Jesu Hẹnazọ̀ngbọ to Gbọjẹzangbe

Falesi lẹ gbẹwanna Jesu bo to whẹjijọ dín nado wle e. Yé dọ dọ e ma dona nọ gbọazọ̀nna mẹlẹ to Gbọjẹzangbe. To Gbọjẹzangbe dopo, Jesu mọ dawe nukuntọ́nnọ de he to nubiọ to aliji. E dọna devi etọn lẹ dọmọ: ‘Mì pọ́n lehe huhlọn Jiwheyẹwhe tọn na gọalọna dawe ehe do.’ Jesu sọ yí otán etọn do yàn okọ́ bo tlẹ́ okọ́ yinyan lọ do nukun dawe lọ tọn lẹ ji. Jesu dọna ẹn dọmọ: ‘Yì klọ́ nukunmẹ to osindò Siloami tọn mẹ.’ Dawe lọ wàmọ bo jẹ numọ ji whla tintan to gbẹzan etọn mẹ.

Ehe paṣa gbẹtọ lẹ bọ yé jẹ didọ ji dọmọ: ‘E ma yin dawe he nọ sinai bo nọ to nubiọ dai lọ die ya, kavi mẹlọ di i poun wẹ?’ Dawe lọ gblọn dọmọ: ‘Yẹn mẹhe yin jiji taidi nukuntọ́nnọ lọ wẹ!’ Gbẹtọ lẹ sọ kanse e dọ: ‘Nawẹ a wagbọn do jẹ numọ ji?’ Whenue e dọ nuhe jọ lọ na yé, yé plan ẹn yì Falesi lẹ dè.

Dawe lọ dọna Falesi lẹ dọmọ: ‘Jesu wẹ tlẹ́ okọ́ yinyan do nukun ji na mi bo dọna mi nado yì klọ́ ẹ sẹ̀. N’wàmọ bosọ jẹ numọ ji.’ Falesi lẹ dọmọ: ‘Eyin Jesu hẹnazọ̀ngbọ to Gbọjẹzangbe, be huhlọn etọn ma wá sọn Jiwheyẹwhe dè.’ Amọ́, mẹdevo lẹ dọmọ: ‘Eyin huhlọn etọn ma wá sọn Jiwheyẹwhe dè, e ma na ko penugo nado hẹnazọ̀ngbọ.’

Falesi lẹ ylọ mẹjitọ dawe lọ tọn lẹ bo kanse yé dọmọ: ‘Nawẹ visunnu mìtọn wagbọn do to numọ todin?’ Mẹjitọ lọ lẹ dibu, na Falesi lẹ ko dọ dọ mẹdepope he do yise hia to Jesu mẹ na yin yinyan jẹgbonu sọn sinagọgu mẹ. Enẹwutu, yé dọmọ: ‘Mí ma yọnẹn. Mì kanse uwọ lọsu.’ Falesi lẹ to kanbiọ devo lẹ kanse dawe lọ kaka bọ e wá dọna yé dọmọ: ‘Nuhe n’yọnẹn lẹpo wẹ n’ko dọna mì. Naegbọn mì gbẹ́ to hokanse mi?’ Adi do Falesi lẹ bọ yé yàn ẹn jẹgbonu.

Jesu wá mọ dawe lọ bo kanse e dọmọ: ‘Be hiẹ tindo yise to Mẹsia lọ mẹ ya?’ Dawe lọ gblọn dọmọ: ‘N’na wàmọ eyin n’yọ́n mẹhe ewọ yin.’ Jesu dọmọ: ‘Yẹn wẹ Mẹsia lọ.’ Be nuhe Jesu wà ehe ma do homẹdagbe hia ya? Gbọnvona dọ e gbọazọ̀nna dawe lọ, e sọ gọalọna ẹn nado tindo yise.