mẹ, mì gbọ mí ni gbadopọnna kanbiọ he bọdego helẹ he zinnudo apadewhe ohia lọ lẹ tọn ji, dile eyin kinkàndai to Matiu 24:7 po Luku 21:10, 11 po mẹ do.
Aliho he paṣamẹ tẹmẹ wẹ dọdai ‘akọta na fọ́n do akọta ji ahọludu do ahọludu ji tọn’ yin hinhẹndi bẹsọn owhe 1914 te? Gando awhàn go, etẹwẹ ko jọ sọn whenẹnu gbọ́n?
Azọ̀nylankan tẹwẹ hùmẹ to 1918 hugan Wẹkẹ-Whàn I lọ? Mahopọnna nuyọnẹn amasin-zọ́nwiwa gbẹtọvi tọn, azọ̀n tẹlẹ wẹ gbẹsọ to gbẹtọ livi susu lẹ hù?
Obá tẹmẹ wẹ núdùdù whèdomẹ ko gbayipe to aihọn mẹ jẹ mahopọnna nukọnyiyi lẹnunnuyọnẹn tọn to owhe kanweko he wayi mẹ?
Etẹwẹ hẹn we tindo nujikudo dọ 2 Timoti 3:1-5, 13 ma to zẹẹmẹ basi do lehe gbẹzan ko te sọn dowhenu ji gba, ṣigba do lehe ninọmẹ ylankan lẹ to sinsinyẹn deji dile mí to dindọnsẹpọ opodo azán godo tọn lẹ tọn ji?
Gbẹtọ lẹ Kinklandovo
8. (a) Nudevo heyin zẹẹmẹ basina to Matiu 13:24-30, 36-43 mẹ tẹlẹ wẹ Jesu kọndopọ hẹ vivọnu titonu lọ tọn? (b) Etẹwẹ nuyijlẹdonugo Jesu tọn zẹẹmẹdo?
8 Nujijọ titengbe devo lẹ tin he Jesu kọndopọ hẹ vivọnu titonu lọ tọn. Dopo to ehelẹ mẹ wẹ kinklan ‘ovi ahọluduta lọ tọn lẹ’ sọn ‘ovi mẹylankan lọ tọn lẹ’ go. Jesu dọhodo ehe ji to oló etọn mẹ gando ogle likun tọn he kẹntọ de dó ogbé ylankan lẹ do e mẹ go. “Likun” to nuyijlẹdonugo etọn mẹ nọtena Klistiani yiamisisadode nugbo lẹ. “Ogbé ylankan” wẹ mẹhe yigbe dọ emi yin Klistiani lẹ ṣigba bo do yedelẹ hia nado yin ‘ovi mẹylankan lọ tọn lẹ’ na yé tindo kanṣiṣa hẹ aihọn he Lẹgba yin ogán na lọ wutu. Omẹ ehelẹ yin kinklandovo sọn ‘ovi heyin ahọluduta Jiwheyẹwhe tọn lẹ tọn’ go bo yin hiadogona na vasudo. (Matiu 13:24-30, 36-43) Be ehe ko jọ na taun tọn wẹ ya?
9. (a) To Wẹkẹ-whàn I godo, mẹkinklan-dovo titengbe tẹwẹ wá aimẹ to mẹhe dọ emi yin Klistiani lẹpo ṣẹnṣẹn? (b) Nawẹ Klistiani yiamisisadode lẹ do yede hia taidi devizọnwatọ nugbo Ahọluduta lọ tọn lẹ gbọn?
9 To Wẹkẹ-whàn I godo, kinklando ogbẹ́ awe ji mẹhe dọ emi yin Klistiani lẹ tọn de wá aimẹ: (1) Nukọntọ sinsẹ̀n Mẹylọhodotọklisti tọn lẹ po hodotọ yetọn lẹ po, he do godonọnamẹ mlẹnmlẹn yetọn hia na Alẹnu Akọta lẹ tọn (he yin Plidopọ Akọta lẹ tọn todin) dile yé gbẹsọ tẹdo owanyina akọta yetọn go gligli, podọ (2) Klistiani nugbo he nọgbẹ̀ to ojlẹ he bọdo awhàn enẹ go mẹ lẹ, he nọgodona Ahọluduta Mẹssia Jiwheyẹwhe tọn tọn, e mayin na akọta aihọn ehe tọn lẹ gba. (Johanu 17:16) Omẹ ehelẹ do yede hia nado yin devizọnwatọ nugbonọ na Ahọluduta Jiwheyẹwhe tọn gbọn mahẹ tintindo to yẹwhehodidọ ‘wẹndagbe ahọluduta lọ tọn’ mẹ lẹdo aihọn pé dali. (Matiu 24:14) Etẹwẹ yin kọdetọn etọn?
10. Etẹwẹ yin kọdetọn tintan na azọ́n yẹwhehodidọ Ahọluduta lọ tọn?
10 Tintan, pipotọ mẹyiamisisadode gbọn gbigbọ Jiwheyẹwhe tọn dali, mẹhe tindo todido nado nọhẹ Klisti taidi apadewhe Ahọluduta olọn mẹ tọn lẹ yin bibẹpli. Dile etlẹ yindọ akọta susu mẹ wẹ yé wá sọn, gbọn titobasinanu dali yé yin kinkọndopọ. Tadidona bibẹpli mẹyiamisisadode ehelẹ tọn ko sẹpọ.—Osọhia 7:3, 4.
11. (a) Azọ́n gbẹtọ lẹ bibẹpli tọn tẹwẹ to yìyì to alọnu, podọ to kọndopọmẹ hẹ dọdai tẹ? (b) Etẹwẹ hẹndi dọdai ehe tọn nọtena?
11 Enẹgodo, to anademẹ Klisti tọn glọ, “gbẹtọ susugege . . . sọn akọta lẹpo mẹ, sọn ohẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ” bibẹpli ko bẹjẹeji. Ehelẹ wẹ yin “lẹngbọ devo” he na lùn “nukunbibia daho” lọ tọ́n biọ aihọn yọyọ Jiwheyẹwhe tọn mẹ. (Osọhia 7:9, 14; Johanu 10:16) Azọ́n yẹwheho Ahọluduta Jiwheyẹwhe tọn didọ whẹpo opodo nado wá lọ tọn zindonukọn kakajẹ egbehe. Po nugbonọ-yinyin po, gbẹtọ susugege lẹngbọ devo lẹ tọn, he sọha yetọn ko yì livi susu, gọalọna pipotọ mẹyiamisisadode lọ tọn nado lá owẹ̀n titengbe Ahọluduta lọ tọn. Owẹ̀n ehe to yinyin lilá to akọta lẹpo mẹ.
Etẹwẹ Na Jọ to Sọgodo?
12. Nawẹ azọ́n yẹwhehodidọ tọn na gbẹsọ zindonukọn sọ whẹpo azán Jehovah tọn nido wá?
12 Kunnudenu heyin nùdego wayi lẹpo dohia dọ mí ko sẹpọ opodo azán godo tọn lẹ tọn podọ azán Jehovah tọn ko to yakẹ. Ṣigba be dọdai delẹ gbẹ́ pò bo na wá mọ hẹndi whẹpo azán dobu enẹ na bẹjẹeji ya? Mọwẹ. Onú dopo wẹ yindọ, gbẹtọ lẹ kinklandovo na whẹho Ahọluduta tọn ma ko wá vivọnu gba. To lẹdo delẹ mẹ fie nukundiọsọmẹ sinsinyẹn wá aimẹ te na owhe susu, jideji to tintin na devi yọyọ lẹ todin. To fie gbẹtọ lẹ tlẹ gbẹ́ wẹndagbe lọ te, lẹblanu Jehovah tọn yin didohia gbọn kunnudide mítọn dali. Enẹwutu, zindonukọn to azọ́n lọ wiwà mẹ! Jesu na jide mí dọ eyin azọ́n lọ wá tadona kọ̀n, opodo na wá.
13. Dile eyin kinkàndai to 1 Tẹsalonikanu lẹ 5:2, 3 mẹ do, nujijọ ayidego tọn tẹwẹ na jọ to nukọnmẹ, podọ etẹwẹ e na zẹẹmẹdo na mí?
13 Dọdai Biblu tọn vonọtaun devo dọmọ: “Na whenuena yé to didọmọ, Jijọho po gingán po; whenẹnu wẹ dindọn ajiji [na] wá ota yetọn, kẹdẹdi ajlù to yọnnu he mọhò ji; yé ma sọ to na gán.” (1 Tẹsalonikanu lẹ 5:2, 3) Lehe nulila “jijọho po gingán po” tọn lọ na wá aimẹ gbọn ma ko yin yinyọnẹn gba. Ṣigba e họnwun dọ e ma na zẹẹmẹdo dọ nukọntọ aihọn tọn lẹ ko didẹ nuhahun gbẹtọvi tọn lẹ na taun tọn gba. Mẹhe to azán Jehovah tọn hẹn do ayiha mẹ gligli lẹ ma na yin kiklọ gbọn nulila enẹ dali gba. Yé yọnẹn dọ to afọdopolọji to enẹgodo, vasudo ajiji na wá.
14. Nujijọ tẹlẹ wẹ na wá aimẹ to nukunbibia daho lọ whenu, podọ to aliho debọdo-dego tọn tẹmẹ?
14 To bẹjẹeji nukunbibia daho lọ tọn, togán lẹ na diọnukunsọ Babilọni Daho lọ, ahọluigba aihọn tọn heyin sinsẹ̀n lalo tọn, bo na và ẹ sudo. (Matiu 24:21; Osọhia 17:15, 16) To enẹgodo, akọta lẹ nasọ diọnukunsọ mẹhe ze nupojipetọ-yinyin Jehovah tọn daga lẹ, enẹ na do adán nukun na Jehovah sọta togán lẹ po godonọnamẹtọ yetọn lẹ po, he na dekọtọn do vasudo mlẹnmlẹn mẹ na yé. Enẹ na yin Amagẹdọni he na hẹn nukunbibia daho lọ wá opodo. Enẹgodo, Satani po aovi etọn lẹ po na yin zizedo odò mapote mẹ, bo ma na penugo nado yinuwado gbẹtọvi lẹ ji ba. Ehe na hẹn azán Jehovah tọn wá opodo to whenuena oyín etọn na yin zizedaga.—Ezekiẹli 38:18, 22, 23; Osọhia 19:11–20:3.
15. Naegbọn e ma sọgbe hẹ lẹnpọn dagbe nado lẹndọ azán Jehovah tọn ma ko sẹpọ?
15 Opodo titonu ehe tọn na wá to ojlẹ sisọ etọn mẹ, sọgbehẹ ojlẹ dide Jiwheyẹwhe tọn. E ma na dọngbàn gba. (Habbakuk 2:3) Flindọ, vasudo Jelusalẹm tọn to owhe 70 W.M. wá to ajiji mẹ, to whenuena Ju lẹ madonukun etọn, to whenuena yé lẹndọ owù ko juwayi. Podọ etẹwẹ dogbọn Babilọni hohowhenu tọn dali? E yin huhlọnnọ, bo deji, bosọ yin hinhẹn lodo gbọn adó gángán etọn lẹ dali. Ṣigba e jai to zánto dopo mẹ. Mọdopolọ, vasudo na wá titonu ylankan dintọn ehe ji to ajijimẹ. To whenuena e na wá, mì gbọ e ni mọ mí to pọninọ mẹ to sinsẹ̀n-bibasi nugbo kọ̀n, na mí ni hẹn azán Jehovah tọn do ayiha mẹ gligli.
Hodọdopọ Dogbapọn Tọn
• Naegbọn e yin onú titengbe nado hẹn azán Jehovah tọn do ayiha mẹ gligli? Nawẹ mí sọgan wà enẹ gbọn?
• Nawẹ gbẹtọ lẹ kinklandovo he to yìyì to alọnu lọ gando mí go gbọn?
• Etẹlẹ wẹ na gbẹsọ jọ whẹpo azán Jehovah tọn na bẹjẹeji? Enẹwutu, etẹwẹ dopodopo mítọn lẹ dona to wiwà?
Yẹdide to weda 180]
To madẹnmẹ azán godo tọn lẹ na wá opodo bọ titonu Satani tọn na yin vivasudo