Tenu-Núdùdù Godo Tọn Jesu Tọn

Ju lẹ nọ basi hùnwhẹ Juwayi tọn to whemẹwhemẹ to azán 14tọ osun Nisan tọn gbè. Ehe nọ hẹn yé flin lehe Jehovah tún yé dote sọn kanlinmọgbenu Egipti tọn bo plan yé wá Aigba Pagbe tọn lọ ji do. To owhe 33 W.M., Jesu po apọsteli etọn lẹ po basi hùnwhẹ Juwayi tọn to abò aga tọn de mẹ to Jelusalẹm. To whenue yé dùnú fó, Jesu dọmọ: ‘Dopo to mì mẹ na de mi hia.’ E paṣa apọsteli lẹ bọ yé kanse e dọ: ‘Mẹnu wẹ na wàmọ?’ Jesu gblọnna yé dọmọ: ‘Mẹhe n’na ze akla ehe na wẹ.’ Enẹgodo, e ze akla lọ bo yí na Juda Iskaliọti. To afọdopolọji, Juda fọ́n bo tọ́n sọn ohọ̀ lọ mẹ.

To whenẹnu, Jesu hodẹ̀ bo wẹ́n akla lọ do flinflin bosọ yí i na apọsteli he pò lẹ. E sọ dọmọ: ‘Mì dù akla ehe. E nọtena agbasa ṣie he n’na zejo do ota mìtọn mẹ.’ Enẹgodo, e hodẹ̀ do ovẹn he to finẹ ji bo yí i na apọsteli etọn lẹ. E sọ dọmọ: ‘Mì nù ovẹn ehe. E nọtena ohùn ṣie he n’na zejo na jona ylando lẹ tọn. N’dopà na mì dọ mìwlẹ na duahọlu hẹ mi to olọn mẹ. Mì nọ wà ehe to whemẹwhemẹ nado flin mi.’ Hodotọ Jesu tọn lẹ gbẹ́ nọ pli to whèjai enẹ to whemẹwhemẹ. To egbehe, opli enẹ nọ yin yiylọdọ Tenu-Núdùdù Oklunọ tọn.

To núdùdù lọ godo, apọsteli lẹ jẹ nudọn ji gando mẹhe klohugan to yé mẹ go. Amọ́, Jesu dọna yé dọmọ: ‘Mẹhe klohugan to mì mẹ wẹ mẹhe nọ pọ́n ede taidi mẹhe whè hugan, yèdọ mẹhe yìdo hugan.

‘Họntọn ṣie wẹ mì yin. Nuhe Otọ́ ṣie jlo dọ ma dọna mì lẹpo wẹ n’ko dọna mì. N’na lẹkọyi Otọ́ ṣie dè to olọn mẹ to madẹnmẹ. Mìwlẹ na pò tofi bọ gbẹtọ lẹ na yọnẹn dọ devi ṣie lẹ wẹ mì yin, na owanyi he mì na nọ dohia ode awetọ wutu. Mì dona nọ yiwanna mìde kẹdẹdile yẹn yiwanna mì do.’

To godo mẹ, Jesu hodẹ̀ bo biọ to Jehovah si nado nọ basi hihọ́na devi etọn lẹpo. E biọ dọ Jehovah ni gọalọna yé nado nọ wazọ́n dopọ to jijọho mẹ. E sọ hodẹ̀ dọ oyín Jehovah tọn ni yin kinklandowiwe. Enẹgodo, Jesu po apọsteli etọn lẹ po jihàn pipà tọn lẹ hlan Jehovah bo tọ́nyi. Ojlẹ he mẹ Jesu na yin wiwle te ko sẹpọ.